Kanmai’ Duhhrilnak

November 27

Tlawngkai Nihnih

 

Kanmai’ Duhhrilnak

                                                           

Bible Siar Ding: Habakkuk 3:1-19

 

Theipi in rah an neih lo ih sabit hri in sabit a rah lo hmanah …

Ka lungawi in ka thin a nuam thotho ding.

Ziangahtile Bawipa Pathian cu i runtu a si.

–  Habakkuk 3:17-18

 

Bible in ziangvek thil a can hmanah Bawipa thangtthat ringring ding in fial. Cumi cu kanmai’ duhhiarnak a si thei, asinan ziangmi asile…..? Na pasal in thuhla a nei asile, asilole na nupi in a lo tlansan, asilole na faate accident in a thi asile? Thlisia in na inntlun khuh a hlithlo thluh, asilole meikaang in na thilri pawl a siatsuah thluh asile? Khensa (cancer) natnak na nei asile, na hnattuannak boss in an lo dawi asile? Pathian ih kut cu kanmah hrangah si loin in siatsuahtu vekih a lang tikah kan thangtthat thei thotho pei maw?

Pathian ih thuneihnak saangbik cu kanmah can-ai ah in siatsuah theitu amahte (natural) ih thilcangmi pawl a neh thluh ih a daihter tikah kan duh. Cuticun Amah cu kan thangtthat ih A maksak zia cu kan rualpi pawl le sungkhat unau pawl hnenah kan sim kan rel ciamco. Sihmansehla cumi vek a si lo caan ahcun Amah thangtthat dingah kan khul a rang thei dah lo.

Profet Habakkuk cun ahlankhan (advance) in thuhrisahcatnak (decision) a tuah, a nunnak sungih ziangvek thil a can khalah Pathian cu thangtthat ringring dingin. A nunnak hrangah lo theih lo ih ttulmi (necessary) thil pawl a ngah thei lo caan hmanah Pathian thangtthat ding cu a hril thotho, a hril vingvo ding! Kannih teh cuvek in kan tuah thei ve pei maw?

Vancung ih um ka Pa, ka nunnak sungah ziangvek in thilcang hmanseh Nangmah thangtthat cu ka hril thotho ding.

Ka hrangah Pathian in ziangmi si a cang siangih ziangmi si a cang siang lo? Cumi in ka dinhmun parih ka khuaruahnak le Pathian parih ka khuaruahnak ziangti’n a danglamter?

 

@Pennington

Comments

comments

Comments

%d bloggers like this: