Kawlram Sungah CPU International Card Hman Theih

images (1)YANGON |Myit Ma Kha: Kawlram sung Bank ih hman theumi le, mi tamtak ih ah hmanmi CPU International card tiih theih mi cu , Myanmar Payment Union (MPU Network) thawn pehtlaihnak nei pawl cun ATM hmangin Kawlram sung khawitawk khal ah card hman a thei thlang ding tiin Kawlram thuthang pawl ah an tarlang zo. Leitlun khawitawk hmun ihsi khalin, Kawlram sung ih an rat tikah, Payment Union Card ( PUC ) an nei asi ah cun, sumfai ih ken ciamco a tul nawnlo dingih, Myanmar Payment Union ( MPU ) Association sungtel bank pawl hnen ah awlaiten sumpai an suah thei thlang asi.

Hi PUC hi, 2011 September 15 ah khan, Myanmar Central Bank hruainak hnuai ah cozah bank 3 le Private Bank 14 pawl thawn din a rak si zo.Cun, 2012, September 14 ah khan MPU Debit Card khal an rak tuahsuak zo. 2013 ah, Kawlram Sea Games um idng ruangah Kawlram cozah hin ramdang mipawl hrang ah awlaiten sumpai an hman theihnak dingah le, lehhnu khal ah Kawlram ih khualtlawn a nuam vivo theinak dingih an hmalaknak khal asi.

Sea Games ih ramdang mikhual ra pawl hin, CPU International Card an keng asi ah cun, Kawlram an rat tik ah sumfai ken tullo in, Kawlram sung ih Bank pawl ah awlaiten sumpai an suah thei thlang ding asi. Tu ah hi, Kawlram sungah, MPU hnuai ah, ATM Machine 198, POS Machine 465 a um tiin theih asi. A tlun ih relmi Card pawl hi, 2012 ah China ram ihsin bomnak thawn an tuahmi, China Union Pay fehtlang ih an rak tuahmi asi ih, tu ah hin leitlun ram 141 pawlin hi Card pawl hi an hmang rero thei zo asi. Cun, Kawlram mi khal in hi Card hi neih theih asi zo ih, zokhal hi card a neitu cun, ramdang khal ah sumfai ken tullo in hi Card thawn sumpai an suah vivo thei thlang asi.

(Visited 50 times, 1 visits today)

Comments

comments

Comments

%d bloggers like this: