KAN RAM UMDAN-2

KAN RAM UMDAN-2

(Democracy Vs. Ethnic Issue)

November 29 sun ah Zakhaing party hotu pakhat in, “Ziangah Pi Clinton hnenah Kan ram ah Democracy hnak hmanin Tlangpar mi thubuai relfel a thupi sawn, tiin na sim. Na sim mi a dikzia na prove thei ding maw?” tiin i sut. Kawl thuthang ca ih ka thusim suah mi siartu khalin an buaipi celcel.

1988 laiih Kawlram Tlawngta buainak ruangih Mizoram lam tiang ra tlansuak Chin mino pawlin Burma Democratic Front (BDF) timi an rak din tikah an hotupawl cu, “ziang nan tumtah bik?” tiin ka sut. “Kan tumtah bik mi cu Kawlram in Democracy ngah dingah a ?ul a sile nunnak tiang pe ih  ?uan a si. Curuangah, Burma Democratic Front tin party hmin khal kan peknak a si,” tiin in sang. An hnenah, “Kannih Tlangpar mi (Chin) ih kan ?ul hmaisak bik mi cu ukawkdan pakhat (governing system or ideology) a si mi Democracy hnak hmanin, hnamlainatnak (nationalism) a si. Kan rampi in Democracy ngah hman nungla, ukawkdan Constitution (Danhrampi) cu 1947 lai bangin a hmin menih Federal, a takih Unitary a si ahcun, kannih Chinmi hrangah hnamdamnak a tling hrimhrim lo ding,” tiin ka rak sim hai. An lung a lut taktak a si ding, an zaten ka ?uannak Chin National Front (CNF) ah an lut thluh ih tui ni tiangin CNF hotu rung si lanta khal an um.

Vanduai ah Gen. Aungsan a thih hnu ah 1947 Constitution run ngan a si. Zalennak (independence) rampi in a ngah veten Democracy dan in ukawk a si. Kan ram khal Asia khawmual rampawl lak hmanah a thangso bik le nuam bik a rak si. Tui Yangon ih President Cenema Hall khal Asia ah a mawi bik ti a rak si. Culaiih Mingladon Airport cu Asia ah a tum bik, a mawi bik ti a rak si. Kan innhnen Thailand ram ah cawleng thawn an vak rero laiah kan ramah mawtaw mawimawi thawn kan rak vak thei zo. Culaiih Kawlram ih cathiam sang pawlin Singapore ah ca zir bet dingin State Secholar in feh a theih an ti hmanah, Kawlram hnakih rethei le farah deuh Singapore ih feh ka duh lo rak ti hman an um. Culaiah Yangon ih Phunhra (Matric) awng cu, leitlun Tlawng ?ha bik rak timi Oxfort University ah zawm thei cih tlakin fimthiamnak lam khalah rampi dinhmun a rak sang. Culaiah Paisa fang khat in arti pum 40 leng lo a rak lei thei. Cozah hnatuan thlatin 50 fang hlawh nei khalin nuam zetin a sungkua a rak cawm thei. Culaiah “Asia khawmual ih Buh-cuampi/khengkumpi (the rice bowl of Asia)” ti mi cu kan Kawlram a si. Rampi President rori khal Tlangparmi Shan miphun Saw Suithaih a si.

Cutin kum 10 a rung kim. Asinan Shan, Kachin pawlin, 1947 ih Pinlung Agreement kan rak neih laiih kan rak saduhtah vekin Tlangpar mi le Kawl lakah rualranten nuntlangnak a um lo, kan nunphung le calai khal zalen zetin kan kilhim in kan cawisang taktak thei lo, curuangah Pinlung thukam thlun ih ngan mi Danhrampi (constitution) ah kum 10 a kim hnuah rampi ihsin suahsal a theih a ti bangin, rampi ihsin kan suak ding, tiin an dil. Prime Minister UNu in Tlangparmi lungawi lonak cu a relfel thei lo. Cutin UNu san ih Democracy dan ih ukawknak cun kum hra fang lawng a daih ih 1962 ah a cem.   Democracy ram nuam le ram thangso Kawlram pi cun a lennak le a nawmnak a hloh ih Democracy khal a thi cih ve .

Curuangah, miphun zarawi, nunphung zarawi le anka phunphun um khawmnak Myanmar rampi vek ahcun, democracy hnak hmanin, Tlangparmipawl thuhla (dinhmun) kumkhaw daih ih felter a thupi sawn ka ti ngamnak tinak a si. NTK (Peh lai ding)

PS : Rihli Group Mail sungih sin lak sawn mi a si.

(Visited 45 times, 1 visits today)

Comments

comments

Comments

%d bloggers like this: