Kan Kawhhran Buai Theunak

A hnuaita pawl rak siar awla, na thinheng lo dingah ka lo ngen. Nan kawhhran ka zionak a silo, a point ngaingai hman ka tarlang ngamlo so khaw. Curuangah keimah in ti san tiah rak ruat duh hlah aw, hivek hicu kan Laimi kawhhran/fellowship ah a common tuk zo!

Mipi: Kan mipi ka zoh rero tikah thlaraumi ngaingai ka hmu fawn lo. Thlaraumi si cu a har, mipi si hman an tlinlo. Zapi thlacam kan neih caan khalah a cemnak tuah ding an phang theu. Khawm pan an tlai theu ih bet ah hlasak an ze tuk bet. Hla hruaitupawl aw lawnglawng ka thei theu. Kei khal cu mipi lakah ka to ko nan ka riahsia. Keimah mawh tla a si. Thlarau lam ah kan tlasam rori a si. Kan hlasak khal a thaw dah lo. Thu mumal lo relporh le kan hmang emem fawn, kan kawhhran hi cu buaithlak tak a si.

Kawhhran upa: Thlaraumi ka hmu hai lo. Hlasak ih zabeng rengreng hman an paih lo. Sermon an thiam ding khal ka phut lo nan Pathian thu an theihlo daan a besia tuk deuh. Midang ih sermon pawl tla an ngai theu lo maw ka ti theu. Meeting an neih caan ah an buai ringring bet. Olsamzet ih rel theih mi thu rori cu a hel zawngin, el aw ciamco zawngin an rel theu. Cun, meeting feh daan an thei lo lawlaw tisehla ka sual lo men ding. Kan thiam lo kan thei lo tile an duh remrem fawn lo. Meeting tinten an buai ih meeting kai peih nawnlo hman an lakah a tam vivo. Kumkhua hruaitu si le an duh fawn, an tlin fawn lo, an tuan duh thotho fawn.

Nubu: Kan nubupawl cun cuvekih tlaksam ciamco an nei lo ka ti men ding. Nu an si vekin buaizet cingte’n Pathian hna an tuannak zawn ah an hlawhtlingzet tiah ka hmu. An lakih thuduh deuh tla an um ko nan ngaithiam theih cu an si. Anmah lakah women right uar deuh tla an um nan rualpidang pawlin rel suak lo dingah an kham theu. Nubupawl ih buainak cu an thu nawi thei tuk, thu olte rel dingmi an hel ih an tlawk rero lawk theu. Cule mirel an hman tuk hi cu an bang leh ko ding ka zum. Nubu hruaitu rori mirelnak ih nihlawh an lak ah an um.

Kan Mino: Kawhhran upapawl zio phahphah an hmang. A caan caan ah kawhhran an uk theh tum vek tla a bang ka ti phahphah. Anmah pawl le thianhlimnak lam ah cuvek ciamco an si fawn lo kawhhran upa pawl ih sualnak hmu theitu tamzet an um. Asinan, program an tuah mi pawl ahcun a tha  thei zet. Kawhhran upa pawl khin kan mino pawl an toksual sawn tiah mipipawl in an sim theu ih minopawl khal cun mawhnak tampi an nei thotho ding ka zum. Mah pa le rual cu upat thiam deuh sehla ka duh. Kawhhran upapawl in le kan thei lo tiih tangdor le an duh ve fawn lo.

Kan Pastor: A thu a duk zikzik. Kawhhran upa dang pawl a ttih deuh vekvek. Thusim lampang cu a thiamzet in ka hmu. Thlarau lam khalah mipipawl khawp ko van manna in fah thei ko in ka hmu. A ziaza a thleng ding mi ka duh sawn cu mipi sawiselnak tivek a ngai thupi thei deuh. Pastor pakhat dinhmun ah a tong tuul lo mi le a rolh awk tul lo mi ah a rak rolh aw theu cumi te cu a thleng vivo ko ding ka zum.

Kei Ka Mangbang: Cutin, kan kawkhran sungah bupi, nubu, mino le Sunday school pawl tiin kan um ko nan thlaraulam ah kan tlasiazet in ka hmu. Kan fel ruangah Pathian hnatuan zohman cu kan um lo nan kan nun kan thlengawk tum lo mi hi harsa ka ti ngaingai. Ka mawh lo timi lungput neitu kan kawhhran ah kan tam tuk. Ziangtik hman ah himi thu ah ka back dah lo ding tituvek. A cancan ahcun Pathian hna kan tuan daan hi a lem theh vekin ka hmu.

Cangantu hin a kawhhran sung ih buainak siloin Laimi kawhhran sungih buainakpawl sawn a tarlang ti rak theihsak uh.  A ruh langin a ngan ngamlo ruangah rak ngandam bet uh. Pastor na sawisel, Pathian hnatuan tupawl na sawisel ti a phang ve ko.

Comments

comments

6 Comments

  1. Midang pawl in comment uhla kei ka hmuh daan nasa nawn in ka tarlang ve ding. Hivek cu rel ding tampi ka thei ve.

  2. Hman ka ti zet.tulai kan lai mi pawl cu thlaraulam leh pathian lam i thaw mi an um lo pi.thlarau lam leh pathian lam nak cun BU kohran timi te ah khin an buai tuk kati ve ro ri. kanlai mi dinhmun hi tam pi ngan kaduh ko nan> leh hnulen karak ngan sal ding tu cu caan ka nei lo. Hi na ca ngan mi hi kathokhan tuk ruangah leh kan lai mi phun sinak diktak asih ruangah kalothang that zet.

  3. Na ngan mi ka lung kim tuk ve a ruh lang ko ngan aw la a tha sawn ding ih kan rem aw thiam ding rawn ti bupbo mai aw

  4. Na cangan mi cu a tha tuk nan nang teh khawi tawk dinhmun ah ha na um?

  5. Tha tuk lawlaw nan na dim deuh a bangih ka run rawt na deuh hrih ke…..
    Mah hmuah members pawl vehvai in kumkhat voikhat tal thlacamnak hman nei paih si lo mah ti that hle hle hmuah duh…Cun Kohhran upa hmuah ziang hman ih ngai si lo mah hmuah upat le tihzat duh zet ih meeting nak khal ih mai thu tlin hlan lo ding leuh leuh hmang….A bik tak in Kohhran te nau deuh ih pastor pawl hi an buai tlak thei zet….Hi vek pastor neih cu ka khop tuk a mah maw feh lohli ding kei…?

  6. ka U na ca tar mi leh na thu sim duh mi ka hmu fiang ih tha tuk ti lo bak sim ding dang ka nei lo,lai mi lawng kan c hmang ka ti nan lei lung tlun huap in kan c ti ka hmu..hi pawl kim in phuang tu leh thei ter tu an um thlang ih pathian tong kam kim nak c tin ka lung awi nasa….kan pathian hmin ka thang that. Pathin ih pek mi leh Pathian hnen ih ra mi thla rau thiang hlim co tu ngai ngai cu mi mal te kan c,an c rung ah…kan kawh hran car ah kan hmu nak a bang awk lo ih kan feh dan tla a bang awk lo, Tuu leh Me cu Inn khat an an um tlang ring ring thei ding maw????

Comments

%d bloggers like this: