Kan Nunpi Theimi Tumtahnak

November 15

Tlawngkai Nili

 

Kan Nunpi Theimi Tumtahnak

                                                           

Bible Siar Ding: Jeremiah 29:1-14

 

Nan hrangih tumtahnak ka neihmi cu keimah lawngin ka thei.

Tumtahnak ka neihmi cu siatralnak si loin mi neinung nan sinak dingah a si; cuih tumtahnak cu nan ruahsannak le nan hmailam hrang a si.

–         Jeremiah 29:11

 

Nu le pa tamsawn in an fanu fapa pawl hrangah tumtahnak le khuakhan lairelnak pawl an neih sak – fimthiamnak, hnattuannak, le innsang dinhsuahnak tivek pawl thuhla ah. Nu le pa pawl in an fahniang pawl an duhsaktuk ih cuih an duhsaknak kha an fale pawl ih an lungkim ve ding le an duhsak vekih an tuah duhnak dingah a phunphun in an zuam, ziangti’n ka leem thei ding timi thuruahnak an nei.

Vancung ih a ummi kan Pa Pathian in a fahniang pawl kan hrangah khuakhannak a nei. Leitlun caan tawite kan nunnak sungih kan nuntu khuasaknak ding, tthansonak ding le kumkhua nunnak kan neih theinak dingah tumtahnak tumpi in neih sak. A khuakhan lairelnak cu ruahsannak le Amah thawn naihzet ih pehtlaih awknak kan neih theinak ding ttivek pawl in a a khat. A hmin sunlawitertu kan si theinak dingah a si.

Leitlun kan nu lekan  pa pawl ih khuakhannak cu a caancaan ah a palh thei, ziangahtile kan hmailam hrangah a tthabik ding kha famkim in theihnak an neih lo ruangah a si. Sikhalsehla Pathian cu kan hmailam caan neitu a si. Anih cu lamzin dik ah in khihhmuh thei, curuangah, Bawipai’ kaihhruainak lawng hin kan hrangah lungawinak maksak a thlenter thei a si. A lamzin thlun duh lo ih um cu kan nunnak hrangah aatthlakza le siatralnak thlenhtu a si ding – cumi cu mah le mah siatsuah awk a si.

Pathian ih kumkhua hrang tumtahnak cu sunlawinak a si. Mi pakhat cio kan hrangih tumtahnak a neihmi cu A sunlawinak langtertu bungbel thianghlim kan si cio theinak ding hi a si. Cule kan hrangah sunlawinak thawn a khatmi hmailam caan (glorious future) in pek. Himi hi kan nunpi theimi tumtahnak cu a si.

Vancung ih um kan Pa, ka hrangih Na tumtahnak pawl ka lo lungkimpi thiam lo caan ah ka sualnak in ngaidam hram aw.

Pathian Ttongkam zirzoinak in ziangtinso ka hrangih Pathian tumtah ka theih fiang thei ding? Tuni ah ziangmi Bible caang thar so ka siar thok ding?

 

@Pennington

Comments

comments

Comments

%d bloggers like this: