Kan Ram Umdan-6

KAN RAM UMDAN – 6

(Violence Vs. Non-violence)

July 7, 2012

Pu No Than Kap

Kawlram (Myanmar) ih ram-mipi (citizens) thinlung umdan (lungput) cu a tlangpithu in a hakzawng ih hruainak duhtu le a nemzawng ih hruainak duhtu tiin phun hnih in then theih a si.

Kan ramhnen India cun zalennak ngah thei dingin a nemzawng le a hakzawng cangvaihnak pahnih lakah Chandrabose ho ih a hakzawng (violence) cangvaihnak hnakin Gandhi ho ih a nemzawng (non-violence) cangvaihnak cu an hril sawn. Curuangah 1948 ih zalennak an ngah hnu kum 60 leng lo tui ni tiangin an ram ah ziangvek buainak le harsatnak a suak khalle Democracy dan ih ukawknak cu a ti buai ban dah lo. Vanduaiah Kawlram  in zalennak a sual laiah Gen. Aungsan ho ih a hakzawng (violence) cangvaihnak lawng a rak um. India bang in hril ding dang a nemzawng (non-violence) cangvaihnak a rak um lo. Cutikah  kan rampi hrimhrim hi a hakzawng cangvaihnak ihsin ra piangsuak le zalennak ngah a si.

Leitlun ralpi veihnihnak ih Mirang lal Prime Minister Churchill cun, Kawlram cu zalennak (independence) ngah tlak an si hrih lo, zalennak pek ci khal an si lo, kan pek a si le kum khat sungah anmah le anmah an doaw ciamco ding a rak ti dah. Cu taktak in Kawlram cun zalennak a ngah hnu kum khat hman kim hlan  thla thum sungah anmah le anmah nasaten an doaw. 1943 ihsin 1945 tiang Kawlram lu bik head of state rak tuan Dr. Ba Maw cun, Kawlram ah mino pawlin hriamhrei kai ih cangvaihnak an uar tuk thlang. Hitin a feh vivo a sile Kawlram ah me-kuang ballot box, cah-nak in hmun a nei nawn lo ding (Democracy cu meithal cah-nak hmangih rorelnak in a neh ding), tiin a rak sim dah. A sim vek cekci in Kawlram ah Democracy dan in me-kuang hung ih rorelnak cun kum 10 lai lawng a daih ih cui hnu kum 50 lai cu theih cio bangin me-kuang in umzia nei loin hriamhrei  cahnak in thu a nei lanta.

Riahsiatza in Tlangparmi hnen khalah a hakzawng in rorel vivo a si tikah Tlangparmi khalin a hakzawng hmang ve in mai hnamdamnak ding dil suah le sual suah an tum cio ve. Cutin hriamhrei hmangih ram tundin tumnak ci cu a nung vivo ih Shan, Kachin le a netnakah Chinram tiang in cui thlaici cun fano a nei vivo. Mai tlamngparmi lala lakih thuneihnak hrang khalah a hakzawng hman tumnak a pung vivo. A rah suah cu ramhnenpawl van an kai thluh laiah kannih ve cu leiri te ah rak hnukawk rero a si men.

Tui ni ah Chinram damnak, lole dinsuahnak ding hrangah ziangvek lungput kan nei ding? Ziang lamzin kan zawh ding? Ziang kan uar ding?  A hakzawng maw a nemzawng? Hril ding a um ih hril theinak khal kan nei. Kawlram thuanthu cu lamzin in kawhmuhtu zirhtu tha ah hman theih a si.  Kan hmang thiam maw thiam lo ti le ziangtin kan hmang ti cu a hmangtu kanmai parah a thumaw.

Bet: Rihli group mail ta lakmi a si.

(Visited 34 times, 1 visits today)

Comments

comments

2 Comments

  1. Pu Than, ron ngan ‘theu aw, atak ih ka hmuh tawn hrih lo mi ka Zirhtu ropi hokhaw na si.

  2. Upat mi pu Than, na sim dik riai

Comments

%d bloggers like this: