Keimah Nupi (Part 6) Mai Sokhlei Par

KEIMAI NUPI

(Part 6)

Mai Sokhlei Par

Mai Sokhlei Par le rualpipawl thawn lakphak dawr ah

Mi in anmai nupi thu an run rel celcel haiih, kei tla keimai nupi thu hi sim lo le rel loin ka um thei nawn lo. Ka thinlung sungih ka rak pai hlenhlinak a rei tuk thlangih, ka awm ah a hnawhkhataw thetthet thlang.

Kan nu thawn kan neihawknak hi kum hra lai a rei ve thlang. Nikum tiangah cun buainak pipa tla kan rak nei dah lo. Innsang nuam le lungrual zet kan rak si. Hmansehla tu cun kan innsangah tawhawknak le hngirhngoawknak thimkhawzing a tlungih kan nupa in thenawk kan man tiatia thlang.

Cutlukih a rak hlawhtling zo mi innsang si si, ziangruangahsaw cuti menih nan run can thluh? tiah nan mang a bang men thei. Cumi tak cu famteh lo sim ka duh mi cu!

Kanni’nupa thuhla cu a danglam hleice ngaingai. Kan run buai thoknak cu kan nu a run pianthar ihsin a si.

Kei cu tlangval lai ihsin Jesuh Krih cu rundamtu ah cohlang in, kumkhaw nunnak hrangah hnangamnak a rak nei zo mi, piangthar felfai pakhat ka si. A mak zet mi cu, kei ka rak pianthardan le kan nui’pianthardan hi OT dan le NT dan a danawk tlukin a dangaw verver. Cumi cu si kan nupa kan buai thluhnak hrampi cu.

Kei ka pianthar pekah Pathian thu hi a hal in ka rak hal duahdoih Bible siar, Pathian thu ngai le thlacam ih Pathian pawl hi nuam ka ti tukih khawh ti ka nei dah lo. Ka thinlung hi Jesui’ nun cawn duhnak in a khatih amah vekih nung in ka nunnak ihsin Pathian sunlawinak langter ding hi tuisun ni tiang ka thlacam mi a si.

Asinan kan nu cu a phundang! A run pianthar tikah Bible kau fekfoih mahtei’ Pathian duhnak hawl lamlam, evanpawl ih dung thlunah a phartliau riangri. Kan nupa in Pathian thu hi vun reltlang zik ziarzo sehla, kan nui’ kaa ihsin ‘Bible in cutin a ti’ ti hnakin, ‘Evan cumi in cutin a ti’ ti hi a suak tamsawn theu. Zumtupawl in kan thinlung loram ah Pathian tongkam thlaici kan tuh tam poh le kan nun ah rah tha a suah tam ti ih ka sim khalle kan nu cun Bible siar hi a tum cuang lo.

Piangthar pek kan nu hin ziangtlukin Pathian thu a hiarhal ding ti cu ka theihthiampi zet. Asinan a thil tidan hi a luan tuk thlangin ka thei. Khuitawk hmun a si khalah, zoi’ inn le ziang kawhhran ti um lo’n, crusade a um ti a theih phawt cun a vung pan vurvoih thu a va ngai theu. Ni khat tla cu rel lo, nazi pakhat te hman hi a pelh siang dah lo; pelhter khal a theih lo.

Cule crusade tuahnak hmunah zan tin rorin a vung khawm hrih. Crusade umnak theih ding hi a hnatuan tumbikih a neih mi a si vekin, kan nu hin zan tin ten khawmnak ding hi a pehpeh in a thei thei. Cutikah kei cu falepawl rak khurhawm le an cazoh kil in inn ka rak hngak ngiaungi theu. Nupi tlun can hngak thei loin ihkhun ah mahte lawng nupi nei lo men bangih ka rak ihthah ngelngi can khal a tampi. Cuvek can le kan nu a rak pianthar hlanih kan nupa nun te kha ka vun ngai ruahro theu.

Kan nu cun Pathian thu hi sun tin le zan tin roriih a ngai khalah a duhtawk thei hrih cuang loih, camping feh khal a duh vivo. Camping programe cu a malbikah zarh khat tal cu a si theu ih, innsang nubik in tu le tu ih zarh khat pumhlum a inn a tlansan hi cun a innsangpawl cu an rung vavai a si mai.

Kan nu a um lo cun kan innsang cu inn hngaktu um lo, rawl suangtu mumal um lo le nauhakpawl khal ngaihventu le fingkhawitu cuca um lo’n a buairuai thluh. Keimah khal fumfe in hna ka tuan thei lo phah thluh ih kan inn lam tawlrel tul ah sumlut hmuah kan neih mal phah theu. Pathian thu a si ruangah kan nu cu ka dawn ngam ngaingai deuh fawn lo. Buaithlak tak a si! A rak pianthar hlan kha a ngaium!!

Kan nu cu maw, Pathian thu ngai dingih inn ihsin a pawhsuah hnuhnu cun inn lam cu a hngilh thluh cih a si mai. Thuzir tiak tik khalah mai’ inn ih tin vervo ti um dah hlah; sayapawl a run tohnawh ta theu ih inn lam hmuah kan rak bahlah phah thluh theu. Tu tla cun kei tla cu, nupi piangthar thei neih zarah, keimai hna ih betah fate kilkhawi le rawl suan hnatuan cem in pacang zetin pahmei dinhmun hmuah ka lak phah thluh zo.

Nubik ih khurhawm lo mi innsang cu, pheh thu lo ten, a vaivuan in a hnin dualdo rori. Kan nui’ hnenah inn hlum ih innsang ngaihsakdeuh dingih ka sim tikah, kan nu cun,

“Ka thlarau nun siatsuah dingin Satan in a  lo hmang a si hi! Dung ka sip lamlam zik lo. Hivek donak hi cu thlaraumipawl cun kan tuar hrimhrim ding mi a si. Pathian thu ruangah cun ziangkhal ka tuar ngam. Asinan ka pasal rori, Satan hmanrua ih na rung cang hi cu ka thin a na tukaw,” tin in rak ti riangri. Ka tah hah a suak!

Tuar har ka tizet mi pakhat hun lo sim lawlaw keng. Cumi cu, kan nu’n a evanpawl a duat theidan hi a si! ‘A evanpawl’ ka run ti kherkhernak san cu, kan nu hin uarbik Evan a neih theu ruangah a si.

Kan nu in mai pasal cu sir ah hnawl tahratin a evanpawlsawn riangri hi thuzirh an colh can le khawm tiak veten Lipo dawng thawn a vung pan vurvoih, “Na bang tuk pang kei, himi te hi vun in ta duak,” tin hni siamsiam in a va ti. Cumi lawng hman a si lo, an thlen-inn tiang a vung thlun ih, “Na taksa a thop tuk a bang! Ka rak lo hmet kei cu?” tin a vung tibet hrih! Ai, tuardan thiam a har!

Ka nupi ih mi duat a rak thiamzia hi a  pianthar hnu lawngin si fiang tei ka theih! A pasal ih dinhmun le feeling hmuah theih tum riai lo’n, a evanpawl ih mithmai cu a kil hlehle; a ngaihven hiamhiam; a ti hlephlep. Ka mangbang mi cu, kan nu hin minu evangelistpawl hmuah cutlukin a ti lem lo lala fawn… a ruah ngaihnak ka thei lo! Asinan fiang zetih ka theih mi cu, kan nui’ duat hlawh evanpawl hi ka thik! Thikthusiatnak ding um lo kan nui’ pianthar hlan kha ka ngai lamlam!

Tu, kan nui’ thlacam nun a neihdan khal ka lo sim hrih ding maw:

Kan nu in a Nubupawl (amai’ kawhdan ten ‘Thlarau lamih a rualpipawl) thawn Zarhte ni tin ten rawl ul thlacamnak an nei theu. Thlacam taimak hi a tha; Bible khalin 1Thess. 5:17 sungah ‘catbang loih thlacam dingin’ in forh. Thlarau daan ih kan nun theinak ding hrangah thlacamnakhi a bulpibik a si.

Hmansehla…

Kan nu cu rawl ul thlacam dingih a feh hlanah a suncaw ding a timlam cia thluh ta theu. Cuti a si lo le thla an cam theh in an zaten lakphak dawr an pan ih thil an vung ei khawm vualvo theu. Asinan ka rel tum misawn le torhmawhum ka ti zet mi cu, an rawl ulawter mithmai le an thlacamawter umdan hi a si. Matt. 6:16-18 ih Jesui’ zirhdan thawi vun thim cun a beidonthlak. A hrimhrimah anmah vekih ‘sun hrek’ rawl ul thei lo zosi um? Kan mit an kem!

Rawl ulh thlacamnak ihsin kan nu a rung tin ah hi cun an thlacamnak ih rak tel ve lo hmuahhmuah hi an hmu ‘tisami’ thluh. Pathian thu hiarhal lo le thlacam nun khal nei loah mi an puh; mi an nautat; mi an mawthluk. Cule innsang hnatuan hmuah mang thiam nawn lo koin a thlacampipawl thawn Pathian thu rel an cuhaw, thlarau lamah thlennak sangsawn si an zuamaw, theihthamlo ten an ngiaraw. Ka ningkhong!

Ee, a um lai…

Kan  nuleipawl in an thlacamnak ah midang hrang thlacamsak ding mi hi mah le tul ti mi cio an bur khawm theu. An thlacam rawtdan le thlacamsak ding mi an thehluhdan cu:

“Kan mino secreatary Lal Run hi zan ah a thup ten Karaoke dawr feh a hmang an ti. Curuangah Lal Run a nun a thin theinak dingah…”

“Mizan ah khan Kei Uk in Ngaite a ihthahsan men ruangah Ngaite a ngol an ti. Curuangah Kei Uk tei nupa an remawksal theinak dingah…”

“Pek Tluang hi tu hrawng nuthlawi inn ah a lutsuak tam tuk tin an rel. Curuangah Pek Tluang in thlemnak a do neh theinak ding…”

“Lal San Luai tu tiang nupi a neih lonak san hi a duh lo ruangah si loin, a ton lo ruangah a si titu an um. Curuangah Lal San Luai a beidong tuar ngaihnak thei loin bezai si lolo vek tla a run ngan sual pang lonak ding…”

“Robert pa a zei lo tuk ruangah Robert nu a bei a dong thup rero thlang ti thawm a thang. Curuangah Robert pa tu hnakih a run zeideuh theinak ding…”

“Kan dung zan ahkhan Jesse Tahan ihsin Letpanchaung ah a tlungih, Tlangzawl zin a thlenah, a ziang ai thokah simaw, zin kapah a bike a ret ih cule a kedam kha tingtang ah tum in “Nu-metal.. oh.. you.. nu-matal.. I love you, nu-matal” tin theipatawpih au in lamzin ah amahte a laam ciamco tin thuthang kan ngah. Curuangah Jesse a lung a rung fimsal theinak dingah…”

“Ma Ruat Yangon a um hnu cun PYJC khal a ngaihsak duh nawn lo.  Curuangah Ma Ruat in nunhlun a hngilh lonak dingah…”

Mi thuthup le mi sualnak pawl theih na duh a si le kan nulei’ thlacamnak ah rak tel ve awla, thuthang nepnawi tiangin na run thei thluh ding! Ee, khavek khan thla lo camsak ve bang sehla na lung a awi kem? A tlunih thlacamsak a hlawhtupawl teh khi an lung a awi na zum maw? Kei cu ka tuk a sum! Mualphothlak ka ti. Ka tih, duh hlang!

Bible in Isaiah 58 sungah rawl ul thlacamdan thawn pehparawin ziangtin a si ta in rak zirh kha? Kan nulei’ tidan thawn hin milaw na ti maw? Ee, thudangah, kei cu ka  nupi hi Thlarau Thianghlim thawn khatih a ruahawk poh le tuar har ka ti deuhdeuh!

Pathian thu ah kan nu thawn kan bangawk theilonak pakhat cu ‘Peknak’ ah hin a si. Kei cun, Matt. 25:31-46 sungah a nganawk vek ten, mifatebik parih kan tuah mi (thatnak) hi Pathian parih kan tuah mi a si ih, mifatebik pakhat kan bom duh lo mi hi Pathian bawm duh lo kan si tin tluangtlam ten ka zum.

Asinan kan nu cun Pathian hnatuantu pawl par lawngah thiltha tuah a duh. Rawngbawltu siar lo, zoi’ par hmannah thil tha tuah a tum lo. Bom a dun lo ih zianghman khal a pe duh lo. “Anih pawl in zing thlawsuah hman an phur zik lo” tin a ti theu.

Himi thu ah kei cun, Mark. 9:41 le Matt. 10:42 ih in sim vekin, Pathian hminnih kan pek mi cu tidai khuatkhat hman hi a lak a si lo ding tin ka zum hnget. Culo hrimhrim khalah, kei cun, mi farah le mihnuaita pawl par lawngah si lo in, mi parih thatnak kan tuah mi hin Pathian duhdawtnak a co ih a theitiangtu cun, Pathian in a duh mi hi a duh pi ih, Pathian in a huat mi cu a huatpi ve. Pathian in a ngaithupit mi ziang khal hi ziangtik hmanah a ngainep ngam lo.

Poi ka ti zet mi pakhat cu, kan nu in a pianthar hnu in khawhhran hi a run thlauthla deuhdeuh.a khawmawk ve sun khalah soisel ding le pontam ding hi a thar in a thei ringring. Kawhhran ah a ram lo mi le a ngaih lo mi khal a ngah deuhdeuh. Cule, amah ngaih lotu khal an rung pung ve sinsin. amah vekih Pathian thu ih ‘tui’ ve lo cu a hmu ‘rau lo’ thluh mai ih a hmunian cih; pawl tlakah a ruat lo.

Tu cun kan nu thawn Biakinn kan fehtlang thei nawn lo . Kan Biakinn kan fehtlang thei nawn lo. Kan Biakinn cu kan nun duhdan a bangawk thei nawn lo vekin , kan nupa karlakih lungrualnak le pumkhat awknak khal a rung rulrau deuhdeuh. Kan nui a pianthar hlanah kan nupa nunte kha ka ngai duahdo ko!

Kan nui nundan hi ka bei a dong tuk. thlarau tahfung cu ziang a si ? A rah in a si lo maw? A si le Thlarau rah cu a ‘kha’ thei kem? A kha lo a si ahcun ziangahsaw  kan nui rah suah mi pawl hi thlum ka ti lo? Thlarau mi kiangih um hi teh a zinfe thlak maw? Kei cu kan nui kiangih um hi ka zinfe lawlaw. a thlarau co mi tla hi ziangvek thlarau a si thlang?

Innsang nunnak hrangah donhar in kan nui hnennah thu vun ruah zik dekdo sehla, “kei cu khawvel thil vekmen ah ka buai paih nawn lo,” ti’n in rak ti sanmen hi cuh…..ummm….zo si maw hi vung thong curhci lai ka duh! Milai le thlarau umtlang men bangih, ziang!

Thil dang liangluang hnak hmanin kan nu in innsang a ngaihven duh nawn lo hi ka thin a na hleice cuang.Innsang phurrit in phurhpi duh nawn lo lawng si lo in a theih khal in a theih pi duh nawn lo .Innsungsang pasal le fae tivek cu khawvel thil men an si ih, cuvek hrangih thinlung pek cu ‘milem bia’ thawn a bangaw, a ti! A rak piangthar hlanih kan innsang nuam derhdotei kan rak len lai kha ka ngai tuk.

Tuisun rori cun kan nui parih ka thinhengnak tawpkhawk a thleng.

Kan fangfai a cem ih buh deng dingin kan buhinn vung ong khaw ka lungphang ah ka ngal tum. Buhinn sung cu a rak lawng huauhi thluh. Buhhum khal fangkhat te hman hmuh  ding a um nawn lo! Ka mang a bang tuk. Kan nu ka ko ih buhhum thu ka vun sut cu kan nu cun malte hman mithmai seriai lo in daiten, “Evan Simon lakto hnenah zumnak thlaici ka tuh thluh zo,” tin in ti. Ka cem! ” Na thil tidan hi a luan tuk! Hivek hi maw si Bible in nupi pawl umdan dingih a rak zirhdan? rukru men bangin pasal theihlo sungih a thup a thiarih innsungsang thil hmuah zumnak thlaici tuhnak ih rak hman thluhhi Pathian lungawi zawng a si teh na zum maw? Saul men bangih, tangdorih a thu thlun hmuah tum si lo, peknak thawi Pathian lungawiter tum! Pathian duhzawng ziang a si ti Bible sungih hawl tum si lo, mai ruahnak le tha tidan lawng fehpi ih nung”

Bible siar mi si aw la cu Isamuel 15:22 sung ihsin Pathian in ziang a duhsawn ti hi an rak thei dingih Efesa 5;21-24, IKor. 7:3-4, le Ipet. 3:1-6 pawlih sim mi vekin thlun na duh tengteng ding. Pathian lungawi zawng ziang a si ti thei hmaisa lopin a lungawinak tuah na tum a si ahcun……………na tifuh lo viau men thei”

” Ai…….ai…..ai, zumnak na neih malmal thawi.Bible cang tansan ding cu na hei theithei viau sapbai! Ka Pathain thu ngaizat teh na rak ngai ve dah maw cu! Ziang khalle zumnakah kan kekar a rualaw thei nawn lo ding a si hi. Hitivek cun kan remaw kumkhua thei cuang lo ding. Curuangah kan thenawk lohli hi a thabik ding! Nangmah vek tisa tukthawi um tlang hi ka duh nawn lo……..
ka thlarau nun thanlennak ding indawn kham,”

Tang ding tla kan thei nawn lo. Ka lo suh duh. Ziangruangah saw kan nupa hi kan buai piangthar si veve? Keimai ruangah ? ka nupi ruangah??……………ruangah???

Note: Chin Deirel Journal, 2011 May thla ih suah mi.

(Visited 151 times, 1 visits today)

Comments

comments

2 Comments

  1. Siangte Senhri says:

    Khei khei,cu kel,mak tuk aw,U Par te a si tho,tu lai cu rwl kan ul an tiih mi rel sia na hlir ih khawsa an tam pi..,Zum tu kan nun kan ralring a ttul nasa.Ka awlok an ti song aw

  2. Ka siar man lo nan.. a tha ti ka thei.
    a ngan tu hi ka hmuhlonak a rei tuk ee

Comments

%d bloggers like this: