Kawppi Hawldan Tha

KAWPPI HAWLDAN THA

Dr. Timothy Sui Lian Mang

 “Cun Bawipa Pathian in milai hi amah lawngih um ding cu a ṭha lo; amah bawmtu ah rualpi ka tuahsak ding, tiah a ti.” (Sem. 2:18)

 

Thuhmaihruai

Milai cu kim loih sersiam a si. Pathian in milai a sersiam tikah mi pakhat famkim lo a hrek lawngin a tuah. Mi malte lawng in nupi pasal nei loih um theinak Pathian thilpek an co. Culopawl hmuah cu nupi pasal nei ding kan si. Bible zirhtu saya tamsawn in mi in nupi pasal a hawl tikah a taksa hrek, a kawppi a hawl a si ti hi an zum thluh. Kawppi hawl ti hi Pathian ih a sersiam mi kan taksa hrek kan hawl tinak a si. Taksa hrek pahnih kawm tik lawngah taksa famkim pakhat a si thei. Kum upa kawppi hmuzopawl in fala tlangvalpawl hi kawppi hawldan sim le zirh ding an si. Kawppi hawltu cu mi kim lo kha milai famkim ih canternak a si. Taksa hrek lawngin a kawppi hmu loih a um a si ahcun a nun a hlawhtlingin mual a nei taktak thei lo. A kawppi ding hmungahtu lawng mifamkim a si. Asinan, a mil-aw lo mi kawm pang a si ahcun harsatnak tampi a um ding. ‘Pathian ih a kawm zo mi cu milai in then hlah seh,’ ti hi kan zum. Curuangah Pathian ih i sersiamsak mi hi zo bik a si pei ti cu fimkhur zet le thlacamnak thawi hawl a tul. Nupi pasal neihawknak hin kawhhran nasa zetin a khawih thei. Insang ah buainak a um cun kawhhran buainak a si ko. Kawppi hawldan dik an thiam a tul. Kawppi hawldan thuhla ah Pathian rawn ding a si. Mai’ duhnakah Pathian hruai tum le lungkimter ve tum ding a si lo. Pathian ih a tha a ti mi kha lungkim thluh thei dingin na duhhrilnak kha Pathian hnenah pe thluh aw. Na mit hmangin, na thluak hmangin, nangmai’ duhhrilnak hmangin haihawt hlah. Leitlun mipawl cun awlte’n an neiaw ih, awlte’n an thenaw sal. Khristian hrangah cun thihnak siar loin le uiretnak siar loin nupa thenawk hi Bible in a siang lo. Curuangah ti ciamciamih Pathian lungkimnak hngak thiam a tul zet. Kawppi hawldan tlangpi kan tarlang hnik ding:

Taksa duhumnak:

(Natural Attraction)

Jakob le Rachel ih neihawknak kha taksa duhumnak a tel a si. Jakob le Leah ih neihawknak ah kha cun taksa duhumnak a tel lo. Taksa duhumnak hi kan hnawl men ding a si lo. Kawppi hrilnak ah hin taksa duhumnak hi a tel lo thei lo. Asinan kawppi hrilnak ah cumi lawng cu a tawk lo. A dang tahnak tampi a um. Taksa duhumnak khal cu tahfung pakhat a si ve men.

Pathian mihman zet Dr. Bevan in hiti’n a ti, “Pathian in mi hmuahhmuah hrangih unau dingah a lo tuah. Asinan mi nupi maw pasal si dingah cun taksa duhumnak, hipnak a um a si.” Taksa hipnak, duhumnak hi cu milai ih um cia mi, kan neih cia mi a si.

Na kawppi ding thawn umtlang nuam na ti a tul. Nan nunnak taktakin nan thinlung a milaw ih, umtlang nuam na ti mi a si a tul. Nan duhdan, nan thinlung a milaw lo a si ahcun nei hlah aw. Ziangsimaw kimlonakte nan karlakah a um a si. Umtlang nuam na tinak tla can tawite sung lawng a si lo ding, kum 30, 40 a rei khalah nuam na ti mi a si a tul.

A.  Harhdamnak (Health):

(1) Duhdawtnak cun a neh thei:

Duhdawtnak in kawppi damlo ringring khal thate’n a kilkhawi thei. Taksa mibanglo, piangsual, damlo cia khal duhdawtnak ruangah nupa ah an neiaw ko. England ram ah mitcawnu kha pafel zet pakhat in nupi ah a nei dah. Kawhhran thuanthu ah cuvek tampi kan hmu thei. Duhdawtnak a nasat tuk ih ruangah a duhdawtnak cun taksa cahlonak a neh thei.

(2) A tlangpi thuah:

Asinan, mi hmuahhmuah in cuvek duhdawtnak cu neih a si lo. A tlangpi thuah taksa cahlonak, damlonak cun nupa nun hlimnak a siatsuah. Kawppi a nat leuhleuh a si ahcun a kawppi ve cun a pumpekawk ringring a tul ding ih, insang nun hlimnak, nawmnak tampi cu a khawihsiat ding. A caklo, a damlo sawn khalin hmaisawngnak a nei ding. A tuamhlawmtu hrang khalah thincemnak a um thei. Curuangah harhdamlonak khal hi insang buainak, harsatnak petu a si thei. Duhdawtnak cuaitertu a si thei. Neihawk pekte laiah cun a si lo hmanah, lehhnu vivoah buainak a suak thei. Neihawknak hlawhtling dingah cun nupa harhdam veve a tul ti hi ka zum taktak.

B. Cithlah thuanthu (Herodity):

Kawppi ding kan hawl tikah a pipu lam thuanthu harhdamnak thuah siseh, nun ziaza lam thuah siseh kan zingzawi a tul. Bulpak harhdamnak lawng khal zoh ding a si lo.

(1) Cithlah sawngsin tiangih tuarnak:

Hi thu hi Scientific lam lawngih theih mi a si lo. Bible khalah kan hmu. Pathian dan cu hiti’n a si, “Milem nan be lo pei; a hmaiah nan lu khal nan kun lo pei, ziangahtile keimah cu Bawipa nan Pathian ka si. Keimah huatu parah cun a tefasin san, san thum san li tiang cawhkuannak ka thlenter. Sikhalsehla keimah i duh le ka thukampawl a thluntu parah cun ka duhdawtnak cu cat loin san thawng tampi tiang ka thlenter a si (Suah. 20:5,6). Mino tampi cu an nun a sual zet, ziangahtile an pupapawl in thli an vawrh (Hosea. 8:7). Cuvek milai cu rundam an si thei, nuntharin an nung thei ko. Rundam si hman sehla, nupi pasal dingah duhthu an sam lo. A sualnak cu Zisuh in a ngaithiam, rundam a si ko. Asinan a fate cu awlte’n an piangthar lo ding. Sual ci, thatlonak ci cu cithlah sawng vivo tiang a tlengaw thei. Piantharnak cu cuvekin a tlengaw thei lo.

Tefasin ah hin nunsual zetzet an um thei. Vawi hnih vawi khat ah mangbangza a si theu mi cu khavek Thlarau mi sung ihsin ziangti’n khavek misual a suak thei? Ziangti’n khatluk mitha sung ihsin misual a suak thei? Sualralnak tlengaw sawngsin mi ruangah a si thei? Thli an vawrh asile thlipi a khawm ding” (Hosea. 8:7).

(2) Pathian zangfahnak

Nupi pasal  neiaw zo, pupa sual neipawl cun Pathian zangfahnak an hawl a tul. Ziangkim hi Pathian kut sungih um a si. Pathian in pupa thiltisualnak sung khalin in runhim thei.

C.  Insungsang thuanthu:

 (Family background)

Mirang thufim ah hiti’n a um dah, “A insang ka nei lo, amah lawng nupi/pasal ah ka nei.” Hi thufim hi cu a dik lo ding. Nunau in pasal a neih ahcun a sungkuain an thlun.

(1) Insang nundan:

Insang nundan hin ziangmawzat tal cu in neh cio. Kawppi dingih insang nuntu-khawsakdan zingzawi le theih a tul. An insang ukawkdan a mawi maw, a fel maw? An strict maw, midang hnenah ziangvek lungput nei mi an si? tvk., pawl theih a tul. Cuti’n hmai lam thu a hei ruat thei ding. Kan insang ih nuntu-khawsakdan cu kan duh maw, duh lo simaw insang thar kan din tikah kan theihawk lo lai khalah kan keng. An insang hlun nundan a duh lo mi le a lungkim lo mi khal, insang thar a din tikah a suahpi thotho.

Hi thu hi cu pahra ah pahra a suahpi tengteng cu ka ti ngam lo nan, pahra sungah pasarih cu a suahpi tengteng ka ti ngam. Vawi le khat ah a insang hlun nun lang lo hmansehla, nuamte’n a suak leh ding. Curuangah kawppi hawl lai pawl in hi thu hi theiin fimkhur zet a thupi.

Insang pabik cu fate parah hrohrang zetih biak hmang le mithintawi a si ahcun a fanu, a fapa cu mithinsau, mizaidam cu an har zet ding. Insang nupa duhdaw-aw zet le mifel, mitha sungih si cun mizaidam, minem, mifel na hmu ko ding. Nupi pasal na hril tikah an nu le pa dinhmun ihsin ziangvek mi an si ding ti cu ziangmawzat cu na zingzawi thei ding.

(2) Insang nu:

Nupi ih na duh mi cu a nu ziangvek mi a si ti zoh aw. Ziangmawzat cu a thumaw taktak. A nu in a pa a zohdan, a tuamhlawmdan vekin a lo zoh ve tengteng ding. Ziangahtile a nu in a pa a tuamhlawmdan kha kum 20 mi asile kum 20 a hmu, a zir ngah. Kum 20 lai ni tin a hmuh le a zir mi hmang loin tidan phun dang cu a hmang har zet ding. A thiam cia mi kha a hmang tengteng ding. Cuvek thothoin a pa in a nu a zohdan ihsin a fapa in a nupi a zohdan ding, a tuamhlawmdan ding cu kan thei thei.

~himnakah lungruh zet, lunghak zet mi in biakawknak le leng lam ih vawi hnih vawi khat langnak ah cun nemin tla a lang thei ko. Asinan, ziangtik can ah simaw cun a lunghaknak a lang leh tengteng ding. Insang nem, mawi le tha ihsin thanglian a si ahcun umdan mawi, tawng mawi a hmang ko ding. Curuangah a si, nupi pasal neih hlanah kan kawppi dingih kan duh mi ih insang nuntu-khawsakdan kan zingzawi le kan theih a tul. Pahra sungah pasarih tal cun an nu le pai’ nundan an suahpi tengteng. An insang nundan kha na duhzawng a si maw? Khavek insungsang kha na din ding mi cu a si. Na duhzawng a si lo ahcun na kawppi dingih na ruah mi kha phiat men sawn aw.

 

(3) An sungkua zate

Mipa in nupi a neih tikah a nupi ih insang zate’n a nei cih. Nunau khalin pasal a neih tikah a pasal  insang zate’n a nei cih. Pakhat thawn lawng nan thiaw nan, a takakah cun a insang zate’n na nei.

D. Kum thuah (Age):

(1) Taksa lam:

A tlangpi thuin nunau hi mipa hnakin an tar a awl. Kum bangaw khalah nunau hi mipa hnakin kum 5 in an pitlingsawn ih, kum 10 in an tar a awlsawn ti a si. Curuangah kum thuah cun mipa hi nunau hnakin kum 5,6,7 in upasawn sehla a tha.

(2) Thinlung, khawruahnak lam:

Taksa lam kum lawng si loin, thinlung lam kum a rak um ve. Taksa lamah cun kum upa zet nain, ruahnak-thinlung nauhak a um theih. Kum 30 kim hnu khalih kum 20 vek thinlung nei an um.

Taksa kum upa maw, nupi dingah lungput upa na hrilsawn? Taksa lam na thupitter a si ahcun mipa hi upasawn sehla a tha, lungput-thinlung lam thuah cun nunau kum upasawn a tul. Thinlung-ruahnak lam pitling na duh ahcun mipa in amah hnakih kum upa a tul. Taksa lam thuah cun mah hnakih nauta a tha.

E. Thinlung-khawruah duh mi le tumtahnak:

A tlun lamih kan tarlang mi thu ngapawl hi cu taksa lam, leng lam an sideuh. Atuah sung lam nun, ziaza lam kan zoh hrih ding. Insang hlawhtling din dingah taksa leng lam tlinnak lawngin a ngah hrimhrim lo. Nuncan, ziaza, thinlung-khawruahnak lam le tumtahnak a tul. Sinak, ziaza le duhdan a bangawk loih, a hlatawk tuk a si ahcun nupa cun a rei hlanah an hlimnak a hlo ding ih, harsat buainak an tawng tengteng ding. Taksa duhumnak cu a langte sung hrang lawng a si ih, sinak-ziaza cun rei a daih. Zumlotupawl ih duhdawtawknak hi cu taksa duhumnak lam lawng hi an zohbik. Hi hi cu Bible in duhdawtnak dik le hman a ti mi cu a si hrimhrim lo. Duhdawtnak ah taksa duhumnak a um ko, asinan taksa duhumnak hi duhdawtnak a si lo. Duhdawtnak ah taksa duhumnak a tel ih lungput, ziaza bangawknak, naihawknak khal a tel ve. Curuangah duhdawtnak ah cun taksa lam duhumnak le thinlung-khawruahnak, duhdan, ziaza ngaihaw loin duhdawtnak diktak a um thei lo.

(1) Duhdawtnak (Love):

Mi hrekkhat cu mi duhdawt thiam zetin mi tuamhlawm  le tawngkam tha ui lo an um. Mi hrek cu daiteih um zuarzi men an um. Cuvek ziaza bangaw loin insang nuam din thei a har.

(2) ~hatnak (Kindness)

Mi hrekkhat cu mi an duhdawt thiam lawng si loin mi zangfah-zawnruahnak an nei. thatnak ti mi cu midang zawnruahnak, midang thinnatter duhlonak a si. Ziaza bangaw mi thawn nan neihawk a si ahcun nan nun cu sullam nei, san nei a si ding. Midang zawnruahnak nei, midang thatnak ruatsak duhtu veve an neihawk ahcun insang hlawhtling din a awlte.

(3) Tirhsiang le siang lo

Mitirhsiang zet cun mikhual le rualpi a neih tikah a neih mi hmuahhmuah cu ei dingah cabuai parah a ret theh mai. Cuvek minung kha mitirhfak zetin a neih a si ahcun an insang nun a nuam lo ding. A tirhfaktu sawn kha a thin a na ringring ding.

(4) Tluangtlam le tluangtlam lo:

Suahpiih tluangtlam hrimhrim an um ih, mitluangtlam lo zet an um. Cuvek ziaza milaw lo zet khal nupa dingah a tha lo.

(5) ~awngkamih midik le dik lo:

Mi hrek cu tifekfek le a sinak vek cekciih tawng an duh. Mi hrek cun cuvek cu thupiah ruat loin an pawisa lo. Cuvek mizia bangaw lo khal insang an din tlang asile harsatnak a um thei.

(6) Virvat le virvat lo:

Mi hrekkhat cu taksa cangvaihnak lamah siseh, thinlung lam thuah siseh virvat zet an um. Mi virvat lo thawn an  neihawk a si ahcun milawk a har zet.

(7) Thiangfai le fai lo:

Nu pakhat ka theih mi cu mithiangfai zet a si. An pa cu mibuahcih zet a si ih, an nu in an pai’ dungin thilripawl tla a remkhawm vivo theu. Asinan, an pa cu buahcih zet, thiangfai lo zetin a um thotho. Ni khat cu an inn ah ka va leng ih an pa in lukham zial parah a hlawn, tohkham tla a lingletin a hlawn ka va hmu. Ziangah hiti’n na tuah tiih ka suh tikah hiti’n i sawn, “Ziangahtile ka lungawi tuk lawmam, kan nu inn ah a um loih a pa tei’ inn ah a va leng,” tiin. An nu a thianfai tuk ruangah an pa khan har a ti tuk theu ih  an nu a um lo cun zalen zetin a um hi a rak si.

(8) Sinak, nuncan-ziaza bangaw:

Khristianpawl in duhdawtnak ah taksa duhumnak le sinak, nuncan-ziaza bangawknak a tel ti hi kan hngilh loah a tha. Curuangah Khristianpawl in kawppi ding kan hril tikah taksa duhumnak lam lawng zoh le hril loin, thinlung-ruahnak, ziaza lam bangaw mi kan hril thiam a tul.

Wactmanee sim mi: Shanghai khawpi ah nupa toaw le thuelaw ringring mi ka hmu. An pa kha ziangah so nupi ah cun na thit ti’n ka sut. Anih in hiti’n i sawn, “Ka hmuh pek ihsin a mit tial dumte khan i cuai tuk. Asinan kan neihawk hnuah cun a mit mawite khal ka hngilh theh. Daiteih um ka duh laiah anih in hnih a duh. Nuamnaiteih cetcang ka duh laiah anih in zamrang ih cetcang a duh. Kan remaw thei hrimhrim lo. Thupi, hlapi ka ruah tum laiah a capoh duhtuknak tla hin ka thin a tawk, kan milawin kan remaw thei hrimhrim lo a ti.

Kawppi ding hril tikah leng lam taksa duhumnak lawng cu a tawk hrimhrim lo. Thinlung ruahnak lam kaihaw, milawk a thupi zet. Taksa duhumnak cu a rei hlanah a cuai mai. Neihawk hlanah cun taksa duhumnak hi mihip thei zet khal sehla, nupa nun ah hlawhtlinnak a pe hrimhrim lo,” tiah i ti. Cucu taksa duhumnak a si.

 

(9) Vanram maw Hremhmun?:

Mi pakhat in vanram pahnih, hremhmun pahnih a nei theu. Insang nuam cu vanram vek a si ih, insang nuam lo cu hremhmun vek a si. Zumlotu in hremhmun pahnih an nei thei, leitlun an dam laiah hremhmun ah umin an thih hnuah kumkhua hremhmun ah an um ding. Khristian piangthar khalin leitlun dam laiah insang remawklonak, nawmlonak a um a si ahcun hremhmun ih um vek a si. A thih hnuah cun vanram ah cun a feh ko ding nan!

Nupinu pakhat mitawh hmang zet mi ka thei. Ni tin mi thawn an toaw ringring. A can ah cun thlarau mi zet bangin thla a cam, daite’n a um. Asinan a thintawi a suah can ah cun zohmanin an be thiam lo. An inn kiangkappawl thawn an toaw ringring. A pasal in mi a va lem ih, ngaithiam a va dil ringring. An nu inn a ra tin tinte’n an pa in mi thawn an toaw pang maw, ti a sut ih an toaw asile an pa in ngaithiam a va dil. Thungaite cun ni tin mi thawn an toaw hi a si hrimhrim. A pasal khan midaite um nupi neiin, a nupi khal khan mizathau, pawisak nei lo pasal nei sehla cu an insang nun cu hitlukin nuam lo le harsa an ti lo ding.

(10) Ralrin peknak:

Ka hun sim bet hrih ding. I ngaithiam ko uh. Wactmanee in hiti’n a ti, “Kum tam nawn Shanghai khawpi ah hin Pathian hna tuanin ka um. Ka can hmun li then ih hmun khat hi cu insang buainak tifelnakah ka hmang. Ka hmuhtawn mi ihsin fala tlangvalpawl ralrin pek ka duh mi cu ziaza, thinlung-ruahnak, duhdan bangaw lo hi cu kawpawk lo a tha. Pasal hrangah siseh, nupi hrangah siseh, fate hrangah siseh harsat buainak a tam tuk. A tha hrimhrim lo.”

Cahlonak, tlinlonak:

Cahlonak, tlinlonak ti mi cu ziang a si? Mi hrekkhat milaw zet an si laiah, mizangzel khal an um. Lawtnak cu diknak, thatnak, felnak a si ih, zangzelnak cu cahlonak, tlinlonak a si. Mi hrekkhat cu dik zetih tawng an um. Cu khal cu diknak a si. Mi hrekkhat in tawng bet an hmang, thuphan an per. Cucu nuncan ziaza cahlonak, tlinlonak a si.

(1) Na kawppi dingih cahlonak, tlinlonak theicia aw:

Kawppi dingih tlinlonakah ziangti’n kan tuah ding? Nan hamawk hlanah na kawppi dingih cahlonak, tlinlonak theih theh tum aw. Hamawk hlan hrimhrim ah si seh. Neihawk hnuih kawppi ih cahlonak, tlinlonak hmuh le hawl cu a dik nawn lo. Thilsual a si lawng si loin, at hna khal a si. Neihawk hnuih cuvek ti cu a tlai tuk zo. Neihawk hnuah cun nupi khalin pasal lakah, pasal khalin nupi lakah a cang theitawkin mitcaw le hnaset vekih um a tul. Na kawppi ih tlinlonak cu hawl lo hmanin na hmu ding ih na hawl sinsin ahcun ziang rel ding a um? Neihawknak hi sualnak le tlinlonak hawlawknak ding hrangah a si lo. Nan neihawk hnu cun na mit hmang nawn hlah. Na kawppi ding na hril le na hawl laiah taksa duhumnak ih ruangah na mit cawter fawn hlah. An tlinlonak hmu thei lo koin na mit cawter hlah. Na kawppi dingih na ruah mi ih cahlonak, tlinlonak na hmuh hlanah neiaw dingin hmanhmawh hlah.

(2) Tuar theih mi maw tuar theih lo mi?:

Tlinlonak ah hin tuar theih mi le tuar theih lo mi a um. Tuar theih lo dingih na hmuh mi tlinlonak neitu thawn hamawknak tuah hlah. Na kawppi dingih tlinlonak kha na ngaidam thei ko ding tiih na theihawk lawngah hamawknak tuah aw. Neihawk hnuih tlinlonak hmuh hin sullam a nei nawn lo.

(3) Ralrin peknak:

Tlinlonak bangrep neipawl hi hmunkhat ah an umtlang thei ding ti’n ruat hlah. An harsasawn riangri.

Ziaza (Character):

Neihawknak hlawhtling, insang hlawhtling si dingah pakhat le pakhat upatawk, zahderawk a tul. Hmuhsuam, nautat le hmuhniamawknak a um a si ahcun cui insang cu a siat a si ko. Pasal in nupi ih nuncan-ziaza a lawm, a upat, a zahder thiam a tul. Nupi khal in pasal ih ziaza le tlinnak ah a upat thiam le a lawm thiam a tul. Upatawknak um lo insang cu a cem a si ko. Duhdan, khawruahdan bangrep lo cun insang tluangtei’ fehnak a harter ih, upatawklonak cun insang dinnak hrampi a siatter rori.

Mi hrekkhat cun supawknak an nei lo. An duhtawkin an thin an tawiter. Kawppi ziangtluk a thin a na ding ti an ruat duh lo. Ziangah cuti’n an um? Ziangahtile anmai’ hmakhua lawng an ruat. Anmai’ diremnak lawng an hawl. Mi hrekkhat tla cu thintawi langter hi an di a riam zet. Kawppi hrangah cun a har zet ih, insang hlawhtling le nuam din taktak a har ding. Curuangah kawppi na hril hlanah kawppi dingih ziaza theih cia a tul. Ka tuar thei ding maw, tuar thei lo ding ti ruahfel cia a tul. Neihawk hlanah a ziaza upat ding hawl aw. A hleicein Pathian fatepawl kan neihawk tikah kan upatawk, kan lawmawk le kan zahderawk cu a tul hrimhrim. Mi upatnak nei lo le thiam lo cu nupi pasal nei dingah an tlak lo.

Rualremtei’ um theinak:

Pumpak tlinnak thuhlaih a dang hminsintlak pakhat cu nupi-pasal hi midang thawn remte’n an um thei maw? ti hi a si.

Neihawknak (thitawknak) cu hmunkhat ih umnak a si. Mi hrekkhat midang rem lo, midang thawi umtlang thei lo an um. Rualremte’n midang an umpi thei lo. Mi in a nu le pa, a unau le a rualpi midang thawn rualremte’n a um thei lo a si ahcun ziangti’n insang nuam cu, cu nu, cu pa thawn dintlang thei ding na zumaw mawsi?

Thuthimnakah fala pakhat pasal neih a cu rero thlang. Cu nu in midang hnenah a pa in sia zetin a ti thu, a nu, unau dangpawl le midang khalin tha loih an ti thupawl mi a sim a si ahcun, cu nu cu na nupi ih na neih asile cuvek thothoin nangmah khal midang hnenah a lo sim leh tengteng ding. Cui falanu cu mi thawn rualremtei’ um theinak a tlasam rori a si.

Rualremtei’ midang thawi um thei mi thawn umtlang cu a nuam, a awl. A thupi zet mi pakhat a si.

PUMPEKAWKNAK:

Taksa itumnak, thinlung-khawruahnak lam le ziaza thuhla kan zoh zo. Tu-ah cun thlarau lam nun kan zoh thlang hrih hnik pei.

(1) Tumtah bangrep:

Piangthar Khristian cun zumlotu (piangthar lo) kawppi ah lak hrimhrim lo ding a si. Insang nuam le hlawhtling si dingah taksa duhumnak le ziaza, lungput, ruahdan, duhdan bangawk lawng si loin, thlarau lam tumtahnak khalah pumkhat si a tul. A umzia le a sullam cu an pahnihin Pathian hnatuan duhnak an nei veve ding tinak a si. An pahnihin Pathian hrangih nung an si ding. Thil fate ah siseh, thil tum ah siseh an pahnihin Pathian hrangah an nung ding. Cuvek dinhmun ih neihawknak cun thumawknak hnget a nei riai a si.

(2) Khrih cu Lal ah:

Nupa cu an pumpak nun veve ah Khrih cu Lal a si a tul. An insang lubik, thuneitu sangbik khal Khrih a si a tul. Cuti asile thubuai an neih tik khalah Bawipai’ hnenah an hlan thei ding. Insang roriih Pathian thu ih um, Pathian thu ih feh hi zoh a mawi taktak.

Pathian in thlawsuah lo pe hai hram seh.

Bet: 3nk FCFS mekazin ta lakmi a si.

Comments

comments

Comments

%d bloggers like this: