Kanmai’ Caan

October 26

Tlawngkai Ninga

 

Kanmai’ Caan

                                                           

Bible Siar Ding: Juda Cakuat 17-25

 

Rinhmainak a neimi parah zaangfahnak nei uh;

Midang pawl kha meisa sung ihsin suah uhla rundam suak uh;

Cule a dang pawl parah zaangfahnak le ttihnak langter uh,

Sikhalsehla an tisa hiar sualnak in a hnawihnihmi an hnipuan pawl cu hua uh.

– Juda Cakuat 22-23

 

A zaangfah-lainatnak (mercy) sungah Bawipa in misual le mihloral ding pawl a ruun suak. Rundamnak cu Amai’ hnatuan a si, kannih ih taa a si lo, a dik maw?

Kawhhran hmaisa zumtu pawl hnenah dungthluntu Juda in hiti’n cakuat a ngan, “Rinhmainak a neimi parah zaangfahnak nei uh; Midang pawl kha meisa sung ihsin suah uhla rundam suak uh; Cule a dang pawl parah zaangfahnak le ttihnak langter uh, Sikhalsehla an tisa hiar sualnak in a hnawihnihmi an hnipuan pawl cu hua uh” (Juda Cakuat 22-23).

Pathian in A zaangfah-lainatnak a cotu zumtu pawl kha A zaangfah-lainatnak a ttultu pawl ruunsuaktu dingah a hmang ttheu. Vansiatnak ah, Juda ih a tarlang bangin A zaangfahnak a ttulsamtu pawl hi mi ollo pawl, mi puarthau pawl, Pathian ziang siar lotu pawl kan hmuhton ttheu mi pawl an si ttheu.

Cucing in, kan parah A duhdawt zaangfahnak tamzet in a karzaiter ringringtu kan Pathian cun midang pawl kha Khrih hnenih hruai dingah in forhfial a si. Ziangtluk ih mi sualral le mi luhlul  an va si hmanah an nuncan ziaza cu ziangvek in zohsia le fihnung va si hmanseh Juda cu cutivek misual le mi ttha lo pawl hrimhrim kha Pathian ih zaangfah-lainatnak coter ding in fial ih asinan sualnak an tuahmi pawl cu hua uh in ti.

Mi pakhat in Pathain ih zaangfah-lainatnak thu hiti’n in sim dah. Atu caan hi kannih zumtu pawl in Pathain ih zaangfah-lainatnak midang hnenih kan langter caan a si ti’n.

Zaangfah-lainatnak ih khat Bawipa Pathian, Nangmah a lo ttultu pawl hnenah Na zaangfah lainatnak langtertu si dingin pum ka pe. Na Zaangfah-lainatnak cotu ka si bangin midang tla coter theitu si dingin in bawm hram aw.

Tuni ah cuih hnatuan sunglawi, Pathain hnenah A zaangfah-lainatnak midang hnenih langter theitu si ding cu zo in so a thok ding?

 

@Pennington

(Visited 30 times, 1 visits today)

Comments

comments

Comments

%d bloggers like this: