Khrih ih Dingfelnak

April 22
Zarhpi Ni

Khrih ih Dingfelnak

Minung rundamnak a thlenpitu thu ahcun ziangtluk in so a sunlawinak a tum sinsin ding?
– 2 Korin. 3:9

Bible Siar Ding: John 2:1-21

A nasazetmi sunlawinak hmuahhmuah cu Jesuh Khrih sungah a um; dingfelnak zate khal Amai’ sungah a um. Thianghlimnak le Pathian mi sinak hmuahhmuah thawn a pehpar awmi zate, thihnak a thlenpitu ziangtinkim le nangmah cu a kumkhua in na cem leh ding timi thu a lo theihtertu hmuahhmuah cu cem ni nei lo tho saal Khrih ih huham sungah an um thluh a si.

Jesuh na zoh tinte’n a nunnak ih danglamnak phun tampi pawl na hmu thei ding. Thihnak neh ih a thawh saal hnu van a kai hlan ni sawm li sungah mangbangza thutak, a siatral thei dah lo dingmi A hnattuannak sunglawi pawl ka hmu. Khrih hnattuanmi cu ziangbik so a si? A hnattuannak ih muril sung taktak ah na lut ve asile A tumtahmi cu dingfelnak a si zia na hmu thei ding. A hnattuannak nasabik le sunglawibik cu sunlawinak thawn a khatmi a nunnak hi a si. A simmi thu cu mi nunnak a danglamter, a thlengh aw lo, vanlam thu a si ih kumkhua in a hmun. Ziangtik hmanah a hlo thei lo. A ttongmi cu a dinghnget ringring. Hnin theih lo le tthawn theih lomi a si ih A dingfelnak cu kumkhua in a hmun a si.

Jesuh cu thutak a si, a lenglam nun siseh, a sunglam nun siseh thutak in a khat. Amah cu “lamzin, thutak le nunnak a si” (John 14:6) ih hih hramthlaknak ah tthum aw in kan nunnak saktuah ding kan si. Curuangah ka duhdawt mi tla, kan sia ttha thleidan thiamnak thinlung in in mawhthluk lo asile Pathian hmai ah raaltthatnak kan nei dingih (1John 3:21) tlang hman “tthawn aw” kan ti thei ding (Matt. 21:21). Asinan kan sia ttha thleidan thiamnak thinlung in in mawhthluk asile thlacam khal in huham a nei lo dingih thuthangtha sim tikah tla huham na nei lo ding, daar sumsel awn ruri vek men a si ding (1 Korin 13:1). Thlarau Thianghlim in dingfelnak hnattuan in hmuter hram seh!

Jesuh cu dingfelnak in a khat. Pathian in Jesuh ih dingfelnak cu kan thinlung sungah ret in kannih tla Amah vek bang dingah, Amai’ mizia vek dingfelnak neitu si ding in duhsak. Pathian in kan sunglam nun ah dingfelnak nei in nun thianghlim nei ding in duhsak. Bible cu ziangkim tahnak tahfung a si ih Bible sungih kan ciah awk lo ahcun kan hlawhtling thei dah lo ding. Daan cu Khrih hnen in thlenpitu a si (Galati 3:24).

Bible sungih nungmi kan si le midang in kan simmi an hngatsan ding.

@ Smith Wigglesworth

(Visited 25 times, 1 visits today)

Comments

comments

Comments

%d bloggers like this: