KAN LENLIAM BAPTIST CHURCHES(LBC) AREA KHAWMPI KAN KHUA (BOMBA)AH KA ZAWH

Ttuanpi u le nau sungkhat pawl,

April 4 in ni 5 tiang kan khua ah kan area Lenliam Baptist Churches (LBC) khawmpi a um. Pathian bawmnak le lam hruainak in kei khal damten Ni 4 zan ah ka thleng thei ve. Zuk tamzet ka lo kuat leh hai ding. Tucu Internet connection a ttha hrih lo ih ca lawng si hrih seh.

Falam in April ni 2 zing kan pok. FBA Jeep ka hmang. Saya Thang Za Khum ( Khuma) FBA Development Department Director ka hruai. Hakha ah  Pu Kio kan sawm phah ih, Thantlang khua ah kan lan. A zan cu Thantlang Baptist zungah kan riak. Thantlang peng mino pawl bawhlung zuamawknak an rak nei. Mino 300 zik lai an suak khawm. A veikhatnak, TABC Cup cuhawknak puaipi a si an ti. Zankhawm an nei ih keimah in Pathian thu ka sim. Ruah sur ding kan phang nawn nan ruah sur lo ten a um ih TABC tual ah khawmnak tthaten kan tuah thei. An mandat sakmi cu  April 1 zan thli le ruah in a siat ter ttheh zo.

Tlangkhua tiang Jeep a feh thei le thei lo hi kan fiang tuk lo. (Thantlang in Tlangkhua cu peng 23 hrawng a si an ti.) A feh thei lo le Thantlang in kan kir men ding ka ti.  March 26 zan ah Kalemyo in Falam ka thleng. Kan thlenzan in toruat a sur ciamco. March thlacem tiang ruah maltete a sur phah. April ni 1 sun khal khua a dur ih ruah sur a tum. Cuti a si ruangah Tlangkhua tiang Jeep a feh thei ding hi ka zum tuk lo. Ruah a sur ah cun lam a bi fawn, a nal ding ih kan feh thei lo ding tin ka ruat. Kan khua thlen ding hi 100 ah 100 kan tum ngam lo.  

April 3 zing khal nikhua a ttha. Tlangkhua lam in a ra mi mino pawl in lamzin a ttha ko. Jeep a feh thei ding tin in sim. Saya Siang Cung Bik ( Peter pa) te inn ah kan HIV Project mino pawl in rawl in suan sak lala ih, zingten rawl (breakfast) kan ei. Tlangkhua lam panin zing nazi 8 hrawng in kan pok. February lai ah TABC Jeep tla a feh dah in ti. A siatnak bik hmun cu, “Kuangpi” le “Varangva” a si ti a si.. Thantlang in kan suk. Lamzin cu a bi te. Kan dung naite a sur mi toruah in lamzin cu a siat ter pam. Lihawng kua pipi lamzin laifang ah a um. Kan Jeep cun cumi lihawng cu a karceh ih nuamteten kan suk. Fur ah cun Jeep feh theinak zin a si lo.

Tawkfang in an leileh nak hmun “Kuangpi”an timi hmun rawn kan thleng ngainngai. Hihmun hi Tlangte ram a si in ti. Leikuang kauzet an nei tinak a si. Leikuang tawntir bik ah cun kan ding. A kiangkap kan zuk phahphah. Motor lamzin a fiang tuk lo. Zumnak in kan feh. Khuma a ttum ih Motor a feh thei le thei lo lamzin a zoh phah vivo. Ra uh..Ra uh, Motor a feh thei ding, tiah a kut in zap ih nuam teten a dung kan thlun rero. Tawkfang in hruai cun zin a pit. Kan hlo. Kan ttum sal ih  ralkhat lam tiang motor fehtheinak kan hawl ciamco. Kan Motor mawngtu cu Pa Hre kan ti. Mawtaw mawn a thiam zet. ZBC Motor tla reipi a rak mawng dah zo. Hlan deuh ah himi hmun an rak fehdah. Saklam kap kan rak zawhdah hm,eng e..a ti rero. Saklam cu kan zoh ih, mawtaw keneh malte kan hmu ngaingai. “Ka ti ngaingai lo maw, Saya Khum in ra uh ti ih in hruai ruang ah ka thlun men na” a ti. Aw! mihmai song neih tuktla zin sual zawh a olte tin thu i ruat ter sal.

Cumi zinruate zawh in khatlam ral  nuam teten kan pan sal. Lilawn dawn lomi tiva kan tan phah. Kan motor te cu lung khol lakah tidai cu nuam teten kan tan. Khatlam ral kan kai suak vuarvi. Leikuang bopi in in rak hmuak lala. Asinan kan Mawtaw te cu har loten a kai lurlo mei. A cak nasa. Cuisin Lo  duah pekte hmum kan thleng. Zinrua kan zawh phah. Zin a bi te. An lo zanthing in in kham phahphah. Motor in kan ttum ih an zanthing pawl cu kan hlon sak. Lo feh ih cahmang duah rero tla kan hmu. An vah thar mi a si. Kan motor awn thei in nauhak pa te tla a rung tlan ciamco ih kan kiang a rung thleng. Hilam ah motor a feh tuk lem lo ih mangbang nawn in in cuan. Kor hruh lo, kangmawl lakah ..hmai dum rekri ten .. zintlaang ah a rung ding. Hla nawn in ka zuk . Naideuh in ka zuk ziknan a tlan ciamco.

Cuisin Leikuang lakah kan lut lala. An Leikuangah tidai a luang ih a bek nasa. Kan Motor a feh thei nawn lo. Kan taang. Pa Hre a ttum ih a 4 Wheel kin mi cu a bun. A bun thluh in a motor cu a start. Nuamteten a tthawn thei ih a bek lonak hmun ah a suak thei. Cuisin nuamteten kan feh ih ” Khuafo” timi khua kan thleng. Tlangpar ih ummi khua a si ih a nuam zet. Diriam zetin ka zuk ciamco. Laikuak fop, mipini te tla ka zuk. Nutar tete pawl tla ka zuk hai ih an lung a awi zet. Nupa te pahnih in in zukve aw in ti. Ka zuk hai. Ka hmin ka sim ih in theih zet mi ka rak si. Aw! Nangmah maw na si in ti rero..

An khua kan lan. An Lo kan thleng. Vahthar a si ih an duah pekte. Lo feh, Fangcang tuh rero tla kan hmu. Motor in kan ttum ih tampi ka zuk sal. Hivek Lorih lai ka hmuh lonak a rei tuk. Fing le tlang kaupi a lang. Lo duah pekte, kalmawl lak ih Fangcang tuh rero mitam pi kan hmu phah vivo. Lung a leng nasa. Tawkfang a rei in “Aicirh khua kan thleng. Inn  sak rero tla kan hmu. Khual tlawng thilphur pawl tla kan tong. Khuma in a zoh ih Tihbualmi a theih thiam mi pawl an si. Kan cawl ih malte an be aw ta. An phurhmi cu a ritzet nan, thilphur tthang an si ruangah an bang tuk lo. Kan nih vek cun phur seh la, a hnial hman kan hnial thei lo ding.

Cuisin Harm Tawi khua kan thleng. An khawhrar ah Pu Hram Tawi ih phun mi “Bawi Jesuh” Lungphnu tla kan hmu. Mak ka ti nasa.  Ttha ka tizet. Bawi Jesu Kum 33… Jesuh cu Bawi a si. Misual caah Vailamtahnak ah an thah. Sualnak a tei.. Thihnak in a thotthan..titla a khanah a ngan. Evangelisim a tuah ttha riai ka ti. Mi tampi in an siart cio ding ka zum.

Tawkfang in Tihbual khawtaw “Varangva” an timi zin siatnak hmun cu kan thleng ngaingai. Lilawn an dawn mi a ttha tuk lo. A ongnak ah zanthing kan hrolh sal. Himi tiva ah Bomba kung a um ih rah tampi a rah sabbei. Khuma,”Himi Bomba kiang ah Bomba pa hi i zuk hnik he” ka ti ih Khuma cu a hni ciamco. Bomba rah kiang ah ka zuk aw ta. Varang ralkhat lam cu a so nawn. Kan ttum thluh ih, Pa Hre cun a mawtaw nuam teten a mawng. Lilawn a lan. A so a kai ngurngo. Tawkfang in cirhti malte luannak hmun a thleng. A nal deuh. A motor a so thei nawn lo. Brik a phit phahphah ih nuam teten a dunglam ah a tolh vivo. …Jump lung..Jumplung. . tiah ka au ih Pu Kio in thing tumpi in a rak kham hnu ah a motor cu a cawl. Pa Hre a ttum ih 4wheel a bun lala. Cuisin nuam ten a kai thei. Tawkfang in Tihbual khua kan thleng.

Tihbual khua cu inn 70 lenglo lai an um. Hlanlai ih kan khua ih sin Tihbual ih rakvai pawl tla tampi an um lai. Nei Iang pu a simi Pu Kap Dai tei sungkhat tla an tam zet. An khua ah malte kan cawl ih an lung a awi zet.  In thei zet lai. Kan sungkhat tampi an um tinak a si. Saya Khum ih u pa tla himi khua ah nupi fate a nei ve. A mah cu a thi zo nan, a nufa cu hikhua ah an um lai. An inn ah kan lut phah. Khuma( Cerhmun khawmi) an hmuh cun a fanu upa bik tla cu a ttap rero. Baptist Pastor Hngak (Peter pa) te in Lakphak le rathur tla in rak do. A thaw zet. Tawkfang in Tlangkhua lam pan in kan feh sal. Kan Jeep kiang cu nauhak an khat. Hilam hi Mawtaw a feh tuk lem lo ih nauhak pawl in Mawtaw zoh an duh zet. Sakhi kan kap ih nauhak ih kan kil liailiai vek in kan Jeep cu nauhak in an kil liailiai ve.  Tawkfang in an thlanmual kan thleng. Malte kan cawl. Khuma cu a u pa ih thlan kiang ah ka zuk ta. Tihbual le Tlangkhua karlak zin cu a min nak hmun malte siarlo cu a ttha zet. Tlangtluan a si ih a nuam zet. Olten Tlangkhua kan thleng mei. An bualrawn kan lut. Kan khua a lang. Kan khawram ka zuk ciamcco. Kan Mawtaw hawn tla kan tum phahphah. Kan khua le Tlang khua cu Laiva in in dang. Peng 2 hrawng lawng a hla ding kan ti.

Tlangkhawmi lofeh pawl an tlung phahphah. In theitu tampi ka tong. An mang a bang zet. Ruah lopi ih ziangtin tiah thu in sut rero. Kan khua feh ding kan si ka ti. Aw. Nan khawpawl in an lo hmuak kha in ti. Kan feh vivo ih, kan khaw pawl cu kan tong ngaingai. Sui Eng pa,  Pa Kap le khawpi dang pawlin in rak hmuak. Pa Kap in ka to dingah a Rangcang tla a rak hruai.  Pastor Sangte te inn lam pan in kan feh. Kan Mawtaw tanta ding kan si. Kan khua tiang Mawtaw a feh thei nawn lo. Pastor tei inn ah kan tthum aw. Pastor Sangte le a nufa pawl Ngahring dawi ah an rak feh thluh. An pitar le an sungkhat an rak um. An khawsung upa hrehkhat pawl an ra suak khawm.

Tawkfang a rei in, mikhual tam nawn an ra feh kan hmu. Nauhak rual tla tampi an tel. Singai , Tlangkawi, Satawm khua in kan khaw khawmpi zawh ding pawl an si. Kan kut kan kai aw hai. U pa pawl cun in thei ih an lung a awi zet. Tlangkhua ah kan tong aw ciamco tinak a si. Tawkfang in kan khawlam pan in, laiva suk ah an suk khelkho. Mihrek cu Primary kai lai an si ih an nuahak ngaingai nan an cak zet. An mah te pawk ttul lo in an feh mei.

Keicu Tlangkhua upa pawl thawn malte thu kan rel ta. Tlangkhua ihsin Tlangzar tiang Mawtaw zin an cek rero mi thu in ruah rero. Tu baite ah zarh 2 kan riak ih tam nawn kan zek zo in ti. Tlangkhua le Tlangzar cu peng 17 a hla. Tlangkhua in  peng 9 tiang Jeep feh theinak zin an cek zo. Peng 8 lawng a tang tinak a si. Tlangkhua le Leilet cu Jeep a feh thei zo an ti. Leilet tiang peng 19 a hla. Tlangzar tiang Mawtaw zin an cek suak theiah cun, pursum leilawnnak ah kan hlawk zet ding.

Tawkfang in kan khawlam pan in kan suk ve. A suk zet. Rang tonak a ttha tuk lem lo. Nuam teten kan suk vivo. A tthahnak ah cun Rang ka to phahphah. A suk tuk ih a nuam tuk lem lo. Cowbay cu siseh la a poi lem lo ding nan. Cowboy pawl cu ziang vek suk khal ah Rang an to thiam. Nuam teten kan suk vivo. Tlangkhua ngahring dawi pawl kan tong phahphah. Nete bikah Pastor Sangte te pawl thawn kan tong aw. A nufa pawl tla an telve. Malte kan biak awk hnuah, Laiva lam pan in kan suk vivo. Tawkfang in Laiva kan Lilawn hmun kan thleng.

Laiva lilawn in fala tlangval pawl in in hlarem thawn in rak hmuak. Pangpar tla in orh. Lung an ti leng nasa. Thlacamnak kan neih hnu ah  kan Laililawn zawh phah in kan khawlam ral kan pan. Pual buk rawn ah kan cawl. Hihmun hi kan dung kum 10 lai ih ka nufa  pawl thawn kan thjlennak hmun a si. Kan khaw fala tlangval le Tlangkhua fala tlangval pawl thawn, Nga kan rak thliar ih Ngahring tla an rak dawinak hmun a si. Suncaw hmunkhat in kan ei tlangnak hmun ka thleng sal. Lunglen a um nasa. Cuihmun ah kan cawlih, fala pawl in Lakphak, Ratthur le Baa, Arti in pe. Pu Kio le Khuma cu Rathur an duh ngaingai. Tamzet an ei. Keikhal Baa tampi ka ei ve. Baa ka duh zetve. Kan khua nauhak rual tla tampi an rung thleng. In kil vialvial. Kan zuk ciamco ta. Tawkfang in, Kan khaw lam ah kan so lala. Tawkfang in kan dung kum 10 lai ih Zatum kakah mi kan zawn ciamconak hmun kan thleng.  Ete nu le kan khawpi pawl ih hla thawn in rak hmuaknak hmun pawl kan thleng sal. Kan dung kum 10 lai thu ka mitthlam ah a cuang sal ciamco. Lunglen a um zet. Nuamteten kan so vivo. A kiangkap ka cuan phahphah. Zanthing a rul. A mawk zet. Kan hualram ( reserve forest) a si. Dauhloten, meisa ur loten an kil khawi thei ka hmuh tikah ka lung a awi zet. Kan khaw upa pawl an fel zet tiah ka lawm rero hai. Kan khua kan naih cuahco. Kan Biak inn a lang. Biakinn thlenhlanah ca an tar. Naiten ka siar ih keimah hmuaknak ca a si. Biakinn hmaiah kan zuk aw ta. Cuisin kan khawsung kan lut.

Kan inn pi kan thleng. Pathian thangtthatin um ko seh tin thla ka cam. Kan inn pi cu, ka u nu ih fa ih fa ka tusin Pa Kap ten an hgnak. An fel zet. Kan zaute rop pawl, coka rop pawl,.kan zausuk rop pawl tla tthaten an rak rem sal thluh. Innleng sangka te tla an rem ih a nuam zet.  Hitivek ih an remmi in ka pa ih kutneh, ka pu le pawl ih kutneh cu a hlo cuanglo. Kan pupa pawl ih kutneh cu kan zialpi ah fiangten kan hmu thei lai. An cahdan, an thilthiamdan, hreitlung lawng ih pi 30 lenglo zialpi an salh thei cu mangbangza a si ko. Cui kan zialpi cu tthaten ka zoh sal. An hreitlung haneh tampi a langlai. Cumi pawl cu kan pupa pawl ih kutneh an si.

 Zankhawm

April 3 cu khual thlen zan a si. Kan area Pastor le hruaitu pawl an thleng thluh ve. Khawmsung hmuahhmuah thusim tudingah nangmah kan lo ring in ti. Lungawiten ka co hlang. Khual thlenzankhawm cu Pastor  Khuma thusim ka fial. Mikhual 270 lai an thleng. Boimba mipum thawn 500 lenglo kan kim. Satawm, Tlangkawi, Singai in nubu, mino , CE nauhka pawl le pacing pawl kimten an suak khawm. Kan LBC area in Tibual lawng an suak thei lo. Nauhak Sunday khawm ti si nawn lo in, LBC khawmpi tiih an thlengnak hi kum 3 lai a si zo tiah in sim. Hmunkhatah an kom thluh ih a remcang zet.

Kan LBC area lawng si lo in Tiahdai, Aibuk, Khawlung, Dihai, Hnahthial,Zongte le Tlangkhua lam unau pawl tla khawm an ra zawhve hai mih sunglawi kan tizet.

April 3 zan khawm cu Khuma in Pathian thu phuurzet in a sim.

 Zuamawknak

April 4, Zarhte zing khawm cu keimah in can ka hmang.  An thu tlangpi cu “ Na Tel Lo Cun” Ex. 33:15 a si.

Sunkhawm a um nawn lo. Area khawtin zuamawknak in can an hmang. Khawtin, Sunday School Nauhak pawl hla le Bible zohlo zuamawknak phunphun an nei. Culawng si lo in, Mino Nubu ti in solo, hlarem zuamawknak phunphun an nei ve. Zanlam nazi 4 hrawngah khawm kan bang. An zuamawknak ka zoh rero ih an thiam nasa.

Nauhak zuamawknak ah, Tlangkawi khua in a pakhatnak an ngah.  Belpi kim 12 lai an co riai. A pahnihnak cu, Bomba, a pathumnak ah Singai tla an si. Satawm in zohtthimtlak laksawng bel an co ve.

Zankhawm khal keimah in ka sim lala. Pu Kio in thuhlawmnak a nei ve. HIV thu le harhdamnak thu pawl a sim. A tthazet an ti cio. Kan ttul zet mi an si.

April 5, Nipi ni. Keimah in can ka hmang sal. Saya Khum in thuhla hlawnnak a nei ve. Kan ram kil khawi a ttul dan. Meisa ur a tthat lo thu pawl a sim. Ttha an ti zet.

Sunkhawm a um nawn lo. Kan area pawl in Sia in thah ih upa pawl thawn thurel khawmnak thlacam khawmnak in can kan hmang. Mino pawl cu bawhlung sit an zuam aw.

Kan khawpawl sitlung sit tla an rak thiam zet ih ka mang a bang. Globalization timi hi kan khua khalah a thleng ve a si hi ka ti rero. Mino pawl an hnipuan hruhdan, an sam tuahdan pawl tla mak ka tizet. Common Culture timi cu Bomba khua khalah a thleng ve ta riai. Kan dung kum 10 lai ih kan khua thawn a bang aw nawn lo.

April 6 Monday.

Zirnak Training kan nei. Dawmtuahdan le a dangdang.

Kan area khawkhat in minung 3 ciar an tang ih zirnak phunphun Saya Khum in a tuah sak hai.. A hleice in IMO timi kan tualsuak dawm tthatertu pangang vulhdan phun 2 a tuah sak hai ih an hlawk zet. IMO timi cu Indegenous Micro Organism ti a si ih, hramlak zanthingrop le hnahrop lakih kan hmuh ttheumi Mawvang kan timi pawl khai an si. Cumi Mawvang kan timi hi dawm tthatertu pangang an si ti kan thei dah lo. Leilung sung letmah 6 thuknak tiang lawng ah an nung thei. Meisa kan ur tikah cun an thi thluh a si mei. Cuiruangah kan leirtam a car deuhdeuhnak asi. Asinan tucu awvang vulh kan thiam zo ih phan ding a um nawn lo. Himi hi Japam pawl ih zirhmi fimthiamnak a si.

Tucu kan lairam minung tam nawn in an thiam zo.l khal in an thiam thlang ding ih ka lung a awi zet.

Cuisin, kum 9 le kum 12 karlak hrawng nauhak Junior pawl cazirhnak kan nei. Cumi cu kan MCC Advanced Literacy Program a si. Kan khaw tlawng ah zirh ding in kan tlawng Saya pawl kan zirh sin. Nauhak 20 lai kan ko ih Practicle in ca kan zirh. Kan Text book, level 1 ta kan zirh. A hleice in dawm tuahdan thu kan nganmi Saya Khum in a zirh l;ala. Saya pawl le, Kan area upa pawl in a kiang in an rak ngai. A zirhdan thiam hai she tiah kan ngai ternak a si.

Nauhak pawl cu an thluak a ttha zet. IMO tuahdan, Bokashi timi Japan dawm tuahdan olten an thiam mei. Hramlak ah Mawvang timi, IMO cu ziangvek a si tiah kan hawl ter ih nuam an ti zet. Hnahrawp an kau ih mawvanng timi ziangvek a si tiah Saya Khum in a hmuh rero hai. Meisa ur ruangih mawvang kan thih ter thluh thu pawl a zirh phahphah hai.

Cuisin IMO 3 kan tuah cia mi kan zausuk hnuai ih kan khuh mi nauhak pawl kan zoh ter. Cucun IMO tuahdan, dawm tuahdaan pawl an mit rori in an hmu thlang. Dawm lawng ih hman ding si lo in. IMO cu vokrawl khal ah a ttha ngaingai. Vok damnak vitamin ttha bik a si.

 Khawlung a laang in ka tlawngduak.

April 6 zingpit, vangpawl nazi 6 kim deuh lo in Khawlung khua tlawng ding in kan pok. Pa Kap in a Rangcang a hruai. Sungkhat unau dang pawl khal in in thlun ve. Meithla kan keng nan zianghman kah ding kan hmu lo. Khawlung va kan thleng. Khawlung upa pawl an rak thleng zo. Electric an tuahnak hmun kan thleng. Khawlungva cu a tum zet ih Electric sun zan in an vang thei. Khawlungva Lilawn ah kan zuk aw rero. Khawlungva ral kan kai. Malte a so nawn. Mawtaw cycle zin ceknak ding kan khawram lam tla kan cuan phahphah.

Tawkfang kan so ih, Khawlung fala  pawlin pangpar thawn in rak hmuak ciamco lala. Hivek in in rak hmuak ding ti ka ruat ban lo. A ziang khal le sunlawih upatnak hmuahhmuah cu Pathian ta si koseh ka ti. Nuamteten kan so vivo ih Khawlung khua cu kan lut cuarco. Pa Ro te Khawlung an um lai an hmuan le an inn hlun pawl tla ka cuan phahphah. Ka tlawngkai lai kan khua ka tlun phahah an inn ka riak ttheu ih, Vokte in rak thah ttheu tla ka vun mang sal. Khensam timi an Rangcang an hrennak pawl tla ka mitthlam ah an cuang sal.

Pu Buan Ir tla khawtaw cu a rung thleng thei ve. Diriam zet in kan zuk aw ta hai. Veiziat na cawimawi tiah ka sut ih vei 35 tiang cu ka cing a ti. Vei 40 lai a si men ding an ti. Kan zuk awk thluh in ka ni tei inn lam pan in kan feh. Ka pa ih farnu a si. A mah lawng a nung. Pi Ni Zing kan ti. Ex. Cpt. Tial Hlei Thang nu a si. A tarzet thlang ih a dam thei nawn lo. Ih khun tlun ah an rak do. A mahte a to thei lo. A lung a fim. In hmu thei. Tthaten thu kan rel tlang thei. In hmuh cun a lung a awi zet. In thluntu sungkhat dang pawl tla theihternak ka nei. Tthaten a be thei hai.  

Micak Tawk Kual.

AD.1900 hrawngah Tawk Kual timi micakzet Khawlung ah a rak um. Minung 4 ih tul thei lo mi Lungpi amah lawng in olten a tul thei ti a si. A tulmi lungpi cu ka ni tei inn thaui ah a um lai. Ka vung zoh ih ka zuk ciamco. A tum zet. Minung pakhat ih tul ding cii a si lo. Asinan, Tawk Kual hivek lungtumpi amah lawng in olten a tul thei ruangah a cak ngaingai ticu a fiang.

Tawk Kual cahdan cu, Secang kum 2 ti ( Limthuan kanti) mi tla olten amah lawng in a pu thei. Hramlak ih an thahmi secang zawn an tum ih, “ Hna a hnok hnuaihni ka pu men ding” a ti ih amah lawng in a put men an ti. A cahdan cu mak an ti nasa.

 Vok in thah.

Khawtlang in Vok in thah ih thaithawh ei khawm dingin in kai. Rawl ei hlan ah an Cycle zin ceknak hmun tla ka hal ta. Khawlung khua Motor cycle a thleng dengdeng. Cuisin khawmnak kan nei. Ka ni tei inn an khat thluh. Pathian thusimnak le forh fialnak ka nei.

Khawmtiak in tualah kan zuk aw hai. Cule, tufang an khawlal Palen pa tei inn ah thaithawh ei khawmnak kan nei. Rawleinak cabuai an tuah thepthep ih a nuam zet. Nan tawkzet a sisi tiah ka porh rero hai. Khawtlang ih tuahmi rawleinak cabuai le tohkham a si an ti.

Rawl kan khawhveten kan khawlam pan in kan tlung sal. Kan klhua cu Nazi 11 hlan ah kan thleng . Biakinn zirnak hmun ah ka lan mei. Khuma thuhla tampi a rak zirh rero hai.

Caw in thah

Kan khawpawl in Cawcang in thah lala.  April 6 zan cu kan inn ah zanriah ei khawmnak kan nei. Buh cu mah le inn cio ah an suang. Sa lawngte kan inn ah an suang. A buhsuan mi hmun khat ah an keng khawm ih, mahle inn sungsang ciar hmunkhat ah to in rawl eikhawmnak an tuah. A bur a bur in an to khawm ih kan tual cu an khat thluh.Mai inn ciar in pakan le khuat tla an keng cio hai.

Kan khawsen miting pi.

April 7 zan cu khawmnak tuah lo in kan khawsen miting pi kan nei. Pacang hmuahhmuah, Nubu mino tin kan inn khat in an suak khawm thluh.

Pil her ttul nawn lo ih kumkhaw hmuan dumpi tuah ding thu kan rel tam bik. Ka sim zo vek in hnahkhar va ti lak ding thu kan rel. Lawngrawl pil tiang tidai lak ding thu kan rel ciamco. Nuhmei farah mi harsa ngaingai pawl siarlo cu, inn khat vok khat kum 3 sungah suah ding in kan lung a kim. Khawmdar lungput, Pathian cawimawinak lung put neih ding kan ti.

Tufang kan khua ah hnahkharva tidai cu letmah 1 hrawng a thleng zo ih in ti an khop zet. A liam lak rero men. An khop thlekthlek. Cuiruangah himi a lung lak mi tidai pawl hi, man nei zet in hman ding a si kan ti. Inn ih kip Sabit kung khat ciar cing thei she la tiah saduh kan that. Cu lawng si lo in hang dum tla a tuah thei cun tuah ding kan ti. Hivek tuah thei ding cun, Vok thlah lo a ttul.

Cu a si ruangah Vok suak ter nawn lo dingin lungkimnak kan nei. Inn lak ih Vok suak cu harhdamnak thaw khal in a mil awk lo zia an fiang.

( Kan miting lungkimnak vek in thlun thei hai seh la tiah thla za ka cam.  Saya Khum in lungkimnak ca a ngan khum sal. A veikhatnak cu FBA zungah a ngan khum zo.)

Kan miting cu kan phur zet. Zan nazi 10 hnu ah kan ttheh. Nazi 11 ah kan it.

Tlangkhua lam pan in.

April 7 zing ten kan tho. Vangpawl nazi 6 hrawng in Tlang khua lam pan in kan khua cu ka suah san sal. Tlangkhua ah zikangkhawmnak tuah ih thaithawh zawh ding kan si.

Nazi 7:30 hrawng ah Tlang khua kan thleng. Pastor Sangte pawl in in rak hmuak. Tidai kan in tai h, Biak inn lam kan pan mei. Can kan nei tuk nawn lo. Khawmnak kan nei. Keimah in Pathian thuthangttha ka sim. Saya Khum in kan ram kilhim a ttul zia thu a sim sal. Biakinn an khat,. Pawl tinkim an suak khawm. Mino hlarem an sak. An thiam nasa. An hlasak mi cu milung a khoih zet..  An aw a rual. An aw tla a ttha. Tlangkhua pawl tinkim mino an si.

Khawmttiak veten thai thawh kan ei.. Pastor Sangte in Sia in thah ih an khawpi pawl thawn kan ei khawm. Thaithawh kan khawh veten Motor par kan kai. Pastor Sangte in thlacamnak in neih sak ta. Cuisin Thantlang lam pan in kan feh. Kan rat lam hnak in kan cak deuh. Lamzin ah kan taang nawn lo. Thantlang cu nazi 2 hrawng ah kan thleng. Lakphak tla kan in ta. Hakha lam pan in kan pok sal. Hakha cu zanlam nazi 5 hrawng ah damten kan thleng.  Bomba in Hakha tiang thlen cu a ropi nasa ka ti. Pathian thangtthat in um ko seh.

Sunlawi upatnak hmuahhmuah cu Bawipai ta si ko seh…… Amen.

(Visited 61 times, 1 visits today)

Comments

comments

Comments

%d bloggers like this: