Khiahciami Caan

April 16
Tlawngkai Nikhat

Khiahciami Caan

A tikcu a kim tikah Jesuh cu cabuai ah a dungthluntu pawl hnenah a to.
– Luka 22:14

Bible Siar Ding: Luke 22:7-53

Cumi cu mangbangza tikcu caan a si. Cumi vek tikcu cu a liamcia caan ah a rak um dah lo ih a ralai dingmi hmailam khal ah a um nawn lo ding. Cuih nazi cu ziang a si? Cuih caan cu sersiammi zate thiisen sungih an hnim awk caan, thiisen sunglawi ih khuhnak (cover) ruangah nunnak pawl rundam an si caan, Satan ih huham siatbal caan khi a si. Thihnak ihsin thawh saalnak caan khi a si. Cuih caan cu leilungmi zate luatternak caan a si. Leitlun thuanthu ah thimkhawzing nehnak caan a si. Cumi cu khuaruahhar caan a si! A nunnak ah khawthim in a rak khuh dah, asinan kan hrangah mangbangza zing nitleu mawi a suak zo. Mi Fapa hrangah thimkhawzing a tlung, asinan kan hrangah tleunak a suah theinak a si. Pathian cu thangtthat si ko seh!

Ca Thianghlim sungah ka thinlung nasa takin i hnintu thu an um. Cumi cu Jesuh hi minung ih a rung can ruangah ka lungawi. Paul, Daniel, le John pawl tla milai an si ruangah ka lungawi. Ziangruangah? ti’n thusuh na duh men ding. Ziangahtile Pathian in anmah vek minung parih a tuah ttheumi cu ka par khal ah a tuah ve ko ding ti ka hmuh rungah a si. Cule Pathian in minung hmangin khuaruahhar mangbangza thil a tuah zo vekin ka nunnak hmang khalin a cangvai ve ding ti ka ruahsan ruangah a si. Hih thu hi ruat ve hnik. Ka hrang ahcun mangbangza khuaruahnak a si.

Jesuh in an kaih ding tikcu caan ah, “Hih Lantak zaanriah hi harsatnak ka tuar hlanah nanmah thawn ei tlang dingiah ka duhzetmi a si,” a ti (Luka 22:15). Ka duhzetmi a si a timi hi ruah dingzazet a si. Cumi a duhbiknak cu leilung rundamnak, Satan ih uknak siatbalnak, ziang hmuahhmuah a neh thluh ih a zumtu pawl zalennak ngahnak ding ti a theih ruangah a si. Cuih tikcu le thinglamtah karlak ah Gethsemane in hmun a la.

Gethsemane thu hi napi in ruat dingah ka lo duhsak. Cuih hmun ah Jesuh cu a thinlung kekkuai in Amah te lawng a tuar nasa. Hiti’n a au ruangro, “Ka Pa, a cang thei a si ahcun hih tuarnak khuat-hai hin i luatter hram aw” (Matt. 26:39). Minung pawl rundam dingah minung ah a rung cang. Asinan thihnak thimkhawzing a neh ih, “Leilung ih ka suahsanmi le ka ratsanmi cu hih thu pakhat lawng a si,” a ti (John 18:37). Cumi cu leillung hrangah thih ding hi a tumtahmi umsun a si.

Aw zumtu, na thinlung le na hmurkaa in, “Bawipa Jesuh, ka lo thlun ding” ti thlang aw.

Thlarau Thianghlim hnattuannak lawngin thlarau thu kan thei thei ding.

@ Smith Wigglesworth

(Visited 25 times, 1 visits today)

Comments

comments

Comments

%d bloggers like this: