Ka Rak Sir Aw Dah

12, 2003 January| Rajasthan Tlangleng Zin

Ka Baibal tlawng kai lai cu thla khat veikhat inn ka tlung theu. Sumpai ka harsa deuh ruangah tlangleng ticket ka lak hman ah man olbikpawl sliper class ih Vai kutdawh le lothlopawl tonak room ah ka to theu.  Tuitum khal tlangleng ticket man olbikpawl ka la ih tonak co cuang loin ekinn kiang ah ka to. Tlangleng awn dupdo ngai phah in ziangtikah New Delhi kan umnak ka thleng ding ti ka ruat phah.  Acancan ah ka tonak zial a daih tuk ruangah blanket hlum sung ih, ih a nuamziapawl ka ruat. Kei hi ka daan a dang deuh ih tlangleng par le mawtaw par pawl ah hnangamten’ ka itthat thei dah lo. Mi’ inn ka riah tik khalah ka ihthat har. Mi inn ih dailen le rawl-ei khal ka nuam ti zawng a si lo.

Ka kiangkap ih kutdawh Vaipawl le lothlo vak sukzopawl ih umtudaan pawl ka zoh. Buri puan hnak ih tha deuh fangfang an sin ih thaw zetin an ithat hnurhno. Minung nunnak bolo tiah leitlun ih miharsapawl hrang khalah dam khawsuaknak lamzin a rak um ringring. Thilri malte ken ka hrilsawn ruangah puanpate pakhat le ka ruksaih vial ka keng. Ka lu a daih tuk ruangah puanten’ ka tuam. Ka taksa dang an daihzia cu vur parah it vek tluk ka si.

Zing khua a vang thlang. Ka ruat ih minit 15 sung cu ka mol ngah ding ka zum. Lamtluan ahcun khaat tawk khaat tawkah Kala pawl daileng ding tidai burte keng ih an feh sukso ka hmu phahphah. Ruahlopin ka kiang ih rual vah hnihte ih nauta sawn cu khurh pisik in a khur. A khur tuk. A rualpa ih puan a sin bet. A khur thotho. Culaifangah Pathian in thlacamsak ding ah in fial.

Pathian ih tirhfialnak aw cu ka hnen ah a thleng. “Thlacamsak awla a khawsik a dam ding” ti rorin ka thinlungah a khat. Ka camsak ngam deuh lo. “Tlangleng ticket hman leithei lo in kutdawh pawl lakah ka to, cumi ih thla vun camsak ding” tiah keimah le keimah ngainepawknak a suak. ‘Ka thlacamsak rak duhlo pang sehla ka ningzak tuk ding si khawh. Ka camsak dingih a khurhnat a dam lo pang asi ahcun ziangtluk in ka mualpho ding’ tivekin ngamlonak ka thinlung ah a tum sawn.

Asinan, Pathian aw a si ti rinhlel ding um lo lawlaw in a tur rorin i tur. “Va feh aw, thla va camsak awla, a khawhsik ka ti dam ding” tiah thlarau aw cun in nawr zawk rero. Ka ngam cuanglo. Ka nawpaw rero ko. Asinan ka poksuak theilo. Tuini tiang himi thuhla ka ruah tikah sirawknak in ka khat. Rak camsak nungla cu a dam ding ih Pathian in tidamnak tiang in pe ta ding ka zum. Asinan cam suaklo in Pathian aw ka rak el dah.

(Visited 36 times, 1 visits today)

Comments

comments

Comments

%d bloggers like this: