Kan Nu Ka Duhnak

gods_design_for_marriage_umjrGlobal warming ruangah ram hruaitu a zatel meeting ziangmawzat an to zo ih leitlun rampi ṭhansohnak ding hrangah he-le-chet tiih an buai rero lai ah kei ka nupi ka duhnak thu, thungaithlak in rak sim ka tum. Kan um tlangnak kum a rei zo nan, mi lakah ka lawm dah lo. Ka duhnak emem cu a tanglam pawl ruangah a si. Midang hrangah cun zianghman a si lo nan kei ka hrangah lawm ṭul lo ih ka hnih reronak le ka hnangam huahni nak a rak si.

Ka thinlung I theibik tu a si. Office ihsin thin nuamlo ih ka ra tlun can ah thin dai le mangbang emem in ka phurah ra tahrat in “Tuini cu na danglam” tiah I suthliah ṭheu. Hivekih kan nu a um can ah keimah sawn riangri thin nuamlo in ka um ih ka thinbangnak karh lo dingah ka ziam ter sal ṭheu.

Ka rawl hmeh duh zawng a thei. Ka rawl hmeh duhlobik tiang a thei. Hmeh tampi a tuah dingih ka ei tambikmi a hminsin ṭheu. Hmeh a thaw thu ka rel suah lo ahcun a thin nuam dah lo ih ka rawl hmeh duhzawng tuah dingah a zuam ringring.

Nunau cun an pasal an vah suah can ah a thupte’n an ngai tuk ṭheu ih an angki pawl tla an rak hnim, an rak cul rero ṭheu tiah an rel mi ka thei dah. Kan nu khal cun a thuamhnaw hnakin ka thuamhnaw a care sawn timi ka hmuh tikah a duhzawng thuamhnaw lei dingah shopping kan feh tam nasa.

Kan neihawk hlan ihsin “Kei cu pasal uk pawl ka si lo” tiah I sim cia. A pasal cu ka si ko nan, upatzet le ṭihzahzet ih I biak ṭheu ruangah kei tla amah in ka parih I tuah vekin ka upat ve zet. Pasal control tuk hi a duh dah lo ruangah nupa nunhlim emem cu kan rak si ta.

Biakinn le mipi lak kan suah can khalah ka mithmai a kil thiam. Kei khal cun mi lak ah ka duhdawtnak ka tilang ve ṭheu. Ani khal cun ka pasal a si ti hi I zahpi lo. Nupi tamzet an um ko ding nan kan nu vek hi cu ka ti ve ko. Nupi neih cu sui tum sar vek kan si ko.

Amah hi kan Lai daan le nunphung rak uar zet asi ko nan phun dang mi pawl hawiher dan pawl a thlun thei ih a ṭul dan ih zirin a rem aw thei vivo tikah ka lungawizet. Cun, I hnoh thiam, I duhdawt thiam, I care thiam ih a can le I hnoh tukah a ngol ṭheu ih a nuam lamlam.

Comments

comments

2 Comments

  1. a va tha ve. ka nupi khal hing vek ciah asi. ka lungawi

  2. “Ka duhnak emem cu a tanglam pawl ruangah a si.” na run ti cu ka lau dukdi lawk nan…hi….Nangan ttha na sa.Kei khal na nupi vek ka nei tum dingh ka lungawi…

Comments

%d bloggers like this: