Kachin Lengdawh In Miss Golden Land Myanmar 2015 Final Ah Pathian Hmin Thangțhat

11012564_845055348915804_6816151939163513446_n

Ramdang dang ah Kawlram ai-awh ih Lengdawh zuamawknak teltu ding hrilnak Miss Golden Land Myanmar cun veikhat hrilah Lengdawh 5 a hril ih cuih lengdawh 5 lahka Kachin ramkulh Myitkyina ihsi a ra zuamtu lengdawh 3 hriltlin an si. Himi zuamawknak ah Yangon khawpi telin ramțhen dangdang, ramkulh dangdang ihsin sankhațin mi 31 pawl an zuamaw.

Miss Golden Land Myanmar 2015 zuamawknak tel dingih diltu mi 700 leng an umih mi 31 pawl cu hmel, ruangrai, thinlung ruahnak le theihkauhnak lamih mi cuangcuang tiin hril an si. Thlakhat le hrek zirnak neih hnu ah mi 20 hril betin mi 16, mi 10 tiin hril vivo an si. Kawlram ih Miss zuamawknak kulhsung ah Taiyintu Kachin lengdawh in cawilu an ngah tambiknak a si vekin Kachin miphun hrang hmai a hngal zet thu Facebook pawlah an ngan celcel.

Himi Miss Goden Land Myanmar 2015 ih final lengdawh 5 hrilnak cu June 21 zan, Yangon Mindamah lamzin parih um MCC Hall ah tuah a si ih, ramsung ramleng ih thiamzung sang mi 21 pawlin an zohdik.

Lengdawh 5 an hriltlinmi le an zuam dingmi pawl tla cu; Miss Tourism Myanmar 2015 ah, tai number – 31 Nan Sai M, Miss Face of Beauty Myanmar 2015 ah tai number – 29 Cho Sit Han, Miss Intercontinental Myanmar 2015 ah tai number – 12 W May Shin Sein, Miss Earth Myanmar 2015 ah tai number -23 Eaint Myat Chey, Miss Supranational Myanmar 2015 ah tai number -1 L Bauh Nu ti pawl an si.

“A thok rori in kei cu himi rori ka ngah duh ruangah facebook ih rualpi pawl hnen khalah pheh lo’n ka sim. Rualpi pawl khalin himi thawn na mil in ti. A ngaingai ah ka rak ngah cu ka lungawi tuk rori. Pathian hnenah ka lungawi tuk” tiin Miss Supranational Myanmar Kachin lengdawh L Bauh Nu cun a sim. Miss Tourism Myanmar a ngahtu Kachin lengdawh thotho Nan Sai M cun Kawlram ih Eco Tourisim khaisan ding a tumtah ih nauhak pawl bawm in miharsa bomnak hna țuan ding a duh thu a sim.

Tulai san ahcun Miss a lar nasa ih Miss pakhat hrangah Boby, Beauty, Brain timi a thupitbik thu Camera man Ko Aung in a sim. Ramdang dang ih Miss zuamawknak hrangah crown kan pekmi hi zuknung lemcang hnațuan hrang a si loih Lengdawh pakhat cio in țuanvo phurin rampi ai an va awh thei ding kan duhmi a si tiin Ko Wai Yan Aung in a sim. A hkamah lengdawh pakhat ih țuanvo thei loih hminthan duh ruangah a ra zuamtu tampi an um thu khal a sim tel.

A netabik zuamawknak an luh hlan ihsi an zumciami minung lawnglawng in lengdawh cawilu an ngah tikah hlankhanh in cazin a pauh si ding tiih ruattu tampi an um.

Miss Golden Land Myanmar Organization pawlin zuamawknak pakhat sungah Ramdang dang ah Kawlram ai-awh ih lengdawh va zuamtu ding mi 5 a hrilnak hi kum 2014 in an rak thok. Tuikum hi a veihnihnak a si.

Hrm – Kamayut Media, 7Day Daily

(Visited 261 times, 4 visits today)

Comments

comments

Comments

%d bloggers like this: