Kei Cu Ka Lungkuai

Salai Siang Lian Uk @ Kianghrol

Anih cu khawpi tenau pakhat ih um, inn ih um ve maimai ttheu, sunmang tampi neitu fala tleirawl zaran a si. Amah khal hnattuan hlawhtling nei zo a si nan, tlangval zaran pakhat a si ve. Hualvan in a tonawkter hai ih, an duhdawtawk hnu cun tlangval in fala cu tthansohter ve a duh. Fala cun tlangval cu a ziangkim ah a ruat. Tlangval in fala cu midang hmuahhmuah hnakin a theifiang fawn. Fala hrangih a ttha ding mi ziangkim somdawl a duh. Fala khal in tlangval ih lungawinak ding tapoh cu tuah a huam ve.

Tlangval in fala cu inn ih hliahkhuhnak ihsi suak in mahte ding thei mi pakhat siter a duh. Zatlang nun ih harsatnak diktak pawl hmaton ngamtu, hnattuan neitu pakhat siter a duh. Ziangahtile, hmailam can ah amah pakhatkhat cang pang khal sehla, a rung nun khawsuah thei a duh. Curuangah catbang lo in a kaihruai ih, thil dik lo a tuah pang can khal ah, hrothak deuh phah in nun a sim. Fala ih tthatnak ding hrangah fala cu a hruai vivo. Lehhnu cun fala cu a hung hlawhtling ih tlangval tampi in an run ngaihven. E, a hmel a ttha ti kha ka rel tel ta maw! A hni siamsi mithmai cu mi tin thinlung nuamter theitu a si.

Can a liam vivo tikah, fala cun mahte rinsanawknak a nei sinsin ih, a hlawhtlinnak khal a sang bik dinhmun a thleng. Asinan tlangval cun a sir ah umpi in, lamzin a kawhhmuh ringring ih, tthangso sinsin ding in a nor lai. Hmansehla fala cun tlangval in ruahnak a pek cu a duh nawn lo. Ziang ka tuah ding timi ka tthencat thei tuk zo tiah a ruat. Tlangval in a normawh ringring fawn ruangah an remawklonak a karh sinsin fawn. Tlangval ih a normawh ringring mi cu fala in a theithiam nawn lo. Curuangah an to aw thok. An buai. Fala in, “Na thu thlun ringring ding ka si ce lo, ka hrangih ttha bik cu ka ruatcat thei thlang. Ka hlawhtling zo. Ka sinak vekin lungawi zet ih i cohlang theitu ding tlangval tampi an um ko. Cumi na lungkim lo asile, tlan hlo men aw,” ti phah in a feh san.

Tlangval cu a thin a na. Inn ih um menmen fala zaran a si lai ihsin a rak duhdawttu tlangval cun, fala in a ttha lo zawng ih a hmuhnak san a theithiam lo. Mahte ding thei mi siter duh ringringtu, hlawhtlinnak karbak pakhat a kaisuah tinte’n a rak uang aw ringringtu a si cing in, ziangruangah cuvek a ttongsuak thei ti a theithiam lo.

Curuangah hiti’n sim phah in a fehsan ve:

“Na hlawhtlinnak ruangah na thluak sungah duhawknak a suak ih, na hrangih ka lungput hi na thinlung in a hmuh thiam lo phah a si men thei. Na nun ah hnattuan le hlawhtlinnak um lo in, fala zaran men na si lai ah ka rak lo duhdawt. Ka tumtah mi cu nangmah thapek ringring, na thanau lo ding ih lo tuah ringring hi a si. Can tampi kan hmang tlang cing in ka hrangah ziang na si ih, na hrangah ziangvek saduhthah ka nei timi theithiam ding in ka lo tuah thei lo ruangah ka hlawhsam a si ko ding. Na hrangah a ttha bik lawng ka duh, keimah hnakih hlawhtlinnak na ngah tam ka duh. Ka rak tuah ngah mi thil dik lo na tuah ve lo ding ka duh. Cumi cu ka lo kaihhruai le hranhram ih ka lo kawhhmuh ttheunak a si. Na saduhthah mi hmuahhmuah ngah hram ding in duhsaknak ka lo hlan.”

Tlangval cun pakhat le pakhat hrangih sersiam mi an si veve ti a thei. An pahnih an lungawiterawk tluk in zo dang hman in an lungawiter thei lo veve ding ti khal a thei. Asinan a lungkuai thinna tuk ah, an karlak thu ahcun, lehhnu tiang in ziang dang hman a ttongsuak thei nawn lo. Fala khal in lehhnu ah a run theifiang sal nan, khua a tlai tuk zo ih dam sung sirawknak thawn a nun a run hmang ve.

Vei tampi ahcun in duhsaktu taktak pawl parah thinhengnak a suak thei. Asinan in duhsak taktaktu, kan hrangih a ttha bik lawng duhtu an sinak kha theihhngilh pang ding a si lo. Na nun dunglam kha malte vun ruat awla, na nun ih a rak teltu mi thupi kha vun hawl sal aw. Amah vek um lo sehla, tuini ah ziangvek na si ding timi kha ruat hngilh hlah. Cuvek minung ih man neihzia theithiam ding in na thinlung sungih hngalnak, puarthaunak, duhawknak tivek kha a dang ah na ret ta khal a ttul.#

Hram: www.moralstories.com

Comments

comments

Comments

%d bloggers like this: