KAN DO MI RAL (Sunday Sermon)

KAN DO MI RAL

Ro Khar Thang

Text   :   Eph. 6: 10-12. “Kan do mi ral pawl cu, milai an si lo, thlarau sia, uktu, thuneitu pawl,a thim mi khawvel uktu pawl an si” (v 12)

Thuhmai: Kan do mi, kan ral cu thisen le titsa nei mi an si lo, Satan sual ral a si.

Bible ih kan hmuh mi a hmin hrekkhat pawl-

a)      Satan =  Dokalhtu (Matt.12:26)    b) Ral  (Matt.13:25, ITim. 5:1, IPet. 5:8.  c)  Unau mawhpuh hmangtu (Thup. 12:10)  d). Thlarau sual (IJoh. 4:6)  e). Khawvel roreltu pawl(Joh.12:36, 16:11)  f). Khawvel pathian (IIKor. 4:4)  g). Khuahlan rulpi tar (Thup.12:9, 20:2)  h). Rulhreng (Thup. 12:2-4, 13: 2-4)  i). Aboddon (Hebrew)  Apollion(Grik) = Tawp nei lo khur uktu;  ti mi pawl an si.

  1. Rin um lo vancung mi pawl (IIPet. 2:4, Juda 6) sungah kan hmu. Johan. 8:44 sungah hitin kan hmu thei. “nannih cu nan pa Satan ih fan an si, nan pa ih duhnak nan thlun duh ve a si. A hramthok ihsin anih cu mi that a si ih thutak lam ahcun a tang dah lo; ziangah ti le anih cu a sungah thutak a um lo. Anih in thupan a per tikah amah ih si dan a thlun ve mi a si, ziangah ti le anih cu thupan pertu a si ih thuphan hmuahhmuah ih pa a si”.
  2. A lungput dan khal a hmin thawn a remaw zet. ( Nahsiknak, Porhawknak, Thupan relnak, Mi hrem duhnak, Bumnak phunphun hmangih minung pawl siatsuahnak, (Eph. 6:11, IJoh. 3:8)
  3. Khrih in  Satan ral a neh.”Satan, tlanaw, ziangah ti le Cathianghlim in, ‘Bawipa na Pathian lawng na biak pei ih amah lawng na rian pei’ a ti a si, ti ah a let.Cule Satan cun a tlansan. (Matt. 4:10). Khrih Jesuh sungih   kan nun ahcun Satan cu kan neh thei a si.(IJoh. 1:13).
  4. Satan cu do uh. Pathian duhnak a thluntu si uh. Satan kha do uh la a tlan mai ding. (Jeim. 4:7)
  5. Pathian fate kan si. “Pathian fate a si mi cu sualnak tuah vivo in a nung nawn lo ti kan thei, ziangah ti le Pathian Fapa in a hum ih Satan in a siatsuah thei lo”.

Thu kharnak: Minung nunnak sungih in dokalhtu, zumnak dik ihsin in hruai peng theitu, duhamnak le midang siatsuah poi ti lemlonak, mah ih hrang tha mi lawng ruahnak, hmuahhmuah hi Satan hnatuan nak a si ti ih kan fiang hnuhnu ahcun, cu pawl cu kan hlon viarviar ding mi an si.

Cumi pawl aiah, Khrih ih lungput a si mi, remawknak, duhdawtnak, midang zawn ruahnak, tangdornak le thinsau nunnemnak thawn pawlkom aw le tuan tlang khawm ding kan si sawn.

Khuitawk hmun le ram ih kan um a si khal le leilung par thotho a si ruangah Satan hnatuan mi le dokalhnak kan ton mi hi a bangaw thluh ti thei in, ram thangso lam a thlengtu pawl khalin suahsualnak a tam sinsin ti thei ih, Khrih hmel lawng zoh ih nundan kan zir vivo cio ding a tul ngaingai. Pathian thluasuahnak cotu si cio hram uh,  Amen.

(Visited 53 times, 1 visits today)

Comments

comments

One Comment

  1. Tahan Kalaymyo says:

    Tha zang ka ngah na sa

Comments

%d bloggers like this: