Khasuan Rang le Lungvar Mankhung

May 27

Tlawngkai Nili

Khasuan Rang le Lungvar Mankhung

Siar:

Jeim 2:1-9

Sikhalsehla a lenglam ih hmuhnak in mi na thleidang a si ahcun na sual a si. Daan in daan buartu ah a lo hmu.   -Jeim 2:9

Kumkhat Sung Baibal:

–   2 Sansiarnak 1-3

–   Johan 10:1-23

Ruth Reichl in a cabu nganmi Garlic and Sapphires:The Secret Life of a Critic in Disguise sungah New York Times thuthangca ih rawldawr pawl fakseltu kum (6) a ttuan sungih a tontehmi thuhla pawl a ngan. Fakselnaklam ih hminthang a si ruangah rawldawr tumpipi pawl cun an hnattuantu pawl in theithiam dingin a zuk pawl an taar. Lomnak co duh ah rawl tthabik an pek ih an zoh tthazet.

Curuangah mi menmen vekin an zohnak dingah a pianhmang a thlengh aw. Veikhat cu nutar vekin a thuam aw ih rawldawr ih a va feh tikah an theithiam lo ih tonak ngah dingin reipi an hngakter hlei ah a dilmi pawl khal an pek lohli lo.

Kawhhran thoktir caanlai ah Jeim in thleidannak nei lo dingin a sim. “Hnipuan tthazet a hruktu pa nan upat ruangah, “Hih tokham tthabik ah ra to aw,” nan ti; asinan mi farah pa cu, “Khi tawk ah va ding aw; asilole ka ke kiang zial ahhin to aw,” nan ti a si ahcun, nanmah lakah thleidannak nan nei ih thinlung ttha lo par ihsin thutthennak nan tuah a si” (Jeim 2:3-4).

Kan kawhhran ih a ra khawmtu pawl parah thleidannak kan nei maw? Milian le mithiam pawl kan zoh ttha cuang maw? Thleidannak nei loin mi hmuahhmuah parah bangran tthatnak langter dingin Pathian in in ko. Siangpahrang biaknak ah in ra telpi dingin mi hmuahhmuah lungawi te’n hmuak uhsi!   – Dennish Fisher

Kan duhbikmi ka Bawipa,

zo kan si ruangah si loin, zo Na si ruang sawn ah,

Na Siangpahrang uknak sungah in cohlang a si;

In duhdawtu zaangfahnak ih khat Pathian,

kan pawlkom sungah a ratu hmuahhmuah

cohlang theitu si dingin i bawm aw.  Amen.

Pathian in Amah thawn pawlkomnak sungah in cohlang.

Zo si kan si ih midang ra thei lo dingin kan dawnkham?

(Visited 23 times, 1 visits today)

Comments

comments

Comments

%d bloggers like this: