KA RIM HMUINAK HMUN

KA RIM HMUINAK HMUN

By: J Pek

Leitlun nun zoh tikah thil ziangkim hin caan leh tikcu an rak nei. Nunnak a neitu hmuahmuah tlanlen daan kan zoh tikah vanglai, that lai caan an rak nei a si. Hmanseh vanglai ciocio ah kan thil ti thei daan le kan rim a hmuinak hmun leh ram cu a bang aw cio lo. Zan rimhmui par cun khua a mawt leh veten a rim suah dingah a tangtunto silo in a caan a kim cun zoih fial leh sim tul loten a rim a suah. Arim in hnar mi abarh ngah cun thimlak khal ah kan hawl ciam co, hmanseh sun ahcun pangpar a sinak langlem loin thinghnah phun khat vekmen a si.  Tidai hnuai ih a tlangleng rero rannung pawl khal ti sung ahcun an cahnak thazang suah in dawiman lo leh tihnung za an si. Hmanseh tidai um lonak hmun lei caar ahcun tuah theimi an nei leh fawn lo. Van sang ih zuang rero muvanlai khal khin tidai sungah cun tuah theimi a nei mal zet. Asinan tlun van ih a um lai ahcun vate phunkim leh rul pawl khalin a mah tih in an relh rero fawn. Kiosa (Lion) khal hin thing par ahcun a cahnak thazang suah tum rero hmanseh a duhvek cun a suah thei lo. Ziang ruangah tile a umnak ding hmun leh ram a si lo…..

Leilungpi cun nikhat hnu nikhat kan nunnak a liampi bangin milai khal hin theihmi (experience) hmuhmi kan nei tam sinsin. Kum a hung tam cun ka vanglai ahcun tiin thunuam relnak ah kan simve theu. Mitampi cun kan ziangkim ah kel kan awh lai hmang kan ti ruangah kan tlawkciar sal theu. Khawte ih tualto pa cu an khua leh tlang ah hruaitu a rak si thei men, hmanseh hmunpi le ram cangkang a thlen tikah amah le mah a ruah awk vekin mithmai a co lo tikah a vuihram sal theu. Pawlkom pakhat ih mi tangkai leh rinsan tlak zetmi mah leh mah khal zum awknak rak nei zetmi, a umnak pawlkom ih simthat leh cawisannak ngah ringringtu cun thinthi zet ih a tuannak ih a pumpek awk a tha a si. Ziangah tile hmun dangah cuvek cu a ngah nawn lo tla a si thei. Asilole amah vek tampi an rak um tla asi thei a si. Kan hlawtlinnak hnatuan ihsin a sangsawn dum ih hmun dang kan cer tikah kan hlawhsam sal theu. Ziangruangah tile hlawhman tha zet hmansehla kan thiam theimi a si lo ahcun sir awknak tamter tu men an si. Hlasak thiam zet pawl cun hla an sak lai ah mipi khaisan leh zohsannak an ngah thei zet. Hla an hun sak tikah hmul thi khal a ding surso thei. Hmanseh hlasak thimtu cun bawhlung lektu pawl an hlawh a tha in thlirtu mipi an nei tam sawn kei khal bawhlung ka sit ding ti bang sehla,  laiking puanpi tahtum vek ah a suak men ding. Cu aicun a rim hmuinak hmun ih thinthi zet ih a um kha a hrangah a tha sawn a si.

Hlawhsamnak leh beidawngnak kan ti pawl hi khawitawk in so an hung suah theu. Laimi pawl hin ziang ruangah rinsan tlak ih thiam ngaingai mi kan neih lo, kan farah zonzai ruangah maw asilole lamzin khihhmuh awtu kan neih lo ruangah. Leitlun thu leh nuntu khawsaknak rel tikah sungrual bawng cu kan sim thei ko nan rinsan tlak ngaingai cu kan mal tuk lai deuh a si. Thiam silo thiam vekih um , thei silo thei vekih um, hmu silo hmu vek ih sim, sim leh zirh cu tlawmlak ih ruat ih mahte thiam ngaingai mi nei lo kan tamtuk lai a si. Hminthatnak leh hlawhman duh ruang ih kan thiam lomi hnatuan kan tuan tikah hlawhtlinnak hi ngah a har thei zet. Simsiatnak kan tawn tikah kan tuar thei leh fawn lo. Thil pakhat khat kan tuah dingah kan thluak thawn a taw alu kan hliak thlaihnu ah kan zirmi thiamnak in a bawm sal theu. Cuiruangah nauhak te kan si lai ihsin kan khawruahnak leh theihmi pawl tathriam ding hi nu leh pa ih tuanvo pakhat  a si. Tlawng a kai leh ding ko timen ding a si lo.

Kan rimhmuinak hmun leh ram kan thei a sile kan tuannak kip ah thinthi ko in kan tuan thei ding a si. Kan thei fiang lo a sile mi sim leh relmi pohpoh a si hmang ti ah kan cawng ding ih kan tahnak in theihpi leh nawn lo ding. Thuthang tha sim dingih kawhnak a dawngtu cun lei tlun zoh loin a kotu zoh ringring ih a tuan a sile hlawhtlinnak a ngah ding. Kawhnak dawng lemlo ih a tuan a sile a tuan rei deuhdeuh ding ih beidawnnak a ngah deuhdeuh ding a si. Kan fimnak leh thiamnak  ih ban lemlomi tuanvo kan tuan tikah kan phurh thei lo ding hngawngkawl ah kan barh aw tinak a si. Mi in ziangtin in ruat ti hi thusuhnak poimawh zet a si. Hmanseh zuamnak ruangah hlawhtlinnak cu a um thei ko. Mi pakhat in kan thatnak thu an sim a sile kan that lonak sim theitu midang an um ti hi kan hngilh lo ding hi a thupi zet, hminthat kan ngahnak hmun vek thotho ih hmun dang ah khal ngahve ding ih ruah awknak kan nei  asile thinnaunak lamzin ah ke kan kar thawk tinak a si. Kan khuaruah thiamnak men ih kan tuan dah lomi tuan kan tum a si khal le a cang tluh thei cuang lo fimthiamnak a um thotho a tul a si. Leitlun hruaitu langsar zetzet pawl kan zoh tikah an zirnak ruangah maw asilole an suahsem hlan ihsin hruaitu si dingah danglamnak an nei ti ah ruahnak a um thei zet.

Kan thlawhsuah dawnnak hmun leh ram, thinthi leh diriam zet ih kan tlanlen theinak hmun leh ram hi fiangte ih thei dingih zuam hi kan hna a si. Thinthi ih kan umnak hmun leh kan rim a hmuinak hmun ihsin tampi tuan dingah zuam sawn ding kan si. Kan tuahmi mi ah mi rinsan tlak dingah leh ei hawlnak tlak tiang ko ih kan thiam ding hi duh a um zet. Thiam dawk thiam lo dawk, hmin that duh tuah theimi le nei lo kan si ding hi a duh um lo zet. Mi khal in an tuah thei a si lo maw ti lawng men ih kan tumve asile capo tuahnak ah in hmang ding a si. Kan thiam lonak ah huaisen zet ih zir mai, thei lonak ah thei dingih zuam. Mi sim leh relnak ih kan rel duh a sile thei dingah tawllak nei lo ih suh mai hi a tha a si. Tlangcung sawkhlei par pawl cu kan lungleng tertu leh kan sim nin thei lomi pangpar a si ruangah  phairawn lam ah cingtumin kengthla nungla kan hlawhsam men ding. Ziangah tile a umnak ding a silo. Tlangpar  zilthli thiang lennak ah mahten ummen in par suah ringring sehla miphun kip thlir kuahko mi pangpar mawi a si ding. Pawlkom ih tangkai zet ih kan cangvaih theinak hmun le mi in rinsannak hmun hi kan thei a poimawh zet. Cuiruangah kan zapi ten kan rimhmuinak hmun thei fiangin thinthi leh diriam in rinsan tlak leh zum tlak kan si theinak dingah zuam sinsin uh si.

(Visited 58 times, 1 visits today)

Comments

comments

Comments

%d bloggers like this: