Keimai’ Lam Pan ih A Ra Zuangtu Vancungmi

Šianglianuk Ķianghrol

Kum 20 lenglo nauhak pawl thla ka rak la (ka zuk) zo. Ttum khat Thanksgiving ni ah, cui nauhak pawl lak ihsi pakhat hnen ihsin laksawng hleice ka ngah. Emily cu hnipuan var hlir hruh in zial ah a to. Pom hiar um zet thla ruk nunau naute a si ih, a norleng hngohsan in a um.

A nu in, “Tuini cu Emily a ai a puang lo,” a ti. Emily ih hmai cu a sen hiamhi ngai ih, dingtei’ to thei ding zuam in a lu a herh kual rero. Thla la fuh thei ding in vei tampi ka zuam nan a ngah lo. A netnak ahcun Emily ih hmai ah ka va naih ih, “Vancungmi na bang,” tiah ka sim.

Cuvete’n a cangvaih a cawl ih, a herh rero mi a lu khal thinlung pe zet in a hung um. A mithmai cu, ka ttha ko, ka nisuah a fuh lo men a si, ti ih i sim vekin a um. Emily cu vancungmi vek a si ruangah, vancungmi vekin thla ka la ding tiah thutluknak ka tuah.

Ka thlalaknak pindan ah rampai hmul ngaingai thawi tuah mi, thianghlim zet ih a var mi, vancungmi ih thla ka nei cia. Cu thluh ah pangpar lukhuh fatakte ka khumter fawn. A tohkham ah duhnung zet ih to in, meiro lakaih a to lai cu thla ka la thok.

Culai ah a nu cu a rak ttap rero ti ka hmu ngah lo. A nu cun, “Vancungmi a si. Mizansun ahkhan theih ding a mal zet mi thluaklam natnak ci khat a nei ti kan hmusuak. Tui’ ttum hi Thanksgiving kan hman tlang hmaisabik le netabik a si ding,” tiah ik-ik phah in a sim. “Hivek nat neitu hi kum khat luan tiang an dam dah lo. Amah ka von lai ah sibawi ih fial mi pohpoh ka tuah thluh. Kuak ka fawp lo, ei-in khal ka sup aw, asinan a suahthlak ih a thluak kha a tthangso nawn lo ding. Hivek natnak hi 435 lawng theih a si lai.”

“Emily hi a sinak taktak, vancungmi a si ti na hmu ih, kannih khal in kan duhdawt tuk. Pathian in kan neih mi kan sunsak thiam a duh thu in sim ding ah leilung ih a rung zuang thla mi vancungmi fatakte a si. Amah na zoh khal ah cumi cu na hmu thei. A cancan ahcun biak a theih ih, biak can khal ah thin hahdam le daite’n a um khiaukhi. Cule naute ttong in a hun ttong ttheu ih, a ttong mi na theithiam deuhthaw ding. Thil pakhatkhat lo sim tum vek rori khi a si. Himi thlalak pawl hi an thupi tuk. Emily hi kan hnenah ziangtluk rei tiang a um ding ti kan thei lo. Kumkhaw hrangah kan vangcungmi te ih thla na la ngah a si hi.”

Ka dang sung ih thil sawhhnong aw thawn, “Nan vancungmi te in hlawm ve ruangah ka lung a awi. Keimai’ lam pan ih a ra zuan ruangah ka lung a awi tuk,” tiah ka sim ve.

Hram: Larry Miller ih “An Angel Flew My Way” – A Cup of Chicken Soup for the Soul by Jack Canfield, Mark Victor Hansen, Barry Spilchuk.

(Visited 56 times, 3 visits today)

Comments

comments

Comments

%d bloggers like this: