Kan Nunnak Hrang Pathian Khawkhan Hmuhsuaknak

              KAN NUNNAK HRANG PATHIAN KHAWKHAN  HMUHSUAKNAK

                      Cang Hril : “Bawipa, ziang ka tuah ding?” (Apo. 22:10)                Timothy Sui Lian Mang

Tarsas mi Saul a pianthar levetei a thusuh mi parah kan zirnak kan ṭhumaw ding: “Bawipa, ziang ka tuah ding?” Saul-ih lungthlengnak cu thilcang menmen mi a si maw? Tikcucan ṭha ruangah rinlopin Damaskas lamzin ah a lung a thlengaw maw,  asilole Pathian khawkhannak le tumtahnak vekin saw a si?  Apo.9:15 ih in sim vekin, cumi cu Pathian “Khawkhannak vekin,”a si tiah in sim. Pathian in kanmai nunnak hrangah teh khawkhan mi a nei maw? Aneih asile, ziangtin cumi cu ka thei thei ding, cule cumi hmusuak dingah ziang an ṭul?

1. BAWIPA IN A FALEPAWL NUNNAK CIO AH TIFEKFEK KHAWKHANNAK LE TUMTAHNAK A NEI

Himi zumnak hrangah a hnget zet mi a san pathum a um:

(1) Hihi ruahsan tlak mi thil a si.  Pathian cu thil rem thlipthlep le tidan felfai neiih thil ti mi a si.  Inn kan sak asilole hnipuan pungsan kan vun suai tikah,  khawkhan mi vek zohṭhim mi vekin si kan tuah. Pathian khal cuvek in si a tuah.

(2) Hihi nunih tawnteh mi a si.  Abraham (Heb. 11:8-10); Mawsi (Heb. 11:24-27); David (1San. 17:7); Isaiah (Isa. 6:8); Jeremiah (Jer. 1:5-8); Paul (Apo. 9:15) pawl kha ruat aw.

(3) Pathian thu ih zirh mi a si. Efe. 2:10 zoh aw, cule Sam 27:11; 37:23; 73:24; 148:8; Thf. 3:6; 15:19; 16:3; Isa. 6:8-9 le James 1:5 thawn khaikhin aw.

Kan nunnak hrangih Pathian khawkhan danglamzia a tang lam pathum pawl tla hi hminsin aw:

(1) Hihi pumpak khawkhannak a si.  Apo.9:4 ih milai aiawh ih hman mi – “Nang” le “Kei” ti mi kha hminsin aw. Nangmah vek leitlun ah zodang hman an um lo, curuangah nangmah hrang Pathian-ih khawkhannak hi a danglam hleice mi le bulpak rori a si – na hrang rori a si ko!  Midang nunnak thawn famkimter thei hrimhrim lo mi, na nunnak thawn famkimter dingah na hrang tumtahnak a nei.

(2) Hihi a famkim mi khawkhannak a si.  Rom. 12:2 (hi Rom 12:1 thawi siarkawp a ṭul ) ah, a falepawl kan nunnak ah Pathian duhnak, lole Pathian khawkhannak le tumtahnak cu, “A ṭha mi, a lungawi zawng le a famkim mi amai duhnak” a si tiah in sim.

(3) Hihi nunpi ding mi khawkhannak a si.  Himi hi ṭuansuah theih mi a si ih ni tin nunnak le ṭuanthamnak thawn a pehtliaiaw mi a si. Hihi minung thluak theihnak men ih, “A ṭha, a duhum , a famkim a si tiih ti men ding mi a si lo,  nun rori ih a dikzia nemhngeh theih mi a si.

II.     CURUANGAH KAN NUNNAK HRANGIH PATHIAN KHAWKHAN MI LE TUM MI THEIH HI ATHUPIBIK MI  A SI

Hih thu a dikzia cu a langfiang zet nan,  khristian hrekkhatpawl cun an nunnak hrangih Pathian khawkhan le tum mi an hmusuak lo, cule an nunnak pumhlum cu beidawnnak, thinharnak, sunralnak le hlawhsamnak hlirin a khat mi ih can hi riahsiatumza a si.  A phu taktak mi thil  kan tuahsuak thei ti thinlungih theih le kanmai hrang menah si lo, van ih um duhdawtu  Pathian duhnak bangtukin kan tuah rero ti theih hi ziang tluk duhum le phurumza so a  si! Saul a pianthar hlan hmuahhmuah amai  khawkhan mi vekih a nun bangin, piantharnak a nei hrihlotu pohpoh cu mai khawkhannak ih nun an si – Apo. 9:5  zoh aw; Khristian tam zetin anmai nun hrangih khua an khan khal hi  riahsiatza a si.  Lehhnu ih a diklo ti kan thei leh ding mi hrangah kanmahte in thutithluknak le duhhrilnak kan tuah- Joh. 21:3 khaikhin aw.   Pathian duhnak laifangah kan um ti theih tlukih hnangamnak le thinnawmnak tumsawn  a um thei lo. Piangthar zokhalin cucu kan theih thei mi  a si.

III. JESU KHRIH CU KAN BAWIPA LE IN RUNDAMTU IH KAN   COHLAN LE KAN LUNGKIM TIKAH PATHIAN  KHAWKHANNAK SUNGAH KAN LUT A SI

 Saul cu Bawipa in a tuah ding mi a sim mi sungih a tuhlutawk tikah Pathian khawkhannak sungah a lut  a si– Apo. 9:6 kha cang 8 thawn khaikhin aw. Bawipa Jesu in Saul hnenah, “Keimah cu Jesu ka si,”  tiin amah le mah a phuanglangaw. – cucu, “Rundamtu a si,” Mat. 1:21 zoh aw.  Pathian in Saul cu a ngaihsak lo ih a pianthar hlanah a thlir ringring men ti ding a si lo, cuhnakin Saul in Jesu Khrih-ih kehramah kun in amai Rundamtu le Bawipa ih a cohlan tikah Pathian khawkhannak sungah a lut ngaingai a si ti hi a dik sawn mi a si.

IV.  AMAH HNEN LE A PHUANGLANG MI A DUHNAK IH NI TIN   TUHLUHAWKNAK IN PATHIAN KHAWKHAN MI KAN HMUSUAK IH, CUMI AH KAN UMPEH RINGRING

Amai hmaiah Pathian in kan nunnak lamtluan hrang khawkhan mi a nei, asinan maltete lawng can khatkhatin a phuanglang – Sam. 37:23 zoh aw. Anih cun a thawknak ihsin a cemnak tiang a thei ṭheh (Isa. 46:9-10).   Asinan Pathian duhnak thei thei dingin minung lam dinhmun ih kan ti tengteng ṭul mi cu a hnenih tuhluhawk pumhlum le a thu lun ding duh hi a si – Apo. 22:10 zoh aw.  Pathian duhnak ziang a si ti  zingzawinak dingah thil pali a tel:

(1) Thlacamnak in amah thawi pawlkawmawk. A remcang mi thlacamnak cu Sam 27:11 ah ngankhum a si; hmun fianhrial teah Pathian pawlnak kan neih ringring asile Pathian in a duhnak cu kan hnenah nuam teten a phuanglang.

(2) A thu zir le zingzawinak. Pathian falepawl in Pathian thu siarin an nunnak cu Pathian thupek ah le Pathian thu ih kaihhruainak hnuaiih an tuhluhawk tikah kaihhruaiih an umdanzia hi khawruahharza a si! – Sam 119:105 zoh aw.

(3) Thusuhnak nei lo ih thulun lohlinak.  A thu kan lundan i zirin Pathian in a duhnak a phuanglang – 1Sam. 15:22.  Kar khat tete in a duhnak cu a phuanglang. Bawipa in Saul tuahter a duh mi karbak dang a sim hlanah Saul cu khaw sungih a luh hmaisa tengteng a ṭul (Apo. 9:6).

(4) Rinsan pumhlumnak. Hmuhnak in si loin, zumnak ih kan feh ruangah kan nunnak ih Pathian hnaṭuanmipawl kan zawtsal thei phahphah ko.  A sullam cu amah kan rinsan rori ding tinak a si. Bawipa in Saul kha, “Hril mi hmanrua,” si ding ah a hril, cule Saul-ih nunnak ah a thlenter siang mi hmuahhmuah ah Saul cun amah Pathian a rinsan tengteng a ṭul – tuarnakpawl, tlaksamnakpawl, lungto ih dennak, thawng thlaknak…(2Ko. 11:24-28). Pathian khawkhannak ah a sian mi hniksaknakpawl a tel ti kan cin tengteng a ṭul – 1Pe. 4:12-13 le 19 zoh aw.

(5) KAN NUNNAK HRANGIH PATHIAN KHAWKHANNAK CU  KUMKHUA  DAIH A SI

 Kan zirnak netabik na thleng thlang ih, “Hmai lam ah can sau zet a nei laitu mino hrangah cun phurum zet mi thu a si,” tiah na ti men thei.  Asinan khristian kum upa zet pawl hrang khalah bangrepin phurum zet mi thu a si thotho,  ziangahtile Bawipa neitu kan zaten a sunglawi zet mi kumkhua kan hmaiah kan nei a si. Cun Pathian khawkhannak cun leilung lam  le van lam ti in a nei.   Lei lam ta cu innsaknak ih lungphum(hrampi )vek a si ih, van lam ta cu innsak mi ih ruangpi umdan vek a si.  Pathian khawkhannak thu ah cintawk neihter hi a awl zet mi a si.  Khristian pakhat kum 30 lole 40 ah a thih tikah, “Thinnat a va um ve!” tiah kan ti ṭheu – cucu cintawk nei leitlun thil hmuhdan a si; asinan a falepawl hrangih Pathian-ih duhnungza a khawkhannak cu catuan daih khawkhannak a si – Efe. 2:10; 1Joh. 2:17 le 2Ti. 4:7-8 zoh aw.

*****

Comments

comments

Comments

%d bloggers like this: