Kan Chin Kum Thar Puai A Hmin Le A Ni Hi Cu Aw!!! (Thlirnak)

1378075_613179628720248_1715407348_n

Kan Chin Kum Thar Puai A Hmin Le A Ni Hi Cu Aw!!!

Van Bawi Lian

Tui kum Chin Kum Thar hman dan cu zoh rero tikah ṭhangthar nonawn thinlung a tham in mi a neh zet in a lang. Leitlun santiluan ih a her pi mi Internet le social network tete ruangah kan puai hman dan khal khawitawk hmun kilkawm khalin kan rak zoh ve thei. Mino pawl hrangih cinken tlak kan ni pakhat a si ticu a lang fiang kan ti thei.

Ziang tin kan hmang ti lam cu mah le umnak hmun le ram ih zirin a dang cio ih a ni khal ramleng suak pawl hrang ahcun tlawngpih caan lole zungpih caan hawl ih hmang cio kan siin a lang. Ramsung ih a hmangtu pawl hmunkhat ih ka hman theilo khal kan nithlasiar, CALENDAR sung ih a tello ruangah a si ti a fiang. Rampi pakhat sungih Chin mi um ciocio a ni, ni khat ih kan hman lo hi cu hmailam caan ah thleng thei rori dingin kan Chin upa pawl in hmalak a ṭul rori a si tiin ka ruat.

A ni kan hman mi a bangawlo lawng siloin a hmin kan kawhdan tiang a bangawklo mi kan Chin puai a sihi hnamdang pawl simfiang dingih thil harsa zet pakhat cu a si. Fanger tiin kan ko lan ta ding maw, Khuado kan ti ding, lole Tho tiin. Chin ramṭhen phun le hnam pawl ih kan kawhdan cio bangawk lo celcel mi hin kan puai tuah mi a sunlawinak a ti nep deuh tiah keicun ka ruat.

Chin Kum Thar (Fanger), Lai Kum Thar (Fanger), Chin Harvest Festival (Khuado)(Fanger)(Tho) tivek ti celcel hin Chin mi kan thinlung ṭhekdarh zia a langter tikhal in leh lam ahcun ka ruat.

Chin National Day tiin kan pi le pu, ka u le pawl ih an rak khiah mi vekin kan Kumthar puai khal hi a ni kan khiah theilo hmanah  a hmin tetal hi bangaw theisehla duhthusam thuanthu mawi a si ding. Lai ti kan ret ding le Lai tithluh sehla Chin kan ti ding le Chin ti thluh lawlaw sehla ramsung um le ram leng um pawl khal Chin mi unau kan si ti alang thei ding.

Chin Kum Thar hi mirang ih kan let ding ahcun (Chin New Year) a si. Fanger a cang theilo. Lai Kum Thar hi mirang ih kan let ahcun (Lai New Year) a si lala. Curuangah Fanger tiih kan telh ding a sile Chin Kum Thar (Fanger) tihi a diklo mi a si. Chin Harvest Festival khal Chin ih kan leh ahcun (Chin Thlaithar  Puai) tinak a si. Fanger ti cu hnam hrin pahnih khat ih kawhnak a si tiin kei cun ka thei. Chin pumhuap ih kan pompi theimi ṭongfang/cafang a silo ahcun Khuado, Fanger, Cangzom, Tho ti pawl hi tansan in a tamsawn ih kan pom tlang thei dingmi cafang/ṭongfang vek teh hmangsehla kan puai hi hmunkhat ah sunglawi le nuam zet in kan hmang thei sawn lo ding maw!!

Cutin leitlun kil tin um khalin cui hmin cu kan hmang dingih a ni khal kan ram pi a cozah hnenah nemhnget dilin kan ti theilonak ding a um lem cuang maw si!! Chin mi cu miphun khat sulkual khat unau kan si ti kan puai hman miin kan pholang thei ding a si.

Curuangah kan Chin mi pawl ih kan uar zet mi hi kan puai sunglawi hi hman peh vivo a si theinak dingah a hmin kan kawh dan bang aw in le a ni khal bang aw in tuah thei sehla ziang tluk in so kan Chin mi hrangah a sunglawi sin ding. Kan Chin mi ni sunglawi le puai rori Chin National Day kan urhsun vekin kan Fanger, Tho, Khuado khal sunlawi a sive ding hi ka saduhthah a si.

1_661229745_n

Comments

comments

2 Comments

  1. Ca ngantu, na ngan kim tawk pam, a ttha. Chin Kumthar ti mai ding si ko. Fanger bulce ngan lar, sim uar a ttul lo, kawh daan dangdang a um ih Fanger ti lengleng in a ti siat thei.

  2. Na tihmam na sa ,kativeciah.

Comments

%d bloggers like this: