KAN TIKCU CAANTTHA ZIANGTIN KAN HMANG?

KAN TIKCU CAANTTHA ZIANGTIN KAN HMANG?

CJ Hrang Hmung

Pathian zaangfah lamhruainak in kumpi kumkhat cu kan liam thlangih kumthar sungah kan lutsal lala thlang. Atu caan hi liamciami kumkhat sung Pathian ih in umpinak, lam in hruainak pawl ruat sal le zohkir in a zaangfahnak pakhat hnu pakhat siarphah in Pathian hnenah lungawi thusim in caan a si. Ziangtluk caan remcang lo, caan harsa kan ti khalle kumpi kumkhat sungah khopkham te in kan ei, harsatnak  tampi kan tong kona’n kan pahsuak, kan lansuak thei, himdam te in kan um, damcahnak caan tamsawn kan ngah. Ni 365 sung him le damtein a thla hnuai ah in kilkhawi ih tuvek caan ttha sunglawi ngah in kan um thei hi lungawi thusim ding hrimhrim kan si.

Kumpi kumkhat kan liam tikah cun “tikcu caan” timi hi tthate’n ruatsal cio sehla duh a um zet ding. Kan nunnak sungah caan ttha, caan sunglawi tampi kan co ngah ih a liamzo caan sungah ziangtin kan hmang? Atu ah teh ziangtin kan hmang rero lai? Hmailam ah Pathian zaangfahnak kan co vivo ih kan dam cak vivo hrih ah teh ziangtin hman kan tum? Kan duh lo zawng tikcu caan khal tampi kan pahsuak vivo zo. Kan ruah ban lomi caan ttha, caan sunglawi khal kan co. Cumi sungah “Tikcu Caan” timi cu amah te’n a herliam vivo. Kumkhat hnu kumkhat a liam rero. Kan kum khal kumkhat hnu kumkhat kan tar vivo. Asinain kan caanttha ziangtin kan hmang ttheu? Kan co rero hrihmi “Tikcu Caan” timi thuhla hi daithlanpi men loin thupi takih ruah ding a ttul ve mi pakhat a si tiin kan ruat cio a ttul lo maw?

1. “Tikcu Caan” timi hi a tawi ngaingai

Ca Thianghlim a zate’n kan siar tikah tikcu caan thuhla a phunphun ih nganmi kan hmu thei. Job cangantu cun, “Ka tikcu tthatnak um loin an liam vivo, Zualkotu hnakin a zamrang sawn. Ka nunnak cu a lan vivo, a rangzetmi long bangin, Ar a namtu khaupi bangin a zamrang a si,” a ti (Job 9:25-26).  Kan Bawipa Jesuh Khrih khalin, “Sun a si sung ahcun i thlahtu ih hnattuan kan ttuan rero a ttul a si.

Zaan a ra thleng cing dingih zohman hna an ttuan thei nawn lo ding,” tiah tikcu caan a tawizia le a thupitzia simphah in ralrinnak in pek a si (Johan 9:4). Jeim cangantu khalin, “Nan nunnak cu caan tawite sung a zaam ih a hlo salmi mero bangtuk a si,” tiah nunnak le mero tahtthimnak thawn ralrinnak in pek ve (Jeim 4:14). Curuangah kan theih cio vekin kan tikcu caan hi mittthep kar lakte ah a liam cingcing. ‘Mitute’ timi
khal kan ngah thei sal nawn lo. Kirsal kan duh khalah kir theih a si nawn lo. ‘Tikcu caan’ timi hi a tawi ngaingai a si. Cumi cu kan thei tuk ciomi a si ko.

2.  “Tikcu Caan” timi hi man a neizet ruangah a lakin liamter ding a si lo

Paul in, “Caanttha nan neih mi kip kha felte’n hmang uh; ziangahtile kan san hi sansia a si. Mi aa si hlah uh; Bawipa in tuahter a lo duhmi kha hawl tum sawn uh,” tiah forhfialnak a nei (Efe. 5:16-17). A tu kan san hi san netnak lamah kan um, ti hi kan cingkeng ringring a ttul ngaingai. Kan nunnak sungah Pathian ih duhnak ziang a siih nunnak ih sullam khal tthate’n ruat phah in kan comi tikcu caan ih man a neihzia fiangte’n in simmi a si.

Curuangah nitin kan comi tikcu caan ttha hi a lakih liam ter men si loin kanmah le pumpak cio parah in pek fingfingmi thil ti theinak kan hmang cio ding a thupi ngaingai. Kumkhat hnu kumkhat, nikhat hnu nikhat kan liam rero ko na’n kan tikcu caan hmanmi hi ziangvekin kan hmang timi tthate’n ruat kan ttulzet. Tikcu caan kan hman rero mi hi ka hrangah ziang tthathnemnak ka tuah? Midang hrangah teh ziang ka tthathnempi ve? Pathian ram hrangah le Pathian hnattuannak hrangah teh ziangvek in ka tikcu caan ka hmang? tiin kanmah le kanmah felzet in kan cekfel awk ringring a ttul.

Kan Bawipa Jesuh Khrih khal cu tikcu caan ih man a neihzia a thei ruangah a nunnak caan tawite sungah man neizet in a hmang ti kan hmu. Amah a dodaltu pawl parah thinsaunak in a lehrul, mi tampi hnenah thuthangttha a phuang, mina a phunphun a damter, mi zovek khal hnong loin a cohlang, nauhak pawl khal thluasuah a pek, mopuai tiang hman man neizet in a feh, a tel, amah mawhtluk le sualpuhnak a phunphun tuahtu pawl a lehrul hngai lo ih tangdor le thinniam tein a lehrul, ti pawl kan hmu thei.

Psychologist pawlin ‘kan tikcu caan ziangtin kan hmang timi zoh in kan nuncan ziaza ziangvek a si tihi sim a theih,’ an ti. Kan tikcu caan hi olte’n a liam cingcing ruangah fimkhurzet in hman hna kan thiam a ttul ngaingai. Caan a liam hnu ah siir aw sal lo dingin kan tikcu caan tthazetih kan hman thei ding a ttul ngaingai. Tikcu Caan timi hi sun caan vekin a tleu ringring lo ding. A thimmi zaan caan khal a ra thleng cing ding. Cuih caan ah a liamciami kan tikcu caanttha pawl ngai in, pamhmai in kan tisualmi pawl parah kan siirsalmi tampi a um ttheu. Ziangti vek in kan tikcu caan kan hmangzo va si khal le a ra lai dingmi kan hmailam kan tikcu caan kan neih hrihmi hi a tawi vivo ti hi theihthiam ding a ttul ngaingai.

Kan nunnak tikcu caan a netnak lam pan vivo in khua a tlai vivo tikah tuah dingmi, tuah duhmi, tuah ttulmi pawl ka tuah ngah lo, ka tuahsuak lo tiin kan siir aw leh ding. Tikcu caan a tawizia hi a liamcia kumhlun pawl kan zohkir tikah in khihhmuh ringring. Curuangah kan tikcu caan neihsunte, Pathian in caanttha in peek hrihmi kumthar sungah Bawipai’ ram hrangah le amai’ sunlawinak hrangah kan tikcu caan kan hmang cio pei.

Mi va relsiatnak, mi va hmuhniam in soiselnak, mai’ hmintthatnak ding hrangah midang va palbet, ziang siar lo um tvp kha kan hrial hram pei. Cubang thil ttha lo pawl hnakin Pathian ram hrangah, kan miphun hrangah, kan nunnak hrangah a tthatnak in caan hman cio sawn uh si. Cumi cu a thupizetmi a si. Kumthar a hungsuak sal vekin hi kumthar sungah kan minungpi pawlih tthathnemnak ding hrangah kan tikcu caan pawl kan hmang cio hram pei. Hi khal hi thil thupi pakhat a si ve. Saam cangantu cun “Kan nun tawizia siar daan in zirh awla, cule mifim ah kan cang ding,” a ti (Saam 90:12). Atu hi kan tikcu caanttha kan neihmi a si. Asile duhdawtmi casiartu, zumtu u le nau “Kan tikcu caanqha ziangtin kan hmang?” ti na ruat ve dah maw?

(Visited 28 times, 1 visits today)

Comments

comments

One Comment

  1. Caan tha kan neih sun te hman thiam ding hi a tul zet e. Tha zang ka ngah zet.

Comments

%d bloggers like this: