Khrih Sungih Tthanlen Pitlinnak

Khrih Sungih Tthanlen Pitlinnak

Kan Bawipa le in Runtu Jesuh Khrih zaangfahnak le

Amah theihnak sungah tthang vingvo uh.

– 2 Peter 3:18

– Rev. Run Cung Mang

Thuhmaihruai:

Rick Warren in, “Zumtu cu tthanglian pitling dingih ruangzingmi (designed) kan si,” a ti. Paul in, “Khrih Sungah (In Christ)” timi hi a rel uar non cingcing. Khristian Nun tthandot dot-4 pawl: Khrih theihnak (Knowing Christ), Khrih sungih tthanlennak (Growing in Christ), Khrih riannak (Serving Christ) le Khrih tettikhannak (Sharing Christ) pawl an si. Jesuh Khrih cu i Runtu le ka Bawipa tiih kan zum le kan cohlan veten Pathian fa kan si. Thlarau nun ah tthanglian pitling vingvo ding kan si. Dungthluntu Peter in, “Zumnak parah tthatnak, theihnak, suup awk theinak, tuar theinak, Pathian ttihzahnak, unau tlaihsannak, le duhdawtnak pawl bet uh. Hih tthatnak pawl hi nan ttulzetmi an si ih famkim in nan neih a si ahcun kan Bawipa Jesuh Khrih nan theihnak ahhin a lo caktertu le hmual a lo neihtertu an si ding” a ti (2Pet.1:5-8). Oswald J. Smith in thlarau nun cu naute thawn a tahtthim.

  1. Thlarau Rawl (Bible)

Zumtu thlarau nun tthanlen pitlinnak dingah lo theih lo ih ttulmi cu thlarau rawl Bible hi a si. Kan taksa nunnak hrangah nitin rawl ei loih kan um thei lo vekin kan thlarau hrangah thlarau rawl: Bible kan ttul. Thuthangttha simmi ngai a ttul, thinlung sungah hminsin ih thutak nitin nuncih a ttul. Culawngah zumtu thlarau nun a tthanglian in a pitling thei ding. “Thukham cabu cu hngilh hrimhrim hlah. A sungih nganmi bangtuk ih na nun theinak dingah a sun a zaan in siar ringring aw. Cuti ih na tuah asile na tthangso dingih na tuahmi kip ah na hlawhtling ding a si” (Joshua 1:8).

Naute tthanglian dingah lo theih loin rawl: hnawiti nitin a in tengteng a ttul. Hnawiti in thei lo naute cu nungdam le tthanglian loin a thi tengteng ding. A hung upat vingvo tikah rawl neem in cawm a ttul. Cuihsin rawl hak tla a ei thei vingvo. Cuticun damcak in pitling nun a nei ding. Cuvek in zumtu tla thlarau nun ah tthanglian pitling dingin nitin thlarau rawl ei ringring a ttul. Peter in, “Naute suakpek bangtuk si uh; thlarau hnawiti duh uhla cuih hnawiti nan innak thawngin nan tthang dingih rundam nan si ding,” in ti (1 Peter 2:2).

  1. Pathian Pawlkom (Prayer)

Bible in, “thlacam ringring uh,” in ti (1Thes.5:17). Jesuh in a dungthluntu pawl thlacam ringring dingin thu a zirh (Luke 18:1ff). Thlacam hi Bible thiam pawl in thawthawt thawn an tahtthim. Thawthaw loin kan um thei hrimhrim lo, thawthawt ding um lo cun thih a si. Cuvekin zumtu khal thlacam nun neih lo cun thlarau nun ah cau le thazaang malnak a si. Sualforhnak doneh thei loin thlarau nun dungtolh le tlusia in a um ding. Cuhrangah zumtu cun thlacam nun neih ding hi a thupi ngaingai. David  Yongi Cho cun, “thlacam tam huham tam, thlacam mal huham mal, thlacam lo huham lo,” a ti.

Naute cu a rilrawn tihaal caan le thawsaa khuasik nuam lo caan ahkhin a ttap ttheu. Cumi cu a nu le pa a pehtlaihnak (communication) a si. A ttap tikah nu le pa kiltu in an thei ih an bawm loh-li tikah a remcaang saal thei. Cubangtuk in, zumtu tla thlacamnak in Pathian kan pehtlai thei. Ttap le au thei lo naute cu mibang lo a si ding. Cuvekin thlacam nun nei lo zumtu khal tthanglian thei lo, tthanreh le dungtolh khristian a si ding. Bawipa in, “I ko uhla ka lo let ding, mangbangza khuaruahhar ka lo hmuh ding” in ti (Jeremiah. 33:3). Daniel cu nikhat ah a malbik veithum Pathian hnen pan in thla a cam ringring (Daniel 6:10).

  1. Thlaraulam Cangvaihnak (Exercise)

Zumtu cu Khrih tetti si dingih kawhmi, rundammi, le thlarua thianghlim ih hruaimi kan si. Jesuh in, “Nan hnenih Thlarau Thianghlim a thlen tikah cahnak huham thawn nan khat dingih Jerusalem, Judea, Samaria le leilung deng tiang keimai’ tetti nan si ding” (Tirh. 1:8). “A tthekdarh mi zumtu pawl cu khua zakip ah an thleng ih an thlennak hmunkip ah Thuthagttha an sim” (Tirh. 8:4). Zumtu thlarau nun ih tthanlen pitlinnak dingah lo theih lo ih ttulmi cu Khrih ih tetti si ding hi a si. Dr. Curtis Hutson in, ‘Kawhhran pakhatkhat ih rin-um sungtel sinak nei lo le mi tirhfaak pawl Pathian mihman an si ka hmu dah lo’ a ti. Hiti’n sawmnak a neibet: “Nikhat ih a hmaisabik nazi, zarhkhat ih a ni hmasabik le na ngahmi thluasuah ih hmaisabik rah cu Pathian hrangah pek tengteng aw” a ti.

Naute cu a nu ih hnawiti a in lawng si loin a ihthat lo sung hmuah cu a cangvai ringring. Daite’n a um thei hrimhrim lo. Caangvai thei lo naute cu thinphaan a um lam ding. A dam lo maw ti’n siizung feh ih siibawi hmuh a ttul ding. Naute a cangvai ringringmi khi an damcahnak le an tthanlennak thuhrampi a si. Cuvekin zumtu thlarau nun tthanglian ding ahcun thlaraulam cangvaihnak kan neih tengteng a ttul. Rundamnak thuthangttha kha ningzak loin mipi hmai ah tettikhan in phuang tengteng aw. Na ti thei tawkte in Khrih hrang hnattuannak ah tel tengteng aw.

  1. Umtlannak Hmun (Atmosphere)

Khrih sungih tthanglian pitling dingah kan telnak kawhhran, le komrual hi a thupi ngaingai. Bible in, “Mi ttha lo pawl ih ruahnak a saang loih, Misual lamzin a thlun lotu le Pathian a hmuhsuamtu pawl lakih a tel lotu cu mi thluasuak a si,” a ti (Saam 1:1). Pathian Thutak dinpitu kawhhran le mibur thawn khawm tlang le ttuan tlangnak neih ding hi a thupizet. Tthansonak dawnkhamtu le sualforhnak sungih in piltertu ding rualpi cu hrial thiam ding. Bible siar a thupitmi, thlaraulam cangvaihnak a uarmi Kawhhran le Khristian nun thianhlimnak a uarmi rualpi thawn um tlang ding hi a thupi ngaingai.

Naute cu damcak ih a tthanlen theinak dingah a ihnak le a umtlannak hmun a tthat a ttul. Thli taha um lonak, a ciarnak, a hlumtuknak, a daituknak le a baalnak hmun ahcun naute cu a naa mai ding. Saatuk lo le daituk loin thianghlim te’n fingkhawi a ttul. A tleunak, thli ttha ngahnak hmun ih ret a ttul. Culawngah tthate’n a dam dingih a tthang vingvo ding. Cuvek in zumtu cu Pathian thu le hla thawn nitin ciah aw ih him teih um thiam a ttul.

Thunetnak

Duhdawtmi zumtu unau, na nunnak tthate’n cekfel awla, na zumnak tthate’n hliakhlai saal aw. Na thlarau nun ah thlangamnak taktak na nei maw? Tthanglian pitling ding le huham nei dingin Bible le Nitin Thlarau Rawl na siar maw? Zing-sun-zaan Pathian hnenah catbaang loin thla na cam maw? Na titheitawk te’n thuthang`ha phuang in tettikhannak na nei maw? Kawhhran tthansonak dingah na ti thei tawkte pumpeknak le peknak in hna na ttuan maw? Na umnak hmuntin ah leitlun taksa hiarnak taansan theitu, zumtu thlaraumi rualpi pawl thawn lawng kom aw in rin-umnak thawn Khrih ih tetti ttha na si maw?

Palestine ram ih tili pahnih: Galilee le Tipi thi (dead sea) hi tahtthimnak ah laak sehla: Galilee tili cu a lut a um vekin a suak a um ruangah a nungmi tili a si. A sungah nga tampi an nung ih mi tampi hrangah pumcawmnak bawmtu a si. Asinan Tipi thi cu a lutlam lawng a um ih a suaklam a um lo ruangah a thi, a sungah rannung zianghman an um thei lo. Zumtu caangvai lo cu a harhdam lo ding, a sungin nunnak tiva a luang thei lo ding. Khrih sungih nun neitu, Pathian Thu sungih umtu, thlacam nun neitu, Khrih hrangih cangvaitu, kiangkap hmun ttha le hawikom `ha thawn rin-umzet ih umtu: “Pitling Nun” neitu si zuam cio uhsi!

rcmang@gmail.com

sundayjune62010                                                                                    

Comments

comments

Comments

%d bloggers like this: