KAN CALAI KA HMUH DAAN LE KA TUANVO

pa-thang-kolh

KAN CALAI KA HMUH DAAN LE KA TUANVO

 

Bawipai’ hmai ah tangdor in um uhla a lo khaisang ding.” – James 4:10

 

CALAI hnatuannak ih ka telnak pawl mallai ka tarlang duh. Kum 2003-2008, kumnga sung Falam Baptish Churh, Yangon (FBCY) ah Editors: Rev. Run Cung Mang, Rev. Mike Zung Ceu le Thian Uk Thang @ Nhgepi pawl thawn Kawhhran ih suahmi Vankau Arsi magazine (thlali veikhat) le Nitin Thlarau Rawl, (thla-3 veikhat) siseh, Laica Zirnak (Rev. Run Cung Mang ih nganmi le Kawhhran ih tawlrelmi), Falam Baibal Edit saalmi (Bible Society ih tuanvo neitu le Pastor pawl thawn), le a dangdang Falam tong ih suahmi magazine le cazual tete ah Computer ca-cuk le ceimawi (Lay-out design) lam in kum (4) lai Pastor pawl thawn kan tuan tlang. Hih ka hnatuannak sungih ka tontehmi pawl ihsin kan Calai ka hmuh daan le hmailam ah kan CALAI a thanso vingvo theinak dingih ka hmuhmi pawl ka tarlang duh ve.

 

1. Kan Calai ka hmuh daan:

 

(a) Pathian thluasuah:

Kan CALAI hi Pathian ih thluasuah a si kan ti theinak cu Leitlun huap ih hmanmi cafang (A, B, C) kan nei/hmang thei ruangah lungawi umtuk. Internet ih ca kan kuat awk tikah a hranpa ih cafang (font) thun a tul nawn lo. Asinan, Pathian ih thluasuah a si rualrual in Pathian sunlawinak ah hmang ding le kilkhawi ding hi a neitu in tuanvo tumpi kan nei ti a thei fiang hrih lotu kan tamzet lai.

Lungawi umzet pakhat cu tuni tiangah Laimi in tongkhat kan hmang lo, asinan Kawlram pumpi le Leitlun (World) level in Laitong (Chin Language) tiih an theihmi cu kan hman reromi hi a si timi ka theih tikah mak ka tizet. Keimah rori tla Radio sungah thuanthu cawn siar le relnak in kan Lai Radio caan ah veihnih lai ka tel ngah ve ih a sunglawi ka ti nasa.

 

(b) CALAI, Miphun khaisangtu:

Kan theih cia zo vekin CALAI hi Miphun pakhat ih thansonak tahfung a si. Kei cun kan CALAI ruangah kan Miphun hi a tumsuk hnakin thansolam pan in ka hmu.

Pakhat le pakhat soisel-awknak a phunphun cu a suak ko e, asinan hih buainak ruangah mino tampi CALAI lam ah kan mit a vangter. Cafangkom le catluan feh daan lam ah kan sambauzet ko na’n mai’ lung sungih a ummi kan ngansuak cio tikah, veithum veili kan ngan cun kan cangan ah cafangkom le catluan feh daan a remcaang vingvo.

 

(c) Thinlung hmunkhat kan neih theinak ding:

Kan CALAI ruangah pakhat le pakhat duhdawtnak le lungrualnak hi hmuh ding a mal nasa. Cuhnak in soisel awknak sawn ka hmuh in ka thei tam sawn, riahsiatza ngaingai. Kan buaipimi hi duhdawtnak le lungrualnak sawn ah kan her thlang pei. “Bawi Khrih ah pumkhat kan si.

Hih catluante ah thil dang tla a kim theh zo. Khrih ah pumkhat kan sinak hi Biakinn lawngah langter loin a lenglam ah tla langter ve thlang uhsi! Cutik lawngah kan CALAI ruangah Bawi Khrih a sunglawi dingih thinlung hmunkhat kan pu thei ding. Kan buai tulmi le buai ding hmuahhmuah kan buai theh zo. Hih kan buainak ruangah a sia le a tha, thlun ding le thlun lo ding kan thei fiang cio zo.

Hmuh awk thiam lonak pawl ngaithiam dil aw in pakhat le pakhat rem-aw te’n ke kan kal tlang thlang pei. Lai Phun Suah Ni (Chin National Day) ah Pu Hming ih thinlung puakkuai in duhdawtnak thawn a cahtami cu:

Chin mi zaten lungrualnak a um hlan sung cu midang kut tangah nembet in kan um ringring ko dingti a si. Hih tongkam hi thate’n kan ruah a tul. Laimi kan mal nawn lo, fimthiamnak kan neihmi tla a menmen nawn lo. Laimi Zalennak duh-umtak kan ngah theinak ding CALAI lam in thungai thlak in tan kan laak a tul.

 

(d) Thli-lak (Online) ih kan Calai

Thli-lak (Online group-mail) ih CA kan nganmi pawl siar tikah hmailam thansonaklam ih Canganmi siar ding hi a mal ngaingai. Rev.

Run Cung Mang in tikcu caan pekin Khrih le Calai hrang ti’n NITIN THLARAU RAWL le LAICA ZIRNAK a thlahmi hi tha te’n a siar cuca teh kan um maw? Kan ngan le kan siar tammi cu thuthar (hot news) a um le lawngah kan siar, ngan theu si lo maw. Thli parih ca kan ngan le thlahmi pawl ka zoh tikah a catluan cu rel hlah Cafangkom daan tla kan sambau nasalai.

 Lungawi um ka timi pakhat te cu kan ti thei tawk cio in ca kan ngan le kan thlahmi hi a si. Kan theih tulmi cu, a ngan le siar lawng si loin kan hnakin Calai thiam rinsan mi pawl ih cangan daan, cafangkom daan le catluan feh daan pawl zohthim le cawn hna tla hi kan thiam a tul.

 

2. Tuanvo:

 

(a) Zir/ Zirh

Ramleng um pawl in ahleice kan zir/zirh a tul. Hmundang, ramdang kan um hnuhnu cun kan Tong le kan Calai hi hmannak a mal ngaingai thlang. US thleng pawl in khawlak ah Mirang tong duh le duh lo, thiam le thiam loin an hman a tul.

Cutivek thiamthiam in hmundang, ramdang ih um pawl khal in kan umnak ram ih an hmanmi tong kan hman a tul. Cutikah kan Tong le kan Calai kan hmannak ding hmun umsun cu mai’ innsang le Biakkhawmnak lawngah a si zo. Curuangah kan Calai hi mah rori in thiam tum in zir/zirh a tul.

 

(b) Cangan le Casiar:

Casiar hi ka paih lozet, asinan siar lo a cang lo ti’n phunsang tlawng ka kai cin in ka thei aw suak. A thiam pawl ih nganmi pawl siar tam in a thatnak zawn a ummi hminsin in thlun ding le fehpi ding a tha ka timi, cawntlak a umsun pawl lakkhawm in thansopi thei zuam ding hi ka tumtahmi a si.

Cuti si loin, casiar le cangan tam si lo, siarmi umsun ah an tipalhnak pawl lawng hminsin in mai’ duhpoh ngan in mipi hmai ah tarlang ding hi a si hrimhrim lo. Rangoon ah kum 5 sung Calai hnatuannak ih ka hmuhton tambikmi cu…

Cahram ngantu pawl in theih-tawk suah in an ngan ih cuih an nganmi parah thazaang ngahmi sim le rel si sawn loin an tipalh/sualmi pawl soisel le thinheng riangri sawn tla an um. A tuantu, ngantu in harsazet in an tuan na’n a siartulam in kan thei thiam lo theu.

 Curuangah a ngantu khal in fimkhur in, a siartu khal in mawhthluk le soisellam si loin a thatsin theinak ding hitin, khatin si deuh sehla ti sawn hi a thupi. Ngan ve, siar ve ti lawngin kan Calai thansonak hrangah a tawk lo zia hi kan theih a poimawhzet.

 

Thunetnak:

Laimi kan si, hnam dang, tong dang a uar daan kan thiam a `ul. Mai’ phun-hnam le Calai zahpi riangritu tla kan um betlai. Ningzah thlaktuk. Phunsang Tlawngta tampi Laica cafangkom daan a thiam hrih lo kan tamtuklai. Mirang le Kawl riangri sawn cafangkom daan kan thiam sawn.

Hihi Tlawng ah kan CALAI kan zir lo ruangah tla a si ko nan kanmah rori in kan sunsak lo ruangah a si. Mipi in kan CALAI ziangtluk kan thiam ti cu Internet ih canganmi pawl kan siar tikah kan thei mai.

Kan thlennak ramtin ah kan Calai Zirnak hi kan ngaihtuah a tul. Innsang pakhat in a malbik LAICA ZIRNAK cabu pakhat ciar kan neih a tul. Tan kan laak zo vekin atu hnakin kan zuam sinsin pei.

Kan Calai ruangah Pathian a sunglawi ih kan Miphun mi kan bang theinak dingah kutkai aw le thinlung hmunkhat, ruahnak hmunkhat nei in kan MIPHUN le kan CALAI hrangah hna tuantlang thlang uhsi!

Lungawi.

Salai Thian Za Thang @ Thangkolh

 

 

(Visited 54 times, 1 visits today)

Comments

comments

One Comment

  1. Thangkolh cu na ti tha nasa.
    Kan calai hi tuantlak, buaipi tlak rori a si. A tha si , a kim fawn. Laimi hmuahhmuah ih thiam awl le theih olte a si. Zapi thiam theih dingin tuanvo neitu kan tampi nan a tuantu mimalte lawng an si fawn. Rak zuam sinsin aw.

    Christinapa

Comments

%d bloggers like this: