Kan lungrual theilonak ih ka hmuh mi

Ram harsatnak ruangah tiin tam zet cun phuahhlam kan tuah ih, ramdang kan thlen theinak ding zawn ruat in, hmansehla hrekkhat har tuar ngaingai khal kan um ko ding. Kan ram cu umtlaknak ngai a si lo, a har in khawte um pawl hrang ah le phei cun, sim ngam lo mi tiang harsatnak an tuar thei, khawpi um khal an dang cuang lo. 

Can a hawng her ih, ram thangso zo pawl thatnak zarzo in ram nuam ah kan thleng, kan um. Eiin lam khal a rak tha, ruahnak khal a phunphun in a sang, hmansehla hmun khatah kan um nawn lo, kan suahkehnak hmun ihsin kan suak ih, ram dang ih kan um cun, an ruahnak kantawm vivo, an tuah dan khal kan cawng lo thei lo. 

Samari ram ih um pawl khal hnam cawhcaw rawi an si, an tong khal a dnag ih, an cinken khal a dang cio, cumi cu an parih siang duhdan a rak si, kannih khal kan ram ah kan um thei lo ih, ram dangdang ah kan um, kan nitin hmuh tawnmi khal a bangaw lo, kan eiin le kan thli hawp mi khal a bang aw lo, kan suahpi mizo thawn tiang hman kan bangaw lo. 

Calai hngetkhoh kan nei lo, calai khal kum upa cu sim lo, mino dang fah thei tawk khal in kan nei lo, thuthang nitin suak cu sim lo, zarhtin suak hman hi, kut khiah in kan siar thei lai. A hram cu, kan lungruh hnasau rual ruangah a si bik ko lo maw? Kanmah le kan mah kan vuihram aw ih, asan kan hawl rero theu, pawl ah siseh, kohhran ah siseh, lungrualnak a um ngaingai thei lo, calai ah siseh, thuthluk nak ah siseh, kan hmuh tawn mi a dang bang in, kan lungrual thei lo. 

Ramnuam mallai kan va thleng ih, kan vun um cun, fimbik, thiambik si kan tum ih, “Ka feh dan a dik bik” tiih lungruh suah in kan khawsa lala, ziang dang a si lo, kan ram ih kan fimthiamnak zir sun, hmang thei le hmangthiam lawn kan um ruangah a si.  

Raltan nun ih kan nun lai ahcun, ziang thei lo le, mi lak puipunnak khal ih tong ngam lawn kan kaa kan hup nan, ram dang kan thlen le veten kan thiamnak hman tlak ngaingai si lo pholan kan duhnak khal in, kan sungkua unau za lakah lungruallonak a suah in ka thei.  

Kan za ih tan la ih, kan fimthiamnak hmang thiam ih, kan cawisan tlak kan cawi san awk hliarhlo thiam ni ahcun, mual in liam san zotu, kan thlahtu pialral um pawl cun lungawinak mitthli thawn in thlir hrimhrim ding ti theih kan cuu a si.

 

Comments

comments

One Comment

  1. A va tha lawmlam ve hi ca cu.
    Chin mi hmuahhmuah ih kan theih tul bik mi a si ual.
    Ka lo lawm nasa Hniangsinpa!
    Run nan peh sinsisn hram..
    Ka lungawi.

    Kan za ih tan la ih, kan fimthiamnak hmang thiam ih, kan cawisan tlak kan cawi san awk hliarhlo thiam ni ahcun, mual in liam san zotu, kan thlahtu pialral um pawl cun lungawinak mitthli thawn in thlir hrimhrim ding ti theih kan cuu a si.

Comments

%d bloggers like this: