Kha Mi Caan Kha


Kha Mi Caan Kha

By: Hniangsinpa

Thihnak kutin, ka thlunglu I dai hrih lo ih, natnak siava khal in thihnak kut sung le natnak, zato hmun lam hruai I tum hrih lo. Tihnungza thlan khur sungah ka ruak khalin riah ruun rem a tum hrih lo. Caan tam sawn ih ka hngilhmi khalin tlanghra in kaan sak siang lo ih an um lai caanah, kei Hniangsinpa, zo hman ih thieh tlak ih an rel duh lo mi (Sianglo ti sehla duhdawt tui mithmai zoh a tul fawn). Tar khal sehla, ka mit a mal hrih lo. Aa khal sehla ka ruah nak in dawn khamtu ko ding a si in ka thei fawn lo. In thei lo in ca ngan lo lawlaw sehla ka ti nan, ca ngan lo ka phang fawn. CT hin in hngilh seh ka ti le in hngilh ka phang fawn. Lu thak kheuh men ih can hman lan ta hnak in tiah ka can hman mi ka lo ruah zik a si hi….

Nazi ka zoh lo, hmansehla a siim thlang ti theitertu dingih Ar khuang cu ka hngilh cuang lo. Ih hmutnak le ihthah hiarnak cun dung in tun tiin ka ruat. “Fimnak, thiamnak duh le hminthannak duh ih i in taantu pawl mawhthluknak ka hawl ding” tiih ka ruahnak cu, lei thuahthum sarih sungih in pilsan vek khin ka ruat lala fawn. Ka kut sih in ka bawp ah ka ret nan, cucun sullam hnak in ruahnak thuk sawn ah in hruai khin ka thei.

Kannih, khuahlan phumthum ong ko dingih rak zir lo hrangah, cui ruahnak cun lamkal hruaitu, tuahthatu sinak a thlen thei lo ti ka thei fawn. Tilik thlen caan hman theilo tu hrang le Darwin Theory ti an sal vete’h rak lung aa cia hrang ahcun kan ruahnakin “Tipi rak cu sim lo, hmuanthlang pai’ Hai kung hman a can kem maw?” tiih ka aatnak in sim theu tu aanka cun ka lung i mawlh ter lala fawn. Ka mang a bang tuknak ah ka khuk ka kheuh nan, san a tlaihnak ka thei lo. Arcang khuang ding a um lo, Vate tal ai sehla a ka tin an, a awn ka theih thei nak ding hmunah ka um fawn lo.

Hnatuan bang zet hrang ahcun zaan an hngakhlap ding nan, ka hrang ahcun zing khawvan hngakih zaan var men pawi tinak a um lo sawn riangri! Ka kuak bawmah kuak a um nawn lo, zual cawp ding khal a um lo! A va har lawmmam so! Zo in so in theih thiam pi thei ding. Ka lukham kiangih na zi awn rutro cu ka thei, hmanseh ka ‘Ka sangka kik awn’ ka rak thei lo. Saangka ka rak hren lo ruangah a arung lut ih, kuak hawl hi ka cabuai par cabu ka rak hai let ciamco cu i run hmu! ‘Ka haal na riam, ka ruahnak khal fim sutso in ka thei’… kujat zual khat i pek ruangah!

Ziangtik caan ah a tlungih, ziang kan rel ti lo sim ka tum mi a si lo. Mi aa ca ngan dahlo (A mad man never write) an ti mi bang in, kei mi aa, khawte fa, sunlawihnak co dah lo, mi lak ih cangvaig dan khal thiam lo in, zo in ha maw ka ca ngan mi siar paih ding tiin ka ruat nan, siar paih duhtu an um lo khal ah, ka ngan dah ti tal rel ding ka neih pangah tiin, tongkam hman ding khal midang hnenah sut phah in ka ngan lo ding maw si tiah keimah le keimah ka eel aw rero.

Ca rak siangtu, na hnenah hihi ka lo cah duh, leitlun ka um, na um sungah, ‘maw thihnak, khuiah so na tur cu?’ ti tongkam hmangtu si thei hi ka va lo duhpi so! ‘Thihnak, na nehnak the khuiiah so?’ ti tongkam ra suahnak hmun kan theih thiam ka va duh so! Kha mi caan kha ti hi liam ko men seh. Kan ti pang/sual mi caan cu kan rem thei lo nan, midangih an rello ko dingih tuah theitu kan si ti hiu hngilh ka va siang lo so. Thingkung ka phunnak hmun a hmanlo/diklo a sile, a thingkung mawhthluk hnak in, a phuntu khan, a hman lo nak hmun theih thiam a pawimawh sawn ti cu, zo dangih sim so maw kan tul aw…

Zan a thim ih, khua a vaang ti cu zo so maw thei lo, hmansehla minung nunak ih zaan le khua thim hi zo in so in sim thei ding. ‘Thihnak a si lo’ tiih autu khal in, thihnak silo hmuahhmuah a tuah duh maw? Thaisun thu zo in so rel thei ding titu pawl khin, an thaisun thu an rello ringring cuang kemmaw? Mai sungkhat mawhthluk ringringtu pawl teh, an mai sungkhat mawhthluk lo in an um ringring dah ce sawm? Na unau kilkhawi in theithiam aw tiih in simtu pawl tehin an unau an theithiam ringring kemmaw? A liamciami mitthli hnul sal dingin an kiir dah ko lo maw si?

Ka ruahnak thuk ruangah a si ding, ka kuak fawh mi mang lo ko in ka rak um a si cek ding, ka kut I kaang ih, ka vun zoh cun, Minung hi, kha mi caan kha tiih sir aw theh kan siih, rak ti lo bang sehla, kan tuah lo bang sehla… kan ti cio ko nan… a har caan a um… hmansehla, can liamzo mi ko kiir thei lo kan si ceng ahcun, kohkir hiar sal ko ih tuah lo sawn ding kan si ti tui kan tuah mi ah fiang sehla, Kha mi caan kha ti hi kan rel dah zik lo ti ka vun thei suak cu maw… ka ih a hmu sualso nan… khawvaang in ka daibual a cuu ti in theih ter ih, khami caan kha ti nawn lo ding in, ka tuah dingmi cu tuah sawn in, ka ruahnak cu ka cabuai parah ka taan.

(Visited 62 times, 1 visits today)

Comments

comments

Comments

%d bloggers like this: