Kan Sungmuril Langtertu

Salai Sian Lian Uk Kianghrol

Kalay khawpi, Bogyoke lamzin ih traffic meisa a um hnu ahhin, zoh mawi lo zet mi pakhat cu meisa sen lai feh lan thotho kan tam tuk mi hi a si. Khatlam (meisa hring ngahtu lamzin) ih fehtu an um lo can ih feh lan thotho hman hi thil dik lo a si tinak ih lai ah, khatlam an feh rero lai khal ah a feh lantu tampi kan um thotho.

Himi hi daan kalh a si lawng hman si lo in, minung nunnak tiang siatsuah thei a si ti cu kan thei cio ko ding. Asinan mi tampi in lamzin daan kan thlun lo thotho.

Hivek lamzin daan pahbaltu ahhin tlawng saya, pastor, kawhhran upa, phunsang tlawngta tivek tiang an tel ttheu tikah, kan zatlang nun ih hmailam cu ruahharza a si. Ziangruangahtile mi tampi cun “kan thinlung ah midang kan ret lo, mai’ ttanghma sialnak hlir in kan khat” tinak a si. Cumi pawl ih kaihhruai mi nauhak pawl cu ziangti’n an lungput a dik thluh thei ding?

Traffic meisa a sen sung caan malte hman hngak thei lo in, mah duhnak ih feh cih kan tumnak lungput hi thil ttihnung zet a si. Kan thinlung sungmuril ah midang duhdawtnak, zawnruahnak le lainatnak a um lo timi a lang.

Himi lamzin hi nangmai’ bulpak ta a si lo. Kalay khawpi thawn a pehpar mi minung hmuahhmuah ih neih mi a si. Leitlun hmun dangdang khal ah, zatlanghlawm ih hman mi lamzin hmuahhmuah cu cuvek thotho an si thluh. Curuangah na feh thei caan a um vekin, midang hrangih lamzin na pek can tla a um ttul.

Kan bulpak nun khal ah kanmah kan cangvaih ding caan a um vekin, midang hrangah cangvaihnak can kan pek a ttul caan tampi a um. “Na venghnen duhdawt aw” timi hi kan thinlung sungmuril rori ih a um lo ahcun, a lenglam ih hmansuah ding cu a ol lo ngaingai.

Nangmai’ ruangah mi tampi an buai kha poi na ti lemlo ahcun “na venghnen na duhdawt lo” ti cu a fiang zo. “Pathian cu duhdawtnak a si” ti thei thluhtu Khrihfa kan si ih, “venghnen duhdawttu ding” kan si thu khal kan thei thluh nan, vei tampi ahcun kan nun ah a lang lo ttheu.

Salai Sun Ceu ih “Kan thinlung sung’h a rak um lo mi thil pakhat te cu, thungai in duhdawtnak pangpar a si, thungai in duhdawtnak pangpar rak um ta sehla, leilung ziangtluk in so a rak mawi ding” a timi hi Khrihfa pawl sawmngairnak in tuahtu pakhat a si ve a si hi.#

Comments

comments

Comments

%d bloggers like this: