Kan Pathian Biak Khawmnak ih Thleng Tul Mi Pawl

worship11

– Uk Lian

Kan Laimi kawhhran tin ah thusim thiamnak talent dong lo lawlaw khal, minung le minung tilungawi duhnak ah caan kan pek aw rero ruangah Thlarau Thianghlim hnatuan kan dal vek tluk asi ti’n thinnomlonak ngan sehla thathnemnak a suahpi ciamco ding si lo.

Laimi kawhhran tampi ah Pathian ti lungawinak hnakin member pawl ti lungawi ding thupi sawn ih ruat tu kawhhran tampi kan um zo tivek thu, bulpak hmuh daan a sangsang ten Bible bungcang thawn ngan sehla, hivek cangantu cu amahteh mifamkim ah maw a ruahawk, ziangce saw a si tivekin, ka cangan siartu pawlin in camriam rero lala ding fawn.

Curuangah mitsing phah cing thawn Laimi kawhhran zarh khat ah veithum lai kan khawm ih cumi kan khawm caan ih thil tul lemlo, tuah tengteng tul vekih kan tuah thotho mi pawl cu ka ngan thotho ko ding. Kan Laimi kawhhran tam zetih ka hmuh tonmi pawl asi’h kawhhran tin a bangawk lo vekin tullomi ka ngan ngah mi tla a um hrimhrim ding.

Khawm Program Kaitu 

  1. Amah hi, khawm caan ah Pathian thinlung takih kan biak ngah thei nak dingah in kaihruaitubik a si.
  1. ‘Tui ara khawmtu pawl hi Pathian duh ngaingai pawl nan si. Inn ah daiten nan to men thei nan, khawm nan hril sawn’ tivekih lomawk a tul ringring lo.
  1. Khawm lo pawl demnak le khawm lo pawl cu Setan mission hnatuan vekih sim khal caan kaitu ih tuanvo asi lo.
  1. Khawm in hruaitu dingah ti’n Bible siar hlan ih tong khal tong hleifuan deuh asi thei. Khawm hruaitu cu, Bawpa Pathian Thlarau Thianghlim sawn a si.
  2. ‘Chairman le chairperson tuan ih tong tam tuk cu a mawi lo zet nan, malte ka sim ta duh mi cu’ tivekih tong deuh ringring khal a mawi ciamco lo. Program felten a kai ding kha a tuanvo ngaingai sawn a si.
  1. Program kaitu in, Bible a siar tengteng ding ti khal a um lo ih, a thoknak ah thla a cam tengteng ding tinak khal a um cuang lo ruangah amah le remtidan ten a feh pi thei.
  1. Asinan, program kaitu cun felten a tong ding. Fiah zetin a tong ding mi cu thil mawi le tha a si. A taw hman thang lo in a tong ding a silo.
  1. Program kaitu ih um daan mawi le, a tuah tul mi dang pawl nan kawhhran ih zirin nan ngan peh vivo thei. Cun nan kawhhran ah nan sim in nan zirhaw vivo thei a si.

Mipi Hla Hruaitu 

  1. Mipi ih hla thiam lemlo mi, hla hruaitupawl ih thiam mi lawnglawng sak uar ding a si lo. Mipi ih thawtmi le uarmi hla hril thiam a tha.
  1. Hla hruaitu cu mipi hrangah hlasak nuam ding ih hruaitu an si ruangah, an hlasak daan ah zoh mawi , um dan mawi le an hla hruai daan ah mipi luangkuai zawng asi tengteng ding asi. Cucu, Pathian ih lungkim zawng khal a si ding.
  1. An hlasak mi cu hlabu le projector zoh lemlo khalin an sak thei mi asi ding. An mai nuam tizawng siloin mipi in Pathian thinlung takin an biak ngah theinak dingah hla hruaitu an si.
  1. Thlacam nun neih lawng siloin, Pathian thu ah nasaten an ciahawk neh a tul. Baan an phar daan ah, ngam lemlo vek, ngam aw ter deuh vekin an phar zuakso ding a silo.
  1. Thlarau khat tuk vek khalih cangvaihawk ter ding asilo. Baan phar dingin Thlarau in a fial lo ahcun phar awk ter ciamco lo ding. Nunnak le thinlung ih Pathian ih a langter lo mi leng ah cangvaihawk ter ciamco a tul hran lo.
  1. Awnmawi tumtupawl khalin, mipi ih ngai nuam duhtawk fangten awnmawi tum ding asi. Hla hruaitu in mipi “ding” dingin a fial a tul lo, cun laam ding le khir ciamco ding khalih a nor a tul hran lo.
  1. Hla hruaitu pawl cun nan kawhhran thlarau level le an duhdan nan thei sawn ding ruangah, ngai nuam duh tawk ten, mipi khalih ei ban cin ten nan nan cangvaih ih nan hruai thiam tikah thlarau khal nan hnen ah a um duh sinsin ding tiin ka ruat.
  1. Thil dang hmuahhmuah hnakih a thupibik mi cu Pathian thangthat nan si. Mipi tiphur men ding asilo. Nan hlasak mi le nan Pathian nan sunloihnak kha Pathian ih cohlan tlak a si ngaingai maw timi sawn nan ruat ding a thupi.

Kawhhran Thuthantu 

  1. Mipi warning pek zawng in maw, lungawilonak lang zawng in maw, asilole, ngiofio zawngin thu a than ding asi lo.
  2. ‘Hmai zarh, zo si sermon tu ding’ tiih nan kawhhran member pawl nan suhawk celcel lonak ding ih thuthantu na si vekin, mipi ngai nuam le lunglut zawngin a than thiam ding a si.
  1. Thuthan hlan ah tidaan kel nei ringring a tha lemlo. Thimnak ah, a mitkharh veithum hrawng a tham ta, asilole a taikhap a tuah ta ding, cumi hnu ah thu a than tivekih tidan ziaza mawi lo neitu si a tha lo.
  1. Thuthan a tul tuk lo ahcun ding ringring ding ah a neihaw ding asi lo. Nepnawi le thupi hleice pawl a khaikhin thiam ding asi. A tul lo mi thantu asi lo ding.
  1. Thuthantu ding cu tong felfai le tong daan mawi thiam a si deuh ding. A tul mi lawnglawng thantu asi ding.
  1. Meeting ngan khum dan vekin a than ding asilo, mipi ngai nuam ding le hngilh thei lo dingin a than thiam ding a si.
  1. A thuamawk daan le a tong daan ah upat le lun tlak mi asi ding.
  1. Nan kawhhran ih zirin nan thuthantu um daan mawi le mawi lo nan rak zirh in, nan sim aw vivo bet thei.

A Hlu Lak Caan 

A hlu kan lak tikah, hla kan sak mi cu a hlu hla tengteng a si ding timi a um lo ih ruangah a hlu khawn lai ah ziangvek hla khal sak a thiang asi. A hlu lak lai ih hlasak tengteng ding mi tiih hla phuah khal a rak um hran lo.

Asinan, tuini tiang cu a hlu lak phah ih sak ding awm zet le mawi cu ka hril ih thilsual a si lo. Thiltidan mawi le ngai nuam zet khal a si. Asinan, a hlu lak lai ah a hlu pek hla lam deuh hawizawng sak tengteng ding timi vekih ruah ding cu asi cuang lo.

Zapi Hrang Aiawh Thlacamtu 

Kawhran tampi ah zapi aiawh thlacam lole special ih thlacam tivekin kan hmang ih Moses in a mipi hrang a thlacam maw kan zir ka thei ciah lo nan thiltha ah kan ruat mai ke.

Zapi aiawh thlacamtu hin sau tukin a cam tengteng ding ti khal a um lo nan, kawhhran sung ih activities zaten a cam theu tikah thilsual cu asi lo nan, sam tengteng dingah kan ruat deuh thlang in ka thei.

Cule biakinn sungih thlacamtu pawl hin, Pathian hnenih cam hnak ai in, mipipawl in ziangtin ka thlacam an ngai pei timi lungput thawn thlacam a tam deuh tikah thlacam a mawi duh zet. Asinan, Pathian ih cohlan ding asi pei maw timi cu zohman ih theih asi lo ding.

Zapi aiawh thlacamtu hin thlarau mi durdo tukin a cam ciamco khal a tul lo. Asinan a cam thei hniahno ahcun a tha tuk famteh! Amahlawngte, zapi hrang thlacamtu in sau tuk cam dingih a ruahawk ding hi cu thil tul a si lo. Pathian ih pom le cohlan tlak ding sawn kha ruat hlang sehla!

Thuthangtha Simtu 

Kan Laimi kawhhran dinhmun ahcun thusimtu ding hi hril hleice neiloin, theipum seuh ih seuh awk le pekawk zuatzo men a si hrih. Sermon tu tamzet in Pathian thu siloin thu nepnawi menmen an rel tam sinsin tikah ralrin tulzetin ka thei. Thuthangtha sim ding kan sivekin, kan thuthangtha sim ding mi hi cu felten Bible zohrawn in Pathian hnen khalah dil cio sehla a tha ding.

Testimony khal silo, bulpak thu tampi rel, cun thupi thawn pehpar aw lo lawlaw khal, a rem daan daan ih sim vivo tivek kan hrial deuh cu atha ding. Thusim kan thiam lo tuk hman ah Bible thu tam deuh ih sim le rel cu zuam hrimhrim ding mi a si.

Khawmtu pawl hrangah ziangmi kan sim ngah ding timi le ziangmi kan zir ngah ding timi tal cu thuthangtha simtu ding cun a nei tengteng ding a si. Cuvek a neih thei lo ahcun a sim lo hman a tha deuh ding.

Mipi Hla Sak Zawn Lo 

Hla hruaitu le pastor pawlih an sim theu mi cu kan kawhhran mipi hlasak lo ih mi zoh keukeu men minung an tam tuk an ti theu. Hla hruaitu pawlin thawzetin hla an hruai lai ah mipi hlasak zawn duh lo, rak ding ziarziar men hmuh cu zo hrang khalah a nuam lo ding.

Mipi pawl ih theih dingah, Pathian thangthat dingin biakinn ah kan feh ih hlasak zoh ding le program thlir men ding khalin kan feh mi a si lo ruangah Pathian thangthat in kutbeng le thangthat hla sak ding cu zo cio ih tuah ding mi awm mawi asi.

(Visited 275 times, 1 visits today)

Comments

comments

Comments

%d bloggers like this: