Kan pupa cahnak salurop kan thansonak ah sawmso uh

Kan Pupa Cahnak Salurop kan thansonak ah sawmso uh

By : Rev. Thang Tin Sum

Thu ka ruat rero ih, Laimi pawl hi kan pupa san in tui mino san tiang, kan duhmi kan tumtahmi hi tuahthei lomi kan nei tuklo, ka ti le ka sual lemlo men ding ka ti. Kanmah tawkten,thil ti thei zet, cahnak a neimi, miphun pakhat cu kan sive .

Kan pupa san, hlanlai deuhah cun, an cahnak, an thilti theinak cu, sakah, conlam le buan thiam tivekin an rak tah. Taksa lam cahnak, thazaang cahnak khal an rak uar ngaingai.

Buan thiam micak pawl cu, tulai san ih Karate le Boxing thiam tluk in an uar ve. Buan cakbik an si le, “Buan Thio” ti tlan fapa hmin an sak. Buanthio ti cu buanah a cak bik tinak a si. Buan champion tinak a si.

Zialpi tum zetzet a pu theitu, lungto tumzet a hril theitu, an sawk theitu, a deng theitu pawl tla an upat zet. An cahdan mipi in an rel hiaihiai ttheu. Hlawn Dawh Thang thuanthu khalah lungto den thu kan hmu thei.

Kan pupa sanah conlam le sakah cu an uar bikmi a si ka ti le ka sual lem lo ding. An cahnak bik an tahfung cu ” Salu” ah a tthum aw bik a si ko.

Salu thuhi hlanlai phunsang tlawng ka kai lai ih sin napin ka rak rel ttheu mi a si. Hla khal ka phuah ih cahram khal ka ngan dah. Cumi thu malten vun peh bet sal ka duh. Kum 1973, Tlauhmun khuaah tlawng saya a laangten ka rak ttuan.

Tlawngta pawl thawn kan tlan khawm tikah, mino pawl cu thu hnakin hla ih forhfial hi hmual a nei deuh ti ka hmu fiang. Cuiruangah hla a phunphun ka phuah ih mino pawl in an duh zet. Cuticun kaih hruaiawk tla a nuam ngaingai.”Salurop” timi hla tla ka phuah.

Cumi “Salurop” timi ka hla a suaknak thu malten rel sal ka duh. Tlauhmun khua hi ka pa hringtu ka pu Than Zam ( Tlau lal fapa nauta lam) suahnak khua a si. Tlauhmun khua hi ka pu tei khua a si ruangah inn tek tlan in ka tlang men. Tlau unau pawl khal in in nel zet. An mai khawmi vekin in ruat ve.

Nuam ka tizet. Kum 1973 hrawngah cun inn 70 lenglo lai an taang hrih. Lai inn sau riangriang pawl tla hmuh ding a um lai. Inn ih kip ka zoh tikah. Salurop a tam ngaingai. Salu phunphun ti cawk lo an tar.An bang cu salu in a khat thluh.

An lal tei inn tla cu Salurop a tam cuang. Sahrang phunphun lu siseh, sa hriva timi tlummuang, zawnglu siseh ramsa lu a khat thluh. Culawng si lo in, inn zuat tilva lu khal a tam ngaingai.

Naacang, Secang lu ih sin, Voklu tiang…. Salu phunphun an tarmi  hi siar cawk ding a si lo. Khuahlan lai ka pu le pawl, Tlau inn 300 khua an timi ah ziang tivek in an rak tlangleng ih, ziangtlukin an rak nuam ding ti pawl ka mitthlam ah ka suai thei. An zu in le an sa ei, an com le lam pawl, ziang tluk in an rak nuam ti pawl ka ruat sal. Tulai mino san ih night clup timi cu a nepte ding ka ti.

Kan pupa pawl an rak nuam sawn men thei. Cuiruangah si maw tlawng tla an rak kai duhlo ti pawl thuhla a phunphun ka ruat ciamco.

Tlauhmun khua ih Salurop pawl liangluang hi kan pupa pawl ih nundan langter tu an si. Ziangtin Salurop hizat an ngah thei? Zo hrangah ti pawl ruat lo in ka um thei nawn lo.,, Aw.. kan pupa pawl ih an cahnak..tahfung cu..himi salurop pawl a si hi teh maw ka ti. Cuiruangah Kum 1973 ah, hitin hla ka phuah famteh( panlomaw).

Salurop

1, Khuahlan kan pipu san vun ruat hman

Conlam ding le sa kah ding an tumtah.

Cuileng tumtah saang um lo.

In rohtak an fahniang Salurop.

Ch; Aw! Fahniang napai ro cu zoh hnik.

Nan bang hlumtu lurop phuntling

Zohsal hnik, ttha  na ti maw?

Na hrangah ttha hnem lo ” Salurop”

 

2. Kan pipu conlam Sakah duhah

Surhan ti lo in an tuan ram an tawi.

An ngahsuak an tumtahmi

In rohtak, an fahniang “Salurop”.

 

3. Santhar mino ziang tumtah na nei.

Tesinfa tiang ro ttha ding ziang na tum.

Na ngah suak hlanlo zuam aw

Tesinfa tiang ro ttha roh ding in.

Himi hla hi kum 1974 hrawng ah laican BBS Radio ah ka rak sak dah.Culai san Radio ngaitu lai khawte lam pawl cun an duh zet. Khawte lam ka tlawn le Salurop hla saktu maw na si kha in ti ttheu.Cuticun ka “Salurop” hla cu a mai san lai ah cun a mai tawkten a hmin a rak thang ve.

Veikhat cu kan khua Bomba( Dokhar) ka tlung. Ka pa in Salurop ka phuahmi thuhla a rak thei ve.Ka parah a lung a kim tuk lo. Hitin i salh.

” Thang Tin Sum ra hnik. Thu ka lo sut ding. Ziang ruangah Salurop timi hla na phuah. Salurop lawng maw ka lo roh.Fimthiamnak le thildang tampi tla ka lo roh na thei lo maw? ” i ti. Ka pa a lung a awi lo ti ka thei. Hitin ka let lohli.

 

Ka pa, “Nang cu na tivek in Salurop lawng i roh lo. Thildang tampi le fimthiamnak tla i roh ngai. Asinan, kan lai pacang tampi zoh aw la, an fate nangmah vekih rohlo tampi an um. Salurop lawng an roh. Cui pawl ka ti duh sannak a si. Nang ka lo phuah hnawhsanmi a si lo” ka ti.

 

Ka pa cu ka ttong a theih cun a lung a kim sal ih keikhal ka thaw a suak vuarvi. Ziangah ti le pa le lungawi ter lo hi ka ttih zet mi a si. Phun 14 cu ka ong zo nan, phun 4 hman a ong lomi ka pa si khal sehla ka u pat zet thotho.

Keimah hnakin fimthiamnak tampi a nei mi a si ti ka thei. (Hi zawnah hminsin malte ngan bet ka duh hrih. Salurop ka phuahmi hi, kum reipi hnu ah ka ruat sal. Kum 1990 hnu lam ah cun, Salurop tla man tampi a nei sal ti ka thei. Asinan vansiatnak ah, kan inn ih kan Salurop, ka pai kahmi zukneng kikawng tthattha pawl le a dang pawl cu, sumdawng hrekkhat pawl in ka nu, nuhmei an rak dil ih, siangzetin a rak pek thluh.

K 1000 lai an rak tthen ih ka nu cu a lung a awi zet sapbei. Sumdawng pawl hnenah,”Ka fapa Thang Tin Sum in Salurop a duh lopi” a ti , ti a si. .. Hi thu lehhnu ih ka theih tikah ka nu cu ka mawh thluk ngam lamlam lo.

Keimai sual a si tin ka ruat. Salurop in man a nei sal timi kha, kan khua ih ka nu ka than nawn lo. Kan khua ka hung thlen sal tikah cun, kan inn ih Salurop cu a cem thluh zo.Ka ttapsur. Ziang ti ttha. Tuhi a veihnihnak kan Salurop kan hlawnnak a si. A veikhatnak cu ka pa Pathian a awi pekah a si.

Kan inn ih ka pu san ih sin an rak thah mi le an rak kahmi Salu tam nawn cu, a hnai hnok aw kan ti ih, Bawmrang tum zetzet in kan than ih, Consam va kan timi ah kan thlak thluh men. Tu ka vun ruat sal ih pamphai ka ti nasa.

Ka pai Khaungcawinak an Secang pi lu tla cu a mawi tuk. A kii tthatdaan tla cu a bawng riairiai. A vam helhel. A mawi dan ka mitthlam ah a cuang lai. Khavek Secang ki tulai sanah hmuh ding a um nawn lo. Tulai san mino pawlin ka Salurop hla modernize an tuah lala ih, poi ka ti sinsin.

Salurop ..Phui… titla a tel ih, cu lawmam ka ti. Ka phuah duhsannak cu hiti lawmam cu a si lo ti khal casiartu pawl ka lo thei ter duh sal.Kan dunglai ah Salurop hla thawn pehaw in lungkim lemlo tupa in Mekezin pakhat ah cahram a rak ngan dah. Bualnel a sit a maw ka fiang nawn lo. Cu asi ih himi ka cahram in ka hla phuah duhsannak pawl tla ka sim fiang sal tinak a si hi.)

A pakhatnak ih ka hla phuah mi cu, kan pupa pawl ih an tumtahnak a si mi conlam le sakah ka langter. Himi cu an cahnak, an thil ti theinak, an tthansonak timi pawl tahfung a si bik. Kan pupa pawl khal tumtahnak fumfezet neitu an si ti ka langter. A pahnihnak ih ka hla phuahmi a tican ngaingai nan zoh a si le, kan pupa pawl ih an tai rialnak, an zuamnak, an raltthatnak pawl hi mino hrekkhat in kan tluk hrimhrim lo ti kan hmu ding. Sahrang kah le Conlam hi thil olte a si lo.

Nasa zet ih an zuam a ttul. Raltthatzet tla a ttul. A sur ti lo a han ti lo ih an zuam, tai an rial a ttul. Hmunkhatten sakhan nam tlang, ttanrual tla a thupi zet. Con lam thei dingin milaw, hna ttuan zet si sit la a ttul. Mize pawl in cong an lam thei lo. Cui an zuamnak an lawtnak le an raltthatnak cu mino pawl in kan cawn hrimhrim dingih ka duhmi a si. Cucu ka hla finghnihnak ih ka phuah duh sannak a si.

Cutluk an zuamih an ngahsuakmi Salurop, cu mino kan hrangah pum cawmtlak ro ttha ngaingai cu a si lem lo ticu tampi kan rel sal duh nawn lo ding. Asinan, ka sim zo vekin tulai sanah cun Salu khal man a nei zetve ko. Ttha hnem lo law mam cu a si lo.. !973 ih ka phuahmi Salurop cu tuisan ah cun a kaih tuk lem lo men ding. Ziangah ti le kan sanah cun Salurop pawl in man tampi a nei zo.

A pathumnak kan zoh sal a si le, santhar mino pawl in ziang kan tumtah le a ttha ding timi ruahnak ka suah. Ziang vek kan tumtah khal a si le tesinfa tiang ro ttha siseh. Hman tlak, pum cawmnak tlak si seh ka tinak a si. Kan ram le kan san ih zir in, kan tumtah dingmi cu a bang aw cio lo ding.

Ziang khal a si le, kan tesinfa tiang hman thha, pumcawmawknak ttha, kumkhawdaih zumnak, nunnak a si ding a thupi. Leitlun thansonak ah thuhla ttha, cawntlak kan suah thei lo khal le Pathian zum feknak lam, rinumnak lam, dingfelnak lam tal ah cun taimak suah cio u si. Kan fesinfa tiang, kumkhawdaih nunnak, Pathian uknak ro, rottha hnem roh ding zuam cio u si.

Kan pupa pawl ih an conlam le an sakah ih an liam kuan mi pawl tangka in ziangzat a cem timi hi ka rak ttuat dah lem lo. Tuhrawng cu himi theih duhnak thinlung ka nei ciamco. Kan dung November thla kum 2008 ah Kalemyo kiang Minhla ( Tithim) timi khua ka tlawng. Pu Hai Sam ( Kum 80 luan) Khawlung ih rung vaimi, thawn kan tong aw ngelcel ih ka lung a awi zet.

Kan pupa pawl an conlam thu a sangsang in in sim vivo. Sarual talh, Thlailam, Sethum thah, Sehra thah le Khuangcawi thuhla pawl tla i sim. Cu lawng si lo in conlam fatete a karlak ih kan neih mi khal a um lai. Fangza aih, bupherphah le Calhau tivek tla tampi a um lai. Himi conlamnak pawl ah, ttilva ziangzat ciar an that?  Zu bel ziat? Niziat sung an in? Minung ziangzat rawl an do ti pawl tla in sim thluh. Thlailam can ah cun, ni 3 sung zu an in ih Khuangcawi  ah cun ni 7 sung an in an ei khawm. Conlam ttheh thluh hnu ah tualphiah cu a um thluh.

Vok an that lala. Mipakhat in thlailam in khuang a cawi tiang a liamkuam mi, tilva siseh, ei le in zu pawl siseh tangka in ziangzat a cem ti kan ttuat tikah tulai pohzi in a malbik K 10,000,000/-ting zakhat hrawng cu a tlangpi thu in a cem ti a si. A mal lam men thei.. Kan lairam kan zohtik ah khua ih kip ah a conglam lo mi khua an um lo. Inn ih kip in Sethum cu an that thluh.

Sehra tthat khal an tam zet. Sehra thah tiang cu a mal bik tangka ting 60 tluk an cem. Sethum that tiang cu ting 50 hrawng. An sa aihnak ih an cem mi liangluang kan rel hrih lo.  Kan pupa san ih an cemmi hi ttuat hnik uh. Siar cawk ding a si lo. An thil ti theidan. An liamkuan thei dan. Dollar khal in a tam zet ding ka zum. Kan pupa pawl hi menmen an si lo. An lian ancak, thil an ti thei ngaingai a si.

Himi an liamkuan mi pawl hi zo hnen hman ah bawmnak an dilmi a si lo. An mah te liolio zuamnak in an ngah suak thluhmi a si. Kan pupa pawl in midang bawmnak lak hi an nautat. An duh lo. Keimah te ka tuah theive tihi an uar awknak bik a si. Midang ih pekcop an duh lem lo. ( Mifarah zet pawl kan timi hman in kutdawh an khawng dah lo. An nautat. Cuvek kutdawh khawm cu annau tat bikmi a si.)

Laimi thil ti theizet kan sinak hi, mirang uk hnu, kan pa le pawlsan, cozah hnattuan phunphun sung khalah kan hmu thei. Ahleice in kan pa le ralkap san ah cun ( Mirang uk sung le, kan Kawlram zalennak a ngah pekte hrawng le hnulam deuh) an cahnak, an ral tthatnak, mi humhim theitu an sinak pawl fiangten kan hmu thei. Mirang tuah, Rifle meithal, kan lai pacang ralttha, meithal kap thiamzet, sakap tthang pawl kut ih an hman veten cun, zohman in an tuar nawn lo a si kha. Mi nehtu ah an cang thluh riai aw. Nunglai rori ih, Aungsan thuriza ngah thei Thai Sawn tla kan neih kha.

A thuhla tampi kan theicio zo ih ka rel duh nawn lo ding. Mirang zuknung (Biscope) ih Rambu an titeh ziang ce. Lai Rambu a si veko lo maw. Kan Lai ralkap raltthatnak le an thil ti theidan pawl hi porhtlak, uar tlak  ngaingai an si.  Mirang ralkap pawl hman ih salam an pekmi, Col. Hrang Thio ih nunnak pawl kan zoh tik khalah kan laimi hi mi menmen kan si lo ti a lang.

Hivek ngan ding mihminthang langsar tampi kan nei lai. Civil lam hna ttuan khal ah tampi an um hrih nan, tuittum cu hivial si hrih mei seh. Kan Kawlram pumpi huap ( National level) in  Laimi pawl hi theihtlak kan rak sidah timi ka vun phorh salnak men a si.

Laimi Khristian kan can hnu khalah zohtthim ding tampi kan hmu thei. A tlangpi thu in thlarau hlo kaih ding an pum rak pekawk dan hi a mak ve ngaingai. Thlarau hlo kaih dingthu thawn peh aw in kan pupa Khristian a cang hmasa pawl ih an pumpekawk dan, an tuarnak pawl zoh sehla tulai santhar khristian pawlin kan bang riai lo.

Tulai san hruaitu pawl cu an tuhciami thlairawl pawl kilkhawitu fang lawng kan si. Cumi thlairawn pawl hman himten kan fingkhawi thei tuk nawn lo hmang. Himi zawn cu tuittum ah tampi ngan ka tum hrih lo. Khristian kan si hnu ah Pathian hminin tilva ziangzat hrawng kan that timi lawng  tarlang ka duh.

Khrihfa kan si hnu khal ah kan nunphung, kan salurop thinlung cu kan sawmso vivo ko tin ka ruat. Sathah thinlung put kan neihmi hi a hlo cuang lo. Cuiruangah Khristian kan si hnu khalah, Sia, Caw, Vok olten kan that thei mei. Phurrit zetin kan ruat dah lo.Tilva thah hi kan nunphung ih rak um cia mi a si ruangah, mirang pawl hman ih tuah dahlo mi, Pathian cawimawinak puai phunphun tilva  in kan tuah.

Kan tilva, rannung zuatmi sumhnam pawl Pathian cawimawinak, lungawi thusimnak ih kan thah mi hi a mal ve lo. Khawlung khua pu Buan Ir cu a mah bulpak in Pathian cawimawinak, lungawi thusimnak, vei 30 a tuah ti a si.

Vok le sia a thah theimi a tam ngaingai tinak a si. Kan nauhak lai ah hin, Lushai ram ih zawnbawm an timi hi kan khawkiangkap pawl khal in an zawn ve nasa. Thukam Hlun kan Bible ih Thukam kuang an zawnmi an cawng ve an ti. Cumi zawnbawm timi cu inn ih kip ah an luhpi. An luhpinak inn tekte cu an lung a awi tukih, Pathian hnen ah lung awi thu an sim.

Inn ih kip cumi zawnbawm a luhnak pohpoh ah Vok a si lo le, Caw, a si lo le Sia a that lo mi an um lo. Bulpak Pathian hnen lungawi thusim lawng si lo in, Khawmpi ( Civui) Jubilee, Khrismas, Kumthar.. tin a phunphun peknak kan nei hrih. Khawmpi, Civui kan tuah tikah inn ih kip in mikhual kan dar. Tilva phunphun kan that. Pathian hmin in ttan kan la cio.

Nuhmei farah te kan ti mi khal in mikhual neihlo, khawm dar ve lo an duh lo. Vok an thah thei lo hman ah sacuai an lei ve. Cuvek thiamthiam in Jubillee khal kan tuah thei. Midang bawmnak zo hman kan ring dah lo. Pathian hrangah kan ti ih kan mah te kan liamkuan mi lawnglawng an si. Khrismas le kumthar khalah ticawk lo rannung kan that thei. Rawl einak puai kan tuah.

Laimi Khristian pawl ih Khrismas can kan thah mi tilva hi a mal riai lo. Kum 2008 Khrismas ttum ih kan kawhhran cemmi tangka tla cu ting 30 lenglo a si. Laimi kawhhran zate cemmi hi tuat seh la a tam ngaingai ding ka zum.

Khual upa, khuallian, pawl kan khua cio an thlen tik khalah, Vok, Sia, Caw tivek thah cu kan hrangah a har tuk lemlo. Laimi Khristian pawlin Khawm veiziat kan dar, Jubilee veiziat kan tuah? Kumthar, Khrismas ah siseh, bulpak in siseh, Pathian hnen lung awi thusimnak ah siseh, ziang tluk tilva kan that ticu tangka in tuat cawk ding a si ve lo. Laimi pawl in siang zetin Tilva phunphun kan that ih Pathian kan thangtthat thei mi hi, kan pupa pawl nunphung thawn kan pehzawm vivo a si ka ti le ka sual lemlo men ding.

Kan pupa nunphung a si mi kan con le kan lam, kan sunthah hmuahhmuah hi kan thisen sungah a ciah aw zo ka ti zo kha. Cuiruangah miphun dang hnak in tilva tampi kan thah theinak a si. Miphun dang tampi in con le lam an nei velo. Mirang pawl tla cu an nei lo lawlaw. Kan nunphung ih umcia sunthah thinlung put le Pathian hrang ih peknak, thawinak tuah timi kan kom khawm ruangah phundang zetin kan cangvai theinak a si tin ka ruat.

Phundang in ka sim a si le, Pathian thangtthatnak ah kan nunphung Salurop thinlung kan sawmso vivo tinak a si.

Laimi thil ti thei kan si zia tui kan san khal ah fiangten kan hmu thei. Midang pawl in ramdang fehhi ziang tluk ih in kham khal le kan feh thei thotho. MBC hruaitu upa pakhat in hitin a sim dah. Laimi pawl cu sangka kan phih sak khal le a dunglam an boh thotho a ti. Asi rori.

Kham theih ding rual kan si lo. Kan feh rero ko. Ramdang fehding ah zo in tangka in kuan sak. A tam sawn cu kan mah te kan kuan cio mi a si. Kawlram ih sin ramdang fehnak ah ziangzat cio kan cem? Kan cemmi hi kawmkhawm thluh veseh la a tam ngaingai. A tlangpi thu in ka sim duhmi cu, Laimi pawl hi, kan pupa san in tutiang kan tumtahmi ngah suak dingah thil ti thei miphun cu kan si ve ko. Laimi zianghman kan si lo tin tha nau ding kan si lo.

Hitluk Laimi pawl in kan pupa san in tui kan san tiang kan sunthah mi kan tilva  liangluang le kan cemmi tangka hi tulai pohzi in tuat seh la ziang zat hrawng a si ding? Dollar khal in a mal hrimhrim lo ding.   Himi paisa liangluang hi tulai tthasonak kan timi ah thleng sal thluh thei seh la, kan laitlang hi a tthangso zetmi ram pakhat a si ko lo ding maw?

Midang bawmnak ttul lo in tthansonak phunphun kan tuah thei ve ko lo ding maw? Khua ih kip mawtaw zin a thleng thei ve ding ka zum. Electric thawn hna kan ttuan vutvo thei ve ding. Kan mino pawlihfimnak an thluak thawn kom khawm sinsin sehla, a thangsomi ram pawl kan bang zik ve ko lo ding maw ka ti.

Kan pupa conlam le sakah hnak ih a ttha deuh tumtahnak cu ziang a si pei? Laitlang lam kan dinhmun thawi milaw dingin a thuailam ih tthansonak phunphun tla tuah dingin tumtahnak kan ret thei ko.

– Kumkhua lo ( Organic permanent farming) tuah ding.

– Ta-ba-wah dawm phunphun tuahin, thil cin ding. Chemical hman lo ding.

– Sabit, Lingmaw, Coffee, lakphak kung tivek a phunphun cin ding.

– Hmekphek, mipe, motol, khasuan tivek.. man neimi cin ding.

– Khua ih kip ah Mawtaw cycle lam cek ding, ( Jeep road kan ti thei lo hman ah)

– Khua ih kip ah electric tuah ding. Khawkhat le khawkhat biakawk theinak tuah thluh ding.

– Khuakip ah Home Industry, electric tha thawn tuah ih computer chip a si lo le  tulai santhar ttulmi electronic phunphun IT san thawi mil aw in tuah ding..

– Leitlun huapin kan thil suak zuar thei tum ve ding.

– Kan ram in Leitlun company hmin thangthang peh zom thluh ve ding.

( Ramdang visa dil ttul nawn loten, kan tisop le buber hrawpphah men in leitlun pumpi IT san thawn milhin kan peh theican a um leh ve ko ding. Zumnak tumpi ka nei. Ziang ah ti le Laimi pawlhi thiamnak neimi kan si ve. Ziang hman ca a zirve lo mi Lailam pacang hrekkhat hmanin meithlal tuah an thiamzet ti kan thei cio. Culawng si lo in kan mino zirsang tuk a neive lomi hrekkhat pawl tla Electronic cet phunphun tuah thiam kan um ve thlang. Thutthimnak ah; Than Mawi ( Venven pa).Cumi ka ruattikah, leitlun hmunkip ih zirnak a neitu kan Lai (Chin) mino pawlin ziangah saw leitlun IT sanman thil kan tuah thiam velo ding ka ti famteh.)

Khawte tthansonak thu thawn peh aw in ruat tlang hrih u si. Bomba khua unau pawl thawn sumpai ngah dan ding kan thu rel khawmmi kan tumtahmi hi lo hlawm ve ka duh.Cawn tlak a um pang le nan khua ciar ah rak forhfial ve hram uh.

Kan Bible sirhsan.: Mate 25:40

Bawi Jesuh in Mate bung 25 sungah kan taksa tthansonak thupi zetin a tar lang.

– Tidai thu, ei-in thu, hnipuan hruh thu, damlo thu, mikhual tuamhlawm ding thu, thawngtla thu ..ti pawl a rel. Taksa lam ttulnak hlir a si.

Tumtahmi;

Kumkhawdaih lo ( permanent farming) neihih pilher nawn lo ding.

Kan tuan dingmi.

1.Mithiam pawl ih ruahnak pek vekin, a ttulzat tidawng (pipe) lei tahrat in peng 2 lenglo a hlatnak, Hnahkhar va tidai kan la ding ih.sumpai ngah theinak thingthei le hanghnah hnagrah phunphun kan cing ding.

( Kan Falam peng sung ih a thangsobik hmun pakhat a si mi, Thangpawl area kan zoh tthim.)

3.Mai eiding ah vainim, sangvut le lairawl phunphun tla toruah hngak ttul nawn lo in hnahkhar va tidai ringih cin men ding a si thlang.

4.Kan thilsuak phurh olnak ah, Mawtaw Cycle zin kan cek ding.

5.Electric kan tuah ding.

Ziangtin paisa kan thawh ding?

Jubilee le khawm dar vek in timlamnak kum 3 sung tuah kan tum.

Khawmdar le Jubilee ih Vok le Sia kan thawh cio vek in,

Bomba khawsung le hmundang um khawpi, tufa pawl hnen in;

Sia ( 30), Vok 30 lenglo kum 3 sungah suah thei ding in Pathian hnenah thukamnak kan nei. (Tangka in kan tuat a si le ting 200 hrawng a si.)

Hminsin; MBC, MCC le hmundang in bawmnak lak kan tum hrih lo. Bomba sungkhat pawl hnen lawng in sumpai khawn khawm kan tum.

A thathnemnak ding;

Kan lopil a tanglai mi pil 8 kan vat nawn lo ding.

Tilva tampi kan zuat thei thlang ding.

Kan ram a mawk ding ih, leitlun ecology lam buainak bawmtu kan cang ve ding.

Sumpai kan khawl khawm sal dingih midang tla sawmdawl thei kan zuam vivo leh ding. Mission hna tampi kan ttuan thei ding. Cuticun, kan pupa pawl bangin kanmah te kan nung thei ve tin pacan kan cuh thei ve ding.

Thulak khawm;

Ka sim zo bang in, kan pupa san conlamnak ih tilva phunphun an liam theimi  le Khrihfa san ih Jubilee, Civui, Khrismas le cawimawinak phunphun ih kan pek theidan pawl hi phun dangten kan sawmso thei a si ah cun, santhar tthansonak phunphun kan tuah ve ding tin ka zum.

Jubilee le khawmdar vekin, kum 5, kum 3, kum 1 tivek in timlam nak nei sehla, Vok, Sia, Caw zuat tahrat in paisa kan hawl thei ko lo ding maw? ( A lakih a sa ei thluh men dingah si lo seh la. Jubilee, Civui, Khrismas tuah nawn lo ding ka timi a si lo.)

Cu a si lo le, sumpai ngaingai khal kan bur thei ko.

Tufang ramleng um kan nau le pawl ih Nargis, mautam, Electric, Tidai laknak, Inn kang, Falam siizung Foundation fund tivek ih a phunphun hrangah an bur khawm mi hin ka tha i tho ter zet. Hivek tanrualnak hi peh zawm vivo hrih ding kan si. Thansonak phunphun tuan khawmnak khalah tu hnak ih tam deuhin paisa bur khawm cio hram uh. A malbik tangka billion khat tal bur khawm thei seh la a ttha.. Kan pupa pawl conlamnak ih an cem mi hi, billion tampi a si ding. Thil ti thei phun kan si zia a tlunih tampi ka ngan zo kha. A tamtuk ti pang hlah uh. Kan pupa pawlih Rinumnak timi, Vapual zuk a si lo le, kan Khristian pawl ih dingfelnak  ( justice) timi kan sawmso thei cun, tthansonak phunphun kan timi pawl khal hlawh tling ko in kan tuan suak thei ding a si.

– Kan pupa pawl vekin tumtahnak felzet nei u si.

– An zuamnak, an taimaknak, an raltthatnak sawmso vivo u si.

– An tan rualnak(sakham namvek), an rinumnak, khal sawmso vivo u si.

– Kan Khristian pipu pawlih pumpek nun, dingfelnak, siannak khal sawmso vivo u si.

Kan pupa pawlih cahnak Salurop cu tulai IT timi san thansonak thawn mil aw ding in sawmso vivo ih Pathian cahnak ah hram kan bun thei sinsin le kan hlawhtling tengteng ding a si.

Cuticun kan ramah A uknak thleng hram seh.

Comments

comments

One Comment

  1. Himi saya Thang Tin Sum,, ih ca nganmi kasiarsuak miih kahmuh suak ve mi le kauarnak pawl cu,
    kan falam peng siseh, pengdang tlangdang khalin siseh, Laica nganmi kahmuh
    mi lak ah, Mirang cafang telh lemlo in Laica fangkom hmangin tlamtlingten a ngansuak mihi ka uar ih ka upat,( akulh aw sungih mirangih simfiang tumtuk pawl khi kan Laica tlamtling/famkim terlo tu an si tiah karuat)

    An khawsung hrangih an tumtah mi vek hin, kan mah le khua/tlang ciar hrangah tumtahnak kanneih ciau asi ah cun, Falam peng tthansoh nak hrangah tiih cangan rero ih aukio rero hnak cun an hmuitin a fuh sawn.
    Khua pakhat a tthansoh nak dingah khuasungsuak mi in ttuan vo kannei, Falam khawsung a tthanson nak dingah Falam khuasung um mi in ttuanvo an nei ve ih, Falam pengpi a tthansoh nak dingah Falam peng mi lesa,, kan zate ih ttuanvo asi timi kan hmuh thiamciau a mamawh.

    Khuahlan kan pipu pawlhi,, an minehnak ding le an hminthannak ding hrangih an zuamawknak pawl hi a tu tthangthar pawl in kan cawntlak asi tiah karuat. An Khuangcawi ni khua le Puai ni can pawl ih an sunlawih awk thiamdan pawl le an bawnbawiawk thiam dan pawlhi fak le lawmtlak an si. Kan cawn ding asi.

    Inn tawhhrenh nak mumal nei lo ih, an rin umnak le felnak sawn in thil ziangkim a fingkhawisawn mi pawl khal kan cawn tlak asi. Hna pakhat an ttuantlang tik ah taima bik si an cuhawk mi khal kan cawn ding asi.

Comments

%d bloggers like this: