Kan Cah Lonak, Bawipai Hriamhrei

KAN CAH LONAK, BAWIPAI HRIAMHREI

1Kor. 1:25-2:25

                                                                      Timothy Sui Lian Mang

Fala Gladys Alylward cu 1932 October 15 ah England suahsan in Tuluk ram ih missionary ṭuan dingin a feh. A zal sungah paisa pia khat hman a nei lo, Tuluk ram a thlen asile, na ṭul mi hmuahhmuah ka lo bawm ding tiih tiamkamtu nuih hmin lawng a nei. Gladys cu mirethei sungkua ihsi suak a si. Zirnak lam khalah malte lawng a zir, kutthiam tivek khal a nei lo, thil dang zir mi ziangkhal a nei lo. Amai hmin ih neih mi inn le leiram tivek khal zianghman a nei lo. Nuntukhawsaknak dingah mi dawr kil, mi hnenum tivek a ṭuan ṭheu men.

Pathian in Gladys Alyward cu missionary ṭuan dingih a kawh tikah, “China Inland Mission” ah Tuluk ram ih missionary va ṭuan ve dingin a dil lohli, asinan zirnak le thiamnak zianghman a neih lo ruangah an pawm lo. Zirnak sang nei lo, Bible zirnak khal nei lo, sumpai khal nei lo, missionary khalih pawm duh lo, Gladys Alylward cu Pathian thutiamkam a neih ruangah, Tuluk ram lam pan cun a pawk ko. Tuluk ram a va thlen tikah Tuluk ṭawng cu a hna ih a theihnak men in a zirngah lohli. Zumnak in hngakṭah cawmnak inn a din ih, Bible thuanthu a sim mi cu mi an lung a luh tuk ruangah hmun kip ihsin mi an ra ciamco. Tawkfang zet Pathian thutak thlaici a tuh hnu 1940 ah, Pathian lamih cangvaihnak in thlarau lam fang ah-nak amah rori in a hmu. Ni khat cu Gladys le Tuluk evangelist pa in thu an sim laiah, an khawmnak innpi cu mi an khat ih, Thlarau Thianghlim cu huham ropi zetin a rung thleng, mipi a run nuai ih, Pathian lamah lungkuai in a tum a sen in an pe aw. Pathian in khaih cathiam lo, zirnak nei lo kha a fim ruang le titheinak maksak a neih ruangah si loin, nasa zetin a hmang. Pathian Gladys cu milai lam ihsi cun santlai lo a si ko nan, Pathian in nasa zetin a hmang. A santlaih lonak ruangah Pathian in a hmang hi a si sawn. A santlaih lonak ah khan Pathian cun a huham thiltitheinak a langter thei ih, hna ropi a ṭuan thei sawn riangri.

Pathian thil tidan hi milai thil tidan thawn a bangaw lo zet. Minung cun thil ropi, thil maksak tisuaktu dingah mithiam, thluak ṭha, milian, micallang, dinhmun ṭha nei kan hril ṭheu. Pathian tidan a si riai lo. Pathian cun thil ropi le thil pipa ṭuansuaktu ding a hril tikah degree sang zetzet nei, mark ṭha zetzet ngah, College le University ih milar, Milian, thusim thei tivek a hril kher cuang lo. Pathian cun misantlai lo, zianghman ka ti thei lo, thiamnak le tithei mi ka nei lo, Bawipai cahnak le huham lawng lo cu tiih Bawipa hnenih pumhlum ih ṭhumawtu a hawl ih a hmang sawn. Cuvek minung hnen lawngah Pathian in amai thiltitheinak a langter thei.

Pathian hmuhdan cun Jesu siar lo miropi Letlun ih umsun cu Baptisma petu John kha a si. John cu zirnak sang nei a si lo, milian, milar, mi thiltithei khal a si lo. Thusimthiam khal a si lo. Cuticingin Jesu in, “Thungai thu ka lo sim, nunau hrin mi lakah baptisma petu John hnakih ropi an um lo. Asinan vancung uknak ih mitenaubik cu John hnakin a ropisawn a si,”(Mat. 11:11)tiah a ti. Milai lam ihsi zoh cun Baptisma petu John cu zianghman lo, misantlai lo a si. Curuangah a si Pathian ih a hman theinak san! Pathian cun zianghman lo mi, misantlai lo, mah le mah rinsanawk ding nei lo, amah Pathian lawng ziangkim hrangih rinsan pumhlumtu lawng a hmang a si.

Pathian in kan cah lonak a hmang (1Kor. 26-28)

Bible sungih thil fehdan fiang zet mi pakhat cu Pathian in thil santlai lo a hmang ti hi a si. Pathian in milai anmai titheinak, thiamnak, sumpai le thilti theinak hlawnhlo tahratih Pathian par lawng rori ih ṭhumaw, hngataw a hmang a si. Paul in 1Kor. 1:26 ah, “Cuvekin u le nau tla, Pathian in a lo kawh laiah khan ziangvek mi nan si ti kha cing ringring uh. Milai tahnak ih tahah cun mifim, thiltithei le zah tlak hrin khal nan tam lo,” tiah a ti. Ṭ ha ten hminsin law, Paul in Pathian in mifim, thiltithei le zah tlak hrin a hmang lo a ti lo. “Tampi” cu a hmang lo a ti a si kha. Mifim, thiltithei, mizahum pawl khal anmai titheinak hlawnhlo tahrat ih, Pathian par lawngih phumhlum ih an ṭhumawk tikah Pathian in a hmang hai a si. Pathian cun amah lawng rinsan pumhlum a duh. Isaiah 4): 29 in, “Micaupawl hnenah huham a pe ih, cahnak nei lopawl hnenah cahnak a pe,” a ti. 2Kor. 3:5 in, “Kannih cu thil ziang khal kanmah ihsin a suak tiih ruataw dingin kan tlak tiah ka ti lo. Pathian lawng hi kan haidaihnak a si sawn,” tiin a ti. Ṭ awng dangih kan sim asile, kan tlin lonak le kan famkim lonak kan hmuhawk tikah, ziang tinkimih Bawipai tlinnak le haidaihnak kan hmu a si. 2Kor. 12:9 in, “Cule Bawipa in ka hnenah, “Ka zangfahnak hi na hrangah a tawk. Ziangahtile ka cahnak cu cahlonak ah hin famkim ko tuah a si,” tiah i ti….,” tiah a ti. Hi tawkih “cahnak” ti mi hi ‘dunamies’ ti a si ih, cumi cu “dynamite” ti ṭawngfang ihsi ra a si. Apo. 1:8 ih “huham”(power) ti mi thawi bangrep cekci a si. Cun “famkim” ti mi khal kha John 19:30 ih “ṭheh” ti mi ṭawngfang thaw khan a bangrep cekci ih a sullam cu “famkim” (complete) tinak a si. Pathian huham cu kan cah lonak ah tifamkim in a um a si cu! 2Kor. 12:10 ah Paul in, “…Curuangah ka cah lo tinten ka cak ṭheu a si,” tiah a ti. Kan cah lonak hi Pathian-ih cahnak a si. Hebru cakuat ngantu in Hebru bung 11 ih a tarlang mi mihratkhawkhengpawl kha, “….cahlonak ihsin cahter an si,…,” tiah a ti.

Kan Bawipa Jesu in a ram din vivo tu dingah le a thucah va sim vivo tu ding minung 12 a hawl laiah, khaih san laiih Bible tlawngpawl le Sinakokpawl ah a feh lo. Sumdawnnak khawpi Korin le Rom khalah a hawl lo. Khaih khawpipawl kha cu a lan men sawn a si. A dungthluntu ding a hril tikah ngakaihnak tikap, lamzin kap, bazar tivek ah a feh sawn. Mi menmen umnak hmunpawl ah a feh ih, mizirsang si lo, mizahum khal si lo ngakaitupawl a hril a si. Milai dinhmun ih rinsan tlak si lo, Pathian lawng pumhlum ih rinsan le Pathian par lawngih pumhlumih ṭhumaw ding mipawl a hril a si.

Kan thiltitheinak, kan talent, kan zirnak le kan rinsan thei mipawl pauhpauh hlawnhlo tahrat ih, amah Pathian rori par lawngih kan ṭhumawk tiktik ah Pathian cahnak le huham kan hmu ding, kan tep ding. Kan cah lonak hi Pathian huham cahnak langter dingih hmanrua ṭha bik a si.

D. L. Moody kha zirnak nei lo a si; a ruangrai le a hmuihmel khal zahum lo, a aw khal mihip lo zet a si. Asinan khaih a santlaih lonak pawl khan Pathian in hmang thei lo ko a dawnkham maw? Lamlam ah, Pathian ih a hman theinak a si sawn riangri. Vawi khat cu Moody-ih hlawhtlinnak thuthup, mi a neh theinak thuthup hi ziang a si ti va zingzawi dingin mi pakhat kha Moody thusimnak ah a va feh. Cule hitin a ti, “Amah Moody ah hi tluk mihip theinak titheinak le tlinnak ka hmu hrimhrim lo,” tiin. Moody in cui ṭawngkam a theih tikah a hni ih, “ Si rori e, kei ka si lo, hi hna hi Bawipaih hna a si ih, a ṭuansuaktu khal amah a si, kei ka si lo,” tiah a ti. Moody-ih cah lonak, santlaih lonak cu Bawipai hriamhrei a si.

Cah lonak in Tangdawrnak a Ngen (1Kor.2:1-4)

Apostol Paul hi tlinnak tampi nei a si. Suahkeh Rommi sinak a nei ih, cumi cun a pawmcawmawknak ding hrangah le thil ziangkim hrangah hlawknak tampi ngah theinak a pe. Kha laiih khawpi hminthang Tarsas khawmi sinak khal a nei. Milian sungkua ihsi suak a si. Grik ṭawng, Hebru ṭawng, Aramik ṭawng a thiam thluh. Jew thuanthu zirnak tlawng sang zet, kha laiih rabbi zirhtu hminthang Gamaliel ke hramih zir a si. Tarsas University khalah Philosophy a zir ih, tulaiih Ph.D pahnih kawm tluk a si ti a si. Kut thiam khal a nei, puanthlam sak a thiam. Paul hi cathiam, milian, sinak dinhmun ṭha nei, kut thiam nei a si lawng si loin, sakhaw lamih mitaima, ṭhahnemngai zet a si. Thusim thiam, thusim mual nei le cauh nei lo ih, hnaṭuan thei a si. Milai ṭawng ih kan sim asile, Paul hin ziang tinkim a nei ṭheh ti ding a si. Cuticing cun Paul hin cupawl hmuahhmuah parah a ṭhumaw lo, a rinsan lo lawlaw.

Amah Paul in, “U le nau tla, nan hnenah Pathian thu theihter dingih ka rat tikah khan awngkam thiam zet le fimnak thawn ka ra lo.  Ziangahtile nan lakah Jesu Khrih le khenbet ih a um thu siarlo a dang zianghman thei lo dingin thutitluknak ka nei.  Nan hnenih ka um laiah khan cak lo, ih le nasazetih khur in ka um. Ka awng mi le ka phuan mipawl tla hi mihip thei minung fimnak awngkam thawn a si lo. Cu hnakin ka awngkampawl cun Thlarau le huham an langter sawn a si,” (1Kor. 2:1-4) tiah a ti. Hihi tawngdawrnak a si. Mitangdawr cun a tlin lonak, a santlaih lonak a thei ih, Pathian hnen lawngah a pumhlum in a ṭhumaw.

Paul in amai thuhla Filipi 3:5-10 ah, “Ni riatnak ih serhtan, Israel-mi, Benjamin hnam, Hebrumi diktak, Dan thu lamah Farasi ka si.hahnemngainak lamah cun kawhhran tiduhdahtu; Dan thu ih dingfelnak lamah sawihnawm ding um lo ka si.Sikhalsehla hlawknak dingih ka rak ruah mi cui thilpawl cu, Khrih ruangah sunnak ah ka ruat thlang. A si, thungaitein, ka Bawipa Khrih Jesu theih hi a hlut hleice ruangah thil hmuahhmuah hi sunnak ah ka ruat. Amah ruangah thil hmuahhmuah sunnak ka tuar ih, Khrih ka neihngah theinak dingah cupawl cu hnawmhne menah ka ruat. Cule Pathian in Khrih ah i hmuh theinak dingah Dan parih humaw mi keimai dingfelnak cu nei loin, Khrih zumnak ruangih dingfelnak, zumnak ruangih Pathian hnen ihsi dingfelnak cu ka nei sawn. Cuti cun a thihnak bangnak nei ih tuah mi si in, Khrih le a thawhsalnak huham le a tuarnakpawl awmpinakpawl tla cu ka theih theinak dingah a si,” tiin a rel. Ṭ awng dangih kan sim asile, thil dang ziang khal hi Paul hrangah zianghman lo men an si. Amai santlaih lozia, tlin lozia  thei in, Pathian parah a pumthlum in a hngataw. Mitangdawrpawl cun, “Pathian in mihngalpawl a do ih, tangdawrpawl hnenah zangfahnak a pe,”(James 4:6) ti mi hi an theithiam. Mitangdawrpawl cun anmah le mah hmuhawkdan an thiam ih, an upat deuh deuh tik khalah cak lo deuhdeuh in an theiaw sinsin. 1Kor. 15:9 ah Paul in, “..kei cu apostolpawl hmuahhmuah lakah a thupilobik ka si,” a ti. Neta lamah, “Khrih Jesu cu misualpawl run dingin leitlun ah a ra, an lakah misualbik ka si,” tiah Paul cun a phuang. Mitangdawr cun a santliah lozia a theiaw deuhdeuh. Amai zirthiamnak, a tlinnak, a titheinak hmuahhmuah hi Pathian-ih huham tel lo cun zianghman an si lo ti a theifiang. Mah le mah hmuhawknak dik kan neih lo a si ah cun, Pathian mihman kan si thei lo ding. Pathian cun amai cahnak, titheinak kha kanmah ah le kanmah hmangih langter a duh ih, kannih in kanmai cahnak le titheinak hmang tahrat ih ṭuansuah kan tum a si ah cun, Pathian cahnak khan hmunram a co lo ding ruangah Pathian in dung lamah in dirsawn riangri ding. Pathian cun amai tidan vekte ih in hruai a duh. Paul in amai thuhla, “…keimah le keimah ka cawisanawklonak dingah ka titsa ah hling pek ka si,”(2Kor.12:7) tiah a ti. Paul tangdawr, cak lo le hman theih ih a um vivo theinak dingah, Pathian in harsatnak a thlah. Paul in a cuih harsatnak cu “hling” tiah a ti. “Hling” tiih a kawh mi cu ziang bik a si ti kan thei lo. Cui “hling” a ti mi cu a naa tuk mi a si ti lawng kan thei thei. A taksa ih natnak pakhat khat a si a zumum. Paul in cuih natnak cu a taksa in kum 14 sung a rak tuar zo. Ziangah Paul cu hling pek a si pei? Ziangruangah Pathian in a cui hling cu a lahlo lo si pei? A san cu caang 7 in in sim, “…keimah le keimah ka cawisanawklonak dingah…” culole a tangdawrnak le a cah lonak a hloh ding ih, Pathian huham  a hloh pang ding.

Pathian in dam lonak, natnak, tuarnak a phunphun tla hi kan tangdawr ringring ih, amah |Pathian lawng kan rinsan theinak dingah kan parah a thlengter ṭheu. Cu lawnglawng ah amah Pathian kha kan nun ah a lang thei ding ih, kanmah paltlangin midang hrangah malsawm a luang thei ding. Jakob khal kha a minung cahnak a cem hnu lawngah malsawm a dawng ih, midang hrangah mawlsawm asi thei.

Tangdawrnak in Pathian parih ṭhumawknakah mi a hruai (1Kor. 2:1-4)

Pathian in cak lo ko in tuah theinak dingah tangdawrnak a ngen. Cak lo ih um ding kan si, cu tik lawngah ti ding dang thei loin, Pathian pakhat par lawngah kan ṭhumaw thei ding. Tuisun ih kan buaipi bik mi cu kan cah lonak si loin, kan cahnak hi a si sawn. Tui kan san ah hi cun thil ziangkim hi kan nei thluh deuh tho zuakzo. Zirnak ṭhaṭha kan zir thei, cabu ṭhaṭha siar ding kan nei. Awnmawi a phunphun kan zir thei fawn. Internet, computer tivek in duhduh zir theih a si. Thusimdan, mi va zirhdan, mi hruaidan, Pastor ṭuandan, missionary ṭuandan tivek a phunphun kan zir thei. Thil ṭul le ṭha an si ko nan, Pathian ih in hman ding zatih in hmang lo ko ih dawnkhamtu an si riangri sawn thei. Mi pakhat kha kha vek zirnak le hmanrua ṭhaṭha a neih ruangah rawngbawlnak hlawhtling dingin le thil tuah ṭul mi tuahsuak thluh thei dingih a ruahawknak hin Pathian parih ṭhumawk pumhlumnak a siatsuah ih a nun ah le a rawngbawlnak ah Pathian kutcak a lang lo ṭheu.

Mawsi hi siangpahrang sungkua ih ṭhanglian a si. Khaih san laiih zirnak sang bik a zir. Tisadan lamih dinhmun ṭha bik co a si. Mawsi in Izip mi pakhat in  Israel mi a velh le duhtawkih a sawisak a hmuh tikah, amai tisa dinhmun le tlinnak hmangin, rinsan in runsuah a tum ih, a hlawhsam. Mithat pa ah a cang men. A mualpho riangri sawn a si kha, ziangahtile Mawsi cu Israel hruaitu le runtu si dingah a cu hrih lo. Mawsi cu Israel hruaitu si dingah Pathian a timlam ta a ṭul, cutiih Mawsi timlam a si theinak dingah Izip ihsi tlansuak dingin Pathian in khua a khang. Mawsi cun cah lo nun, tangdawr nun le mirinsan pumhlum nun zirngah dingin kum 40 sung cu vek zirnak ah a lut. Mawsi cun a zirhngah riai. Pathian in Mawsi kha Israel runtu le hruaitu si dingih a kawh taktak tikah cun a tlin lonak, a santlaih lonak lawnglawng a rel thlang. Mawsi in, Suah. 3:11, “..zo so ka si ? Ziang ka sim ding? Thucah sim ding ka tlasam,” tiah a ti. “..an hnenah ziang so ka sim ding?” (Suah. 3:13), “…keimah cu kamnal mi ka si lo, awng nuamnai mi le awhak mi ka si sawn,”(Suah. 4:10). “Maw ka Bawipa, zangfahten thucah cu midang hmang in thlah mai aw,” (Suah. 4:13) tiah Mawsi in Pathian hnenah a ti. Ṭ awng dangih kan sim asile, ‘Maw Bawipa, ka ti thei lo ding, ka tling lo; hruaitu si dingih tlinnak ka nei lo, zirnak tling khal ka nei lo. Ka titheinak ih leng lam thil a si, midang fial aw,” tiin Mawsi in Pathian-ih fial mi cu a elnak tinak a si. Amai santlaih lonak, tlin lonak pawl Mawsi in a hmuhawk fiang kha Pathian mit ah cun a tlinnak a si. Mawsi in tawngdawr hi ziang a si, cah lo hi ziang a si ti le, Pathian parih ṭhumawk pumhlum ti hi ziang a si ti a zirngah riai. A cah lonak cu Pathian hriamhrei ah a cang ta.

Pathian in Israel mipawl runsuak dingih Gideon a kawh tikah, Gideon in, “Cutin anih in a hnenah, “Maw ka Bawipa, ziangtin Israel cu ka run thei ding? Zoh hnik, ka hrin cu Manasseh sungih a cak lo bik a si, cule keimah cu ka pai inn ah a tenau bik ka si fawn,” tiah a ti (Laireltu 6:15). Pathian in nehnak cu nangmai ta a si ding tiih Gideon tha a pek hnuah, Pathian in Gideon kha hniksaknak ah a hruai lala. Israel ralkappawl kha 32000 an si ih, an ral Midian ralkappawl cu 135000 an si. Pathian in Isreal ralkap 22000 pawl cu a kirtersal hai ih, 10000 lawng an tang. Pathian in Israel ralkappawl hi an tam tuk lai hrih a ti ih, 9700 pawl a tlungkirter sal lala. Midian ralkap 135000 do dingah, Israel ralkap 300 lawng an tang thlang. Israel ralkap pakhat le Midian ralkap 450 an doaw ding tinak a si. Pathian mithmuh ah Israel ralkappawl cu an cak tuk thotho. Hi hnakih cak lo deuh ko a timlam hai hrih. Cui Israel ralkap 300 te cu hriamhrei ṭha: thal, fei, ralnam, awmphaw tivek pe hai loin, santlai lo zet leibel le meifar le tawtawrawt a pe hai. Raldo dingih cuvek hriamhrei cu thinphan a va um zik em. An hriamhrei rinsan a tlak lo, kanmah lamah rinsan ding zianghman kan nei lo ti rori Pathian in an theihawk ding a duh. Cutik lawngah Pathian thiltitheinak cu khawruahharza in a rung lang ih, Israel-pawl in nehnak an co a si kha.

Pathian ih hna a ṭuandan cu cutin a si. Gidon-ih santlaih lonak le a ralkap malte tekti kha nehnak hrangih Pathian hriamhrei a si. Pathian in Gideon kha tisadan ih a rinsan ding mi hmuahhmuah kha a hlihsak ṭheh, cutin hril ding nei loin Pathian pakhat lawng rinsan ding a nei thlang. Pathian in misantlai lo, micak lo a hmang. Cah lonak in tangdawrnak a ngen ih, tangdawrnak in Pathian par lawngih ṭhumawknak ah mi a hruai. Pathian in in khuai, in hlit, cem ko in tuah tikah, rinsan ding, ṭhumawknak ding dang kan nei nawn lo ih, amah par lawngah kan ṭhumaw thlang hi a si. Cutiih amah par lawngih kan ṭhumawk tikah, a huham, a thiltitheinak a langter.

Ṭ humawknak in Pathian huham-thiltitheinak a langter (1Kor. 1:27-28)

Ziangtizawngin mifimpawl ningzakter dingah Pathian in leitlun ih thil aapawl a hril ih, micakpawl ningzakter dingah Pathian in leitlun ih thil caklopawl a hril? Ziangtizawngin Pathian in thil um mipawl zianghmanlo ih an can theinak dingah, leitlun ih thil pawimawh lopawl, nautat mi thilpawl le thil um lopawl a hril?( 1Kor. 1:27-28). Bible in miaa, mi cak lo, misantlai lo, ziang siar lo mipawl cun Pathian lawng an rinsan, Pathian par lawngah an ṭhumaw, cutikah Pathian cu anmah paltlang ih a huham-thiltitheinak langter ding cu a lunghmui zawng a si.

Pathian in mi cak lo, misantlai lopawl a hmang. Cah lonak in tangdawrnak a ngen. Tangdawrnak in ṭhumawknak ah mi a hruai ih, ṭhumawknak in Pathian huham-thiltitheinak a langter. Kan cah lonak hi Pathian hriamhrei a si.

(Hminsin: Evangelist Michael Redick Sermon ta laksin mi a si)

(Visited 45 times, 1 visits today)

Comments

comments

Comments

%d bloggers like this: