Kawlram ah Ruahsannak le Thlengawknak

Kawlram ah Ruahsannak le Thlengawknak

Salai Za Kunglal

Salai Za Kunglal

General Ne Win ih rampi thuneihnak a lak kum 1962, March 02 ihsin kan siar le tuih kum 2012 March 02, ah ralkap uknak cu kum 50 a kim. Kum 50 sungah Kawlrampi cu ralkap uknak in ‘The Rice Bowl of Asia’ timi ihsin leitlun farahbik ram ah a hruai thla zurzo.

Ralkap kedam hnuai ih kum 50 um cu a tuartu hrangah kumkhua tlukin a rei. Cubakah, ram tampi ah democracy an hmangih an thanso rero mi thawn tahthim cun kan harsatnak hi a luar sinsin in a lang. Culaiah, kan ram innhnen a simi Thailand, Indonesia, Taiwan, South Korea, Singapore, Philippines, Malaysia le ramdang dang pawl cu dictatorship uknak ihsin democracy uknak lam hawi in an feh rero. Kawlram amahte lawng khuihman feh loin a rak um.

A Rampi cu thansonak a um lo nan, a uktu mithenkhat cu ramsungsuak thilri pawl an pupa ro vekin duhtawk in an cen rero men. Anmah duhlo tu an um le theithiamnak sihte tiate hman nei loin an kai, an hrem, an that.

Cutiih Kawlrampi tumsuklam a panih a ihthah rero lai ah khawvel pi cu a rak feh rero. Berlin Wall pi a tlu ih, Soviet Union khal a tekdarh thluh. South Africa ramih Apartheid khal caang thei loin a taar riairiai. US ah 1962 ih an rak buaibi zetmi civil rights cangvaihnak khal an hlawhtling ih, midum pawl khal hrilawknak ah vote an pe thei thlang. Cule, mangbangza zetin 2008 ah midum president tla an hril sapbai. Cutin kan dung naiteah Arab ramah dothlengnak nasatak a thlengih Tunisia, Egypt le Lybia ram pawlah ukawknak a thlengaw. Himi thluhah Syria a ra lai men thei. Culai lakah, Kawlram cu thlengawk a tum cuang lo.
Kum 1988 ah, tlawngta pawl telin minung a thawngthawng in a rak that. Cuthluh in a hmin a thleng. Burma ihsin Myanmar ah.
Cumi ruangah leitlun ramtampi in Kawlram cozah thawn sumdawnnak an cawl. Sanction an tuah. Asinan, Kawlram in zianghman a poisa lo. Ziangah ticun, ramthenkhat North Korea le Cuba ti pawl thawn sumdawnnak a tuah thei lai thotho.
Cutin mi tampi thinlung sungah Kawlram hi a thlengaw nawn pei maw? Thlengawknak taktak teh a um thei ngai pei maw? Timi thusutnak a rak um. Thlengawk duh ruangah 2007 ah phungki pawlin lamzin an zawhih thlengawk an dil. Ralkap pawlin phungki tlawng rori ah an va that hai. Zohman an zuah tum lo.

Cutin Kawlrampi cu ralkap kuthnuai ah kum 50 a um hnu ah zumbanlo zetin danglamnak a ra thleng. A kum 50 nak cu kumdang thawn a bangaw nawn lo.

A danglamnak pawl cu kan dung kum March thla ah SPDC in President Thein Sein ih parliament hnenah thuneihnak an hlan. Culawng a si hrih lo, thawnginn sungih kum reipi rak um zo tu Daw Aung San Suu Kyi khal thawng ihsin a luat. A party pawl thawn parliament ah tohkham cuhin a vak rero zo.

Cuhleiah, hriamnaam keng pawlkom pawl thawn remdaihnak an tuah rero fawn. Labour laws pawl cu zohsal le tuahthar an siih, canaam le casuah khal a zalen deuh. Internet khal zalen deuhin hman a ngah.

Cuih thlengawknak hrangah tha kan lo pek a si ti langternak ah US ihsin an Secretary, Hillary Clinton cu Kawlram a va tlawng. Cutin US le kawlram pehtliah awknak a tha vivo. Canada thawn ramkhat le ramkhat pehtlaih awknak khal a that vivo zum a si. Ziangah ticun tuhlan ih rak um dah lo mi Canada Foreign Minister ih Kawlram tlawn a tum thu cu tuihzing (March 06) ah thuthangca ah an suahzo. John Baird cu Canada mi Foreign Minister lakah Kawlram tlawng hmaisabik tu ding a si. Ziangtik a tlawng ding theih a si hrih lo.

“Canada cun Kawlram cozah parih sanction a tuahmi a lak kirsal tum hrih lo, asinan Kawlram ih thlengawknak hi tiawkter men si loin, a taktak a si maw ti a zoh rero vek a bang,” tiin Canadian Friends of Burma ih executive director Tin Maung Htoo in a sim. Tu hlanah British Foreign Secretary William Hague khal kawlram a va tlawngzo.

Cutikah, Kawlram democracy ngahnak hrangih hnatuan rero tu ramleng ih um pawlkom tampi cu an cau cuahco thlang. An runsuah tum rero mi ramkhel ruangih thawngtla pawl le an suak thlang, tuahding a um lo vivo vekin bawmtu khal an nei mal vivo ih an sum dawhhna khal a kang vivo a si tiin ‘Times’ magazine ah an ngan. Ziangahtile, democracy cangvaihnak cu a hlan vekin ramleng ihsin si loin, ramsung lam ihsin a um rero ruangah a si.

Cumi ihsin, thusutnak a um lala mi cu, thlengawknak hi a taktak a si pei maw? Mipi le ramdang mi bumnak men a si thei maw? Rei teh a daih pei maw? ti pawl an si thlang.

Cutiih rinhlelhnak a um ding cu a si hrimhrim. Ziangah ticun, parliament ah tohkham tamsawn cu ralkap pawlin an luah lai, thawngtla thenkhat an suak hrih lo, cule ramri ah an kap aw rero lai fawn. Asinan, ruahsannak a nei nawn lomi hrang ahcun malte thlengawknak a um khal hi a thupi tuk. Kum 50 sung rori balbetmi pawl hrangah sihte tiate thlengawknak khal man a nei.

Ziangruangah, tu-ah himi thlengawknak a um, ziang an duhsan? Leitlun ah mithmai an ngah duh ruangah maw si?
Thusutnak tampi cu simfiang theih an si hrih lo. Asinan, a fiangzet mi pakhat cu ‘Kawlram a thleng aw rero’ a si.
A cancan ah, ruahsannak um lo, thlengawknak khal a um lo ding tiin beidong in thu kan ruat theu. A taktak ahcun thlengawknak le ruahsannak timi hi khuitawk khalah a um, ziangtik khalah a um. Kawlram khalah a um.

Sources: Ottawa Citizen News Paper
Times Mekazin

(Visited 53 times, 1 visits today)

Comments

comments

Comments

%d bloggers like this: