KHIMI PA KHI JESUH A SI MAW?

October 26
Tlawngkai Nikhat

KHIMI PA KHI JESUH A SI MAW?

SIAR:
Rom 8:26-29

Pathian in a hril cia mi pawl cu A Fapa hmuihmel keng dingah a
thleidang cia hngai; cuticun unau tampi lakah a Fapa cu upabik a sinak
dingah a si.    -Rom 8:29

KUMKHAT SUNG BAIBAL:
–    Jeremiah 9-11
–   1 Timote 6

Nipi Ni zingkhat cu Biakinn sungih ka fehlai ah mipa nauhak te pakhat
in i zoh hratih a nui’ hnenah, “Nu, khimi pa khi Jesuh a si maw?” tiah
thu a sutmi ka thei. Sim hman ttul loin a nu in a fapa ih thusuhmi cu
ziangti’n a sawnkir pei ti cu ka thei hiar nasazet. A nu cun, “A si
lo, kan Pastor a si khi” a ti.
   
A nu cun, “si lo” a ti ding ti cu ka thei cia ko nain, hitin simbet
sehla ti cu ka duhzet, “Si lo, kan Pastor a si, Jesuh ih thu tampi in
theihter cingcingtu a si” ti’n.
   
Jesuh bang ding hi kannih Amah thluntu dingih kawh cia mi pawl hrang
ahcun kan nunsan a si. John Stott ih ti daan takin a liamcia caan, atu
laifangte le a ralai ding hmailam caan ih kan tumtahbikmi hmuitin a
si. Rom 8:29 thu cun, ahlan ihsin Pathian Fapa thawn bang-aw ih nung
dingah ruatcia mi kan si ih atu san ah Khrih bang dingin le a
sunlawinak langtertu si dingah sersiam le tuah tthat rero mi kan si
(2Kor. 3:18). Cule hmailam caan ahcun Amah thawn kan bang-aw ding,
ziangahtile a sinak vek cekci in Amah kan hmu ding (1John 3:2).
   
Jesuh bang ding timi cu daan pawl thlun, Biakinn feh, tthenhra
tthenkhat thawh tinak a si lo. A ngaidamnak thei in, zaangfahnak le
lainatnak in tuahnak ah pumpek thei ringring ih mi zate man neizet ih
retnak nun khi a si. Kan Pa Pathian ih duhnak vekin nun duhnak
thinlung neih khi a si.
   
Jesuh bang in nung aw. Cumi hrang ding hrimhrim ih rundam mi na si!       

Jesuh bang dingin hihi ka hla a si,
Inn ah siseh mibur lakah siseh;
Sun nivui Jesuh bang dingin!
Jesuh vek si ka duh.

Nangmah ah midang in Jesuh an hmuh theinak dingin nung aw.

(Visited 23 times, 1 visits today)

Comments

comments

Comments

%d bloggers like this: