Kan Bible Kilhim A Tul!!!

KAN BIBLE KILHIM A TUL !!!
By: Hniangsinpa

Kannih Laimi hi a hleice in sakhaw mi zet kan si. Kan Pathian thu thianghlim Bible khal tawk fang cu kan thei cio ko. Sakhaw dang vun ruah cun a hleice in kannih Laimi pawl hi kan sakhaw sinak thei hngettu kan si khal zum a um. Cui kan sakhuanak cun kan hnam nun khalah tam zet in thu a nei ban khal in ka thei. Cu tiih kan rellai ah, ‘thil tha/thlum zet khal, sebik/ kha bik ah a suak thei’ ti cu kan cin ken tha in ka thei. Curuangah kan cin dingih tha cu, ‘Kan Bible khal hi a sinak ngai kan hlo ter pang ding’ ti hi a si.

Khuahlan ih kan rak ruah dah lem lo, Bible leh cu tui san ahcun, a man man in kan let (Translate) tum a bang. ‘Mirang tong ka thiam’ ti ruangih let simaw, lole Dollar duh ruangih let si maw khal a um theih men ding. Kan Bible sungih thu um pawl hi, cabu dang vek ih ngan menmen a si lo ih, kum rei zet sung, tong dang le ram dangdang ihsin an rak ngan mi an siih, a ngantu pawl khal ih, ralring cianak um lawn, Thiang thlarau hruainak hmangih ngan a siih, cumi hnu kum reizet an lakkhawm hnu ih Bible nei thei fang kan si.

Curuang ah, Bible rori hi cu, Pathian thunung le Pathian thaw thawt mi a si ruangah, a man rem cangcang ih rak leh (Translate) ding thil a si lo. Mirang pawl in Bible letmi (Version) phun tampi an neiih, kannih Laimi in kan nei mal tuk ti men ih rak tawngpaw ngam ding thil khal a si bik lo. Mirang pawl ih calai an rak neih tikcu le kannih ih kan neih tikcu khal a thlauaw tuk. Mirang pawl cu hnam fim hmaisa le thil rak zir kau hmaisa an sinak khal kan theihsak a tul.

Bible an rak ngannak tong khal, Hebrew, Greek le Arabic an siih, cumi tong fang pawl hmuahhmuah khal miring pawl cun an rak zir hmaisa ti khal kan theihthiam a tha. Curuangah, anmah pawl thawn tahthimawk rual kan silo ti khal hi theihfiang hmaisak tha zet mi a si fawn. Cumi lawng hman silo, an Bible rak neih tikcu le kannih neih tikcu khal kan ruah hmaisak a tul. Hnam fim hmaisa an sinak lawng hman si lo, a minung hrimhrim khal an tam vun ruah cun, an nei mal lam ti theih sawn khi a bang.

Miring pawl khalin, a man man in an let ce lo. Curuangah, mirang pawl thu cawng ih, Bible let mi (Version) phunphun neih a tha tiih rak ruattu kan um ahcun, kan thuruahnak nasa sawn ih kan thleng sal tulin ka thei. Cun, Bible let mi khal a bangaw thei cio lo. Laipa ih Bawkbawn le mirang, Hebrew, Greek pawl ih Bawkbawn cu a bangaw thei men dingih, Bawkbawn tiih vun leh a theih ko nan, hmansehla mirang pawl hi ‘Friend’ an timi le kannih ih ‘rualpi’ kan timi sullam cun a thuk sawn zia kan theihthiam ka zum.

Hebrew le Greek le mirang tong khal a bangaw lo zet ih, a hrekkhat ahcun sau deuh ih simfiang tul mi a tam zet ding. Greek cun, ‘thu’ ti cu, ‘logos’ an tiih, mirang cun, ‘word’ an ti. Hmansehla Greek ih ‘logo’ sullam cu fimnak lam (Philosophy) a khih hmuh ih, a thuk dan a bangaw lo zet.

Tong hi hnam le nunphung thawn a pehtlaih ruangah, kan umnak le kan hnam nunphung ihzir in, kan tong duhsan khal a bangaw thei lo ding. Khaw khat le khaw khat tong le raw lei mi hman a bangaw lo a si ahcun, thuk le kau sawn ih kan ruahnak hman a tul ding. Hebrew le Greek tong zir riai silo ih, Bible kan let pang a si sual ahcun, mah le mah zoh fiangawk a tul ti kan theihthiam a tul zet ding.

Kan Lai Bible ih fiang lo deuh a va si hmanah, mirang Bible ah simaw fiang sawn a um ko ding nan, cumi ruangih kan Lai Bible a sual lellel tiih rel cu a tha bik lo ding. Hebrew le Greek tong fang hman mi cu, mirang pawl in an tongih fiang sawn a si ahcun an tong in an ret thei ih, Mirang tong khal ih fiang ciah lo a si ahcun, kan Lai tong khal in a rak fiang sawn men thei ti khal kan theihthiam ih, ‘Hi Bible thu cu a sual lellel’ ti kan relnak in khamtu ih hmangthiamtu kan si khal duh a um zet.

Kohhran ti bul neiin si maw, lole mai sumpai hmuhnak simaw hrangih fiak tuk ih let cu um hrih lo hmankhalsehla, hmailam can a hung rei cun, Satan khal tleu tirhkoh vek a hung cang ding tiih Timothy cakuat sung kan hmuh bang khan a um thei ruangah, ralrin cia cu kan ti ding hrimhrim si khin ka thei. Kan kohhran bik hrang simaw, lole kan thu pom mi thawn remaw zawng ih leh duhnak thinlung kan neih sual pang ahcun, ka ruahnak kan thleng lohli a tul ti theitu kan si khal a cu in ka thei.

Tui kan Bible neihmi ah, cumi kha mi cu a tha hman ding, ti ka rel duhnak lam a si lo ih, mai duh zawng le man dan zawng simaw, lole ram leng lam paisa duh ruang simaw, hmin duh ruang ah simaw ih let ciamco hi thilthabik a si thei lo ka ti duhnak sawn a si.

Tui kan san ahcun, Bible Society an um ih, cu pawl cun thangthar nonawn hrang ih theihthiam ol sawn ih ret an duh can a hung her suak leh ko ding ti hngak tu kan si thiam khal a tul. Pawlkom simaw, kohhran hrang bik ih let kan si le phei ahcun, kan Pathian thu a si lo zawng ih ret sual khal a ol ding ti thei ih, kan ralrin a tha zet ding.

Kan let ding a si ceng ahcun, Pathan hnenah, rawl ul thlacamnak thawn, nun aapaw in, tong dang a tlun ih kan simmi pawl khal zir fiang tahrat ih kan tuah a tul. Cumi silo ih, mi let cia mi, mallai a cafang simaw, a thu si maw vun rem deuh ih, ka let kan ti ahcun, dunglam ihsin in hnihsan tu an tam zet ding ti kan theihthiam ka duh zet.

Curuangah, kannih Laimi khal hi Bible lehlin thuhla ah, kan ralrin ih, mipi khal kan harh thok a tha zet ding. Kan Bible zahumnak pawl hmuahhmuah khal kilhim cio tu kan si a pawimawh ih, Bible a let thei tiih mi va uar ciamco khal hi kan ti lo a tha zet ding. Bible sungthu simfiangnak khalah, kum reizet Bible rak zir hmaisatu pawl ih sim fiangnak kan ngai thupit sak khal a tul. Mai kohhran kilhim duhnak ruangih Bible mallai vun her rem hmang pawl khal kan hrial vivo a tul in ka thei fawn.

Ziang a va si khallen, kan Bible, kan Kristian nun in kaihruaitu hi, kan tihzah thiam ih, a hmandanah kan ralrin vivo thei duhsannak thawn ngan ka si ti in theihthiam sak ruang khalah, ca siartu parah ka lung a awi a si.

Comments

comments

3 Comments

  1. Timothy Thiante says:

    Hniangsin Pa,

    Na ngan tha nasa! Ka lungawi.

  2. Hniang Sin Pa..

    A thatuk aw… Pa Pathian in ruahnak tha lo pek vivo seh..

Comments

%d bloggers like this: