Kan Pahnih (I)

Kan Pahnih (I)

Mai Dai Dim

Zaanttim 12am a naih cuahco. Kiangkap thawmvang khal a ṭhing khupkhi thlang. Ngunte cu itthat tum rero nan itthat thei loin a ihnak khaan fiak takte ah cun khatlam le khatlam siir a her rero. A ihnak zawn tukverhte ihsin a rong cerh-awmi Thlapi vang cun a fim harhter sinsin. A hong tho ih sangkate cu a hon ong. Thla thuul zaan a rak si. A umnak ihsin a hmuh ban tawk tiang khua a cuan. A lungleng tukah a kaa cun Salai Tuan Ling Thang ih ‘Cinmual Tlang’ timi hla cu miih theih lo ding fang in ti riangro tein a hon sak. Hla fingkhat cemtiang a sak vivo. “Zaan thlapa a rong vangih keimah te lawng in maw mitthli thawn ka rong vakvai ee……” ti hlafang a von sak cun a hnathlaam ah, “Ngunte, khui hmun ih kan um khalle thla thuul zaan ah cun thlapi par talah kan mit tongaw ringring seh maw”, tiih ‘Van Mang’ ih ttong aw thlaam cu a rong thang. A biang parah dai kiahkoin mitthli a rong luang suk. A thinlung mitthlam ah dunglam thu pawl an rong lang ciamco.

Falam No. (1) B.E.H.S (10 A) khaan sungah Ngunte cu a rualnu Chinku thawn ca an sutaw rero laiah Pa Tawk cun Ngunte cu Caaku raang ih tuahmi rose par  a va pek. Ngunte cu Caaku rose a ratnak a dunglam a von zoh ih mitmen cang nawn thawn, “Ziang na cang? Na aa pawt maw?!” tiin awka hro nawn in a von ti. Pa Tawk khal cun, “Aw si. Nangmah ka lo hmuh cun ka aa pawt cih”, tiin a rak sawn ve. “Feh aw! Tlawngkai lai ah i hnaihnok hlah. Sayama hnen ka lo sim ding. Feh zaang aw!” tiin awkaa hro takin thinheng mithmai thawn Ngunte cun a hon ti. Asinan Pa Tawk cu feh duh cuang loin hmai lamah  a hei naih deuhdeuh ih Ngunteih hna phuurah cun a lu a hei ret. Cun, dim thektho tein, “Ziang tlukin ka lo duh ti na thei lai ding.” tiin a von sim. Ngunte cu a thinheng tukah a thihri pawl tiang an hit thluh! Zianghman ttong thei loin a ngui ciauci. “Bupp!!! Phawkk!!!”. Ngunte cu a theihmi thawmvang ruangah dunglet a her salih, “U Mangte!!” tiin mit kau takih meng tahratin a hon ko. Van Mang cun thil umtudaan hmu thluhih tuar aw thei nawn lo ah Pa Tawk cu a rak thongh. Pa Tawk cu Khung parah a vong bok khup. Van Mang cu Tlawngta a si nawn fawn loih thuhla a buai ngaingai thlang. Sayakyi zungkhaan tiang an thleng.

Zaanlam ninu cu Vankau tlang phenah a hrek a liam ih a hrek taang cun a kiangkap ih thingkung pawl a tlet ih tleu sersi in mi thinlung a ti danglam duh nasa. Ngunte cu an inn hmai pangpar le an hmuan duum ih haanghnah haangrah an ciinmi pawl ti a tawih rero laiah, “Uhumm!!!!” tiih khuh suak lo khuh awtermi aw a thei. Zoih aw a si ti cu ruah lawk khal ttul loin a thei cih. Asinan thei lo bangin a ti tawih kelte’n a tawih rero thotho. Van Mang cun a hon naih deuhdeuh ih a hmin in a ko. “Ngunte” “……..” “Ngunte” “………” . A ko rero nan Ngunte cun a awih duh remrem lo. Van Mang cu a um thei nawn loih an timerh a hong phit sak. Tidai a rat nawn lo cun Ngunte cu a khel khatlam le khatlam parah a kut suang tahratin, “Ziang na tuah?!” tiin a hong au. Phuhrung aw tak mithmai thawn hni zuamzi phahin Van Mang cun “Timerh ka phit lo ziang” tiin a rak sawn. Ngunte cu Van Mangih umdaan zoh ah thinheng thiam nawn loin a hong hni hruthri.

“Ngunte, ka man zo.” tiin inn sung ihsin a nu cun a hon auh. Ngunte khal cun, “Aw, ka ra” ti phahin hmuan ti tawihnak pipe pawl cu a kual rero. Ngunte nu cu Vankau tlangih Nurse pawl hrang hmehsuan hlawhtu a si. Zaan tinten Ngunte cun NTS ah Ttawng thawn hmeh a hon khaih ringring. Ngunte le Van Mang cu ttawng zawn awin zaandang bang Vankau lam pan in an hong so. Ni dang ahcun thutin ruah awin lamziin tluan an hni an khek ttheu nan tuihzaan lam cu ni tlak a mawi ruahin annih ih ni tlak cu a rak hahdam lo nasa. Mah le thuruahnak cio thawn an feh nguahngo vivoih No.(2) Hramthok tlawng inn zawn an thlen in Van Mang cun, “Ngunte” tiih a kawh zawng cekci ah “U Mangte” tiin Ngunte khal cun a rak ko ve. An pahnih in an aw rual thlurthli in an ko aw. Nang sim hmai an ti aw rero ih zohman sim aw ngah loin NTS tlawng inn hmai an hong thleng. An kir lamah Van Mang cun a sunih thilcang thu ah ngaidam a dil. Ngunte khal cun tuihhnu lam tlawng inn hrimhrim ra nawn lo dingin a dil ve. Cutin cuih zaan cu Van Mang hrang ahcun thinlung phawkaw hiamhiam in a thawsa zaan itthat thei loin caan a hman zaan a si. A sun ih thilcang thu pawl a ruat. “Ngunte, nangmah thawn kan pahnih lawng si kumkhua ding ka duh. Rak thei hram aw maw” tiin thinlung sungten saduh a that. Ngunte cu cazohnak kinlan parah cabu kau in a to. A thuruahnak a mitthlam pawl cu sun ih thil cangmi le an umtudaan pawl an rong cuang ciamco. “Aih! Ka cazoh ttul” tiin a lu a hon thing ih cabu kaumi cu a mitin a zoh nan a thinlung cun ca a siar lo lawlaw.

Febuary 14 zaanlam a si. Thli a hraang zurzo. Falam khawdai lakah thli a hraang bet cu dai ngaingai a si. Ngunte cu sweater hngawng tuam tlunah Jacket pi a thuah bet. A sam a liang ron luan fang cu a thlah ih lukhum hlum a khum. Laitah skirt sau a kaih. Cutin a ti kelten NTS lam pan in a hong so. Febuary ni 14 hi ziang ni a si ti khal a thei loih ziangtin an hmang ti khal a thei lo. A hrangah cun danglamnak zianghman um lo mi ni asinan tuini cu a hrangih ni danglam tak a si. NTS rawl einak ihsin kir dingih tim a tuah lai ah a kiang te ah, “Vung!!!” tiin Bike a ra cawl. “U Mangte!” tiin hni phahin a hon ko. Hmakhatte ah “Vungg!!!!” tiin an suaksal. Ngunte cu, “U Mangte, ralringten aw. Skirt ka kaih na thei lo maw? Nuamten mawng aw. Ka thinheng le ka dawp thla hlukhli ding hokhaw.” tiin a au phah vivo. NTS rawl einak ihsin zato innpi lam in an feh ih Catholic biakinn lamah. Cun Pathangkhaan tlunziin tangziin, Cinmual pangpar duum in Vankau pura ah an hong suak sal. Pura kiang tlang pawngah an va to. Ngunte cu ttan a lak tuknak ah a taksa khal an na thluh. A kawng le a liang hmet phah rero in Ngunte cun, “Ziang na cang? Camibuai a nai tuk zo na thei lo maw?” tiin a hei sut. Van Mang khal cun, “Maltakte sung lawng. Laksawng ka lo pe duh” “Ziangmi hrang? Ziang laksawng? Ziang zuamawknak tivek ah le ka tel fawn lo. Ka suahcam le a si fawn lo. Zamrang aw maw” tiin thusuhnak tamtak a hon tuah.

Van Mang cu ngamdok ngamlodok in ti hruanhro te cun a Jacket zaal sungih wrapper mawi tak thawn tuammi cu a hon phorh. Cule, “Tuini hi kan pahnih hrangih ni sunglawi si hramseh ti ruahsannak thawn himi ka lo pek. Asinan Camibuai na ttheh zaan lawngah ong aw. Na camibuai tuah lo hnaihnoktu si cu ka duh hrimhrim lo. Himi hi tuini ih ka lo pek lo cun ziangtik hmanah keimah le keimah ka lung si thei dah lo ding ruangah tuizaan tengteng ah ka lo pek.” ti phahin Van Mang cun Ngunte ih kut ah a percel pack cu a pek. Ngunte cun theithiam lo tak mithmai thawn a kut ih thil fuun a zoh thuul, Van Mang ih mithmai umdaan a zoh thuul. Ttong lohli ding khal thei loin a ding cuahco. Van Mang cun, “Kha le, na rei tuk le na nu a thinphang ding. Tlung kunguh.” tiin a sawm. Ngunte cu a hmuh dahlo mi minung si awm takin Van Mang cu mit ttheplo’n a zoh keukeu.

Ngunte teih inn an thlen in Ngunte nu cun, “Ai Mangte, thaizing cu na suk ngah ding ti” tiin a rak sut. Van Mang khalin, “Aw, suk ngah ding cu a bang”. Ngunte cu a nu le Van Mang ih biaksawn awkdaan theithiam lo takin, “Khui na feh ding? Ziangah zianghman in sim lo?” tiin a hei sut. A nu cun, “Ngunte, na u Mangte cu…..” a ttong hman cem hlan in Van Mang in, “Aw… Kalaymyo ah ka tlawng luhnak ding form tuah a cu ii….” “Tlawng na ttheh zo ko ual” “Ka peh bet tum” “Aww….” tilawng in Ngunte cun a ti nan a zum ngaingai thei lo. March 24 zaan phunhra Camibuai an ttheh zaan cekci ah Ngunte cu a percel pack cu a phorh. A von zoh ih a sungah Note book tawhfung thawn ummi ‘Love’ pung a rak si. Tawh a von ongih a kawm cu a von kau. A sung cangan a von hmu. A mang a bang tuk. Cun ca cu a von siar.

“14 Febuary
Valentine’s Day

To// My beloved Ngunte,

Ngunte, tuih ka lo sim dingmi thu hi tthatein cingkeng aw maw. Ka lo duh ti cu na thei ko. Ka lo duh vek rori in nang khalin in rak duh ve ding khal ka ruahsan bikmi a si. Ngunte, Kan Pahnih rori maw kan pahnih. San khuk thleng tiang kan pahnih kutkai in………

Tipi, tlangsang in in dang hmanseh kan pahnih duhdawtnak cun in naihter ringrig hram seh. Karlak ah ziangvek thu a um khalle kan pahnih cu thih ah thi tlang nungdam caanah pumkhat sakhat. Kan pahnih cu hri le dai vek kan si ding.

Kan umnak hmun a dancaan ah zaan thlapa ah kan mit tongaw seh maw.Hi thu hi hngilh dah hrimhrim hlah maw. Kan Pahnih…..

Van Mang”

Ngunte cu a thuruahnak ihsin a hong fimharh ih a thil retnak kuang a va ong. Note book te cu a von kauih ca pawl cu a von siarsal. A cabu fate cu a ttaang sungah fek takin a pom ih,  “Aw!! U Mangte, ka va lo ngai lawmmam ve! Na sim vekin kan pahnih hi khuanu’n rem in ruat taktak pei maw? Na thuhla ka theih lonak kumkhat lenglo a rei zo.” tiin  a kaa cun a hon ttong suak. Ngunte cu a hong ding salih sangkate lam a hei pan. Van parih fim keuki teih a vangmi thlapi cu vantau in a hon zoh. Cule, “U Mang, na sim vekin tu cekci thlapi na rak zoh ve maw? Maw thlapa, ka U Mangte hnenah ka ngainak thu in va simsak hram aw maw” tiin thlapi hnenah a thinlung sung thu a hon cah.

Zarhte sun a si. Ngunte cu weekend tinten an tuahdaan kelin nitlak(western) lam pawlih “Brunch” an timi Pan cake  kio dingin a timtuah rero. Culai ah a kiang te ihsin, “Ngunte, thaisun cu leng na suak thlang ding kha. Na thlahlawh pawl a zaten ka lo pe ding. Cun, himi hi MRT card a si. Train(tlangleng) na to le Bus na to tikah himi card um lo cun a ngah lo. Curuangah himi card hi keng awla Customer service ah S$10 na top-up dingih cutin na hmang ding maw,” tiin Ngunte ih hnattuannak pinu(Lady Boss) cun paisa le Card cu a pek. Ngunte cu a lungawi tuk ticu a mithmai ah vam hemhem in a lang. “Thank you MDM! Thank you very much!” tiin a ttong nolh rero. Singapore a thlennak kumkhat cekci a rei. Asinan himi kumkhat sung hmuahhmuah inn lam khal a pehtlai thei dahlo. Rualpi ti khal a nei lo. Ziangahtile Agent inn ih a um lai ah rualpi pawlih address a kenmi le phone number pawl cu an rak thlek sak thluh. Cun a hnattuannak inntek tei in a umnak thlakhat cekci a kim ah phone card an leih ih cumi in a nu le a phone dah. Cuih hnu cu phone ti khal um dah nawn lo. A tu rinlopin a pi ih lengsuak caan a pek cu a lungawi in Arpi khawm hremmi suah tak bang le thawngtla luat pek bangin a thinlung cu a zaang in a nuamawk tukah umngaihnak khal a thei lo lam. Thaizing kim ding cu lungtur rang dukdo in a hngakhlap nasa.

Bus stop ihsin  ‘International Bridal Malaysia’ dawr lam pan in Van Mang cu kekar rang nawn in a von feh. Dawr sangka zawn a vong thlengih innsung lut dingih a ke a hon khai zawngah a dung ihsin “Ai ka duh lo ka nu!!” tiih au-aw a hon thei. Cu rualrual in a kerte ziik dirtu nei in a thei aw. Dunglet a hon her cu a theih vek cekci in fala tuak tak pakhat a kedam  bunmi kediil sang tuk kha ciarbek ah a kediil zum a pil ih phuak dingih a tum ah le a pil deuhdeuh. Cun a ke a hon khai ih  a tolh zik kha a ttan laknak ah Van Mang ih ker a rak dirh ngahmi a si. Van Mang cu ralring lo tukih a hong her kha nunau nu in le heh-le-mang law tiih ttang ttentto in a rak dir fawn cu an pahnih in tlu ding maimai an si thlang. Nunau nu cun  Van Mang hmaisong ah a kut a thlahih dunglam ah tlu dingin a za a zam rero. Mipa nana tiah Van Mang cu a von ttang ih nunau nuih kut cun a hon kai. An her aw luangloih Van Mang ih ttang sungah nunau cu a thleng thuthi. Manglam bangin an khawruahnak le an thinlung cu a rak ṭhen aw viarviar zo. An thinlung a hong fimih an hon zoh aw. Van Mang khalin nunau nu cu a rak pon ve. An pahnih in ningzak mithmai thawn “Sorry” “Sorry” an ti aw veve.

“Aw! Manga, na ra thleng zo maw? Aw, Siangte tla. Ai, nan ra tlang maw? Nan thei aw cia maw?” tiin inn sung ihsin Thangte cun a hon biak hai. Van Mang le nunau nu cun theithiam lo takin Thangte cu an zoh. Cu zawngah dawr kiltu nu cun an hmai ih puanthaan zaar a von hlip ih Mopuan raang ziarziar thawn mawi takih an ceimi Parte cu an von hmu. Van Mang cu Parte ih thuam a hmuh in a ciil a dolh khutkhi. A thinlung ruahnak ah ‘Ngunte’ a vong cuang ciamco. Mopuan sin in Ngunte thawn kut an kai awk tiin a mithlam ah a von suai ciamco. “U Mang, ziang thu saw na ruah ciamco?” Parte ih thusuhnak a theih lawngin a lung a hong fim. “A….aw….. Ziang thu hman ruat lo ee. Parte, na Mawi daan cu mak lawlaw!!” tiin hni phahin a kut zungpi a hon tung. Parte cun, “Aw, U Mang, himi hi Tahan ih punkua phunhra ka kai lai ih ka rualpi a si. Thaisun LCF biakinn ih kut kan sih tikih i dinpitu ding a si. A hmin cu ‘Siangte'”, tiin a hon sim. Cumi lawngin Van Mang le Siangte cu mithmai panten an zoh aw ih Van Mang cun a kut a hei san. Cun, “Kei ka hmin cu Van Mang ka si ih a duhtu in Mangte in ti. Mihrek cun Manga in ti” tiin a hei sim. Siangte khal cun, “Aw, singai. Ka hnakin na upa ko ding ka lo zumih U Mang ka lo ti ve mai ding. Hee….” tiin hmel theihnak an von tuahaw.

Lakphak dawrah an va to ih Van Mang cun, “Parte, tuizaan hi a free netabik ding zaan a si fawn ih ziangha kan tuah ke?” tiah a hon sut. Parte cu  a lakphak khuat cu a hon khai ih kaa khat a von in hnu ah, “Umm……” tiin ṭong ding thei cuca lo vekin a hmur a hon ciip. Thangte in an ṭong a rak kankhelh ih, “Thaizing na mawi lo pang ding. Tuanten na it ding panteh. Tidai khal tampi in hlah maw. Na hmai a phaw thluh pang ding” tiin a rak ti. Parte cu ti ziamziam in a hni. Siangte cun Van Mang ih umtudaan le a ṭongdaan pawl a zoh thup rero. Thangte cu Van Mang lam ah a her ih, “Manga, nangteh ziangah ha nupi thu hrimhrim na rel dahlo? UN ah le nupi na thuncih ko fawn. A tutiang fala le na nei fawn lo! Ka mang in bang ter. Kawlram in na cah ding a si khalle cah lohli awla..” tiin a hon ti. Parte cu ti khukkho’n a hong hni ih, “U Thang, na paseu ih fanu kha Singapore ah a um na ti vek maw? A phone number in pek hme” “Aw, anih cu handphone a hmang thei loih an inn phone lawng si” “Aww…..” Thangte le Parte ih ṭong a theihin Van Mang cu  mit kau pempem in a hon meng. A tonak ihsin a hong dingih, “Singapore ee? Khui maw a phone number?” tiin zamrangten a hon sut.

Zaan thlapi vang tangah Van Mang cu amahtelawng a to. A khuk com in a kut pahnih  cu a khuk parah  a sih ih vantau in thlapi cu zohin a ṭong keuhko. “Ngunte, karual duh tak Thangte cu maw thaisun hi a ni sunglawibik a si thlang ding. Kan pahnih ih ni sunglawi hi teh ziangtik ah a thleng pei? Ngunte, tuizaan ih thlapi vang ahhin na mit ka tong maw aww…. ” tiin……..

(Visited 142 times, 1 visits today)

Comments

comments

Comments

%d bloggers like this: