Khawdur Le Van Dum

November 22

TlawngkaiNikhat

Khawdur Le Van Dum

Siar:

Rom 8:18-30

Cule harsatnak caan tawite sung kan tonmi tete hin a let tampi in kumkhua sunlawinak in pe ding.   – 2 Korin. 4:17

Kumkhat Sung Baibal:

–   Ezekiel 18-19

–   Jeim 4

Nikhat cu ka thin a hartuk ih ziangti’n ka thin ka nuamter ding tiah ka ruat rero. Susan Lenzkes ih, “Nun hi hling parih khuaitizu liak vek a si,” timi cabu sungah, “Hnihnak le ttahnak hi ziangti’n an ra thleng khal le kan cohlang ih a dikmi Pathian in tthatnak ah canter dingin kan ap,” timi ka siar ngah.

Lenzkes in, “Mi hrekkhat cu a tthalam zawngin thuruattu an si ih siatnak hnong in nomnak le thil ttha pawl an ciingmang. A sialam zawngih thuruattu pawl cu an sunralnak thu lawnglawng an ruat ih nomnak le nehnak an hlohter. Asinan zumnak ih a nungtu pawl cun nunnak ih a ttha le sia a zate’n an cohlang ih Pathian in in duhdawt taktak ih kan tthatnak hrangah le a sunlawinak hrangah hna a ttuan ringring a si ti theih theinak ah an hmang,” a ti.

Casiar phah in innlenglam ka hei cuan tikah ruahsur zik mero dumpi ka hmu. Rei lote ah thli neemte a hraangih mero dumpi cu a sem hlo ttheh; hmakhatte ah van cu a tleu saal. Nunnak ih thli sia khal cuvek in a hraang ih a dai saal ttheu.

Zumnak in, Rom 8:28 sungih Pathian thutiam kan pom. Caan tawite sung kan tonmi harsatnak in a let tampi le kumkhua sunlawinak hrangah in tuah sak ti kan thei (2 Korin. 4:17). Pathian cu in duhdaw ih kumkhua tleunak ah in hruai dingin ziangtik caan khal ah tiarcia in a um.   – Anne Cetas

Pathian ih tumtahmi pawl cu an dik,

Kan hmu lo men thei na’n;

Ziang hmuahhmuah ah kan tthatnak dingah a ttuan,

Riahsiatnak cu a thlengh awkter. – Sper

Pathian in thlengh suak dingin thu in tiam,

asinan lamzin tluang tengteng ding cu a ttul lo.

(Visited 31 times, 1 visits today)

Comments

comments

Comments

%d bloggers like this: