KHRISTIAN A THIH TIKAH

KHRISTIAN A THIH TIKAH

                                                                                                    Timothy Sui Lian Mang

 “A mithiangpawl thih cu Bawipai mit ah cun a sunglawi zet a si” (Sam.116:15) . 

A tlunih Bible thu hi leitlun thuthang ca menmen ah lang hnik sehla cu thuthang ca siartu hrangah cun thil phundang zet a si ding. Asinan Bible sungah a lang ta riai mai. Thu danglam zet vekih a lang hman ah Bible sungih um mi thu a si ruangah a hman, a dik a si tin kan pawm. Leitlun dan cun mi pakhatkhat thih hi cu riahsaitnak a si. Unau sungkhat, rualpi a nungdam hrangah cun lunglen, riahsiatnak, tah le mithli tlaknak a si. Van lam thlirdan ve thung cun phundang zet a si! Pathian in hitin a ti, “A mithiangpawl thih cu Bawipai mit ah cun a sunglawi zet a si” (Sam. 116:15). Hih Bible cang ih a sim lo mipawl hminsin hnik aw: 

(1) Mi kip an thih hi Pathian mit ah a sunglawi a ti lo.

 A hman lo mi a si. Mi hrekkhat thih tla hi cu rapthlak le riahsiat um tuk an si. Zumlotu piangthar lo thih tla hi cu ruahsannak nei loin an thi, Pathian loin, Jesu loin an thi. Khrih um lonak catuan kumkhua ah an feh. A sunlawinak a um hrimhrim lo. Thungaite cun riahsiatnak rapthlak maksak a si. Kan Bible cang ah khan “A mithiang” ti a si. Zumtu piangthar (Pathian mit ih thiang) thih lawngah a sunglawi a si. 

(2) A mithiang hrekkhat thih cu Bawipai mit ah a sunglawi a si a ti lo. 

Khristian miropi a thih tikah hiti tla hin kan ti theu, “Bawipa in ropi zetin a hmuak ding,” tiin. Asinan mipiangthar zumtu hmuahhmuah hi Bawipa in sunglawi zetin in hmuak thluh ding. Bawipai tang sungah kan um thluh ding. Rawngbawlnak ropi kan neih mi in rundam kan si lo. Rundamnak hrangah ti le tuah mi zianghman kan nei lo. Pathian zangfahnak liolio ih rundam kan si. Curuangah rundam a si mi pohpoh cu kan thih hi Bawipai hrangah a sunglawi thluh ding. Ziangahtile, ‘A mithiang thih cu Bawipai hmuh ah a sunglawi a si,’ ti a si kha. Kei cu piangthar zumtu ka si ko nan, nun felfai nei lo ka si na ti maw! Kanmah lam a si lo. Pathian cun a catuan zangfah ngilneihnak in kan thih tikah a tang sungah in pawm ding a si. A mithiang ah in ruat zo. Ziang tlukin a sunglawi.

(3) A mithiangpawlih tuarnak cu Bawipai mit ah a sunglawi a ti lo. 

Pathian ruang le Pathian hrangih kan tuar hi Bawipai hrangah a sunglawi ve ko ti cu hngilh lo sehla. Tuarnak hi Pathian tumtahnak nei in kan nun hniksaknak ah a hmang theu. A cemnetnak ah kan hlawknak ding le amah sunlawinak ding hrangah a si theu. “Meisa ih hniksak zo mi sui hman a siatral ding. Asinan nan zumnak cu cui sui hnakin a man a khung sawn. Curuangah Khrih a runglang tikah nan zumnak hniksaknak cun thangthatnak, upatnak le sunlawihnak a thlen ding.”(1Pet. 1:7). Mi hrekkhat in an nat tikah damnak hi thupibik in an ruat. Asinan a thupibik sawn cu Pathian duhnak hmun ih kan um (damnak maw, rei deuh ih tuar maw) le amah sunlawinak, cawimawinak kan hlan theinak hmun hi a si. 

(4) A mithiangpawl duhdawtnak cu Bawipai mit ah a sunglawi a si a ti lo. 

Thungaite cun duhdawtnak kan neih mi hi Bawipai hrangah a sunglawi ko. Kan hnenah ra in, in duhdawt maw tiin in sut sehla, Bawipa ka lo duhdawtzia cu na thei ko ti i kan sawn thei hi cun a di a riam in a lungawi tuk ding (John. 21:16). Asinan, kan Bible cang hril mi ih in simdan a si hrih cuang lo.

(5) A mithiangpawlih nehnak, hlawhtlinnak pawl hi Bawipai mit ah a sunglawi a ti lo.

 A siahhlawhpawlih hlawntlinnak van ih kan pa a lungawituk ko ti cu a fiang. Asinan kan Bible cang hril mi kha cun “thih” a ti a si.

 (6) A mithiangpawlih thlacamnak cu Bawipai mit ah a sunglawi a ti lo.

 Mithiangpawlih thangthatnak le thlacamnak cu Bawipai hrangah a sunglawi ko. Thuphuan cabu sung tla ah cun “rimhmui” a ti hial. Asinan kan Bible cang hril mi ih sim mi a si hrih lo. Khristian zumtu a thih tikah Bawipai hrangah a sunglawi a si a ti. Ziangah si pei? A san pali in kan tarlang hnik pei.

 1. Khristian zumtu thih cu Bawipai hrangah a sunglawi, ziangahtile a fate inn ah a tlung a si.  

Bazar na feh ih thil ziang si maw na lei, thil man khung tuk a si lo hmanah, inn ih tlunpi na duh. Ziangahtile na ta a si thlang ruangah a si. Bawipa Jesu in a mithiang hmuahhmuah hi a thisen in a lei a si. A mithiang hmuahhmuah hi a mithmuh ah an sunglawi. An van inn ih an tlun cu Bawipai hrangah a sunglawi tuk.

Midang hrangih thla a camsaknak ah Jesu in hitin a ti, “ Ka Pa, ka hnenih i pek mipawl in i pek mi ropitnak an hmuh theinak dingah ka umnak hmun ih an um ve ding ka duh. Ziangahtile, leilung sem hlan ihsin nang cun i duhdaw zo.” (Joh. 17:24).

Zumtu a thih tikah cun hih Jesui duhnak hi a famkim. A thisen in a lei mi a mailai cu amah thawn umtlang dingah amai hnenah a hruai a si. Pathian fale hrangah cun, thihnak hi sangka kiltu men a si. Paih inn sangka awngtu men a si. Jesu in hitin a ti, “Ka Pai inn ah cennak hmun tampi a um. Rak um lo si sehla ka lo sim zo ding. Nan hrangah hmun timtuah dingah ka feh ding. 3 Cule nan hrangah hmun timtuah ih ka feh asile ka rasal ding. Ka umnak ah nannih khal um ve dingin ka hnenah ka lo hruai ding.” (John 14:2-3). Khristian a thih leveten a taksa ihsin a suak ih, inn ah Bawipa thawn an um’ (II Ko. 5:8). Zumtu hrangah cun thih thu rel khal hi thlawsuah siin a lang lo nan, Bawipai hrangah cun a sunglawi a si. 

2. Khristian thih cu Bawipai mit ah a sunglawi. Ziangahtitle zumtu khristian thihnak cu tur a um ve lo, thih tihnak khal a um ve lo.

 Bawipa Jesu in, amai thihnak rori in thihnak a neh. Paul in hitin a au,

“…..Cule a tawih thei mi hi taksaruangpum hin a tawih thei lo mi a hruh ih a thi thei mi hi taksa hin a thi thei lo mi a hruh tikah, Cathianghlim in, “Thihnak cu nehnakin a dawlh theh,”   a ti mi cu a thleng kim ding. “Maw Thihnak, na    hmanrua cu khuiah a um? Maw Mithikhua, khuiah saw na nehnak cu?” Thihnak ih hmanrua cu sual a si. Sual ih huham cu Dan hi a si. Asinan kan Bawipa Jesu Khrih zarih nehnak in petu Pathian hnenah lungawithu um hram seh.” (I Ko. 15:54-57). Paul cun thih khal hi a hiar kuahko men. Filipi Khristianpawl hnenah hitin ca a kuat, “Ziangahtile, kei cu thil pahnih lakah awlawksawng in ka um, fehsuak ih Khrih thawi um duhnak ka nei; cumi cu a thasawn mi a si.” (Fil. 1:23). Thih a tha deuh maw? Khristian na si ah cun tha deuh sawn e.    

D.L Moody a ,hnukcah hlan fangte ah, a ihkhun kiang ah a duhdawttupawl cu an ra ih, hitiih a tawngsuak cu an thei. “Van sangka ka hmaiah a awngaw….hihi thihnak cu a si ah cun, a nuam tuk! Khawthim a um lo. Pathian in i ko. Ka nehnak a si, ka lallukhum khum ni a si.” “Lungto in an den rero laiah Stefen cu Bawipa a ko ih , “Lungto in an den rero laiah Stefen cu Bawipai hnenah a au ih, “Bawipa Jesu, ka thlarau cohlang aw,” tiah a ti. Cule a khuk a bil ih ring zetin a au. “Bawipa, hi sual hi a mawh phurter hai hlah aw,” tiah a ti. Cutiih a ti theh in a itthat.” (Apo. 7:59-60)

 Itthat tahratih, Jesu tang sungih hung thangharh cu ziang tlukin a sunglawi ding. Thih tihnak ihsin na luat ding hi ka lo duhsak tuk. Cutin hiti in na ausuak thei ve ding, “Thihnak hawrkuam sung zawh hman ningla zianghman ka tih lo ding. Ziangahtile Bawipa nang cu ka hnenah na um a si.”(Sam 23:4) 

3. Khristian thih cu Bawipai mit ah a sunglawi, ziangahtile a famkim lo mi leitlun nun cemnetnak a si ih, cem ti um lo ramih van nun sunglawi tawthawh ni a si.” 

Paul in hitiin a ti, “Kei ka hrangah cun nun hi Khrih a si” ( Fil.1:21). Asinan hi tawkah a thu a cemter lo. Hitiin a ti, Thih cu hlawknak a si.” A si, hlawknak.

D.L Moody in a rualpa hnenah hitiin a ti dah. “Ni khat ni ah cun thuthang ca cahnah parah Moody a thi a si ti an ngan mi na hmu leh ding. Cuktikah zum hrimhrim hlah aw. Fiangsin in le nun ngai in ka nung sawn ding,” tiin. A ti mi cu a dik a si. Atu kan nun hi cu a famkim lo tuk. Sual tla hin in hnaihnawk thei. Taksa harhdam lonak, sung lamih sual thawi buanawknak le leng lamih doral tla thawi buanawk ringring a tul. Kan umnak leilungpi hi buainak ram, tuarnak ram a si. Hniksaknak le tuarnak a phunphun kan tawng. Khat lam ral ve thung ah cun lungawinak, aipuannak, Bawipai tang sungah cun sual, mitthlitlaknak, thenawknak, tuarharnak pawl tla an um nawn lo. Lungawi kimnak hmun a si.

C.H. Spurgeon in vate bu sungih vate ti mawi zetzet hmutu nauhakpatei thu hitin a sim dah: “ Zarh khat a rei hnuah vate ti zohsal dingin a va feh ih a lungkuai in a tap ih a nui hnenah a kirsal ih, hitin a nu a sim, “Vate bu sungih vate ti mawi zetzet kha an kuai theh ih, a hawng lawng an tang,” ti in. A nu cun hitiin a ti, “Khaih vate ti mawi zetzet kha an siatral men lo. Khaih vate ti sungah khan vate fate duhnung zetzet an um. Anmahtein vate ti kha an khuai ih an suak, atu ah cun an zam ih thing parah aipuang zetin hla an sak rero! Spurgeon cun hitin a ti, ‘Cuvek cu kan si. In fehliam santupawl kan zoh ih, kan thin sungin hitin kan ti, “Riahsiat beidawnnak lawng e – umngaihnak ka thei lo e, a na tuk e,” ti in. Asinan rinnak cun dimtein hitiin a ti, ‘Cutin a si lo, a tuamtu a kuai zo, na duhdawt mi cu a Bawipai tangnem sungah a zuanglut zo,’ ti in. Atu ah, na duhdawt mi cu paradise Bawipai lennak ram ah lungawi le hlimnak cem lonak ram ah lengin thangthatnak zaihla a awi rero so khaw. Thih hi hloh a si lo. Hlawknak a si. Cem nei lo hlawknak a si.

Richard Baxter cun a hnuk a cat zik thlang ih, a rualpa in hitin a sut, “Ka duhdawt mi ka rual Mr. Baxter ziang na bang? Na dam tha ko maw?” ti in; Baxter cun, “Ziangkim a tha thluh zikte thlang,” tiin a sawn. A ti mi cu a dik a si.

“Hi tawkah mithianghlimpawlih tuarfainak cu a um. Hi tawkah Pathian thupekpawl a kilkhawitu le Jesu zumnak a kilkhawitupawl an um.” (Thu. 14:12). 

4. Khristian thih cu Bawipai mit ah a sunglawi a si, ziangahtile a thinlung ah diremnak diktak a thlen. 

Kan Bawipai thinlung ah ziang diremnak a um? Van thar le lei thar ra um ding mi cu maw! Jesu in leitlun pumpi a uk ding cu maw! Setan thawngthlak ding maw?Cupawl an si lo. A thisen ih lei mi misual thawng tampi, a zangfahnak ruangih rundam si mipawl a hnenih an cen ding cun a thinlung di a riamter.  “A mithiang thih cu Bawipai hmuh ah a sunglawi a si” tiin Bible ih a ti hi    mangbang ding a um lo. Tuisun ah maw, thaisun ah maw thihnak in lo pan pang sehla kumkhua catuan thawknak khawvang zing lam na hrangah a si pei maw?

Maw! kumkhua catuan thimkhawzing sungih luh thawknak lam sawn a si ding maw, na hrangah? Piangthar zumtu hrangah cun Bawipai hnenih len thawknak zing lam khawvang hi a si. 

Hminsin: Dr. Francis W. Dixon Sermon ta lak mi a si.

(Visited 24 times, 1 visits today)

Comments

comments

Comments

%d bloggers like this: