Kawlram Nainganyee Tiherh Lakih Tumbik Pali

KAWLRAM NAINGANYEE TIHERH LAKIH TUMBIK PALI

By- James Thang

1798863_718833214818198_1955469184_nDaw Aung San Suh Kyi, U Thein Sein, U Shwe Man, Bogyoke hmuugyi Min Aung Hlai 2014 kan lut hnu kawlram ih Nainganyee dinhmun le fehdaanpawl theitheih zetin a thleng aw ti ah hmuh a si. Miphun thuhla, Biaknak group pawl, Miphun Nainganyee le a hlan Ralkap Aanasin kut lai ih Rampi duhtawk ih rak uk pawl le a tu khalah Aana power thawn neih le siah neitu pawl Lutung ih an um mi hmuh ton a theih.

Kawlram dinhmun a thlirtu pawl ih thlirdaan ah Kawlram cu dungah a sip sal, hmailam a pan lo, a cawl zo ti ah ruat a si.

Hitivek dinhmun ah Tum’bik pali tong aw ding ti ih au-aw a ra suak. Tum’bik pali ti ah President U Thein Sein, Hlutdaw Chairman U Shwe Man, Daw Aung San Suh Kyi le Ralkap hruitubik (hotu) Bogyoke Hmuugyi Min Aung Hlai pawl an si.

President U Thein Sein le Daw Aung San Suh Kyi ih a hmaisabik tongawknak cun Leitlun ramkip le Ram sung ah ruahsannak pawl le thinlung cangvainak pawl a suak tir. Cumihnu khalah tthatlam pan in thleng awknak tampi hmuh theih a si.

Tu ah an tongawknak thu thlirsal a si le an pahnih tongawk le reltlangnak cu awsuak lo reltlangnak puai vek a si ih thukam nak le nemhngetnak tuah mi um lo in Kaa lawngih sim le relmi a si ruangah a takih tuahsuak mi zianghman a um taktak lo. Curuangah Daw Aung San Suh Kyi cu a lakin Cozah ih hman’ a tuar ti a theih. Leitlun rampawl ih hremnakpawl tlaniam deuhding hrang Cozah ih bumnak men a si ti ah a tthen cun an ti.

1994 kum ihsin thokin Kawl Ralbawi Aanasin hruaitu pawl ( Bogyoke hmuugyi Than Shwe, MI hotu Bogyokegyi Khin Ngut) pawl cun Leitlun ram tin ih hremnak le press pek tuknak ruang ih harsatnakpawl maldeuh ding hrang Daw Aung San Suh Kyi cu phorhin an hmang ttheu.

U Thein Sein le Daw Aung San Suh Kyi ih Political Honeymoon cu rei a daih lo. 2012 luan 2013 a lai hrawngin an pahnih ih pehtlaih awknak a bal ti cu hmuh le theih a si.

A tu an pahnih tongawk salding hrang a zuam rero tupawl an um. Cumi sungin dokalhtu party an tel vekin Cozah lam ih ttuanvo neitu pawlkhal an tel ve. Kaphnih ih naideuh sumdawng pawl khal cun an pehtlaih awsalnak ding zuampi a si ve.

An pahnih tongawk ding a cang thei ko ( Sumdawng Milian hrekkhat cun President pa ih nupi le Daw Aung San Suh Kyi an tong aw hmaisa ding ih pehtlaihnak tuahsal a si ding tin an sim). A si, an tongaw leteh ziang hlawknak a um ding, ruahsannak neiin maw kan hngak hrih ding. Awsuak lo ih ttapmi lemzuk hlun maw zoh sal a si ding. A bawr le a kel a si pei maw.

thup neilo hmuh relnak ( Transparency) le ttunvo laknak ( Accountability) pawl tu le tu a simtu hruaitu pawl an mah rori ah Transparency si a ttul. Mipi tlun khalah Accountability si ding a ttul.

An pahnih rem-awklonak karlak ah rak lut vetu cu U Shwe Man a si. Tuihlan Ralkap Cozah san Ralkap sungah khat le khat rualremnak tuahtu a ttuan ih Bogyoke Hmuugyi Than Shwe le Duh Bogyoke hmuugyi Maung Aye ttheh ih Ralkap Council ah Aana neitubik a si. A ni hi political Ambition ti ih ko mi Nainganyee Aana hrang ruahsannak neitu a si.( Curuangah U Than Shwe in President a pe duh lo ih daiten a um mi U Thein Sein sawn President sinak a pek ti ah ruat a si thu theih a si)

U Shwe Man le Daw Aung San Suh Kyi ih pehtlaih awknak cu kiangkap a rak zohtu pawl ih mangbang ding tiangin tikcu tawite sungah nel-aw zet a si thu hmuh a si. An pahnih in hlutdaw ah an si ih President U Thein Sein par ih an hmuhnak khal a bangaw veve hmang ti a si.

An pahnih in 2015 hril awknak ah telin Kawlram ih President si duh thu tu le tu sim rerotu veve khal an si.( President ka si le Ram hrang ah ziangtin Vision pawl ka nei ti ih an simmi theih a si hrih lo)

U Shwe Man le Daw Aung San Suh Kyi te pahnih ih pehtlaih awknak cu ziangtluk tiang a si ding ti sim a theihlo nan an pahnih ruangah U Thein Sein a cozah cu a harsa tir phah. Cozah ih theh lutmi Ohpade cian’ pawl cu hlutdaw in namhnget sak loin cawltir a theih vekin a netabik ah Cozah cu zumh tlak a silo timi thuhla suah ih thehlut khal a theih.

Daw Aung San Suh Kyi lamin U Shwe Man hnen ihsin a duhmi cu Daan hrampi remding a si. President tling theinak dawnkhamtu section 59(F) le Daan hrampi remtheinak ding tarlangmi section 436 pawl remding a si. Aana ngah party USDP kai hruai tu U Shwe Man cun himi daan hrampi remding ah a tawlrel rero nan Party sung ah remding hrang lungput a bang awlo nasa.

2011-2012 kum dinhmun thlirsal a si le tum’bik pathum a si mi U Thein Sein, U Shwe Man le Daw Aung San Suh Kyi kar lak ah dialouge a um ih pehtlaih awknak a tthat ruangah rampi ih daihnak le remtthatnak pawl par ah tthatlam a thleng tir ti ah ruat theih a si.

A tu 2014 ahcun tum’bik pathum karlak ah Harmony a hlo mi hmuhton a si. Hikhal cu kapli nat a tuartu Kawlram nainganyee ah thil phundang zet cu a si lo. Hitivek dinhmun karlak ah phundang zet ih a lutvetu cu Kaagyoke ti ih kohmi ralkap hotubik Bogyoke hmuugyi Min Aung Hlaing a si.

Ralkap University (DSA) Apatsin No. (19) tlawngsuak, Shanram ah Kah-Sah-Hta hmuu rak ttuan dah tuhlan Bogyoke hmuugyi hlun Than Shwe Ttaihmuu ttuanvo a laknak Ttatmah 88 ah officer ttuan dahtu a tu Kaagyoke ( Ralkap hotu) ih tuikum a ke kar pawl cu lunglut dingmi tampi a um.

Ziang lunglut dingmi a um ti ih sut a sile bawngbi phoih ih Lunggyi hruk hmang laansin a si. Khatlam ih sim a si le Nainganyee lut a tummi thuhla pawl a si. ( President a ttuan ding zum a um)

Zohfeltu pawl le Diplomatic lam ih reldaanvek a sile Ralkap hotu cu tuikum July thla ah ralkap sinak in a cawl ding ih Nainganyee ah a lut ding ti a si.

Himi ah a fiang hrihlo mi cu USDP ah ziangtin a lut ding, culole Ralkap ih hrilmi kusahle ihsin maw a lut ding ti a si.

Ralkap hotu Min Aung Hlai nainganyee sung a lut thei daanding phunhnih in a um. Pakhat nakcu USDP ah Thupi zet Upa lam hruaitu ttuanvo lakin hril awknak tel ih MP si ding, cuthluh in USDP MP pawl ih sawmso mi Vice President ih hril tling ti a si. Vice President ih hriltling a si hnu ahcu President siding ih hriltling salding a har nawn lo.

A pahnih nakcu kum 60 kim tikcu 2016 kum kumthok lam caan 2015 hrilawknak ih hriltlingmi hlutdaw pawl kothok caan, Ralkap in Pinsin a lak hnu Ralkap hlutdaw kusahle pawl ih direct hril theimi Vice President sinak direct ih lut a si.

Pakhatnak le pahnihnak ah pahnihnak cu Bogyoke hmuugyi Min Aung Hlai hrang nainganyee lut ding le President si ding hrang a olbik mi a si. A fiang mi cu Bogyoke hmuugyi Min Aung Hlai 2015 hril awknak ah President a si ding ti in Ralkap sung ah thu a leng mi thu a si.

Hitivek ih Ralkap hotu ihsin suak ih nainganyee tuahpeh ding thu tawlreltu cu U Than Shwe a mah rori maw silole tufang ih President U Thein Sein sawn a si ti ah Yangon ih Ramkheltu lakah thungai thlakin ruat le rel rero a si.

President inn thawn a nai aw deuhmi sumdawng hrekkhat pawl cun Daw Aung San Suh Kyi le U Shwe Man thawn rem awlo vivo tu President U Thein Sein cun Bogyoke hmuugyi Min Aung Hlai cu sawm in a hrui thei ti ah an ruat.

Ralkap hotu ih nainganyee sung lutding kekar cu U Shwe Man le Daw Aung San Suh Kyi cun an lungkim tuk lo. A hleice in U Shwe Man cun a duh hrimhrim lo.

Daw Aung San Suh Kyi a mah rori in Ralkap hotu thawn tongawding in a dil nan a dil micu tong ding ti ah a hmaisa thu a suak ih a hnehhnu ah tongsallo ding ti thu a suak sal.

Khaikhawm a si le tum’bik pali tongawding thu cu a cang theilo. Ziangruangah ti a sile himi sungih hrekkhat cu Ram hrang hnattuan duh, Mipi ih upat ttihzahmi hruaitu pawl an si lo lawng siloin Political Will khal a um lo.

Himi tum’bik pali sung ah a thupibik cu Daw Aung San Suh Kyi a si. Ziangruangah tile Mipi lungkimpi mi le leitlun ramtin ih thapekmibik a si ruangah a si. A mah ih hmailam a kekar cu a thupi ngaingai a si. A tu ahcun Daw Aung San Suh Kyi le 88 hnahthlak pawl karlak pehtlaih awknak a tthasal ti khal hmuh a si.

Tum’bik pali sungah pahnihnak thupibik cu President U Thein Sein a si. A ni hi Leitlun ram hmuahhmuah ih theihpinak ngahtu a si. Thleng awknak( Reform) cu cawllo ih peh vivo ding hrang a mah ih thazang a ttul. Curuangah tum’bik pali tongawding thu simhlan ah tum’bik le thupibik pahnih karlak biakawk salnak le tongawk salnak a ttul men thei. A sinan aw suaklo tong awknak silo in a tak ih thlengawknak a duh zettu Mipipawl khal ih thei theimi tongawknak phunpawl si a ttul.

Irrawady News/ February 24, 2014

(Visited 575 times, 1 visits today)

Comments

comments

Comments

%d bloggers like this: