Kawlram cozah in North Korea lawng thu thuthangah suah siang lo

Burma ralkap uk nak a cozah cun tui zarh sungah Yangoon lawngcawlh nak ih a rak thleng ding mi North Korea lawng cung cang thu cu thuthang ih suah lo dingin a kham. Cumi lawng ahcun a mah a cozah hrangah hremhrei pawl phurh asiding ti’n zum a si.

Ramsungih zarhtin thuthang suah tu Weekly Eleven, 7 Days, Yangoon Times le The Voice thuthang suah tu pawl cun, ram leng thu thang ih an suah mi , June 17 ah Nampo lawngcawlh nak in a pok suak mi North Korea lawng The Kang Nam 1 cu United States destroyer ( Tipi thuan thum ih North Korea le ram dang lawng pawl a thling thla tu ) in China tipi a lan lai hmuh asi le Yangoon lam pan ih a rat thu ngan an tum re ro nan, a cozah cun a siang lo.

A cozah thuthang cun “ June 27 hrawngah fangfai tones 8,000 phur North Korea lawng MV Dumangang cu, India ram Kolkata ihsin a rak thleng ding thu a sim. Asinan, ramleng thuthang pawl ih an sim mi Kang Nam 1 thu a theih lo thu a rel bet.

North korea lawng Kang Nam 1 cu NKorea ih missile a thlah hnu US le UN thling thla tu pawl ih zoh a tuar tu hmai sa bik a si.  June 22 ah US thu nei tu in Nang Kam 1 cu Aegis destroyer USS John S McCain cun a dung a thlun vi vo thu a sim.

South Korea ih YTN television thuthang cun, Kang Nam 1 cu missile asilole a pehtlaih mi hriamhrem a phurh ding zum a um thu le Kawlram lampan in Singapore lam sin a pok suak thu Sunday ni ah a phuang. Tones 2,000 a rit mi lawng cu North Korea saklam Nampo lawngcawlh nak ihsin Kawlram ah June 17 a feh thu asim bet.

Rangoon lawngcawlh nak thu nei tu cun, North Korea lawng cu ni rei lo te sung ah Yangoon thlanglam peng 20 ( 30 km ) ih Thilawa lawng cawlh nakah rak cawlh ding thu a sim.

Kang Nam 1 hi 2004 ah hi mi lawngcawlh nakih a rak cawlhlai khal ah Kawlram a cazah hrangih hriamhrei, missile asilole nuclear hriamhrei phun khat khat a phurh ding zum a rak si.

2007 kum ah, Thilawa lawngcawlh nak ih Kang Nam 1  a thup ten a rak thleng thu rak hmu suak tu, Japanese television thuthang agency Nippon News Network ( NNN ) ih hna tuan, Burmese journalists pa hnih cu Kawlram a cozah ih ni thum le zaan hnih sung kaih khum an tawng. A cozah cun Kang Nam 1 cu thlisia le thil ri tul sam nak ruangih bawm nak dil in a rak cawlh sung mi a si tin arak sim.

Kawlram le North Korea hi 1983 lai ih Yangoon ah South Korea president Chun Doo-Hwan an rak that tum ruangah khat le khat ngeih aw lo zet ram pawl an rak sin an, 2007 ihsin rem awk nak an rak tuah sal mi ram an si. Cu hleiah an ram hnih hi International pawlih human right um lo nak bik le sawi sel bik mi a si. 1983 bomb puak lai ih a thi mi minung 17 sungah  president Chun ih bawi pawl le Kawlram thu nei tu pa 4 an tel. 1962 ihsin raalkap uk nak asi mi Kawlram le North Korea ram pawl hi United States ih ram uk tu  tha lo le sual bik ti’n a rak kawh mi pawl an si.

(Visited 73 times, 1 visits today)

Comments

comments

Tags:

Comments

%d bloggers like this: