Kan Lungput, kan nun khaltu

Ta HniangÙk

Tumkhat cu Nick Vujicic hnenah “Ziangtin so kut le ke nei lo cingin na hnih-siamsi ringring thei?”tin thu an sut. “Ka neih lo mi hin ka nun in ti buai lo, ka neihmi sawn hin ka lung in awiter ringring asi. Pathian ih duhdawtmi ka siih a hriak thihmi ka si hi ziangah saw ka lung a awi thei lonak ding” tiah a rak let. Nick Vujicic ih thuken cu “Kut nei lo, Ke nei lo, (hmanseh) donhar cuang lo” ti asi vekih a piansualnak hin a nun a dawnkham hrimhrim lo asi.

Cuvek dinhmun ah ding hmanseh la hringnun hi nuam a ti ih midang hrangih thazang cahnak pek ding hi a hmuitin ringring. Acui lungput hmangin vansiatnak le piansualnak timi cu a hnawl sawn ih mi vantha le mitangkai asinak cu leitlun pumpi ah a langter thei asi. Mi beidong pawl thazang caktertu ropi zet ah a hung suakih hmunkip ramkip ah thuthangtha sim in le nun man nei ih theiaw lotu pawl hnenah ruahsannak nung petu mi hleice a hung cangsuak. Cabu uk 4-5 lai ngan suak theitu a si fawn. A thuhla cipciar in kan tarlang cawk lo ding, hmanseh a hringnun ih sin thil kan zirsuak mi cu—minung kan sinak manmual ti sunglawi tertu le tlaniam tertu cu kan lungput hi asi. A piansualnak lawnglawng ahmuhawk laiah cun a lung a awi dah lo ih amah le amah hman thahawk a tum dah. Hmansehla thil tha sawn cu thlir dingin a lungput athlak-thleng theiih mihlawhtling ah a hung cang asi.

Hringnun kan thlirdan lungput hmangin kan hringnun thuanthu cu kan ngan asi. Santlai lo le zianghman ih thahnem thei lo dingih kan ruahawk ah cun cumi cu kan covo a si ding. Hmansehla ka tuah thei ding tin kan zumngamawk ah cun ram kaupi kan nor thei ve ding asi. Ziangah tile kan Pathian cu beidonnak pathian asi dah lo ih, afa le pawl kan thatnak ding khuakhang theutu Pathian asi ruangah thlawsuah lamzin kan zawh ding cu in duh ringring asi.

Leitlun mi ropi pawl thuhla kan siar tikah hlawhtling dingih lungput an neihmi hi kan hmu tel ringring. Cunmi cun harsatnak aphunphun apahtlang ter thei ih, midang in a cang thei lo ding tiih an ruahmi khal cui an lungput hmangin anetnak ah an hlensuak theu.

Ziangruangah saw harsatnak tong ciocio beidong ih dungsiptu an um laiah beidong hrimhrim lo ih zuam tentoin hlawhtling tu an um? Kan lungput ruangah asi tisehla a sual a zumum lo. Ziangah tile dungsip dingih lungput kan neih cun dung kan sip ngaingai ih, harsazet hmanseh hmainawr ding ih lungput kan neih cun cumi in in nor ih in fehter asi. Nelson Mandella in, “Harsatnak cu mi hrekkhat hrangah tuahmawhawknak asi ih mi hrekkhat hrangah cun tuahthatawknak asi” tin a rak sim dah. Harsatnak hmaton dan thuah Nandar Theihzan khalin, “Harsatnak in tthal ni ling bangin in hniksak theu. Tthal ni ling lakah cawhnawi cu a uih lohli ih in tlak lo ah a cang; hmansehla thingthei rah hrekkhat pawl cu thlum-thaw takih ei tlakmi si dingah a uam hmin thung”tin a rak sim.

Ziangruangah saw lianzet cingih lungawi thei lo an um laiah harsa cing tei lungawi ringring theutu an um? An lungput ruangah asi bik ko ding. Milian zet tapoh hin miharsa bawm lam ah an tirh asiang theh lo ih, hmanseh harsa cingte in thei tawk tei midang bawm rero khal an um thung. Cutivek ih mi bawm theinak khal cu lungput ihsin hramthok mi asi.

Ziangruangah saw soisel ding um lo khop ih mi mawi le hmeltha tapoh pawl kiangih um a nom lo theu? An lungput ruangah asi theu. Ziangah tile lenglam langnak cu rei lo te hrang lawng a deih theuih, sunglam nun thukah mawinak an neih lo ah cun a lenglam mawinak in rei a deih dah lo asi. Cuvek in mawinak nei lemlo hmansehla lungput thianghlim aneitu pawl kiangih um cu nin a um dah lo thung asi.

Ziangruangah saw natnak khirhkhan tak tuar ciocio beidong ih cemral lohli tu an um laiah, hi natnak cu ka thihnak ding asi lo tin rinngamnak thawi damsuak tu an um theu? Atha zawngih thil an thlirdan lungput lole a thalo sawn an thlirdan lungput ah a thumaw men ding.

Pathian thu kan pomdan lungput khal hin kan nunah sullam a nei thuk zet. Thlarau lamih lungput kan nei dik lo asiah cun Pathian ih siter in tumtah vek in kan si thei dah lo ding ih thawnginn sungih kharhkhum mi vek kan si ding. Hmansehla Thuthangtha thawi a milaw mi lungput kan neih ah cun zalennak diktak ah in hruai ding asi. Ziangah tile Thuthangtha cu kan luatnak famkim asi. Cumi lungput kan neih ding cu ava thupi em. Ziangah tile kan lungput hi ziangkim kan sinak laireltu a rak si. Curuangah kan lungput a dik theinak dingah thil tha sawn cu kan ngaihtuah ringring a tul zet. Zing kan thawh ihsin thlawsuah nithar hmang dingin kan timlam aw dingih mangbangza kan hmuhdah kel lomi ni hmang ding in lungawiten kan timtuah aw ding asi. Cutin a thlawsuah siarin Amai duhnak kan hawl thiamah cun kan lungput cu adik vivo ding asi.

Comments

comments

Comments

%d bloggers like this: