KAWHHRAN IH THLA AN CAM TIKAH THIL CANGSUAK A UM RINGRING

KAWHHRAN IH THLA AN CAM TIKAH THIL CANGSUAK A UM RINGRING 

                                                                  By  Dr.Warren.Wisersbe 

Thlacam lo cun huham/thiltitheinak kan nei lo. Jesu in hitin a ti, “ Kei tel loin zianghman nan tuah thei lo.” ( John. 15:5). Thlacam hi kan bulpak nun le kawhhran nun ih a pakhatnak thupi ih kan ret a tul. Apostalpawlih cangvaihnak cabu hi Jesu Khrih in a kawhhran paltlang ih Thiang Thlarau hnatuan a si. Kan Bawipa Jesu Khrih hi leitlun ih a um laiah thu a sim, thu a zirh. Van ih a kai hnuah, cuih a hna cu a taksa a si mi a kawhhran hmangin a sunzawm.

Kawhhran hmaisa kan zoh asile mi malte an si nan, thilropi tuk an tuahsuak. Tuih ni ih kawhhran thawn khaikhin  in ruat hnik aw. Thimnakah tuih ni kawhhran cun pawlkawm tum tla kan rinsan. Kawhhran hrekkhat tla cun kumtin an kawhhran hruaikaihawknak dan tla an rem ih, an kilthat lo cun Pathian in hna tuan thei lo dingah tla an ruat. A taktak ah cun kawhhran hmaisa pawlin milai tuahcawp hruaikaihawknak dan an nei lo. Pathian in nasa tukin a hmang hai.

Tuih ni kawhhran cun Bible tlawng sang ih degree sang ngah hruaitu tla kan rinsan. Training kai tulzia le athupitzia cu kei khal ka zum ko. Bible tlawng khalah zirhtu saya ka tuan ve dah. Keimah rori khal Bible tlawng ka kai dah. Asinan Apostalpawl cu “tlawngkai lo le zirnak nei lo an si ti an theih tikah an mang a bang zet.”

 ( Apo. 4: 13). Anmai san ih biaknak lam zirnak Rabbinical tlawng ih zirnak nei an si lo tinak a si. Tuih  ni ih kan beisei vekin zirnak sang nei kawhhran hruaitu an nei ve lo nan, kawhhran hlawhtling an sizia hi a makin a mak. Sum le pai lam zoh hrih hnik uhsi: Tuih ni ah kawhhran tampi cun sumpai tampi budget  suai ding an neih lo cun ziang khal tuah thei lo dingah an ruataw. Peter in hi tin a ti, “Cule Peter in, “Sui le ngun ka nei lo. Asinan ka neih mi ka lo pe, Nazareth Jesu Khrih hmin in ding aw la, feh aw,” tiah a ti. ( Apo. 3:6). Zumtupawl cu an neih mi an tawmaw ih an eitlang.

Kawhhran hrekkhat cun uktu acozah thawi theihthiamawk le tanpinak ngah lawngah hna tuan thei dingah an zumaw. Zumtu tha acozah hnatuan thuneitu neih hi a sualnak a um hrimhrim lo. Kawhhran hmaisapawl cu acozah hnatuan thuneitu sang khal an um lo. Theithiamawk cu sim hlah, an doral ah ruatin Kristianpawl cu thawng an thlak rero sawn. An vuak, an vel, huat mi an si. Cucing cun thil ropi an tisuak thotho.

Kawhhran hmaisa pawlin pawlkawmpi, member tampi, inn tumpipi, sumpai tampi, zirnak sang nei hruaitu, thuneitu acozah lam ih theihthiam mi le tanpitu an nei hrimhrim lo. Asinan an cangvaihnak, an sulhnu zoh tikah a nasa tuk. Asile an thuthup ziang a si pei? An ropitnak, an hlawhtlinnak thuthup cu  “ Pathian thu” ( the Word of God),  “Thiang Thlarau” ( Holy Spirit) le ‘Thlacamnak’( prayer) hi a si. “ Thiang Thlarau” parah pumhlumin an hngataw, an thumaw. “Thla an cam” ih “ Pathian thu” an phuang. Apostlapawlih cangvaihnak cabu sungah thlacam ti hi vawi 30 lai a lang.

 Tuih ni ih kawhhran cun thlacam hnak hmanin thusim kan uar sawn a bang. Thusim hi a thupi ko. Asinan Apostalpawlih cangvainak cabu ih kan hmuh mi cu Apostalpawlih thusim dunglamah thlacam nun an neihzia khal na hmu ko ding. Kawhhran hmaisa pawlin thlacam ih thiltihtheizia an zum. Kawhhran cu thla an cam le cam lo parah thumawin a hlawhtling in a hlawhtling lo ding. Riahsiat umza le tuksumza a si mi cu,        “Pathian ngaisak bangnak” ( 2Tim. 3:5) kan nei. Asinan huham/thiltihtheinak kan nei lo. Pathian hnatuannakah cangvaihnak tampi kan nei nan, rawngbawlnak cu malte lawng. Cu hnakih besiat sawn cu malsawm-thlawsuah dawng zet bang si in, Pathian sunlawinak rahsuah lo, milai sunlawinak lawng a hringsuak. Kawhhran rawngbawlnak hi milai parih hngataw le thumaw hi riahsiat umza a si. “ Thlacamnak” le “ Pathian thu”       (Apo. 6:4) parih thumaw ding a si nan. Bawi Jesu cun khraws parah kan hrangah a tuan zo. A Thiang Thlarau in kan sungah atu ah a tuan. Khawvel mipawlin nun an neih theinak dingah thla kan cam le a thu kan ngai tik canah kanmah fehtlang in a tuan.

Kawhhran in thla an cam tikah Pathian in thil ropi a tuah a si. Thil cangsuak a um ringring. Apostalpawlih cangvainak cabu sungah khawhhran  thla an cam tikah thil ziangsimaw a cangsuak ringring. Thla kan cam tikah Pathian in ralthatnak, duhdawtnak, huham- thiltitheinak le zangfahlainatnak tla in pe.

Thla kan cam tikah Pathian a cangvai. Kawhhran in thla an cam tikah thil ziangsimaw a cangsuak ringring. Na kawhhranah ziang thilcang mi a um maw? Thla na cam ve maw? Thlacam hi rawngbawl a si ih, na tel ve maw? Tuih ni ih kawhhran cu Pathian- ih lungthlitum thlacamnak rinsan loin thil dangdang kan rinsan a si. Kawhhran thla an cam asile thil cangsuak mi a um ringring, ziangahtile sunlawih ih um thosal Jesu in khawhhran thlacam a thei ih, a phi a pe. Nan kawhhran thla nan cam ruangah thil danglam ziangtal cangsuak mi a um maw?

(Visited 45 times, 1 visits today)

Comments

comments

Comments

%d bloggers like this: