Kawlram Hril Awk Hlanah NLD Party Hotu A Thi

Kawlram hril awk hlanah NLD Party hotu a thi

NLD party hohatubik Soe Myinit (kum 87) cu kan dung May 20, 2010 (sunhnu nazi 1:20 hrawngah) ah South Okkalapa (Yangon) ih amai’ umnak inn ah lungphu cawl in a thi ti a si. NLD vice-chairman Tin Oo cun, “Takhin Soe Myint ih thihnak cu NLD hrangah vansiatnak pakhat a si ih, Kawlram politics boruak hrangah ‘Opposition Party’ dinhmun le cah-nak khal amai’ hruainak parah a thum aw ringring tiah a ti. Soe Myint hin ahlan ihsin thaw thawt harsatnak (ashma), lung natnak le thil dangdang harsatnak a rak nei ih, a natnak ruangah vei tampi cu amahte’n a tlu theu tiah a tunu Khine Wint Yi cun a sim.

Takhin Soe Myint hi 1942 ah Japan pawlin Burma Defence Army (BDA) an din ihsin ‘Commanding officer’ a rak tuan ih, Japan pawl uknak a that lo ruangah anmah dawisuak dingin Mirang pawl bomnak thawn Burma National Army timi din suah sal a si ih, cucun March 1945 ah Japan an do thok. Soe Myint cun Burma National Army ah ‘Pathein District commander’ a rak tuah. Kawlram in Independence a ngah hnu khalah People’s Revolutionary Party, Socialist Party, Anti-Fascist People’s Freedom League, Burma Farmer’s Association le People’s Youth League tivevk pawlah hotu le sungtel  a rak si ringring theu.

Kawlram ralkap pawlin NLD hnenah thuneihnak an pek duh lo ihsin NLD cun Reformed Central Executive Committee cu March 26, 1991 ah a din sal ih, cutawk khalah member pakhat a rak si. 1993 ah Soe Myint cun ‘Ghandi Hall ih mipi rorel khawmnak ah ‘Ralkap pawlin mipi hnenah thuneihnak ap duh lo bang sehla, kan tuah tengteng tulmi thil pathum’ timi ruahnak thar a aupi ruangah rei lote sung kaih a tuar.

NLD in Ralkap acozah hnenah 1990 kum ih ram sung hril awknak ih nehnak cotu hnenah thuneihnak ap thlang dingih a dil hnu ah, Ralkap pawl cun ziangtin hman ih thuhla an theihter duh nawn lo ruangah People’s Parliament timi cu September 16, 1998 ah din sal a si ih, Soe Myint khal member a rak si.

Aung San Suu Kyi in ram sung hmunkip a tlawng lai ah, 2003 ah  ‘Depeyin’ buainak a ra suak lala ih, cutawk ah Ralkap acozah cun Soe Myint cu May 30,2003 ah an kai (House Arrest) nan, November 23, 2003 ah an suahter sal.

Tu dinhmun ih NLD party hotu pawl cu: Aung Shwe (chairman), Tin Oo (vice chairman), Aung San Suu Kyi (Gen. Secretary), U Lwin (Secretary); member pawl: Win Tin, Nyan Win, Lun Tin, Ohn Kyaing, Dr.May Win Myint, Han Tar Myint, Win Myint, Nyunt Wei, Than Tun, Hla Phe le Tun Tun Hein pawl tla an si. (-Mizzima)

(Visited 37 times, 1 visits today)

Comments

comments

Comments

%d bloggers like this: