Kan Pahnih (III)

Zingpit Ngunte a thawh veten a phone sms thleng cu a von zoh. “Tui zarhpi cu ka suahcam a si kha. Na ra tengteng pei. Na rat lo cun ka thinheng ding simai! ‘Botanic Garden’ ah kan tuah ding.” tiih nganmi ‘Tete’ hnen in a si. Ngunte cu khua a ruat. Kan dung thla an umtudaan pawl a von mitthlam ciamco sal. Van Mang thawn an pehtlaihawk thei hlan a si ih a rualpipawl sawmnak vekin ‘East Cost Park’ ah an rak feh. Tipi kap vunneel lakah an lekih an nuam aw zet. Tipi khatlam ral khal zoh a mawi ngaingai. Mi tampi (Anmah Singaporean pawl hrimhrim tla cu) Picnic an feh ringringnak hmun a si. Ei ding a phunphun an kengih leilung parih phah ding pher khal an keng. In ding an kenmi lakah Beer khal cu langhngan zetin a rak tel. Rualpi a buurpi ih feh ti cu an ti ruri in an hlunghlai nasa. Tuih ttum lengsuah cun  kan Falam khawmnak ih khawm tengteng a duh fawn. A rualnu birthday a feh lo cun hua aw ding maimai an si. Kan dung thla a suah ah le a khawm fawn lo. Singapore um ve siih hmun nuam le hmun mawi hmuh le thlen ve a duh fawn. Ziangtin caan ka hmang ding ti thei loin a thawpi a thaw rero.

Zarhte zaan a hong kim tiang Ngunte cu zarhpi sun a caan hmandaan ding a ruatcat thei hrihlo. Kawlpa Minmin in le tuletu “See you tmr” a ron ti leuhleuh. Thinlung buai takih a um laifang ah a phone cu a rong tle depdo. A von zoh ih Van Mang a rak si. Zamrangten phone a von la ih, “Hello……” tiin thil pakhat ruangih thinbang nawn ti theihtheih zetin a hon sang. Van Mang cun, “Ngunte, na dam lo maw? Na aw cu a va ciang lo ve! Na ziang saw na?” tiin seherh zet le thinphang zetin a hon sun. Ngunte cun tawi vutvo’n, “Ka lung a hnok!” a rak ti. “Ziangah maw?” “Thaisun hi ka rualnu ih suahcam lomhnak ah ka feh ding maw feh lo ding ti ka ṭhencat thei lo” “Zo na rualnu?” “Kawlram Agent inn ih ka umpi mi ‘Tete’ tiin kan ko. Thlali sung rori kan um tlang. Kan neel aw tukmi si.” “Biakinn ah maw a tuah ding?” “Si lamlam hlah! Botanic Garden ah. Veikhat hman ka thleng dah loih thlen ve rengreng ka duh fawn” “Tuiṭum ka suah cun kan laimi khawmnak ah ka khawm ding na ti si lo maw?” “Aw ee. Curuangah panteh ka buai” “Ngunte, thu ṭhaten ka lo sim ding” Van Mang cun aw neem takin a von ti. Ngunte khalin thungaithlak in, “Aw. In sim aw” a rak ti ve. “Ngunte, minung pakhat cio in duhhrilnak timi kan nei cio. Nang khal nangmah ah duhhrilnak a um ve. Na duhhrilnak vekih na tuahmi kip hi ka lo mawhthluk dahlo ding. Na lamah ka ṭang ringring ding. Ziangahtile, na dinhmun ka lo theihpi tuk! Asinan na sirawk dingmi lamzin cu hrilsual pang hram hlah maw. Na kiang nai ah ka um fawn loih na rualpi kommi hi ziangvek minung an si tikhal ka thei fawn lo. Asinan Keimai’ Ngunte cun mi zuva rualpi cu ziangtik hmanah a kom lo ding ti cu ka theifiang.” tiin Van Mang cun a hon ṭong. Ngunte cu Van Mang ih ṭongmi ruangah a taksa, a thihri pawl an sa thluh thei. Van Mang ih theihthiam lo ding fangin dimten a thawpi a thaw rero. Van Mang cu a ṭong a peh salih, “Cun, Ngunte, na rualpi kommi ruangah mi in an lo zohniam thei vekin na rualpi kommi ruangah miin an lo zohsang thei ti kha hngilh hlah. Thaisun na caan hmandaan ding von ruat ta aw. Neta ah kan be aw leh ding. Mang ṭha” tiin phone a thlak cih. Ngunte cu theihlo karah a biang parah dai riahro ten mitthli a rong luang. A phone cu a ṭaang sungah a hon pom ih, “U Mangte, in ngaidam hram aw. In ngaidam hram aw!” tiih a kaa ih a ṭong rualrual in a mitthli cu van rialruah bang an rong suur thlurthlo.

Van Mang cu itthat thei loin a sir le sir a her rero. A zathal in a it thuul. A cal a hon dom ih khua a ruat. “Ngunte ih rualpi kommi pawl hi zovek ha an si ke? Beer in hmang kawl tlangval thawn duhtawk ih um an si pang pei maw? Asilole amah Ngunte teh kawl tlangval……. A si theilo! A cang thei lo!” tiin a kaa in a hon ṭongsuak. A hong tho ih tidai a hong in. It sal dingin ihnak a von pan sal zawnah “Kiring….kiring….ring…ring…” a phone a rong ring ciamco. A von zoh cu Siangte a rak si. “Aw…. Siangte” “Hello…. Himi phone neitu hi na theihmi a si maw?” Van Mang cu a theihmi aw ruangah a mit kau puppiin a thin phu dupdo phahin, “Aw. Zo na si? Ziangah himi phone na hmang thei?” “Aw….. Dawr kan khar thlang ding kan tiih amah lawng a taangih himi phone in ko sak uh a ti” “Khuitawk si a tu nan umnak dawr?” “…” “Awkhe. Ka ra ding. Ziangtin hman rak tuah hlah uh maw!” Van Mang cu a ngelih nazi a von zoh. 12:45am a si zo. Taxi a sangih zamrangten a va tlan. Sungai Besi Champion Club thlang, zohman in zuu dawr khalah an ruat lonak hmun. Kawl rawl dawr a si. Dawr sung a vong lut cuh! Van Mang cu a hmuhmi thil hi a zum in a zum thei lo! Beer duur sarih cem riahriah in rawl einak kinlan parah darhaw zelzelin a kut zam denden ih a rak bawkkhup mi Siangte cu a von hmu. A awloksong in dawr kiltu pawl a von zoh. Dawr kiltu pa cun a liang khatlam le khatlam in a lu dai ziktiang a hon khaiso ih a kut zaphak a pharh. A hmur a hon ti peng hrih. A dang pakhat khalin cuti thotho in a rak tuah ve. Netabik ah nauhak pate tiih kawh theih Kyaw Lyin timi kum 18 kim ṭawkṭawk fang a ra ih, “U pa, himi Siangte thawn Monywa ah kan rak  thei aw dah. Rinlopin tuisun ah kan tongaw ih…….. Iih,,, thinharnak pakhat khat cu a nei tengteng ding. Amah tlukih thinlung pacang nunau hi ka hmu dahlo ka rak timi asinan tuisun ih a umdaan cu thinnau tuk a bang! Keimah ka lo thlah ding ka tinan na phone number rori in ko ter ih cunah si.” tiin ṭhaten a hon sim.

Van Mang cun Siangte cu a zaang parah a pawkih cutin a hei fehpi. A umnak inn an thlen in Van Mang cun nuam teten a von itter. Cuzawng ah a bawngbi zaal ih a pai mi a cell phone cu ihphah parah a rak tla. Puan a von sinter ih ṭhaten a hmai a von zoh. Siangte ih mit kil ihsin mitthli a rong luang a von hmuh cun Van Mang cun thin nuam lo takin a von zoh. Mitu nai ih Kyaw Lin sim mi “Amah tlukih thinlung pacang nunau ka hmu dahlo ka timi asinan tuisun cu thinnau tak a bang” timi awfang pawl cu a hna thlam ah an rong thang. KLCC tisuar kiangih a rak ttong dahmi, “Tlung dingin ka nu le khalin in lungkim pi thluh. Asinan ziangruangah ha tlung loih hitawk ih hnaṭuan ka hawlnak san na thei maw?” “Thei lo. Ziangah maw?” “Hitawk Malaysia ah ka thinlung ih duh a zulh dingmi ka tonngah ruangah. Kan theih awknak a rei hrih lo nan….” ti pawl a von mangsuak sal. Van Mang cun Siangte ih puan sinmi cu a von remsak hnu ah a hong dingih leng suak  dingin a dunglet a hon herih a ke a hon khai zawngah a ding cutci sal. A Nazi khihnak ngel zawnin Siangteih kut cun a hon kai. Van Mang cu a dinnak ah a ding ringring ih Siangte cun, “U Mangte, nangmah hi ka kiangnai ih na um cun leitlun nun timi hi kahrangah san a nei ding nan…..” a hon ti. Van Mang cu Siangte lam khal her cuang loin a ngel kai hngettu Siangte ih kut cu nuamten a von phelhsak hnu ah, “Khati vekin kanmah laimi zohman um lonak hmun ah Beer va in nawn hlah. Zuu dawr le a si fawn lo.” tiin aw rum nawn in a hon ti. “U Mangte, khami Beerduur na hmuhmi pawl kha keimai’ in mi an si lo. Ziang tlukin ka parah thinlung na nei ti ka theih duh ruangah anmah an in mi beer duur lawng kha ka retter mi an si. Ka in mi an si lo. Na duh le i ra hnim aw!” tiin Siangte cu a hong tho ih Van Mang cu a va naih. Van Vang cu thinheng nawn in a kut a tumih mitmeng cang tak thawn Siangte zoh dingin a dunglet a von her cuh! A ruah ban loin Siangte cu a dingah a rak ding ziarziar. Tha la nawnih taksa rak her a si thawn Siangte ih  lu le a liang a khawngaw dukdi. A lungphuhri cawl thluh vekin a thei aw. Siangte khal a mit a sing murmoih a lungphuhri a rak cawl ve. Zuu rim nam a thei lo ngai tikah a khawruah a har. Culeveten a thinheng a hong sisang ciamcoih, “I hniksak hlah aw. Nangih hniksak ding ka si lo. Hniksak khal ka duh lo! Na lamzin ah feh awla ka lamzin ah ka feh ve ding. Ka feh ding. Sangka rak hren aw maw” a ti hnu ah Van Mang cu ke kar rang tauhtoin lenglam ah a suak. Siangte cu netabik Van Mang ih ṭongmi “Ka feh ding. Sangka rak hren aw maw” timi ṭongfang a von ruat. Ngaihsaknak ṭongfang a si. I ngaihsak cun ruahsannak a um hrih lai ti ruatin amahte a hni hmukhmo.

Zarhpi zing Nazi 9am cun Ngunte cu kan dung thla an suah ih a rualpipawl ih hrilsakmi hnipuan, kersuur a von hruk. make-up pawl cu a von thuh ve. A umnak inn ihsin a suah zawngah sms a kuat ta. “U Mangte, na thinphang hlah. Tuisun cu biakinn ka thleng taktak ding. Nang tla khawm nuam maw. Tu inn in ka suak. Sun ṭha”. Hni siamsiam in Ngunte cu a von feh. Orchard MRT a thlen in a ṭum ih Bus interchange lam a hei pan. A rualpi Cerkuk le nuambeuh le pawlin an za an rak zap. Hot taktak hlir in an cei aw ṭhepṭhep. An kedam bunmi khalle khapkhat can ih sang a si fawn. Ngunte cu a um khal a rem thei thlurthlo lo. A rualpi pawl cun, “Na hruk pek a si ruangah hokhaw. Hitivek veihnih thum na hruk cun na zongsang dingih kedam niamte bun na rem nawn lo ding” an rak ti. A kerte hrukmi khal an rem sak phah vivo. Botanic Garden cu an von thleng taktak. A zing tuk lai zianghman tuah ding a um hrihlo ruangah pangpar lakah an tawivak rero. Ngunte cun Min Min hnen ah cun,  “1:00pm rori in biakinn ka feh ding kha aw” tiin a hna phuur ah a hei sim. Min Min khal cu a lu a rak sut hnguthngo ve.

Siangte cu a kiangih thil awn a theihmi cu mak tituk in a hawl ciamco. A kiang a dap vivoih a ton ngahmi cu cell phone a si. ṭhaten a von zoh ih Van Mang ih phone a si ti a von fiang. Message a thleng a hmu nan siar tum cuang loin TV parah a hei ret. Ti kholhnak lam panin a von feh. Ti a kholh phahin mitu nai a thih hmuhmi cu a von mitthlam sal. Ti a kholh ṭheh veten TV parih phone cu a lak lohli ih a von zohhliah. New message from ‘My life’ ti a von hmu. Siangte cu a thihri pawl an hong sa luailo. Ca cu a von siar. “U Mangte, na thin phang hlah tuisun cu biakinn ka thleng taktak ding. Nang tla khawm nuam aw. Tu inn in ka suak. Sun ṭha”. A phone number a hon zoh. Singapore in a si ti a hon fiang. Cucun a mitthlam ah cun Parte le Thangte kut an sih hlan deuhte ih a hmaisabik Van Mang thawn an tonawk sun ih thilcang pawl a von mangsuak. Parte ih, “U Thang, na paseu ih fanu kha Singapore ah a um silo maw? A phone number in pe hen” “Anih cu inn phone lawng si a hman” tiih an biakawk lai ih “Singapore ee?! Khui maw a phone number?” Van Mang ih mithmai umdaan pawl a von ruat sal. Cuveten Siangte cu a mai’ phone ah cuih phone number cu a ngan khum. Cule, “Enjoy your day!” tiin Ngunte hnenah ca a hon let. Cu hnu ah Ngunte ih ca kuatmi le a lehsalmi cu a delete thluh sal.

Ngunte cu a phone cakuat a rong thleng a von zoh ih a hna ngam tukah a hni hmurhmo. 12:45pm lawngah Birthday cake an at ih sun caw an von ei thlang. Midang cu Beer an in huahho mai. Asinan Ngunte le Nuambeuh cu Coke an in. 1pm a kim cun Ngunte cun, “Ruallepawl, ka lo hmaisong zet nan ziangkhal lole ka lo fehsan ke aw. Rong sun ṭha auh la.” a ti hnu ah a dingih feh tim a tuah. Nuambeuh khal a ding ve ih, “Ngunte, kei tla ka khawm duh ve” tiin a dungin a rak dawi. Bus thawn an feh thiam lo ruangah Taxi an von sang. Biakinn hmai an vong thlen in Min Min cun Taxi fee $12 cu a pek. Ngunte cun, “Nuambeuh minung pathum kan si ih $4 ciar kan ciah khah” a von ti. Nuambeuh cun mak ti nawn in Ngunte cu a hon zoh. Ngunte cun, “Ziangah? $4 na nei lo maw?” “Ngunte, hivek tiangtiang cu anmah an cemdaan sisi” “Kawl pawl lakah daan le dun ti a um lo. Hitin kan biakinn an rak thleng duh hman lungawi lam sisi” “A sung a lut cuang lo ding pi. Biakinn sung a luh man in aan a cing cuang lo ding fawn” “A sikhalle kan pe thotho ding” “Aw. Si ko” tiin paisa cu Min Min ih kut ah an pek sal. Asinan Min Min cun, “Nan lamzin man lo tumsak theitu ka si hi sunglawi ka ti tuk! In pe hrimhrim hlah uh. Ziang tluk in pek khalle ka la cuang lo ding” a rak ti. Ngunte cun duh cuang lo’n, “Ka feh tlunnak man hrangah thlahlawh ka nei ko. Thildang laksawng pekawk tivek cu thuhran a si. La aw” tiin a kerte zaal ah paisa cu a hei than zik ih Min Min le a rak kiang man. Cutin an heerhawt awk rero lai ah kawlram ihsin Evangelist ra tlawngtu Evan. Joel le FCFS hruaitu hrekkhat pawl cu an rong thleng. Nuambeuh cun, “Ngunte, khih!” ti phahin a mit le a kha in a hon piah. Ngunte khal ningzak nawn in Biakinn sung cu a vong lut.

Khawmnak cu Ngunte hrangah cun nuam a ti tuk. Kanmai’ ṭong fulfo roriih hlasak hi a di a riam tuk. Caan an von hmangliam vivoih thuthangṭha simnak caan a si thlang. Evan. Joel cu a hong dingih Bible a hon siar. “Zohṭhimtlak/ Cawntlak nun neitu” timi thupi hmangin a hon sermon thlang. Caan tawkfang nawn a sermon hnu ah hitin a ron ti. “Singapore ih Chinmi pawl, zohṭhimtlak nun neitu si zuam uh! Ka rualpi pawl Beer an in caan ah kei cu pepsi si ka in ti maimai kha Zohṭhimtlak a si lo! Na rualpipawl Beer an duh ih nang na duhlo maimai a si. An Beer innak kiangah to tahratin pepsi na rak in thei ve cu anmah thawn thildang ah nan duhmi a bangaw in nan lung a rual thotho a si kha! Na rualpi pawl hnenih zohṭhimtlak le cawntlak na si ding cun an thil tuahmi kiang ihsin na tlan hrimhrim a ṭul. Paul in Timote hnenih ca a kuat ah khan, “Zumtu dang pawlih Zohṭhimtlak si dingin nung aw” a ti a si kha”. Ngunte cu a hong thir dukdi! Khawm an von bang cuh hmai zum nawn in a von suak.

Van Mang cu khuitawk fangah a phone a thlau ti ruah ngaihnak a thei lo. Siangte ih phone number le a by-heart fawn lo. A khawruah a har. Phone um lo cun a va a vai. Ngunte hi ziangtin caan a hmang pei ti theih a duh tuk fawn. Zaan khawm dingin a tumih khawm feh phahin Siangte hnen feh phah a tum. Siangteih umnak inn a thleng nan zohman an rak um lo. Cutin ziang tuah ngaihnak thei loin Biakinn cu a hon pan. Siangte cu Singapore ih a rualnu Nuambeuh hnenah phone a ko ih Van Mang phone sungih a hmuhmi phone number kha na theihmi a si le silo ti thua hon sut. Nuambeuh phone number cu a von zoh ih a theihmi a si daan le  cun a sunih an umtlangdaan pawl a zaten a rak sim thluh. Cuveten Siangte cu lungkim tukin, “Hahahaaaa!!!!! A ṭha! Sun ih nan zuk hmuahhmuah i ron kuat aw. Email in i kuat hlah. Phone sms in i kuat aw. Veikhat kuat ah pung sarih kuat a theih kha” tiin a hon fial. Nuambeuh khalin lungkim in a lu a rak sut ve.

Ngunte cu zaan it dingin ihnak lam a von pan. Sunih thuthangṭha a ngaimi pawl a von ruat sal. Culai fangah a phone a rong tle depdo lala. Vangmang hnen in sms a rong thleng. “Kan Pahnih hi Pathian samhrisih kan si lo hrimhrim ding a bang. Asilole, nangmah ih remruahlo maw a si sawn ding????? Tuisun na umdaan zaten ka thei ṭheh. Ka lo zumih ka lo rinsan tukmi na sinan……….” Ngunte cu cakuat a siar thluh cun a lungphang in ziang ka tuah ding ti a thei lo. A phone cu a kai ṭeuṭeu ih “U Mangte, ziangmi si na sim duh? I zum ih i rinsan asile cu a cemtiang i rinsan lo ding maw? Kan pahnih lawng rori kumkhua in na rak ti kha……” tiin ca a von let sal. A hngak rero nan ca a ra thlengsal nawn lo. Phone a von ko nan kawh a rak theih lo. Sms a kuat sal lala. “U Mangte, na ti duhsan ka theithiam lo. Zangfahten na phone rak kai aw. Ka lo ko ding. Maw. Na phone kawh theih in rak ret aw”. Ca a kuat thluh in phone a von ko sal. A rak lut purpi ih a hna ngam deuh. Khatlam ihsin phone cu a kai nan sawnnak awkam a um lo. A hmaisabik ih Van Mang ih a rak hrem lai a von mitthlam sal ih hitin a von ṭong. “U Mangte, in biak paihlo khalle ka ṭongmi cu in ngaisak hram aw. Tuisun ih ka umdaan zaten na theih thluh a si ah cun i fak tuk lam dingmi na si. Nangmai’ ziaza lo bangin ziang ai suakin saw khativek ca in kuat. Sun ih ka umtlandaan ah na rinhlelh dingmi pakhat hman a um lo pi. Thufiang thei loin kan pahnih kar lakih a rak thelh awtu an um asile cu na theihfiang duhmi in sut aw. Kan pahnih thinlung a theifiang ih a hmuaw fiangtu khal kanmah pahnih thotho kan si kha. Hmmm……. U Mangte, na thinheng a daih tikih thu i suh huam tiktik ah na theih duhmi a zaten ka lo simfiang ding. Tucu na ṭong paih si lo. Mang ṭha phot” Ngunte cu phone thla dingin a hna ih phone cu a kutin a hon tiniam zik zawngah aw ring takin, “Simfiang a ṭul lo! Tuih na um vek cekci in rak um mai aw” tiih nunau aw a hon thei. Ngunte cu ṭong dingdang thei lo le a theihmi aw cu zum thei loin a phone a zoh. “Hello!! Zo si?!” a ti rero nan khatlam in phone a thlak cih. Phone number a von zoh salih Van Mang phone rori a si fawn. A lu vawhpi tia in a thei aw. A aw theihmi, “Simfiang a ṭul lo! Tuih na um vek cekci in rak um mai aw!” tiih nunau aw cu  a hnathlam ah lungawzir bang a thuahthuah in…………

By – Mai Dai Dim

Comments

comments

Comments

%d bloggers like this: