Kawlrawn Ah Ka Tlawng – Hniangsinpa

Kawlrawn Ah Ka Tlawng

By: Hniangsinpa

Kan Chinland Today ka tlawnlonak duh aiin a rei thlang ih, um a har in, lung khal a leng zet in ka thei. Laitlang ka tlawng ih, cumi hnu ah Kawlrawn lam ah ka tlawng lala fawn, kan Calai thansohnak tampi ka hmuh rualrual in, kan tlaksamnak khal hmu in ka thei aw fawn. Kohhran thuthang lawng silo in, Leitlun thuthang tiang khal in Kawlrawn ahcun an rak nei zo! A mak ka ti ih, ka lung a awi zet. Calai lam ih kan tlaksamnak lawng in lungthin i nuam ter thei lo… Calai khawng duh ruangih, Calai Advertisement kan tum in ka thei (Ka sim duh mi sawn cu, kan Laica si lo deuh, Kawlrawn Laica tam zet ka hmu ka ti duhnak a si) Cumi cun Calai duhdawt hnak in, mai tual tawng hman ih, calai advertise nak siin ka thei… a tha bik kemmaw? tiah ka ruat.

A parlam ih ka ngan zo bang in, Kawlrawn ahcun khawmpi khal hmun dangdangah ka feh ih, cumi ih ka hmuh suah khal Modernization cun kan thinlung luah khat ta hrat in, kanmah le mah kha mi hmuhah kan advertise aw bik in ka hmu. Hnipuan hruh duh dan, khawlak tlanlen duhdan, mi kan va biak dan tvp. cun ka thin in ti thar ih, kannih kan san laiih Pathian thangthatnak hrang khawmpi kan hman theu mi thawn ka vun tah cun, ka ninghang lam in ka thei aw. Pathian thangthat duhtu an umlo tiin ka sim lo, hmansehla thangthat duhnak thinlung neitu mi mal te pawl in, cui can ih an thangthat thei lo cu ka ninghan pi a si ko.

Area/Bial hruaitu, Pastor, Missionary tvp. advertise nak sawn hmang ha? tiih ruah le pawm a har ka zum lo. A dartu khua le Kohhran khal in, zuamawknak an nei khin ka hmu fawn. Ziangah tile, zawi khua ha SA pe tam thei ih, ei le in ah hnianghnar zet ih tuah sak thei, tiin an zuamaw ih, cucu advertisement pakhat a si. Ziangah tile, mikhual pawl an tlun khawm tik ah, cu mi kha mi khua cu an tlin riai tiin thangthat hlawh an duh cio a si bik ko.

Khawte le khawpi hnipuan hruh duh dan khal in danglamnak ngai a nei nawn lo. Ziangah tile, Singapore return/Malaysia return an tam tuk. Thawsa pit epep khalah, Jean bawngbi le kedam tuam hruh ih thlan sa bekbek ih khawlak tlangleng tawk khal an tam, cun mai umnak khua thawn a milaw maw? ti ruat lo ih, an return nak ram thuamawk dan ih, thuamaw khal an tam zet.

Biak in sak that le neih that ah kan zuamaw ih, Pastor neih that ah khal zuamawknak a um in ka thei. Biakin lawng hman silo, a kulhnak tiang neih that kan zuamaw bet lailai!!! Hnam nauta kan siih, mi ti dan kan hmuh mi zir a sual lo nan, a awmmawi tawk kan theih thiam a tha in ka thei.

Nei le neilo in Moto Cycle neih kan zuamaw ih, thir leng mawg cu hmuhniam an si deuh in ka thei. A hleice in tlangval in thirleng thawn fala a len le phei cun, fala thinlung cu dang zet a si! Cuhnak cun, ke thawn leng lawlaw men seh, a tha sawn ding.

Kan thansohnak ih ka theih ve mi pawl cu, zirnak kan ngaina thiam vivo ih, nu le pa khal in an duh vivo. Cun, nun harsa pawl khal in an neih sum liam in an fa le ramlengah an kuat ih, cui an fa le khalin an harsatnak theiin nu le pa cawm hna an thawk thei. Lamzin ah zu ri au aw theih ding a mal ih, sualaw khal hmuh ding a mal vivo. Biakkhawmnak kan ngai pawimawh.

A tlangpi thu ih ka kawlrawn hmuh tawn mi a si.

(Visited 102 times, 1 visits today)

Comments

comments

Comments

%d bloggers like this: