Kan Pahnih (II)

Kan Pahnih (II)

By – Mai Dai Dim

Zinglam khua a van veten Ngunte cu a tho. Tuisun leng suah ding a hngakhlap tuknak ah zaan khal a itthat thei lo. Asinan zo ka va tong dingih ziangtin ti cu a thei awlo. A umnak kiang nai te ah Kachin nu ‘Daisy’ timi thlakhat veikhat leng suak theimi Christian minu a um ih cumi thawn suak tlang ding an si. Singapore a thlen ihsin zodang hman pehtlai theilo bembem a si ruangah Laimi khawmnak a um le um lo ti khal a rak thei lo lawlaw. Zinglam 9:00am in inn ihsin an suak tlang. Daisy ih hruainak ah a thlun vivo mai. Ngunte cu hnen-um ka si tiin amah le amah a phahniam aw ringring mi hi Daisy cun a ngaih hrimhrim lo! Biakinn an va thlengih Biakinn hmai ih canganmi cu a von siar. ‘Elim Church’ ti a si. Elim Church cu miphun tinkim komkhawmnak a si ruangah Kawl ṭong  hmang in an khawm. Ngunte cun an Church kaihhruaiawk daan, an mino pawlih mi pawlkom daan, an khawm a hlunghlai theidaan tipawl a zohih a lungkim in ṭha a ti zet.

Khawm an ban in an Church member sungin innsang thar a din pekmi Esther le Kyaw Min tei nupa in suncaw an do ih cutin suncaw kawl rawl tlaitakin an ei. Ngunte cu kawlsuan ih Voksa kio a ei lonak khal a rei nguahgno thlang. Sunglawi a ti zet. Rawl an ei ṭhehin Daisy cun a fehpi salih cutin Singapore ih Kawlram mi tonkhawm awknak hmunpi a simi ‘Cityhall Penisula Plaza’ timi ah a hei fehpi. Ngunte cu a nu le rori hman a pehtlai thei lo ruangah Handphone lei ding rori  a tum. A thlen pekteih a pi nuih ṭongmi cu a von thei sal. “Handphone hmang timi hrimhrim ka duh lo aw!”. Ngunte cu a lu a thing. A lei lo cun ziangti hmanih a nu le pehtlai thei lo ding dinhmun a si fawn. An inn kiang Indonesia lam pawl An pi leih theih loin Handphone a thupteih hmang pawl a von ruat sal. Cucun, “Umm!!! Ka thlahlawh sungin lei loin Tuluk kumthar ih ‘Ang-pau(Red packed)’ in pekmi in phone ka lei ding. Kapi ih i kaih ngah tikih i tlunter khalle ziang ti ṭha. Cun Handphone ka neih cun U Mangte khal ka pehtlai thei ko ding!” tiin thuthluknak a tuah. Thla sarih le hrek sung a thlahlawh cu Agent fee ah a cem. A tu cu kumkhat cekci a um ruangah thlali le hrek hlawhman cu a pi in veikhat pekah a pek thluh. Cutin a thlali hlawhman cu inn lam a kuat hnuah Phone lei dingin phone dawrlam ah Daisy cun a fehpi lala.

Phone dawr ah cun dingin khuimi ka lei ding tiin Phone a bih rero laiah a dung ihsin mi pakhat in, “Ngunte!!!” tiin ko phahin a rak pom. Lau nawn in a hon zoh. Kawlram Agent inn ih a rak umpi mi ‘Cerkuk’ a rak si. “Aii….. Cerkuk!” a hon ti ih a mitthli lamlam an rong tla. Cerkuk thawn an pomawih Cerkuk khal a mitthli a haal ṭiamṭiam ve. “Cerkuk, phone ka lei duh in zohpi aw maw” “Ngah tuk! Ziangah na suak dahlo maw?” “Aw tuisun cekci lawng ka suak. Aw! Himi hi zing ihsin i suakpi ih i hruaitu a si. Kachin miphun a si. A hmin cu Daisy” tiin theihter awknak a tuah hai. Cerkuk cun “Himi lei aw. Himi si ṭha” tiin phone ṭha a sim ih a hmuh vivo. S$120 man Nokia phone cu an lei suak. Memory card pawlkhal an lei. “Hla cu keimah ka phone sungta ka lo kuat ding maw” tiin Cerkuk cun ti vohvo’n a ti. Cerkuk ih hoiher cangvaihdaan a zohin Ngunte cu a lu a thing rero. Mak hi a ti tuk! A thuamhnaw hrukdaan le a cei awkdaan pawl khalin Ngunte ih thin lamlam an ti phang. “Ngunte, a tu hmaisabik kan tonawknak a sisi. Tuisun ih a suakmi kan rualpi zaten ka ko dingih hmunkhat ah zaanriah kan ei tlang ding maw” tiin Cerkuk cun a sawm. Ngunte khal cun lungawi takin a rak cohlang ve.

Ngunte ih phone lei tharmi ah cun hla  thun phahin Cityhall khatlam ih ‘Marina Bay’ timi tipi ah an hei fehpi. Ngunte cun, “Cerkuk, nannih leng nan suak theinak a rei zo maw?” tiin a hon sut. Tawi vutvoin Cerkuk cun, “Thlali nak” tiin a rak sawn. “Nan khawm dahlo maw? Ih,, laimi khawmnak tivek teh a um pang maw? Na thei maw?” “Um ee, laimi khawmnak a um ko” “Neta ka suak thei tik le cu Laimi khawmnak ah kan khawn hai pei uh ti” “Aw. Khawm ding si ko”. Cerkuk ih ṭonglehdaan vutvo cun Ngunte ih thin a hringter deuhdeuh. Ngunte cu laitlang ihsin a kenmi laithil tahmi skirt le kerte fawmaw a hru. Cerkuk cu skirt kawng can le kedam sang a hruk. Kerte banbul a hrukih mithmul lem a bun bet. An thuamawkdaan a dang verver tuk.

Zaanlam 5:30pm a kim cun Cerkuk cu phone a biak rero. Zaanriah ei dingin kawl rawldawr sung cu an von luhpi. Ngunte cu a lau tuk thlang! An rualpi Suikuk, Khinte, Kimboih le Tete tipawl an rak kim thluh. Cubet ah mipa pawl an kiangah an to ṭhepṭhep. A mit cu sumbu mit tia in a kau. A rualpi pawl thawn cun an von pomaw hai. An cei awkdaan tipawl a zoh kual vivo ih amah le amah a ningzak lam. Rawl cu an von cah. Rawl a ra thlen hlan in Beer a buurpi piin a ra thleng. Ngunte cu a thawthawt khal a rem nawn lo. An lakih mipa pakhat cun Beer buur cu a hon ongih khuatkhat hnu khuatkhat a von thle. Ngunte cun mit ṭhep loin a zoh ringring. Cupa cun a thlet dingmi khuat a cem in pakhat hnu pakhat hmai ah khuat cu a hei ret sal. Ngunteih hmai ih Beer khuat a von ret cun Ngunte cu a thihri tiang an rong hit cuaico! A kut a tum ṭelṭel ih, “La sal aw. Kei ka in lo ding.” tiin a hon ti. Cupa cun, “Naunu, nangmah hmuaknak ah na rualpipawl in an tuahmi sisi. Na in lo cun cang lo. Tuizan kan rawlman hmuahhmuah cu keimah ka pe ding. Hmaisong loten in-ei huahho aw” tiin a ti. Cun, a rualpi dang pawl khalin, “Si ee Ngunte, nangmah kan lo tong ngah ruangih kan aihmi si. Beer maimai tla cu zianghman a si lopi. In awla si ko,” an rak ti ve. Ngunte cun, “Leng nan suah tinten hitin maw nan um ringring? Hi milai pawlin rawl le Beer an lo do ringring maw?!” tiin thinheng nawn awkam thawn a hon sut. Tete in, “Ngunte, in zum sual pang hlah. A ringring in kan tuah lo. Cun, leng kan suah tinten hi milai pawl khal kan tong lo. Tuisun hi nangmah na suak ti  thu Cerkuk ih in sim veten kan hei phone ih an hnaṭuannak ihsin an tlun hnuih an ra mi si. Sun ni tlak khal anmah thawn caan kan hmang dah lo,” tiin a hon simfiang. Ngunte cu a thawpi veikhat a hon thawt hnuah, “Hmm!!!!! Cuti asile, tuisun cu hmaisabik kan tonawknak a si ih thinheng ih ṭhenawk ka duhlo. Nan simmi cu ka lo zum ding. Asinan, kei cu Beer ka in lo ding. Ka in hrimhrim lo ding. Nanmah le nan kaa te thawn nan in mi cu ka lo dawn lo. Asinan ka kaa sung tiang cu rak thlengter tum hram hlah uh. Cun, miphun dang pawlih nautat le zawkzet suukso rero ding men in nan tikcu caan hi nan hmangliam pang maw tihi ka rualpi ṭha le ka duhdawtmi nan si ruangah ka ruah nan har zet. Nan lakih thlahnih ih upa mi ka si ruangah kanau le vekin thu ka lo sim” tiin a thinlung sung thu pawl cu a phorhsuak.

Zaan a kim in Van Mang cu Falam ka phone ding maw Phone lo ding ti ruatin a buai. A phone cu a kut pahnih in a huumih a khabe ah a sawh ih thuuk zetin thu a von ruat. A lu khalin a kehlam liang dai zik khopin a ringh a peng. “Kan dung ka phone tiang kha Ngunte ih thuhla theitu zohman an um lo si khawh! Singapore a thlennak le kumkhat a rei zo an ti fawn. Inntek sia tuk tivek a tongteh a sipang pei maw? Asilole pakhat khat a cang teh a si pei maw? Aaasshh!!!” tiin a kaa in ṭong phahin a kutin a lu a hon cuul. Sun ih Thangte le Parteih kutsihnak a dinpi laiih Parte dinpitu Siangte ih mitmeng lamlam a mitthlam ah a vong cuang ciamco. Ziangkhallole khua ka phone dingih Ngunteih thuhla cu ka von sutsal thotho ding tiin a ruatsuak. Phone cu a von ko ih a lut purpi. Khatlam ihsin “Hello….. Zo nan biak duh?” tiin an rak sang cih. Van Mang cun, “Lily nu, Malaysia in Mangte ka si. Zangfahten Ngunte nu ka biak duh nan…” “Aw, rak kai sungaw maw. Ka hei ko duak ding” tiin reihman a hngahman hlan in Ngunte nu cu a ra thleng cih. A theih duhmi pawl a sut ih Ngunte nu cun Ngunte Singapore a thlen thlakhatnak ih a ron phone hnu a thuhla zianghman an theih nawn lo thu a rak sim. Van Mang cu a thutheihmi in a tha a dawngter sinsin. A hna ih a ngaimi phone cu nuam teten a kut a thlak niam vivoih amah a ruangpum khal nuam teten zial parah a vong to. “Ngunte, zamrangten na nu le von pehtlai hram aw. Maw!” tiin a ṭong phurhpho.

Zinglam a pi zungkai a feh veten Ngunte cu a phone a lak lohli ih Falam a von phone ṭuṭo. Asinan phone a lut in a lut thei dahlo. Caanher pakhat le hrek sunglai a bei nan a ngah thei cuanglo. A beidong in a to sialsial. Sun hna a ṭuanthluh zaanlam kau ah a bei sal. A ngah cuanglo. A rualpi pawl ka kawhdaan a sual si pei maw tiin a sut ih le a rak dik ko fawn. Cutin a zaan cu thinheng hngerṭeu in a it. A thaizing ah a try salih veikhatnak ah a rak ngah purpi. Lily nu in phone a rak kai ih Ngunte ka si a ti cun Lily nu cu a lungawi mitthli a luang. Zamrangten a nu le a va kawhsak. Paisa a kuat thu le a inntek tei miṭha zet an si thu pawl a sim. An ngaiawk tuknak ah an nufa cun an ṭap phah an hni phah tiin an biak aw. A nu cun, “Ngunte, na u Mangte in zarhpi zaan in ron biakih na thuhla in ron sut rero hokhaw. A lo seherh zet a si kha” “U Mangte maw?! Khui a phone number zamrangten i rak pe aw Kanu” “Ai, a phone number cu in pe dah lo pi” “Hmm!!!! Aw! Kanu, keimah ka phone number ka lo pe dingih tuihnu veikhat a ron lo phone le rak pe aw maw” tiin a phone number cu a pek. Cutin a phone oversea balance a cem tiang Ngunte le a nu cu  an be aw.

Malaysia ih a hminthang zetmi KLCC hmai ah Van Mang cu mi tonding nei manhlap zetin Taxi sungin a hong suak. Taxi sangka a von kharih a ke a hon her zawngah mi pakhat in kedam dunglam zum in a ke a rak pal ngah. “Ahh!!!!” tiin au phahin a ke cu a von zoh. Dingten hong feh a tum zawngah a kiangin nunau nu pakhat ih phone biak rero mi aw, “Ziangah khami bus kha Kotaraya a thleng na ti cu in bum rori si! Veihnih helin kan hel ih in thlenpi lo. A tu KLCC hmai ah kan ṭum.” ti a von thei. A aw a ngai in a neel zetmi aw bang a ti tukih ngunngaih deuhin a von zohhliah. Mani bai ih Monuih ṭhian Siangte a rak si ngaingai. “Siangte” tiin a von ko. Siangte cu a hong her vukvi ih, “Aw! U Mangte!” tiin a hon ko ve. “Ziangah maw Kotaraya cu feh na tum?” “Aw….. Poi sal lo. Nangmah ka lo tongih ka feh sal lo ding. Khui na feh tum U Mangte?” “Aw!!! Mi tong ding ka nei ii…. Ka tlai deuh zo. Ka feh cih ding maw” tiin a her aw ih a feh. A kekar karhnih hrawng a hon kar ah, “U Mangte!” tiin Siangte cun a hon ko. Van Mang cu dunglet a herih Siangte cu a von zoh. “Na man in khimi tisuar umnak ah ra aw. Na rat hlan sung ka lo hngak ding” tiin a hon ti hnu ah Siangte cu zamrangten a tlan.

Ngunte cu a pi le in a phone neih an theih ding le a phang si thin phaw dede in a um ringring. A phone sms thleng a um le um lo zoh ah ek-inn hi tuletu a feh. Tu khal cu ek-inn sungah a vong lut lala. A phone cu a von zoh. New Message pathum rori a rak um. A von kau ih Cerkuk hnen in pakhat le Phone number thar in pahnih a rak si. Cerkuk ih kuatmi a von siar hmaisa. “Ngunte, nang cu a thinlung a hmun zet ti ka lo thei. Asinan Singapore kan um sung kan inntek pi le thawn cun hni siamsiam ih thurel tlang tivek a um thei lo ruangah umhar phen ih in hniter theitu ding ah tlangval ka lo pe. Na phone number ka pe zo. Thinphang hlah. Singapore tlangrai hokhaw a si. Cun, na hmin ah ‘May Hnin’ tiin ka bum bet. Hiiii….haahaaa..” tiin a kuat. Ngunte cu a thin a hong phang dukdi. Thil sual  pakhat tuah ngahtu vekin a thei aw. Cun a dang a von zoh leh. “Dear May Hnin, I’m Min Min” tiin le a dang pakhat cu, “R u dinner?” ti a von hmu. Ngunte cu cuih message a siar cun a ti can a thei thei lo. A lu a thing. A ringh a peng. A kaa in “R U Dinner?ti cu? ????” tiin a hon ṭong suak. Cerkuk hnen ah a hei forward ih Cerkuk cun, “Zanriah na ei zo maw a lo tinak hokhaw” a ron ti cun Ngunte cu pumdom in a hni. Zingtinten ṭuanvo neh takin “Morning!” cu a ron kuat ringring. Zaan 10pm hrawngah “Has u sleep?” tiin a suat sak. Ngunte cu a umhar caan le cuih sms pawl a siarsal cingcing. Cutin phone a neihnak thlakhat a kim tiang Van Mang thawn an pehtlai aw thei cuanglo mihin a thin a bangter.

Van Mang cu a hnaṭuan lai thu a ruat kurhko. KLCC tisuar zoh phahih Siangteih ṭongmi pawl a von ruat. “U Mangte, ngaingai te cun khami Parte tei neihawk thluhin kawlram tlunsal ka tum. Kanu le khalin an lungkim ih Kotaraya ih Agent pakhat hnen in tanglam ziin ih tlun ka tum. Asinan ziangruangah tlung loin Malaysia ah hnaṭuan ka tum sal ti na thei maw?” “Thei lo. Ziangah saw na tlun sal lo?” “Hitawk ah ka thinlung duh ka zulh dingmi a um. Kan theihawknak a rei lo nan…. Ka hmuh veten ka lungtur a rang dukdo. Anih khal a si ve ko ding ka zum. Curuangah tlung thei ka si hrimhrim lo!”. Van Mang cu a lu a thing. “A cang thei lo. Ngunte ka pehtlai theidaan ding ka hawl hrimhrim ding” tiin thungai thlakin thuthluknak a von tuah.

8:30pm hrawng, zaanriah an khawh thluhin Ngunte cu basin khat liailiai in thil a kholh. Culai ah a pinu in, “Ngunte, Airport ah na pu kan hei thlah dingih khami na tuah thluh cun ziangdang hman tuah ṭul nawn lo aw..” tiin a rak ti. A pupa cu Hongkong feh ding a si. Ngunte khal cun a pi ih simmi lungkim in a lu a sut. A hnaṭuan hmuahhmuah a von ṭheh thluhin a phone a va zoh. ‘3 missed call’ a rak um. A von zoh cu Malaysia phone number a rak si. A lungawi tuk ti cu a mithmai ah vam hemhem in a lang. Zamrangten cuih phone number cu a von ko sal. Zohman in an rak kai lo. Veihnihnak a ko sal. An rak kai nan ṭong awkam ih sawnnak a um lo. Amah Ngunte sawn in, “Hello… Zo si?” a ti rero nan an rak sawn cuang lo. A mangbang in phone a thlak. A phone balance le a rak cem. A lutlam lawng a ngah thlang. A beidong awloksong in a phone cu a zoh cuahco. Culai fangah a phone cu a hong tle depdo. (A thupteih phone hmang a si ruangah a aw thangin a ret ngam dahlo). Zamrangten a phone cu a von kai.

“Hello…..” “……….” “Hello…. Zo na si? Zangfahten zo na si tital in sim aw” “……..” Ngunte cu khatlam ihsin sawnnak a dawn lo ruangah thu a ruat. Ka khawruah vekin thil a rak silo a si hi ti ruatin, “Hello! Who set?! I’m toking to you! Pls say something!” tiin Singlish in a von biak thlang. Van Mang cu a hnih suup thei nawn loin, “Khikhikhukkk!!!!” tiin a hong hni. Cuih hnih aw a theih veten Ngunte cun, “U Mangte!” a hon ti cih. Cu veten Van Mang cu, “Hahahaaa….. Who set? I’m toking to you! Ziang saw a duhsan? Hahahaaa….” tiin ti huakho piin a hong hni. Ngunte cu a lungawi tuknak le a ningzak cem awin a mitthli a haal ṭiamṭiam. Van Mang cun hni phahin a sut sal thotho. Ngunte cu tuar aw thei nawn loin, “Na hnihsuak tuk rori maw? Nangmah ka lo biak rero ih in biak fawn lo ruangah si. ‘Who set – who is it?’ ‘I’m toking to you – I’m talking to you’ tinak an si. Khakha Singlish an ti” “Aww…… Ngunte cu na rak fel thei thotho hokhaw aww…. In simfiang ih ka lungawi tuk maw” tiin thungai in Van Mang khalin a von biak ve. “Ngunte, na dam in na tluang ko ti? Na thuhla zingzoi in caan ka hman a tamtuk hokhaw. Kan pahnih pehtlai aw thei dingin ziang tlukin ka zuam ti na thei lo” “U Mangte, ka lo ngai daan hman a mak! Nangmah thawn kan pahnih pehtlaih awk theinak ding hrang ruat rori in si a thuptein handphone ka lei” “A thupte in ee?!” “Aw. Kapi le in phone hman in sianglo pi. Kan pahnih kan pehtlaihawk thei ding ruahsan rori in….. Ummm….. Tucun ka hna ngam tuk zo” “Si rori. Ngunte, ka lo ngaiiii tuk lawmmam!” “Ka lo ngai tuk ve. U Mangte, tucun zaantin kan biak aw thei thlang ding ti” “Aw. Si ee,…” cu zawngah inn hmai gate sangka a rong ong aw. “U Mangte, kapi le an ra tlung. Neta le aw! Duk!”. Ngunte cun Phone a thlak dukdi. Van Mang cu a lungawi tuk umngaihnak khal thei loin a khir a khawt, a zuang a zam. A phone cu a hmur in a hnam thuul an inn sungah a her aw ciamco. A ihnak ah a hong sepaw ih a phone zoh keukeu in, “Ngunte!!! Ngunte!!!” tiih a kawh hnu ah a phone hnam phahin a vong bokkhup.

(Visited 167 times, 1 visits today)

Comments

comments

Comments

%d bloggers like this: