Khavek Thleng Nawn Hram Hlahseh!

article-india2-1225NEW DELHI : Tuhrawng leitlun ih a theihlar zet mi thu pakhat cu, India ram ih nunau pawngsualnak thlengmi hi asi ve. Siatnak tuartu nunau ih tlangval pa cu tu ah a umnak Gorakhpur, Uttar Pradesh state ah a um. Cutawk a umnak ih ta cu phone thawn interview nak an neih nak ah, kum 28 mi a hmin rellang duhlo tlangval pa cun, “Movie kan zoh theh ah ka fala nu thawn kan tlung phei ih, ka fala nu thlah ding in auto rickshaws kan sang nan in phur duhlo ih, cumi lai ah private bus ra cu kan to. Cumi cu leitlun ih ka thiltisual mi rapthlakzet asi.

Kan to fel maw ti ah a sungih to tu mi 6 le a mawngtu, zu kamnam zetzet pawl cun ka fala nu cu sualpi an tum. Ka theihtawk in ka beisal ve nan tingaihnak a um nawnlo. Cumi hnu khal ah an hmai ah khukbil in zangfah ka dil rero hai nan ziang san a tlai lo. Khavek  sualnak rapthlak kha kan ram ah thleng nawn hram hlah sehlaw. Cun, ka rel duhmi lak ah, ka fala nu thawn bus ihsin hlawn kan si ih, cutawk ah bomnak dil ih ka au rero lai ah mi tamtak cun in fehsan men. Ziangtluk thinnat za ha asi. Cumi hnu ah palik pawl khal an ran an an cangtlai tuk hi ka mangbang zet.

Kan 2 in in retnak emergency public hospital ih kan umnak khal ah in tuamhlawmdan pawl cu mak ka ti zet. India ramsung ah hivek hi um nawn hram hlahseh law. Ziangtluk ka tuarna ih ka thin a na ti hi rel menmen cun a faing theilo ding” ti in tah aw zet in a sim asi. Amah khal hin a ke ah le taksa hmun dangdang ah hliamhma a tuar ve. Leitlun democracy ram tumbik pakhat asi ve mi ah, hivek a thleng cu leitlun ram tampi in India cozah cu an mawhthluk nasa ih, ram tamtak ih India ambassador zung ah sandahpiahnak tampi a um. Pawngsualtu mi 6 lak ih 5 pawl cu “ Mithat le pawngsual (Murder and rape)” timi case thawn an thu relsak an si ding. Midang pakhat lawngte cu kum 18 a kim hrihlo ruangah a thu an relsak dan a dang deuh ding ti in thuthang theih asi.

(Visited 122 times, 1 visits today)

Comments

comments

Comments

%d bloggers like this: