Ka Thlawh Ding Mi

KA THLAWH DING MI

By: J Pek

Zanriah ei dingih tapphur ih ka her rero lai ah  ka hmuansak tei zaute ihsin khawk ruahro in tlangau pa in lo pawm ding thu a au. Khawtaw lam in an theih ngah lo pangah tiin khawtaw lam ih a suh zawng ah tuizan cu kha na rat lohli lole na lo kel ka lei ding so khaw tiah in au pha. Zanriah ei phah cun kan lo ram pawl mithlam ah an hawng lam cupco. Zanriah ka khawh fel hnu cun tlangsuahnak ding lam cu pan pheive ka tum. Hmuan thlangpa ka vawn auh ih an nu in apok zo tiah in rak ti. Ava tuanve ti phah cun hmuansak pa ka hawn auh ih an nu in tute kha a suak nan so khaw, zosi ka hei sawm phah ding a tivek a ti. Mahteh phun hmurhmo phahphah cun ka feh phei. Lo pawm zan hi a thupit ruangah kan va thlen cun an rak thleng tam nawn thlang. Kan thawk hlan ahcun kan mah leh duh daan kan sim celcel. Tlangsuak hruaitu a hawng ding ih thu umdaan leh kan lo pawm daan ding pawl simfiangnak a nei hmaisa. Ahmaisa bikah lo luruh neih kan duh maw duh lo kut thlirnak kan nei ta pei tiah a ti.

Ading thei hmuahhmuah cun ding ttheh kan tum cih. Tthenkhat an hawng ding ih Lo luruh ti cu tuihlan pipu pawl ti daan a si ko., hmanseh kan pupa pawl cu inn lu dawng tla an rak mal, cuihlei ah ram tla an rak khawp. Tu kan nih ahcun lo luruh nei lo pawl hrangah ttuan ding nei lo vek kan cang ih lo luruh um nawn lo sehla ti ah an ti. Pathian hnih khat an hawng ding ih kan pupa pawl hin fang  rori an rak cing ih kumkhat an ttuan suahmi le an ni hlawh zo sehla a mil aw lo tuk. Cuiruangah zo khali`n a lo cu hmuan ah si maw kum rei daih ding ih thlairah a phun le hmuan ah ring cih thei sehla kan khawtlang khal hmai kan sawn deuh ding ti ah an ti. Hi khua cu ka khua a si ti pawl an hawng  ding ih ka pi le pu, nu le pa tlanlennak lei ram ka co ngah lo asi ahcun si tawk kan si mai ke ti ah an ti ve.  Tlangsuak hruaitu a hawng dingih ziang khal le kut thliri`n a duhtu tamnak lam kan thlun ke ti ah a ti. Kut kan vawn thlir ih lo luruh neih a duh lam in pakhat in kan neh. Hmanseh zo khal mai lo cu hmuan ih tuah duhtu hrangah tuah theih a si ti ah kan rel cat. Kan ttheh cun phun hmurhmo phahphah cun kan tlung hai.

Thaizing cun ka lo ri zo fiang ding cun lo lam ka panve. Lo sung ka hawnhal kual cu ka lung a leng zet. Lo vat ding cun kan hriamhrei kan timlam aw zul. Kei khal ka namtawng le hreitlung cu ka duh thu an zam lo ruangah a thar ser ter dingin soser nak hmun lam cu ka pan. Ka va thlen cun pa li nga lai an rak thleng zo. Titi thu nuam rel cun kan phul culci. Kan hriamhrei kan tuai daan khal a dang aw ruri. Bua no nei in a tuai rumtuk lem lo, thing cang hmun nei in cang zikzik, ngaw sawi ding nei pawl khali`n an sa duh thah in an tuahter ve. Ram ngaw sawi ding nei pawl cu rual leh pi thawn tlak aw ding in an saw rero. Vah taw thawk ding cun lo lam cu ka panve. Lo sung ka vawn hal kual phah ih ka pi leh pu kut hnu pawl hmuh ding an rak um phahphah thawn kei mah te cun ka phur zet. Ni kum lam kan rak pam zul thawn zo cio khal ttanlak kan tum na sa. Pam ih a harzia kan tep hnu cun ttanlak a ttul zia leh patthat a nawm zia kan thei. Nitin ka vawn bung ngurngo cun thing khali`n in tuar ce lo, ka ttheh ding ni ka bi khiah thei rero thlang. Ka lo hnen pawl mahte ih vat na, rual leh pi thawn tlak aw na  vah lak ahcun kan thawm bengbeng. Thu phunphun ruat phah ih thing ka hau rero lai ah thingtuai in irak kham hnuaihno rero ruangah nam tawng cun ka  vawn sat, a sunglam a rak can deuh ruangah ka nam tawng cu rin lo pi in a bal. Hreitlung thaw cun  ka thei daandaan cun ka vat hnuaihno nan a sawt duh lo zet. Tlaini nem ah in lam pan in ka tlung, lamzin ahcun ka lolu pa a rak to khuaukhi. Nangteh na vatuan ve ka ti ih. Thingcang ka ceh ngah ih ka hreithlung a bal si lawm maw le tiah iti. Nam hmannak dingih hreitlung hman leh hrei hmannak dingih nam hman cu hriamhrei in rei a daih thei ttheu lo. Thinlung ten ni ka bi khiah vek cun ka ttheh thei leh zik lo a si hi ti phahphah cun khua sung ka hawng lut.

(Visited 101 times, 1 visits today)

Comments

comments

2 Comments

  1. Salai Lung Leng says:

    Lung na ti leng vungvo si mawle
    Lai lam nunte kha!!!!!
    Na ti tha thei nasa
    Ngan vivo aw

    Nan,
    na theih hngilh lo dingih ka duh cu
    na ca ngan ciami kha vawi 3 / 4 lai siar hnu lawngah thlak awla a siar a nuam sinsin ko ding

  2. Adik rori si, ar khokhu on khal a hmanhmawh tuknak ah sava in a la pang ttheu.

Comments

%d bloggers like this: