Khawsia In I Tuahter

August 5

Tlawngkai Nili 

Khawsia In I Tuahter 

SIAR:

Jeim 1:12-18 

Sikhalsehla minung cu sualforhnak a ton tikah amah ih taksa hiarnak in a thlem ih thang vekin a awk ttheu. – Jeim 1:14 

Kan dung kum March thla ah Washington peng ih kum 62 nutar pakhat cu an kawhhran paisa US$ 73,000 a fir a si ti’n an mawhthluk. Zingzoitu pawl in thu an sut tikah cumi nu ih a simmi cu, “Hih thu ah Satan nasatuk in a tel” a ti. A sullam cu khawsia khuavang in i tuahter a tiduhsannak a si.           

A duhhrilnak ah Satan a tel nain sualnak le sualforhnak thu ah a ruahnak a dik lo. Khawsia pawl cun zumtu cu sual tuah ding cun an forh nain sual an tuahter lo. Jeim in Pathian mawhthluk ding khal a si lo a ti. “Pathian in i hniksak a si tiah zohman in ti hlah seh. Ziangahtile Pathian cu sualnak in a hniksak thei lo ih Amah khal in zohman a hniksak hngai lo a si (Jeim 1:13). Amah cu mi ttha le mi thianghlim a si.           

Kan sualnak hrangah zo kan puhmawh ding? Minung cu sualforhnak a ton tikah amah ih taksa hiarnak in a thlem ih thang vekin a awk aw ttheu (c.14). Ngasiotu in siotarh a hman vekin kanmah ih duhhiarnak sual cu kan theih lo sungah sualforhnak ah le sual tuah dingah in hruai.           

Pathian thuthlun lonak sual kan tuah tikah, khawsia in i tuahter a si tiah puhmawhnak kan tuah lo pei. Cuhnak in kan tuahmi parah ttuanvo laak in sual ngaidamtu le zaangfah thiamtu Pathian hnenah kan sualnak phuang uhsila, nun dik in nung saal uhsi.  – Marvin Williams 

Sualforhnak ton tikih tlan cu fimnak a si,

A um ringringtu cu mi aa a si;

Khawsia thawn a um tlang rerotu cu,

A rei hlanah a siatral ding.  -D. De Haan 

Sualnak kan tuah tikah, thinlung sungah puhmawh ding a um.

 

Comments

comments

Comments

%d bloggers like this: