Ka Sangka Ihsin – Salai J Pek

KA SANGKA IHSIN

Salai  J Pek

Lai arcang khung cun zing thawh cu zo ti ih in sim ruangro cun paih lo cingten ka puan sung ihsin thawhtum in ka nawp aw. Hmanseh kan inn phihnak phar ong ihsin zilthli dai lut ih irak sem cun lungfim zet cing cun puan luh khuh in ka it sal. Sun lam ih ka ttuan ding pawl ruatin ka thinlung cu avak tawi rero. Ka it sal ruangah sun lam ih ka ttuan ding ka tlai phah thei ti ka theih awk leh veten puan sung ihsin cun nawp aw nawn lemlo cun ka tho vukvi. Ka hawng thawh cun zing ni suak ding cun kan tual hi a rak thawk zo hi a rak si. Hmuansak pa le hmuanthlang pa cun sun lam ih hnattuannak ih an hmang ding hriamhrei an rak tat awn hrut hro cu ka thei. Kei hi mizan lam ka ih a rak thaw deuh a si maw ti aw phah cun ka hmuancar lam sangka te cu ka vawn ong. Ka inn hi kan khua lu lam deuh ih um a siruangah khawtaw lam ih um pawl cu an lang fiang zet.

Tihmun sangka pi ka vawn on cun ni khal a suak cih ve. Thawh pek ahcun ni suak pek cu duh aiih a hlum lo deuh ruangah paih lo cingte cun hmaiphiah ding in ti kuang lam cu ka pan. Hmaiphiah ding ih tidai ka vawn suah cun ka zumhnak ai hman in a rak dai. Tino keng phah cun khawtaw lam pawl cu ka cuan rero. Zing zilthli le a dai tuk fawn. Ka hmai ka vawn phiah cun ka lung khal a fim sutsi deuh. Hmaiphiah ttheh ih ka hawng din cun tak hruknak thawn ka hmai ka hru. Hmuanthlang pa cun a nufa pawl sun lam ih an ttuan ding a ruah rero cu ka vun thei. Zing ni suak cun mero ih a tuammi tlang pawl a sun kian cun tlunzuang vate pawl cun lungawinak zai hlamawi an rem celcel. Zing rawl suang ding cun inn sung lam ah ka lut sal. Mei muah ding ih thinghniar hawk rero phah cun caiceh thawn ka thingthu duahmi a vam leh vam lo ka thai phurhpho. Hmanseh zan lam ih vutcam thawn ka khuh tthat lo ruangah le thing cang ttha deuh ka duah lo ruangah meimuahnak ding tlak meivam a rak um lo. Thinghniar ka hawh thluh cun meittek kan neih lo ruangah meittek sang ding cun ka hmuansak tei in lam ka pan so.

Hmunsak te`i inn sung lut ding cun an sangka ka vawn king. In tekpa cun tihang hrawp phah cun rawng lut aw ti ah in rak sawn. Sangka ka vawn on cun inntek nu hin an pai lam caw ding hi a rak fun rero. Nauhak pawl khal upa sawn in tlawng kan tlai pang ding hman hmawh uh ti phah rero cun an angki an tleng rero hi a rak si. Inntek pa cun tuisun teh ziang si maw na ttuan thei tum ti ah in rak sut. Thiam aw lo zet cing cun cul hmun lam ah ka vawng bai thla pei maw ti phah in an mei cu ka cawng kurhko rero. Inntek nu cun rawl na suan hrih lo le rawl kan ngah so khaw suang duh rero lawn hi tawk ta hi keng thla men aw la in ti. Buh cu mizan lam ah ka suangtam deuh ih a tthing  rin ding ka nei ka ti. Hmanseh na bai suan mi cu ka lo suahsak men ngai ke nan khawp thlang a bang ti phah cun khengkum cu ka la. Bai rim cun rilrawn a zual ter zet, lungawi thu sim phah cun meitthek leh bai khengkum ih keng phah cun ka inn lam cu ka pan thlah sal.

Buhtthing ti hlumnak talah tiin mei cu ka muah thotho. Mei a hawng ttua ngah cun Buhbel cu ka vun dawh. Zan lam ih a siin ka sin tthat lo ruangah zinghnam ke neh cu ka buh parah an ttial cengceng. Ka inn le duhvek ih a tthat lo ruangah zinghnam pawl an duhduh in an lut an suak fawn. Phun phahphah cun  buhtting ka hlawn hnu ah rawn ti cu ka toh sal. Buh ka suan rero lai ah hmuaksa pa hna ttuan ding ih a feh awn au cu ka hawn thei. Ka buh a hmin fel cun rawl cu ka vawn ei ve. Hmunsak nu ih bai suan cu ka vawn hrawp cun ka zumhnak hman in a rak thaw. Bai ti nafam cu a phunphun a rawi celcel. Anhnah lawng suan cu zingzan ka ei ruangah a si pei maw ka a thaw cuang. Thlaihnah, thlairah lawng a si ka zum lo, ziang an rawi a si pei ti phah cun voihnih voithuam ka hrawp nawn leuhleuh. An mahte cio ih ka suan tikah hi vekin a thawh lemlo nan ka ti rero. Atthen cu an mah lawng ih ei theih lo khal an rawi ko ding tiah ka ruat. Ni dang ai khali`n ka pumpuar daan a hman. Rawl kawp fel cun hnattuan ding cun ka tim ka tuah.

Bawmrang phur phah cun cul lam pan cun ka suk thla sulso. Kan ram le duh ai ih a tthat lo ruangah a si pei maw, cul aiin ram thar thlawh cu vengnu vengpa pawl an phur sawn ruangah cultuah bet paih khal an um lo. Cul hmun ka vawng tlen cun awn au theih ding a um lo. Ka bawmphurh cu lei ah ka vawn tthum. Thlairawl umsun pawl cu ka zul rero. Nikum lam ah a khua ih hihmun kan thlawh lai ahcun kan nuam aw cel nan si khaw ti phahphah cun ka tawi vak rero. Phurh khawp ka ngah cun khua lam pan cun ka tlung sal. Phianghnam cu hrawngah inn ka hung thleng. Zan lam ramtoi ding cun ka meithal cu hmuan sak ni sa ahcun ka va tung. Ka bang a rehhnu cun sun rawl mal lai ka vun bar. Zinglam ka ei ningnawi cu ka vawn hawl sal. Zing ih ka ei hlei bai hrawp phahpah cun ka suanve lo ihnak cun ti phahpha in a cemcih. Ka khawh fel cun ramtoi ding cun khualu tlang lam ah ka liamso muarmo. Sa umnak ding ih ka zumnak pawl cu khawlu tlang cun ka cuan rero. Ka thinlung ka bawh cat thei lo ruangah tlang khat hnu tlang khat ka tawi vak vivo. Zan khua a rawng sau cun tilhum in ka tlung sal.

Rawl tthing rin ding ka neih nawn lo ruangah rawl ti toh phah cun bai suang dingah sunlam ih ka phurh tak pawl cu ka then fai rero. Thlaihnah, thlairah ka thlah kawm hnu  ah cite, sada phut, cing al, hnak phek le hmehhan (chohmuk) tvk.. ka vawn thlak. A hawngsokhawm taktak cun a rim a suak hluahhlo. An mah leh thawtnak pawlh khawm rimra cun ka rilrawn a nat ter sinsin. Khawpi restaurant pawl ih an suan khal hi ziang si dang ce ti ah ka tlawk rero. Pumpuarnawn cun  ka it. Ka ram toihnak pawl ka ruat rero ih sa umnak ding ih ka zumnak ah sa an umlo ruangah vang hlan ih zing ram vak ding cun ka thinlung ka tthen cat. Vang ar khuan hlan ihsin zing ram vak ding cun ka tim ka tuah. Sa umnak dingih ka zumnak lam cu ka vawn pan. Thawmvang theih mi ka neih ruangah ka thawm khal ka dim nawn. Ka cilvawlh khal hi ka duh aiin a ring tuk. Sa khi tuaite zinsak ihsin nuamnai tete ih ka hmai a rawn tan zawng ah ka hei kah. Ka ngah leh ngah lo ka hliah hnuah a hliam dawi ding cun ka tim lam aw. A nat lo deuh ruangah maw si ding ka dawi man lo nan a thih suak cu a um vivo. Ril a rawn deuh ruangah sun lam ih dawi sunzawm dingah ka thlun san.

Khua ka va luh cun lo feh netta pawl kawtsuah an rak liam muarmo hai. Ka sa hliamdawi ka duh ruangah a sun cu ka lo thar lam ah khal ka feh man leh lo. Ka thlai rawl pawl le thlawh an cut lai fang an si fawn. Cu ticun nikhat cu a liam cih sal. Kum a hawng veih cun thlai rawl pawl seng a hawng cu. Thil dang ka buaipi tam deuh ruangah ka lo rawl pawl khal ka thar ding zati`n ka thar lo ding ka ti awk rero lai ah. Ka lo sir nu cun na thlawhlo lak ih rawl pawl khal khi lak aw la, a lak theihtheih an um ding an ui um tuk so khaw tiah in auh rero. Bawmpi phurphah cun thlawh lo lak ih rawl a lang pawl cu favah thawn ka zul vivo. Thlai rawl ka vawn seng thluh cu pursum ka rak ttul ding hi a rak si. Zan khat cu hmuan thlangte in innleng an nei, an titi cu ka itkhun par ihsi cun ka vawn ngai khuaukhi inntek nu cun kan hmuan sak pa khal a ti pawi tuk a rawl thar ding an tthat tthat thawn thil dang a buaipi ruangah a pam phah fawn a ti rero. Cucun ka harh vukvi, hmanseh kum a rak veih zo fawn, hmai kum hngak ding lawng a rak tang. Pasia kumtiam reh lo an ti cu ka rak si.

(Visited 72 times, 1 visits today)

Comments

comments

One Comment

  1. Chinland Rose says:

    Hi ca cu siar tam le sullam a nei sinsin in ka thei!!

    Hmuansak le hmuanthlang pawlih rawl a daw (kan Chinmipawlih hmuansak le hmuanthlang cu???)

    Bai suan ti mi cu hanghnah hangrah pawl rawi khawm mi.. cuvek rawi khawm ih suan cun tihang thaw zet a suak. (lungrualnak tivek a sawh duh mi si pei maw??)
    Innhnen tei bai suandan ka zir ve ding a ti bet hrih//

    “Ka thlai rawl pawl le thlawh an cut lai fang an si fawn” a ti mi hi teh.. tui kan Ram dinhmun a sawh duh mi maw si ding?

    “a rawl thar ding an tthat tthat thawn thil dang a buaipi ruangah a pam phah” !!!
    “Thil dang buaipi” a ti mi hi….?….?….?

    Hmmm.. siar tam le a thuk sinsin!!!

Comments

%d bloggers like this: