Kawhhran lenglam ah Kekar Suak

September 7
Tlawngkai Ninga

Kawhhran lenglam ah Kekar Suak

Bible Siar Ding: Thufim 11:1-11

Dingnak in miphun a cawisang; Sualnak cun miphun mual a photer. – Thufim 11:1-11

Ziangmi in ram le miphun maksak a dinsuah? Mihrek in raalkap cahnak huham, sipuazi (economic) ih miciahneh, asilole mifim le cathiam mipum ziangzat an um timi in a si, tiah an ti. Mitthen cun ram tthangso le huham cahnak thawn a khatmi ramdang pawl thawn kom aw thiam ding asilole a tthangso lomi ram farah pawl bom duhnak thinlung neihnak in a si ti’n ruahnak an pek ve. Santhuanthu tluan ah, ram le miphun pawl cun leilungpi ih mit-hmuh ah siangpahrang uknak saktuahnak in le raalkap thazaang cakternak in anmah te’n an khaisang aw.

Sihmansehla, ram le miphun pakhat in raalkap thazaang cahnak le huham neihternak pakhat men lawng cun a ram a dinsuah thei lo ding. Mifimthiam (scholar) pawl in khuahlan Roman Empire pi ih tlaksiatnak thuhrampi an zingzoi tikah an hmuhmi cu ram uktu pawl ih nuncan ziaza siatralnak le ram uknak ah dingfelnak nei loin nawhthuh einak le siatralnak (corruption) ruangah a si ti’n an phuang. Thufim 11:11 in raalrinnak in pekmi cu, “Miding pawl in thluasuah an pek tikah khua le ram cu a tthangso; asinain mi ttha lo pawl ih ttongkam in khuapi cu a siatter,” ti a si.

Caan tampi ah zumtu Christian pawl in Pathian hna kan ttuannak hi kawhhran sung lawngah si dingin rii kan khiah ih leiteek kan tuah ttheu. Asinan kan innhnen vengpa pawl duhdawt ding le hih khawvel mizapi hrangah cite vekin alnak nei dingah le meifar vekin tleu ding kan si zia kan theih hngilh pang ttheu in ka thei. Nuamnungzet ih kan to mennak dinhmun ihsin kan tho ih Pathian hrangah pumpe in hna kan ttuan tlang cio asile Patian hmin cu mikip nun in sunloih a si ding. Cuti’n Pathian sunloih (glorify) ih a um tikah ram le miphun cu khaisan (exalt) a si ding.

Bawipa, ka khuatlang nunnak sungah Na hmin sunlawinak langtertu si dingin in bawm hram aw. Cite vekin ka al ih meifar vekin alh in kan feh theinak dingah in tthangharh aw. Mahte khawvel daan ih khaisan awk a zuam rerotu si loin Pathian Ttongkam sungah hrambun ih nun thlenghtu in siter hram aw.

Kawhhran lenglam ah suakin ka miphun le mibur sungah ziangfahnak langter thei dingah khui tawk hmun ah ziangti’n ka cangvai ding?

@Pennington

(Visited 18 times, 1 visits today)

Comments

comments

Comments

%d bloggers like this: